BUITRE

[Heb., ra·chamʹ; ra·chaʹmah], Nangisit a Buitre [Heb., ʽoz·ni·yahʹ].

Dakkel a tumatayab a managkaan iti agruprupsa a lasag a mangipaay iti napateg unay a serbisio kadagiti daga a nabara ti klimana, nga ibusenna dagiti bangkay ken malunglungtot a lasag a pakaigapuan koma ti sakit. Nailanad daytoy a tumatayab a karaman kadagidiay naideklara a ‘narugit’ iti Mosaiko a Linteg.​—Le 11:13, 18; De 14:12, 17.

Iti Arabiko, pagsasao nga umar-arngi iti Hebreo, ti maysa a sao nga umasping iti ra·chamʹ tukoyenna ti buitre ti Egipto (Neophron percnopterus), a masansan a maaw-awagan manok ni Faraon. Puraw daytoy a tumatayab malaksid kadagiti nangisit a payakna ken duyaw a sippit ken saksakana. Dayta ti kabassitan kadagiti buitre a masarakan iti dagdaga ti Biblia, yantangay agarup 65 cm (26 pul.) ti kaatiddogna. Gapu iti ludingas a nagkuretret a rupana, dadakkel a matana, kimmaw-it a sippitna, ken nagbakkuko a kukkukona, kasla makapasugkar ti langana. Gapu ta pagay-ayatna ti mangan iti basura a karurod uray pay ti dadduma a buitre, naibilang kas kabangsitan a mananglamut iti Makintengnga a Daya ket, gapu met laeng iti dayta, ad-adda a makatulong unay gapu iti serbisio nga ar-aramidenna.

Ti griffon a buitre (Gyps fulvus) ket dumuyaw a kayumanggi a tumatayab nga agrukod iti agarup 1.2 m (4 pie) a kaatiddog, a ti pakaukradan ti payakna agarup 2.7 m (9 pie). Ti griffon a buitre isu idi ti simbolo ti diosa iti Egipto a ni Nekhebet ken nagparang met kadagiti bandera ti pannakibakal dagiti Egipcio, Asirio, ken Persiano.

Ti lammergeier, wenno barbasan a buitre (Gypaetus barbatus), ket dakkel a tumatayab nga agsippayot, nga agtakder iti agarup 1.2 m (4 pie) a katayag. Babaen kadagiti atiddog a timmirad a payakna nga agukrad iti agarup 3 m (10 pie), ti lammergeier agtayab buyogen ti di gagangay a kinalanay, ket silalaka nga agrikusrikus bayat ti panangsawarna iti daga iti baba maipaay iti taraon. Saan a kas iti dadduma a buitre, ti lammergeier addaan kadagiti dutdot iti ulona ken barbas nga umarngi iti barbas ti kalding. Kaykayatna dagiti tulang nga addaan pata, nga itayabna dagitoy kadagiti nangato unay ket kalpasanna itinnagna ida kadagiti bato tapno mabusakda, a mangted gundaway iti tumatayab a madutdotna ti pata iti uneg.

Ti Hebreo a sao nga ʽoz·ni·yahʹ nabatad a tumukoy iti nangisit a buitre (Aegypius monachus), ti kadakkelan a tumatayab nga agsippayot nga agparang idiay Israel. Ad-adda a kayumanggi imbes a nangisit, kasla buitre ti langana a kalbo ti ulona; asul ti tengngedna, sinan-pasat ti ipusna.