“Ti Gubat Saanyo a Kukua, No di Ket Kukua ti Dios”
“Mamatikayo ken Jehova . . . iti kasta rumang-aykayto.”—2 CRONICAS 20:20.
1. Kadagiti ania a pamay-an nga iladladawan ni Josafat ti naitronon a Jesus?
MAYSA a naimbag nga ari ni Josafat iti Juda. “Isu saan a simmina iti . . . daydi a nalinteg kadagiti mata ni Jehova.” (2 Cronicas 20:32) Ti naganna kaipapananna “Ni Jehova ti Ukom.” Intan-okna ti nagan ni Jehova, a kumitkita kenkuana iti pannakaiwanwan iti dalan ti kinalinteg ken maipaay iti tulong iti panangukomna iti ili ti Dios. Sinigurona a dagitoy ti masursuruanda iti linteg ni Jehova. Personal a napan iti tengnga dagiti taga Judea tapno paregtaenna ida nga agsubli iti pudno a panagdaydayaw ken Jehova. Inorganisarna ti pagarian a maipaay iti teokratiko a panagdaydayaw. Iti amin daytoy, maiyanatup ti panangiladawanna ken Jesu-Kristo, nga Ari, a kaipatpatugawna pay laeng iti nailangitan a tronona idi 1914 ket itan ur-urnongennan ti ili ni Jehova a maipaay iti pannakailasat, bayat a dagiti nademonyuan a puersa ur-urnongenda met dagiti nasnasion iti dayta maudi a gubat ti Armagedon.—Mateo 25:31-34; Apocalipsis 16:13, 14, 16.
2. (a) Ania a dakkel a rigat ti timmaud para kadagiti Judeano? (b) Aniat’ umas-asping a kasasaad ti sangsanguen dagiti Saksi ni Jehova itatta? (c) Ania dagiti elemento ti lubong ni Satanas ti katupag ti Ammon, Moab ken Bantay Seir?
2 Kalpasan ti panangasikaso ni Josafat a maisubli ti nateokratikuan nga urnos idiay Juda, timmaud ti dakkel a rigat. Maysa a napigsa a kabusor, “ti umariwekwek,” ti naggapu manipud deppaar ti Ammon, Moab ken Bantay Seir, a mangbutbuteng iti ili ti Dios iti pannakaikisap. (2 Cronicas 20:1, 2, 22) Ti situasion ti umas-asping itatta. Dagiti Saksi ni Jehova, kas “saan a paset ti lubong,” ti gurguraen ti lubong ni Satanas ken masansan a maidaddadanes a sirurungsot babaen kadagiti kabusor ti Dios. (Juan 15:19; 1 Juan 5:19) Ti panangdominar iti daga ti ili ni Jehova—ti Juda (kayatna a sawen, “Dayaw”)—ti isyu idi panawen ni Josafat. Ngem itan, kas pannakaipadronna iti kadaanan nga Ammon ken Moab, dagiti napolitikaan a pannakabalin ken ti dakkel a negosio itatta (agraman dagiti managaramid kadagiti ig-igam iti “aldaw ti panungpalan”) ti agsinsinnalisalda a maipaay iti panangdominar iti lubong. Iti panangararamidda iti dayta, rarautenda met ti sakop a nainkalintegan a kukua, nanipud pay 1914, ti Mesianiko a Pagarian ti Dios. (Apocalipsis 11:15, 18) Ti kadaanan a Bantay Seir ti inturayan ti apostata nga Edom, dagiti putot ni Esau a kasingin ni Jacob. Ngarud, maiyanatup, a dagiti taga Bantay Seir iladladawanda dagiti natangsit nga apostata iti Kakristianuan itatta.—Genesis 32:3.
3. Kasano a ti panagtignay ni Josafat ken dagiti Judeano kapada dagiti matalek a Saksi itatta?
3 Itan ta agpegpeggaddan kadagidiay rumaraut a buybuyot, aniat’ maaramidanen ni Ari Josafat? Bueno, ania kadi ti kanayon nga ar-aramiden dagiti nasungdo nga ad-adipen ni Jehova no naipasangoda kadagiti bigla a pagkasapulan, pannakaidadanes wenno panagpeggad ti biag? Ket ni Josafat “impamaysana ti bagina nga agsapul ken Jehova.” Ket manipud amin dagiti siudad ti Juda ti ili “naguornongda a sangsangkatipon nga agsapul iti badang ni Jehova” idiay balayna iti pudno a panagdayaw.—2 Cronicas 20:3-5.
4. (a) Ania dagiti kasasaad ti mabalin a namnamaen ti ili ni Jehova? (b) Sadino ti kitaan ti rumangrang-ay a “dakkel a bunggoy” iti pannakaisalakan?
4 Anian a nagsayaat nga ulidan para iti ili ti Dios itatta! Daytoy a panawen ti kinaranggas ti agturturongen iti kangitingitanna inton Har-Magedon. Dagiti kasasaad iti lubong ni Satanas ti saanton nga agbalin a basbassit ti kinaranggasna. (2 Timoteo 3:1, 13) Masansan a ti mismo biag ti ili ni Jehova ti agpegpeggadda. Sadino ti pakasarakantay ti pannalaknib? Daytat’ masarakan iti panagkaykaysa iti panagdaydayawtayo. Kadagiti Kingdom Hall tayo ken dadduma pay a sentro ti panagadaltayo ti Biblia, agtataripnongtayo tapno gumun-od ti makapapigsa a naespirituan a taraon ken tapno maorganisar ti serbisio publikotayo a pagdaydayaw ken Jehova. Siraragsak ta, “maysa nga umariwekwek” ti agtultuloy a rumrumuar, manipud amin a nasnasion, tapno tumiponda iti ili ti Dios iti “sagrado a serbisioda.” Dagitoy a kabbaro ti agay-ayusda nga agturong iti ‘bantay ti balay a pagdaydayawan ken Jehova.’ Kaipapanan met dayta ti pannakaisalakanda.—Apocalipsis 7:9, 15; Isaias 2:3.
5. Aniat’ isingsingasing ti “baro a paraangan” ni Josafat maipapan iti organisasion ni Jehova itatta?
5 Innala ni Josafat ti takderna “idiay balay ni Jehova iti sango ti baro a paraangan.” Nalawag a ti programa ti panagbangon ti ari idiay Juda inramanna ti panangpalawana iti lugar a pagdaydayawan idiay templo ti Jerusalem. Kasta met itatta, iti sidong ti panangiturong ti agturturayen nga Ari, a ni Jesu-Kristo, maysa a naindaklan a naespirituan a programa ti panagbangon ti agtultuloy, tapno iti dayta naindagaan a paraangan ti templo ni Jehova adda nawadwad a lugar nga agpaay kadagiti riniwriw pay a di papadi nga “umariwekwek.” Anian a nagsayaat ti maadda sadiay!—Salmo 27:1-5.
Panagturong ken Jehova
6. (a) Ania a bambanag ti sinaklaw ti kararag ni Josafat? (b) Kasano a birukentayo ti pammigsa bayat kadagiti panawen ti pannakasuot?
6 Idiay balay ni Jehova, imbuksilan ni Josafat ti intero a banag iti imatang ni Jehova babaen iti kararag. Binigbigna ti Kinaari ni Jehova, ti pannakabalin ken bilegna, ket rinepasona dagiti ar-aramid ni Jehova a maipaay iti ilina. Dinakawatna ti napasnek a kararag ni Salomon idi maidedikar ti templo ken sipapakumbaba a sinerraanna dayta babaen ti panagkunana: “Dikami met ammo no ania ti aramidenmi, no di ket dagiti matami addada a situturong kenka.” (2 Cronicas 20:5-12; 6:12-14, 34, 35) Napadpadasanyon aya iti naadda iti kasta a kasasaad—a kasla awanen ti mabalinyo a pagturongan? Kadagiti panawen apostoliko ni Pablo ti masansan adda iti kasta a pakarigatan. Isut’ agpannuray unay ken Jehova. Ngem masansan a maikunana, “Ta inton nakapuyak, isu ti kapigsak.” Ta inton mariknana nga interamente nga awan kabaelanna, ti naan-anay a panagpannurayna ken Jehova ti nagbalin a gubuayan ti di maparmek a pigsana. Uray dakayo met, pumigsakayo!—2 Corinto 12:10; Proverbio 18:10.
7. Ania a bilin ni Moises ti sursuroten dagidiay Judeano?
7 Arapaapenyo, no kabaelanyo, ti buya idiay napalawa a paset ti templo idiay Jerusalem: “Ket amin a Juda nagtakder iti sanguanan ni Jehova, agraman kadagiti babassitda, dagiti assawada, ken dagiti annakda.” (2 Cronicas 20:13) Awan duadua nalagipda ti nabatad a bilin ni Moises iti panggep ti kasta a panagtataripnong, kas nailanad idiay Deuteronomio 31:12. Adda laeng lugar a pagtakderan iti dayta naglawaan a panaggigimong dagidiay a pamilia nga agur-uray a siraraem ken Jehova, nga alertoda ken sisasaganada a mangaramid ti ibilinna.
Ti Kalasugan ni Jehova
8. Itudoyo ti kalasugan ti komunikasion ni Jehova (a) idi panawen ni Josafat (b) iti panawentayo.
8 Kasano a sungbatan ni Soberano nga Apo Jehova ti kararag ni Josafat? Nangted ni Jehova ti kalasugan ti komunikasion. Daytoy ket iti kinatao ni Jahaziel, iti tribo ni Levi. Nupay saan a maysa a padi ni Jahaziel, isut’ pinili ni Jehova a mangiwaragawag iti maysa kadagiti makatignay a mensahe ti pammaregta iti intero a Kasuratan. Ti importante a banag a ta “immapay ti espiritu ni Jehova kenkuana iti tengnga ti gimong.” (2 Cronicas 20:14) Nangted met aya ni Jehova ti umas-asping a kalasugan iti tengnga ti ilina itatta? Sigurado a nangted! Dinakawat daytoy ni Jesus iti padtona iti “panungpalan ti sistema dagiti bambanag” idi tinukoyna ti klase napulotan a “matalek ken naannad nga adipen,” nga isut’ nangitalkan ti Apo kadagiti “gamengna” ditoy daga.—Mateo 24:3, 45-47.
9. (a) Kasano a maiyanatup unay ti nagan ni Jahaziel? (b) Aniat’ mensahe ni Jehova idi, ket kasano a paregtaennatayo daytoy itatta?
9 Ti nagan ni Jahaziel kayatna a sawen “Makitkita ti Dios.” Pudno a makita ti Dios amin a nairaman iti dayta a rigat. Mabalinna a makita nga umun-una ti kurso nga alaen ti ili ti Dios. Makitana met ti maudi a pagtungpalanna. Gapuna, ania a mensahe ti impaawat ni Jehova babaen ken Jahaziel? Denggenyo! Isu daytoy: “Denggenyo, amin a Juda, ken dakayo nga agnaed iti Jerusalem ken sika Ari Josafat! Kastoy ti kuna ni Jehova kadakayo, ‘Dikayo agbuteng ken dikayo met agkullayaw gapu itoy umariwekwek; ta ti gubat saanyo a kukua, no di ket kukua ti Dios.’” (2 Cronicas 20:15) Anian ngata ti panagragsak dayta sangsangkamaysa a bunggoy! Ken anian ti panagragsaktayo met itatta a makaammo, a nupay kasanot’ panangraut ni Satanas ken dagiti buybuyotna kadatayo—uray pay kasanot’ pannakasuot ti pammati ken ti kinatarnawtayo—datayo, kas nagkaykaysa nga ili, maisaadtayo ti naan-anay a panagtalek ken Jehova, sitatalek nga isut’ makidangadang a maipaay kadatayo!—Exodo 15:2, 3; Salmo 24:8; 37:3-7; Zacarias 14:3.
Kasapulan Nagkaykaysa a Panagtignay!
10. (a) Naipasango iti ania a suot ti kinatarnaw dagidiay a Judeano? (b) Ania nga aramid ti mangiturong iti ‘datdatlag nga aramid’ ni Jehova?
10 Nupay kasta, dagidiay a taga Judea ti saanda koma nga agpalpallailang, nga agur-uray lattan ti aniaman a panangispal nga iyeg ni Jehova. Rebbeng nga agbalinda a tattao a managtignay! Masapul nga idemostrada ti panagtulnogda ken Jehova ken ti panagaramidda kadagiti bambanag sigun iti pamay-anna tapno makalasatda. Awan duadua nga adu ti mangipagarup kadakuada a dagiti bilbilin a naggapu ken Jehova ti medio karkarnada. Dagitoy ti nangsuot ti kinatarnawda. Iti isu met laeng a pamay-an, sakbay nga aramiden ni Jehova ‘ti aramidna a datdatlag,’ iti panangdadaelna iti Kakristianuan inton pangrugian ti “dakkel a rigat,” kalikagumanna a dagiti saksina ti makiramanda a sangsangkamaysa iti maysa nga aramid a kasla karkarna wenno datdatlag kadagiti adu. Maysa a sagrado a serbisioda ti ipapan iti pagtaengan dagiti tattao, a maulit-ulit, tapno pakdaaran ida iti dayta um-umayen a pannakadadael.—Isaias 28:21; Mateo 24:14, 21.
11, 12. (a) Ania a naisangsangayan a bilin ti inted ni Jahaziel, ngem kasanot’ panagtignay dagiti Judeano? (b) Kasanotay met a makaipakita ti panagtalek ken Jehova?
11 Inladawan daytoy dagiti bilbilin nga inted ni Jahaziel kadagiti umili ti Juda. Maipapan kadagiti kabkabusor, kunana: “Inton bigat sumalogkayo a maibusor kadakuada. . . . Saanyonto a masapul ti gumubat itoy a bakal. Agurnongkayo, agtakderkayo a sitatalna, ket kitaenyo ti panangisalakan ni Jehova kadakayo. O Juda ken Jerusalem, dikayo met agbuteng wenno agkullayaw. Inton bigat inkayo bumusor kadakuada, ta ni Jehova kumuyog kadakayo.” (2 Cronicas 20:16, 17) Dayta awan ig-igamda a buybuyot dagiti lallaki, babbai ken ub-ubbing ti nabilin a rummuar a bumusor iti napagtitipon a buybuyot dagiti kabusor!—Idiligyo iti Salmo 148:12, 13.
12 Nauneg ti panangapresiar ni Josafat ken dagiti taga Judea ti panangiwanwan nga ipapaay ni Jehova baeten ken ni Jahaziel. “Ket ni Josafat inkul-obna ti ulona a ti rupana agingga iti daga, ket amin a Judea ken dagiti agnaed ti Jerusalem nagpaklebda iti saklang ni Jehova a sikakararag ken Jehova.” (2 Cronicas 20:18) Ti Dakdakkel a Josafat, a ni Jesu-Kristo, ti nangipakita met ti kasta a panagpasakop a panagpannuray ken Jehova bayat ti kaaddana ditoy daga, ket makasigurotayo nga isut’ kumita ken Jehova a maipaay kadagiti bilbilin iti pannakibakal inton ‘ni Jehova iti makannawanna danarennanto dagiti ar-ari iti aldaw ti pungtotna.’ (Salmo 110:5, 6) Umas-asping iti dayta, dagiti Saksi ni Jehova itatta ti maragsakan a “sikakararag” met iti Dios a pagtaltalkanda, bayat nga agserserbida kadagiti paraanganna.—Salmo 84:10-12; 122:1-4.
13. Asinoda itatta ti agdaydayaw ken Jehova “iti natbag unay a timek,” a nangibunga iti ania?
13 Sigun iti 2 Cronicas 20:19, dagiti managkanta idiay templo “nagtakderda nga agdayaw ken Jehova a Dios ti Israel iti natbag unay a timek.” Ket asino ita, iti sidong ti panangiwanwan ti napulotan a natda, ti mangus-usar “iti natbag unay a timek” a pangdaydayaw ken Jehova iti saklang dagiti kabkabusorna? Nalawag nga iti sanguanan ti ili ni Jehova isut’ kanayon nga umad-adu a bilang dagiti payunir a ministro. Dagiti auxiliary ken regular payunir, espesial payunir ken dagiti misionero—dagidiay mangidadaulo iti panagdaydayaw ken Jehova idiay tay-ak—tinagiragsakda ti 19-porsiento nga irarang-ay bayat ti 1983. Ti ‘panagkankantada’ ti nakaipaay iti naisangsangayan unay a tulong iti nakaskasdaaw a dagup ti 436,720,991 nga oras—a maysa a 13.5-porsiento nga irarang-ay—a naipaay iti Nakristianuan a ministerio idi napan a tawen ti 1983.
14. Iti panangsurot iti ulidan dagiti Judeano, kasano nga adu itattan ti mangipakpakita ti pammati babaen iti ar-aramidda?
14 Saan idi a panawen ti panagdudungsa idiay Jerusalem. Situtulnog, dagiti umili “bimmangonda a nasapa iti bigat ket napanda idiay let-ang ti Tecoa.” (2 Cronicas 20:20) Itan ipakitada dagiti ar-aramidda iti pammati. (Idiligyo iti Santiago 2:14.) Kasta met itatta, dagiti ministro ti Dios ti masansan kasapulan a masapada iti trabahoda. Dagiti assawa a babbai a payunir ken dadduma pay ti masapul a bumangonda a nakasapsapa tapno maaywananda dagiti obrada iti balay tapno makaipaayda ti naan-anay nga agsapa iti serbisio ni Jehova. Addada tattao itatta iti lubong ni Satanas nga ‘agsasaibbek ken agsangsangit,’ ken masapul a matandaan a maipaay ti pannakaisalakan inton “dakkel a rigat.” Dagiti Saksi ni Jehova ti determinadoda a mangsapul kadakuada.—Idiligyo iti Ezequiel 9:4.
Umabante iti Pagbabakalan!
15. (a) Siasino ti pangikabilan dagiti Judeano ti pammatida? (b) Kasanotay met a “rumang-ay“ itatta?
15 Ti rekord idiay 2 Cronicas 20:20 ti mangituloy: “Ket idi napanda, ni Josafat nagtakder ket kinunana: ‘Denggendak, O Juda ken dakayo nga agnaed iti Jerusalem! Mamatikayo ken Jehova a Diosyo iti kasta mapatibkerkayto. Patienyo dagiti mammadtona, iti kasta rumang-aykayto.’” Umasping iti dayta, ti ulo ti kongregasion Kristiano, ti agturturayen nga Aritayo, ti nangted iti ilina ti adu a pammaregta iti panagmatalek. Masarakantay dagita kadagiti kasuratan kas kadagiti sumaganad: Mateo 10:27, 28; 24:9-13; Juan 16:33. Ti pammati ken Jehova, pammati kadagidiay us-usarenna kas pannakangiwatna, wen, pammati iti organisasionna! Bayat a ‘rumrummuartayo’ itatta iti serbisio ni Jehova, anian a nasken ti intay panangipamatmat ti kasta a pammati! Isu daytoy ti sigurado a dalan iti panagballigi—a magun-odan koma amin a dedikado, nabautisaranen a Saksi nga addaan pammati ken Jehova ken kadagiti urnosna. Ramanen dagitoy ti nakaskasdaaw a saganana iti biag nga agnanayon, a posible laeng babaen iti daton ti Anakna.—Juan 3:16; 17:3.
16. (a) Asino a “kumakanta” ti masansan mangidadaulo iti serbisio? (b) Kasano nga amin mangidaydayaw ken Jehova “iti nasantuan nga urnos”?
16 Mainayon pay, ni Josafat “nakiuman kadagiti tattao ket tinudinganna dagidiay a mangkanta koma ken Jehova ken mangted ti panagdayaw iti nasantuan nga urnos, idi mapanda iti sango ti buyot ket kunaenda: ‘Agyamankayo ken Jehova, ta ti kinamanangaasina agpaut iti panawen a di nakedngan.’” (2 Cronicas 20:21) Ditoy indauloan dagiti managkanta idiay templo ti ipapan idiay pagbabakalan. Kasta met itatta, babaen ti panangiwanwan ti napulotan a natda addada dagiti payunir ken misioneros, dagiti agdaldaliasat a manangaywan ken ti assawada, kasta met kadagiti agserserbi kadagiti pagtaengan a Bethel, agraman dagiti panglakayen ken ministerial nga ad-adipen iti kongregasion, a masansan isudat’ adda iti sanguanan a mangar-aramid iti sagrado a serbisio, a parparegtaen amin dagidiay adda iti kongregasion nga agbalin nga aktibo. Amin dagitoy ti mangipapaay ti dayaw ken Jehova “iti nasantuan nga urnos,” nga agmartmartsada iti nateokratikuan nga urnos. Ti naespirituan a kawesda ramanenna met ‘ti baro a Nakristianuan a personalidad, a mangipakpakita ti pudpudno a kinalinteg ken kinasungdo.’ (Efeso 4:24; Galacia 5:22, 23) Anian a nagdakkelan a pribilehio ti pannakaipaset itatta iti daytoy sangalubongan a trabaho, a mangitantan-ok iti nagan ken kinamanangaasi ni Jehova!—Salmo 144:1, 2; 136:1-26.
17. (a) Apay a ti ili ti Dios ‘saanda a masapul ti gumubat iti bakal’? (b) Ania a “pakinakem” ni Jehova ti kaipapananna ti pannakadadael iti ulbod a relihion?
17 Imbaga ni Jehova iti ilina: “Saanyonto a masapul ti gumubat itoy a bakal.” Ket kasta nga agpayso. “Ket idi nangrugida nga agkanta ken agdayaw,” ni Jehova insaadna dagiti agsaneb a maibusor kadagiti manangraut a buybuyot, ket “dagiti annak ti Ammon ken Moab nagtakderda a maibusor kadagiti agnaed idiay Bantay Seir tapno papatayen ken dadaelenda ida nga ikisap.” (2 Cronicas 20:17, 22, 23) Anian a naglawag ti panangiyilustrar daytoy ti mapasamakto iti lubong ni Satanas! Kas ipamatmat ti Apocalipsis 17:16, 17, ti addaan ti “pakinakemna” maipapan iti Babilonia a Dakkel, ti Kakristianuan nga isut’ managbasol unay a paset dayta. Tignayennanto dagiti militarisado a miembro a nasnasion ti UN a maaddaan itoy a “pakinakem,” babaen ti panangbueltadanto iti ulbod a relihion, tapno rumeken ken dadaelenda. Ti naindaklan nga apostata a sistema ti Kakristianuan, kas kadagidiay Edomita manipud Bantay Seir, ti marumekrumekdanto!
18. Kasanonto a maikisap ti moderno nga Ammon ken Moab inton Har-Magedon?
18 Nupay kasta, saan laeng a dayta! Adda pay met laeng dita ti moderno-aldaw nga Ammon ken Moab! (Idiligyo iti Apocalipsis 18:9, 10, 15-17.) Desididoda pay met laeng a mangdadael kadagiti managdaydayaw ken Jehova, dagiti Judeano itatta. Ngem panawen metten a panangibanag ni Jehova ti panangdusana. Kas panangiladawan iti dayta ti Apocalipsis 19:11-16, ti Ari, a ni Jesu-Kristo, mapanton a ‘payatenna ti pagpespesan ti kinaunget ti pungtot ti Dios a Mannakabalin-amin,’ a dadaelenna dagiti natda pay a paset ti sangalubongan a sistema ni Satanas. Inton kangitingitan dayta naindaklan a gubat, dagiti agmauyongen a natda dagiti napolitikaan a nasnasion ken dagiti militarisado a buybuyotda ti awan duadua agkikinnabildanto iti maysa ken maysa kadagiti ig-igamda ti panangikisap. Kasta idi ti napasamak iti Ammon ken Moab, idi “tunggal maysa nakitinnulong a mangdadael iti sabali.” Ngem dinto ipalubos ni Jehova ti panangusarda kadagiti nuklear nga ar-aruatenda a mairamanda a dadaelen ti ili ti Dios wenno ti aramidna, nga isu ti dagatayo.—Apocalipsis 11:18; Isaias 45:12, 18; Salmo 115:16.
19. (a) Kasanonto met ti panagrikna dagiti moderno a Judeano inton wanawananda ti pagbabakalan? (b) Aniat’ iladladawan ti ‘panaguurnongto idiay Lobong ti Beraca’?
19 “Ket idi ti Juda simmangpet iti torre a pagwanawanan idiay let-ang. Idi kinitada ti umariwekwek, ket adtoy, isuda bangbangkayda a napasag iti daga ket awan idi ti nakatalaw.” Inton dagiti moderno-aldaw a “Judeano,” agraman dagiti kaduada a managdaydayaw, wanawananda dagiti resulta ti gubat ti Har-Magedon, idaydayawdanto ni Jehova iti dayta naindaklan a panagbiktoria. Didanton kasapulan ti agala kadagiti literal a samsam, no di ket pagragsakandanto ti panagtataripnongda idiay simboliko a “Lobong ti Beraca”—a ti Beraca kayatna a sawen “Panangbendision.” Siraragsak, dagiti saan a papadi a “dakkel a bunggoy” sumrekdanto iti nadalusanen a daga, iti sidong ti panagturay ti Pagarian, a gumagarda iti mapasungadan a pribilehioda—a pagbalinento a maysa a minuyongan a paraiso ti daga. Iti sangaribo a tawen ti naarian a sakop ti Naindaklan a Josafat, a ni Jesu-Kristo, ti awanto ti pakariribukanna, ket ni Jehova a Diosna, ti agtultuloyto a mangted ti talna iti aglikmut.—2 Cronicas 20:24-30.
Panangrepaso iti 2 Cronicas 20
◻ Asino itatta dagiti katupag ti buybuyot ti Ammon, Moab ken Bantay Seir?
◻ Asinoda ti inladawan ni Josafat, Jahaziel ken dagiti Judeano?
◻ Kasano a nakaaramid dagiti moderno-aldaw a Judeano ti nagsayaat nga isusungbat?
◻ Aniat’ mangted panagtalek kadatayo iti ibunganto ti “dakkel a rigat“?
[Dagiti ladawan iti panid 16, 17]
Kas ken Josafat, tultulongan itan ti naitronon nga Jesus ti ili ti Dios a “rumang-ay” iti panagdaydayaw ken Jehova