Ti Biag ken Ministerio ni Jesus

Dagiti Mensahe Manipud Langit

TI INTERO a Biblia, iti epektona, ket maysa a mensahe manipud langit, nga impaay ti nailangitan nga Amatayo a pakasursuruantayo. Nupay kasta, dua a naisangsangayan a mensahe ti naiyawat ngangngani 2,000 a tawtawen a napalabasen babaen iti maysa nga anghel nga “agserserbi iti sanguanan ti Dios.” Ti naganna ket Gabriel. Sukimatentayo dagiti kasasaad dagiti dua a napapateg a panagsarungkar ditoy daga.

Ti tawen ket 3 K.K.P. Idiay turturod iti Judea, nalabit di unay adayo manipud Jerusalem, addat’ maysa a padi ni Jehova a managan Zacarias. Isut’ lakayen, ken kasta met baketen ni Elisabet nga asawana. Ket awan annakda. Innannong ni Zacarias ti pannakabatangna iti kinapadina idiay templo ti Dios sadi Jerusalem. Pagammuan nagparang ni Gabriel iti makanawan ti altar ti insenso.

Nagbuteng unay ni Zacarias. Ngem pinakalma ni Gabriel ti butengna ket kinunana: ‘Impangag ti Dios dagiti karkararagmo. Aganakto ti maysa nga anak a lalaki ni Elisabet, ket panaganamto ti Juan. Isaganaannanto ni Jehova ti maysa nga ili nga awan pagkuranganna.’ Ngem di mapapati ni Zacarias dayta. Kasla imposible dayta, ta iti edadnan, isu ken ni Elisabet saandan a maaddaan iti anak. Gapuna kuna ni Gabriel, ‘Agsipud ta dinak patien, agumelkanto agingga iti aldaw a pannakaaramid daytoy.’

Kabayatanna, dagiti tattao idiay ruar ti agsidsiddaaw no apay a nakabaybayag ni Zacarias idiay templo. Idi a nakaruaren saan a makapagsao no di ket nagsensenias laeng babaen kadagiti imana, ket naawatanda nga isut’ nakakita iti maysa a banag a nakaskasdaaw.

Kalpasan dagiti aldaw a panagannong ni Zacarias idiay templo, isut’ nagawiden. Ket di nagbayag pudno a napasamak dayta​—nagsikog ni Elisabet! Bayat nga ur-urayenna ti pannakaipasngay ti anakna nagtalinaed ni Elisabet idiay balay nga adayo manipud kadagiti tattao iti lima a bulan.

Adtoy! nagparang manen ni Gabriel. Ket iti siasino ti nakisawanna? Isu iti daydiay balasang nga agnagan Maria manipud ili ti Nasaret. Ania a mensahe ti iyegna ita? Denggenyo! ‘Agsikogkanto ket ipasngaymonto ti maysa nga anak a lalaki, ket panaganamto ti Jesus,’ kuna ni Gabriel. ‘Isu natan-okto nga ari, ket ti pagarianna awanto ti inggana.’

Masiguradotayo a marikna ni Gabriel ti dakkel a pribilehiona a nangipan kadagitoy a mensahe. Ket bayat nga ad-adu pay ti mabasatayo maipapan kada Juan ken Jesus kadagiti masanguanan a ruar daytoy a magasin, makitatayto pay a nalawlawag no apay a dagitoy a mensahe manipud langit nakapatpategda. 2 Timoteo 3:16; Lucas 1:5-33.

◆ Ania a dua a napapateg a mensahe ti naiyeg manipud langit?

◆ Asinot’ nangited kadagiti mensahe, ken iti siasino ti nangitedanna?

◆ Apay a narigat a patien dagitoy a mensahe?