Ti Sao ti Dios Nabiag
Ti Tao a Dinadael ti Agum
NI Naaman ti nagyaman gaput’ pannakapaimbag ti kukutelna. Impakitana ti panagyamanna babaen ti panangted ken Eliseo kadagiti sagsagut ti rinibo a kapisi ti balitok ken pirak, agraman ti sangapulo kasukat dagiti napipintas a pagan-anay. Ngem di inawat ni Eliseo dayta a sagut. Kinaagpaysuanna ni Jehova ti nangaramid iti namilagruan a panangagas, ket madi kayat ni Eliseo ti mangawat iti aniaman a pammadayaw iti panangawat iti maysa a sagut.
Ngem ni ngay Giezi nga adipen ni Eliseo? Siagum a minatmatanna dagidiay napipintas a pagan-anay ken amin dayta a kuarta. Aniat’ mapasamak no agtultuloy a tartarigagayan ni Giezi ti sumagmamano kadagitoy a bambanag? Ti di umiso a tarigagay ti nangiturong iti pannakaguyogoyna ken pannakaallukoyna gapuna isut’ nagaramid iti dakes.—Santiago 1:13-15.
Idi agangay nagpakada ni Naaman ken ti adipenna ket nagrubuatdan nga agturong idiay pagtaenganda sadiay Siria. Ngem di nagsardeng ni Giezi a mangpampanunot kadagidiay napipintas a pagan-anay ken amin dayta a kuarta. Kitaenyo sadiay! Ni Giezi ti agtartaray. Sadino ti papananna?
Ni Giezi kamkamatenna ni Naaman ket isut’ nakamakamna. Ni Naaman ti nangkablaaw ken Giezi, a kinunana: ‘Naimbag met laeng dagiti isuamin?’ ‘Wen,’ insungbat ni Giezi. ‘Ngem imbaonnak ni Eliseo a mangibaga kenka a simmangpet dagiti dua a bisitana. Ket kayat ni Eliseo nga isu komat’ ikkam ti dua a kasukat dagiti pagan-anay ken sumagmamano a talento ti pirak.’ Ngem maysa a kinaulbod daytoy. Ni Giezi ti mangtartarigagay kadagitoy a bambanag nga agpaay iti bagina met laeng. Ni Naaman, nupay kasta, saanna nga ammo daytoy, gapuna isut’ maragsakan a mangipaay iti daytoy a sagut. Impapilitna pay a mangala koma ni Giezi ti ad-adu pay a pirak ngem iti dinawatna.
Idi a nagsublin ni Giezi, nagsaludsod ni Eliseo: ‘Sadino ti naggapuam?’
‘Ay, adda napanak,’ insungbatna. Nupay kasta, impanayag ni Jehova ken Eliseo ti dakes a banag nga inaramid ni Giezi. Gapuna kuna ni Eliseo: ‘Saan a panawen daytoy a panangawat ti kuarta ken pagan-anay! Ita ti sakit ni Naaman ti umapay kenka ken kadagiti putotmo.’ Dagus nagkukutel ni Giezi, ket daytoy nakabutbuteng a sakit ti nagtalinaed kenkuana aginggat’ tungpal biagna. Ti napasamak ken Giezi ipakitana no sadino ti pagturongan ti kinaagum.—2 Ar-ari 5:5, 15-27.