Inkeddeng Kadin ti Dios ti Gasatyo?

ADU a tattao ti makumbinsir nga immuna nga inkeddengen ti Dios ti gasat ti maysa a tao. Ket mariknada a pudno a paneknekan daytoy ti Biblia.

Kas pangarigan, dadduma ti mangitudo iti kaso ni Esau ken ni Jacob. Addada pay laeng iti aanakan idi impadto ti Dios: “Ti inauna agserbinto iti inaudi.” (Genesis 25:23) Kasta met, ammo nga immunan ti Dios a ni Samson, Jeremias ken ni Juan a Mammautisar mangaramiddanto kadagiti nakaal-alinggek nga ar-aramid iti serbisiona. (Oc-ocom 13:3-5; Jeremias 1:5; Lucas 1:13-17) Daytoy kadi dina kaipapanan a dagiti kakasta nga indibidual immunan a naikeddeng ti pagtungpalanda nga agnanayon a pannakaisalakan?

Kasta met, ni ngay Judas Iscariote? Mabayag pay sakbay ti pannakaipasngayna, dagiti padpadto iti Kasuratan sinaritanan ti pannakaliput ti Mesias. (Salmo 41:9; 55:12, 13) Kuna pay ti Biblia a “nanipud pangrugian” ammo ni Jesu-Kristo no siasino ti mangliputto kenkuana.​—Juan 6:64.

Iti lawag dagiti immunan a naibaga a punto, ania ti makunayo? Isuro kadi ti Biblia a ti Dios immunan nga inkeddengna ti dadduma iti agnanayon a pannakaisalakan ken dagiti dadduma iti pannakakondenar? Inkeddeng kadin ti Dios ti gasatyo?

Naikeddeng a Pagtungpalan​—Ti Kaipapananna

Sakbay ti panangsungbattayo kadagitoy a salsaludsod, usigenyo ti kaipapanan ti naikeddeng a pagtungpalan. No pudno daytoy a doktrina, dayta mabalin a kaipapananna nga immunan nga ammo ti Dios dagiti amin a pagbanagan iti panangparsuana iti tao​—ti isisiasi ni Adan ken ni Eva, dagiti gubgubat, krimen, imoralidad, dagiti panangilupitlupit, ti panagulbod, ti kinamanaginsisingpet, ti sakit. Babaen ti panangisaona iti sasao nga, “Aramidenta ti tao,” ginagara ngarud ti Dios nga inrugi amin daytoy a kinadakes! (Genesis 1:26) Ti panangikabil ti Dios iti namnama a biag nga agnanayon iti sango da Adan ken Eva, ngarud, ket maysa a panangallilaw. Kasta met ti awis ti Biblia a, “Ket ti mayat awatenna ti danum ti biag nga awan baybayadna.”​—Apocalipsis 22:17.

Ngem kunaen ti Biblia a ni Jehova a Dios “aglaplapusanan iti kinaimbag a siaayat ken kinapudno.” (Exodo 34:6) Pulos a saan a mangitukon iti maysa a banag nga ammona nga imposible a magun-odan ti maysa a tao. Nagimtuod ni Jesu-Kristo: “Asino a tao nga adda kadakayo a no ti anakna dumawatto koma ti tinapay​—isu ikkannanto ti maysa a bato? . . . Ngarud, no dakayo, idinto a dakeskayo, ammoyo ti mangted kadagiti nasayaat a sagsagut kadagiti annakyo, saan aya a nangnangruna pay ni Amayo nga adda sadi langit a mangtedto kadagiti nasayaat a bambanag kadagiti agdawat kenkuana?” (Mateo 7:9-11) Kasta met, no nabayagen nga inkeddeng ti Dios no siasinoda dagiti makagun-od iti agnanayon a pannakaisalakan ken no siasinoda dagiti madadael iti agnanayon, apay a kunaen ti Biblia a ni “Jehova . . . agur-uray a siaanus gapu kadatayo ta dina kayat a mapukaw ti uray siasino no di ket agturongda koma amin iti panagbabawi”?​—2 Pedro 3:9.

Ti immunan a naikeddeng a pagtungpalan, ngarud, ti maisupadi a naimbag iti isursuro ti Biblia maipapan iti Dios. ‘Ngem saan kadi a ti pananglimitar iti pannakaammo ti Dios maipapan iti masanguanan pakapuyenna ti kinamannakabalin-aminna?’ mabalin nga imtuodenyo. Saan a pulos. Idiay Tito 1:2, kas pangarigan, maammuantayo a ti “Dios . . . dina mabalin ti agulbod.” Ngem daytoy kadi pakapuyenna ti kinamannakabalin-amin ti Dios? Saan, imbes ketdi, daytoy ipaganetgetna ti kinapudno ti Dios.

Binalakadan ni apostol Pablo dagiti Kristiano nga addaan iti sagut iti panagipadto: “Ket dagiti espiritu dagiti mammadto paiturayanda kadagiti mammadto. Ta ti Dios saan a Dios ti riri, no di ti talna.” (1 Corinto 14:32, 33) Dagiti kakasta a mammadto dida agsao nga addaan iti panangidumduma no di ket iramanda dagiti pammadtoda iti naurnos a pamay-an. Tapno maaramid daytoy, kasapulan ti panagteppel. Ngarud, mabalin met nga usaren ti Dios ti pannakaammona nga umuna kadagiti paspasamak iti napili a pamay-an, nga usarenna laeng dayta no adda makagapu wenno panggep iti panangusarna iti dayta.​—Idiligyo iti Genesis 22:1, 12.

Immunan a Pannakaammo ti Dios

Iti 40 laeng a tawtawen kalpasan ti pannakaorganisar dagiti Israelitas kas maysa a nasion, impadton ti Dios a dadaelendanto ti tulagna kadakuada. Nupay kasta, daytoy nga immunan a pannakaammo saan nga awan ti nakaibatayanna, ta ti di panagpaituray ken ti iyaalsa iti nasion napasamak idin. Gapuna, kinuna ti Dios: “Ta ammok ti panunotda a buklenda ita nga aldaw a kasakbayan ti panangyegko kadakuada iti daga nga insapatak.” (Deuteronomio 31:20, 21) Kas iti maysa a mapagtalkan a managibangon ti mabalin a mangipadto iti pannakarba iti maysa a pasdek a naibangon iti nakapuy a materiales, kasta met ni Jehova makitana ti pagturturongan ti nasion. Dagiti indibidual, nupay kasta, ti mabalin ken pudno a nangipangag ket nagunggonaanda manipud iti balakad nga inted dagiti mammadto ti Dios.​—Jeremias 21:8, 9; Ezequiel 33:1-20.

Kasta met impadto ni Jesu-Kristo ti pannakadadael dagiti relihiuso a papangulo a maawagan eskriba ken Pariseo. (Mateo 23:15, 33) Nupay kasta, daytoy dina kaipapanan a tunggal Pariseo ken eskriba ti agturong iti Gehenna. Ni apostol Pablo a mismo ket dati a naregta a Pariseo!​—Aramid 26:4, 5.

Pudno, impadto ti Dios ti pagbanagan ti dadduma nga indibidual, kas kada Jacob ken ni Esau. Ngem daytoy saan a panangikeddeng iti pagtungpalan. Iti kaso da Esau ken ni Jacob, ti Dios basta ammona no siasino kadagiti nasional a grupo nga agtaud kadakuada ti mangiturayto iti maysa ken maysa. (Genesis 25:23-26) Nupay kasta, awan ti pakakitaan a ti Dios inkeddengna ti agnanayon a pagtungpalanda. Adu a pangkaaduan a kababalin ken rikrikna ti ubing ti agparang a mamolde wenno mabukel babaen kadagiti genetiko a bambanag. Mabalin nga inusigen ni Jehova ti genetiko a pannakabukel dagiti di pay naipasngay a da Esau ken ni Jacob iti panangikeddengna no siasino nga anak ti mangiturayto.​—Idiligyo iti Salmo 139:14-16.

Kasta met, inusar ni Jehova ti immunan a pannakaammona maipapan ken ni Samson, Jeremias ken ni Juan a Mammautisar. Daytoy nga immunan a pannakaammo, nupay kasta, dina ipanamnama a dagitoy ti agtalinaed a matalek agingga iti ipapatay. Impadto met ti Dios a maysa kadagiti annak ni David ti managananto iti Salomon a ni Salomon ti mausarto a mangibangon iti templo. (1 Cronicas 22:9, 10) Ni Salomon, nupay kasta, natnag iti apostasia kadagiti maudin a tawtawenna.​—1 Ar-ari 11:4, 9-13.

Ngem ni ngay Judas Iscariote? Saan kadi a ti panagtraidor ti maysa kadagiti ad-adalan ni Jesus ti nalawag a naipadto nga immun-una? Wen, ngem dagiti padpadto dina ibaga nga espesipiko no siasino nga adalan ti mangliput. Kinapudnona, no ngay no maammuan ni Jesus a ni Judas ti manangliput? Ngarud ti panangtuding ni Jesus ken ni Judas a kas maysa nga apostol ti nangaramid koma Kenkuana a “nakiraman” iti basbasol dayta a manangliput. (Idiligyo ti 1 Timoteo 5:22.) Ti Dios a mismo ti mabalin a kakumplot met, ta immuna pay a nangaramid ni Jesus iti napasnek a panagkararag ken Jehova iti panangpilina ken ni Judas.​—Lucas 6:12-16.

Nupay kasta, saan a ‘di ammo ni (Jehova) dagiti gakat ni Satanas.’ (Idiligyo ti 2 Corinto 2:11.) Ammona a ni Satanas a Diablo ti nangusaren idi iti nasinged a gayyem ti maysa a tao a kas manangliput, a kas ti inaramidnan iti kaso ti gayyem ni David a ni Ahitophel. Ngarud, ni Satanas, saan a ti Dios, ti “nangikabil iti puso ni Judas Iscariote, ti anak ni Simon, a manangliput” ken Jesu-Kristo. (Juan 13:2; 2 Samuel 15:31) Imbes ketdi a nagkedked iti impluensia ni Satanas, pinalubosan ni Judas ti basol a mangringbaw kenkuana. Ket iti dadduma a punto nabaelan ni Jesus a binasa ti puso ni Judas ken ipadto ti panangliputna. (Juan 13:10, 11) Gapuna ammo ni Jesus ti panangliput ni Judas “manipud iti pangrugian”​—saan nga iti pannakaammona ken Judas, no di ket manipud iti “pangrugian” iti panagtignay dayta a tinitraidor.​—Juan 6:64.

Immunan a Tinudingan ti Dios

Ti immunan a panangammo ti Dios ngarud ket, pulos a saan a gapu iti pagayatan laeng. Imbaga ni apostol Pablo kadagiti napulotan a Kristiano: “Idinto a natudingantay idi a kas ti panggep daydiay [ni Jehova a Dios] agar-aramid kadagiti isuamin a banag a kas mayalubog iti nakemna met laeng.” (Efeso 1:11) Nanipud iti pannakatnag ti tao iti basol, panggepen ti Dios nga itan-ok Ti naganna babaen ti Pagarianna. Maipaay iti dayta a panggep, no dadduma inusar ti Dios ti pannakabaelna a mangkita iti masanguanan. Kas pangarigan, intudingna nga addanto ti maysa a klase dagiti kakadua ni Jesu-Kristo nga agtawid iti Pagarian, nupay no dagiti indibidual masapul a paneknekanda ti kinamatalekda tapno agbalin a paset dayta.​—2 Pedro 1:10, 11.

Ti pannakaammo iti nalawag a sursuro ti Biblia maipapan iti daytoy a banag mabalin a makatulong kadakayo a maaddaan iti nasalun-at a panangmatmat iti masanguanan. Ti Dios dina ikeddeng nga umuna ti gasatyo. Imbes ketdi, mabalinyo ti mangusar iti wayawaya nga agpili iti pagayatanyo nga inted ni Jehova a Dios kadagiti parsuana isu a naaramid “a kaladladawanna.” (Genesis 1:27) Mabalinyo ti mangaramid iti nainsiriban a panagpili ket naimpusoan nga ipangag ti panangitukon ti Dios iti biag nga agnanayon.​—Juan 17:3.

[Ladawan iti panid 5]

No ammo ti Dios a ni Adan ken ni Eva didanto agballigi, ti panangikabil iti biag nga agnanayon iti sangoda ket maysa a naranggas a kinaulbod

[Ladawan iti panid 6]

Kaano a nabigbig ni Jesus a ni Judas ti mangliputto kenkuana?