Report dagiti Mangibunannag ti Pagarian
Panangisuot ti Baro a Personalidad
IBILBILIN ti Biblia: “Ikkatenyo ti daan a personalidad agraman dagiti ar-aramidna, ket ikawesyo ti baro a personalidad, isu a mapabpabaro iti pannakaammo nga umasping iti ladawan daydiay Namarsua kenkuana.” (Colosas 3:9, 10) Adu kadagiti Saksi ni Jehova itatta ti naminsan paset ti nasiutik a lubong ni Satanas. Idi naaddaanda ti umiso a pannakaammo kadagiti pagannurotan ti Dios a maipaay kadagiti Kristiano, nagbalbaliwda, kinawesanda dagiti bagbagida ti baro a personalidad. Dagiti sumaganad a kapadasan iyilustrarna no kasano a naaramid dagita a panagbalbaliw.
◻ Maysa a napeklan a mannanakaw iti España naaddaan kadagiti kleptomaniac a pagannayasan ti nangrugi a makipagadal ti Biblia a kadua dagiti Saksi ni Jehova. Ti balayna ti napunno kadagiti bambanag a tinaktakawna. Bayat nga agtultuloy iti umiso a pannakaammo kadagiti prinsipio iti Biblia, ti konsiensiana ti mangrugi a mangburibor kenkuana ket naikeddengna ti mangisubli kadagiti bambanag a tinaktakawna kadagiti makinkukua.
Inasitganna ti dati nga amona ket impudnona nga isut’ nangtakaw iti baro a makina a paglaba kenkuana. Daytoy a lalaki, a nakellaat kadagiti rason a maipaay ti nagbalbaliw a kababalinna, ti mangpalubos kenkuana a mangbayad iti gatad iti makina a paglaba, a daytat’ $292 (E.U.), ket kunana a saannanton nga ipakpakaammo iti polisia.
Sumaganad sinarungkaranna ti alkalde ti ili ket impudnona nga isut’ nangbuong kadagiti dua a nangingina a bombilia ti pagsilawan iti siudad, ket intukonna a bayadan ida. Idi makitana a daytoy a tao ket inkawesnan “ti baro a personalidad” gapu iti panagad-adalna ti Biblia, ti alkalde ti nangpakawan kenkuana ket saanna nga awaten ti aniaman a bayad.
Daytoy a lalaki ti nangsarungkar met kadagiti dadduma pay iti sangakaarrubaanda, nga insubsubli dagiti bambanag a tinakawna, ket aminda nagsiddaawda iti dakkel a panagbalbaliw ti kababalinna gaput’ panangiyaplikarna kadagiti prinsipio ti Biblia.
Ngem dagiti makinkua kadagiti adu a bambanag nga adda pay iti ikutna ti saanna nga ammo ida aminen. Gapuna kalpasan ti panagkararagna ken Jehova, napan idiay hedkuarters ti polisia ket sadiay inyawatna dagiti innem nga stereo radio cassette players, a tinaktakawna kadagiti nakaparada a kotse. Agsiddaaw ti polis ta isut’ addaan nadalus a rekord kadakuada. Isut’ pinagbayadda ti multa ken pinagserbida iti ababa a tiempo idiay pagbaludan.
Itan isut’ addaanen ti nadalus a konsiensia iti imatang ni Jehova. Maitunos iti Efeso 4:28, “Daydi nagtaktakaw saan koma nga agtakawen,” ket gaput’ panangapresiarna a dagiti mannanakaw “didanto tawiden ti pagarian ti Dios,” insardengnan ti agtaktakaw ket inkawesnan “ti baro a personalidad.”—1 Corinto 6:9, 10.
◻ Ti kinasingpet dagidiay addaan ti kas ken Kristo a personalidad ti masansan bigbigbigen dagiti taga ruar, kas iyilustrar iti kapadasan idiay Italia. Maysa a nagdakes nga aksidente ti kotse ti naimatangan ti maysa kadagiti Saksi ni Jehova. Isut’ immasideg iti maysa kadagiti kotse a nairaman tapno kitaen no aniat’ maitulongna, ket idi nakitana ti maysa a lalaki a nagdakes pannakadunorna ken agpadpadara, isut’ nagsao kenkuana a dinakamatna ti nagan ni Jehova. Intangad ti lalaki ti ulona ket sinaludsodna no isut’ maysa kadagiti Saksi ni Jehova, nga isut’ sinungbatanna met ti wen. Kunana: “Miss, madi ti rikriknak. Addaanak ti maysa a bag idiay kotse a naglaon ti minilmilion a kuarta [a lira]. Pangngaasim ta iyawidmo dayta idiay balayyo. Ammok a daytat’ adda kadagiti naimbag nga im-ima, Ta no saan agpukaw laeng daytoy a kuarta. Ket inton umimbagakon mabalinmonto nga isubli ti kuarta kaniak!” Ti Saksi ti nangala iti kuarta ket sana insubli kenkuana idi isut’ immimbagen. Isut’ siyayaman unay.
Ni Jehova bendisionanna dagidiay “ikkatenda ti daan a personalidad” ket “ikawesda ti baro a personalidad.”—Efeso 4:22-24.
“Daydi nagtaktakaw saan koma nga agtakawen, no di ket agtrabaho nga aramidenna ti naimbag, babaen ti imana, tapno adda pagitedna iti adda pakasapulanna.”—Efeso 4:28