Ti Biag ken Ministerio ni Jesus

Ti Anak ti Kari

IMBES nga agsublida idiay Nasaret, ni Jose ken Maria nagtalinaedda idiay Bethlehem. Ket idi a ni Jesus walo nga aldawnan isut’ pinakugitda, kas ibilin ti linteg ti Dios ken Moises. Nalawag nga ugali ti panangited iti ubing a lalaki ti naganna iti maikawalo nga aldaw. Gapuna pinanagananda ti anakda ti Jesus, kas nasaksakbay nga imbaga ni anghel Gabriel.

Nasurok a nakabulanen ti napalabas, ket ni Jesus 40 nga aldawnan. Sadino ti pangipanan dagiti dadakkelna kenkuana? Idiay templo ti Jerusalem, a sumagmamano laeng a milias manipud iti pagnanaedanda. Sigun iti Linteg ti Dios ken Moises, 40 nga al-aldaw kalpasan ti panagpasngay ti maysa nga anak a lalaki, ti maysa nga ina masapul a mangiparang iti daton iti pannakadalus idiay templo.

Dayta ti aramiden ni Maria. Ngem isut’ nangiyeg iti dua a babassit a tumatayab kas datonna. Daytoy ti mangipamatmat ti kasasaad ti ekonomia a pagsasaadan ni Jose ken Maria. Ti Linteg ni Moises ipamatmatna a ti maysa nga urbon a kordero, a napatpateg ngem dagiti tumatayab, ti masapul a maidaton. Ngem no ti ina saanna a kabaelan daytoy, dua a pagaw wenno kalapati umdasen.

Idiay templo maysa a lakay ti nangubba ken Jesus. Ti naganna ket Simeon. Impalgak ti Dios kenkuana a dinanto makita ni patay agingga a makitana ti Kristo ni Jehova, wenno Mesias. Ket idi ni Simeon simrek iti templo iti daytoy nga aldaw isut’ inturong ti nasantuan nga espiritu iti ubing nga inawit ni Jose ken ni Maria.

Bayat ti panangubba ni Simeon ken Jesus isut’ nagyaman iti Dios, a kunkunana: ‘Tinungpalmo ti karim, ta dagitoy matak nakitadan ti pannakaisalakan isu nga insaganam.’ Nasdaaw ni Jose ken ni Maria idi nangngegda daytoy. Kalpasanna binendisionan ni Simeon ida ket kinunana ken Maria a ti anakna “maikabil tapno pakapasagan ken pakaitan-okan dagiti adu iti Israel” ket ti ladingit, kas maysa a natadem nga igam ti mangsalputto iti kararuana met laeng.

Adda met iti daytoy nga okasion ti 84-tawenna a mammadto a managan Ana. Kinapudnona, pulos a saan a maaw-awan idiay templo. Iti dayta met laeng nga oras isut’ immasideg ket rinugianna ti nagyaman iti Dios ken nagsao maipapan ken Jesus kadagidiay amin nga umimdengto.

Anian a panangparagsak dagitoy a paspasamak idiay templo kada Jose ken Maria! Pudno, daytoy pinaneknekanna laeng kadakuada a ti ubing isu Daydiay inkari ti Dios. Lucas 2:21-38; Levitico 12:1-8.

◆ Kaano a nalawag nga ugali ti panangited iti ubing a lalaki nga Israelita iti naganna?

◆ Ania ti kasapulan iti maysa nga Israelita nga ina no ti anakna a lalaki ket 40 nga aldawnan, ket kasano a ti panangtungpal iti daytoy a kasapulan ipalgakna ti kasasaad ni Maria iti ekonomia?

◆ Siasino ti nakailasin iti kinatao ni Jesus iti daytoy nga okasion, ken kasano?