GITA
Makasabidong a pluido nga iparuar ti sumagmamano nga uleg ken dadduma pay a parsua. (Nu 21:4-9; De 8:15; Ara 28:3-6) Ti maysa a Hebreo a sao maipaay iti gita dagiti reptilia ket che·mahʹ (De 32:24), a nausar met a mangipasimudaag iti “pungtot,” “rungsot,” ken iti umasping kadagita. (De 29:28; Eze 19:12) Nagtaud dayta iti sao a kaipapananna ti “pumudot” (De 19:6) ket mabalin nga iparipiripna ti panagebbal wenno nasaniit a rikna a nainaig iti kagat ti maysa a nagita nga uleg. Ti sabali pay a Hebreo a sao (roʼsh, wenno rohsh) ket nayaplikar iti “sabidong” wenno “gita” dagiti kobra, “nasabidongan” a danum, ken “makasabidong a mula.”—De 32:32, 33; Job 20:16; Jer 8:14; 9:15; 23:15; Un 3:19; kitaenyo ti KARASAEN, NAGSARA A; KOBRA; MAKASABIDONG A MULA.
Nupay dagiti sabidong ti sumagmamano nga animal mabalin a kasla agpaay laeng a pangsalaknib wenno pangpapatay, makapainteres daytoy a sasao ni H. Munro Fox: “Iti sumagmamano a kaso ammotayo a dagiti sabidong adda ak-akmenda iti panagandar ti bagi ti animal a mangpatpataud kadagita. Iti adu a kasasaad mabalin a daytoy ti pudpudno a makagapu iti kaadda dagiti gita, nga adayo a naiduma iti aniaman a mangsalaknib a pategda. Kas pagarigan, ti makasabidong a katay dagiti uleg adda akemna iti pannakarunaw ti taraon ti uleg.”—Marvels & Mysteries of Our Animal World, ti The Reader’s Digest Association, 1964, p. 259.
Piguratibo nga Usar. Ti naulbod, manangpardaya a sasao ti nadangkes, a makadadael unay iti reputasion ti biktima, ket nayarig iti makapapatay a gita ti serpiente. (Sal 58:3, 4) Naikuna maipapan kadagiti manangpardaya, “Ti gita ti nagsara a karasaen adda iti baba dagiti bibigda” (wenno, “iti likudan dagiti bibigda”), no kasano a ti glandula ti gita ti karasaen adda iti likudan ti bibig ken dagiti sangi ti makinngato a pangana. (Sal 140:3; Ro 3:13) Ti dila ti tao, a di umiso a maar-aramat iti panangpardaya, panangpadpadakes, ulbod a panangisuro, wenno iti umasping a makadangran a sasao, ket ‘napno iti makapapatay a sabidong.’—San 3:8.