ZERA

[mabalin a napaababa a porma ti Zerahias].

1. Maysa a shik ti Edom. Ni Zera ket anak ni Reuel ken apoko da Esau ken Basemat, ti anak a babai ni Ismael. (Ge 36:3, 4, 13, 17; 1Cr 1:37) Mabalin nga isu met laeng ti Num. 2.

2. Ama ni Jobab a maikadua nga ari ti Edom; taga Bozra. (Ge 36:33; 1Cr 1:44) Mabalin nga isu met laeng ti Num. 1.

3. Anak a lalaki da Juda ken Tamar; kasingin ni Perez. (Ge 38:27-30; Mt 1:3) Maysa ni Zera kadagidiay kimmadua ken “Jacob iti Egipto.” (Ge 46:12, 26) Ti lima nga annakna (1Cr 2:4, 6) ket nagbalin a pampamilia iti tribu ni Juda (Nu 26:20), ket idi agangay nagtaud iti dayta dagiti indibidual a kas ken Acan (Jos 7:1, 17, 18, 24; 22:20), ti dua kadagiti panguluen ti buyot ni David (1Cr 27:11, 13), ken ti sumagmamano a nagnaed iti Jerusalem kalpasan ti pannakaidestiero (1Cr 9:3, 6; Ne 11:22, 24).

4. Anak a lalaki ni Simeon ken nagtaudan ti maysa a pamilia iti dayta a tribu. (1Cr 4:24; Nu 26:12, 13) Naawagan Zohar iti Genesis 46:10 ken Exodo 6:15.

5. Maysa a kaputotan ni Gerson (Gersom) nga anak ni Levi. (1Cr 6:16, 20, 21; idiligyo ti Ge 46:11.) Mabalin nga isu met laeng ti matuktukoy iti 1 Cronicas 6:41.

6. Maysa nga Etiope, wenno Cusita, a nangidaulo iti nakadakdakkel a buyot a buklen ti maysa a milion a lallaki ken 300 a karuahe a simrek iti Juda bayat ti panagturay ni Asa, idi 967 K.K.P. Naabak ni Zera, ket nakamat “agingga idiay Gerar” dagiti agtaltalaw a puersana ken napapatayda. (2Cr 14:1, 9-15) Awan ti nabileg a pammaneknek a ni Zera ket maysa nga Egipcio wenno Etiope nga agturay a pagaammo iti sekular a pakasaritaan.