Panangsapul ti Rag-o iti Napnuan Riribuk a Lubong

“AGRAGSAKKAYO iti Apo iti kankanayon,” imbilin ti apostol a ni Pablo. “Ibagak manen, agrag-okayo!” (Filipos 4:4) Ngem para kadagiti adu ti kasta a ragsak kasla naatap. ‘Kasano nga agrag-oka idinto a masapul nga agibturka iti kinapanglaw, kinaawan pagtrabahuan, saan a nasayaat ugalina a katrabahuan, imoral a panangallukoy, wenno rigrigat idiay eskuelaan?’ panunoten dagiti dadduma.

Mabalin a saan a nainkalintegan para iti Dios a manginanama a dagiti tattaona agtalinaedda nga agnanayon iti naragsak a kasasaad. Ti Dios a mismo pinaltiinganna ni Pablo a mangipadto a dagitoy isudanto dagiti “napeggad a panawen a narigat a pakilangenan.” (2 Timoteo 3:1-5) Nupay kasta, ti Biblia nalawag nga ipakitana nga uray pay ti kadadaksanen a kasasaad, ti maysa mabalin a maaddaan iti panagrag-o. Ni Jesus, kas pangarigan, “inibturanna ti kayo a pagtutuokan” ken “dagiti sasao a panangbusor dagiti managbasol.” Pudno a bassit laeng ti panagrag-o iti nakasasaem a pannakailansa iti kayo a pagtutuokan wenno ti panangririaw dagiti bunggoy. Ni Pablo sinaritana pay dagiti panagtutuok ti Kristo a nakaro unay a masapul nga agdawat iti Dios a buyogen “ti nasged nga araraw ken lulua.” Ngem ni Jesus naibturanna amin daytoy “gapu iti rag-o a naikabil iti sanguananna.”​—Hebreo 12:2, 3; 5:7.

Dagiti immuna a Kristiano met “inibturanda ti dakkel a salisal iti sidong dagiti panagsagaba no dadduma bayat a [dagitoy] ti maisarang a kasla addada iti teatro tapno malalais ken agsagaba iti rigat.” Ngem, kunaen ni apostol Pablo, dagitoy “sirarag-o nga inibturanda ti pannakadadael dagiti sanikua[da].” (Hebreo 10:32, 34) Ngem kasano a posible daytoy?

Rag-o​—Manipud Ruar wenno Manipud Uneg?

Ti rag-o saan a maysa a banag iti ruar. Dayta ket maysa a kualidad iti puso. (Idiligyo ti Proverbio 17:22) Pudno, dagiti makinruar a bambanag kas iti pamilia, gagayyem​—uray pay ti paborito a taraon​—ti mabalin a mangiyeg iti rag-o iti limitado a pamay-an. (Aramid 14:16, 17) Ta, ti laeng pananginanama iti nasayaat a banag mabalin a mangyeg iti rag-o! (Idiligyo ti Proverbio 10:28.) Nupay kasta, ti rag-o ti maysa a tao nga agtaud kadagiti makinruar a kasasaad wenno namaterialan a bambanag ket apagbiit laeng.

Iti kasumbangirna, dagiti makinruar a kasasaad no dadduma ti kasla mangrabsut iti rag-otayo. Kas pangarigan, maysa nga agtutubo a managan Jim inyebkasna no kasano a ti sekular a trabahona ti nangapektar kenkuana: “Kagurak ti trabahok . . . Diak makitkita ti pagimbagan iti biagko iti panangparang-ay iti dadduma a kompania a kasla di pudno a di mangikankano kaniak kas maysa a tao. Mainayon pay, adu a tattao a pakikadkaduaak iti trabaho ti manangirurumen, saan a napudno a tattao.” Ti panangpadas a mangpataud iti artipisial a rag-o ti napaneknekan nga awan ti mamaayna. Nalagip ni Jim: “Nairamanak iti droga iti amin a kita nanipud pay idi sangapulo ti tawenko. Nagbalinak a tao nga aglalaok ti kasasaadna. Agsakitak gapu iti kasasaad ti panagbiagko: managinum, managtomar ti droga, ken kanayon a mapan kadagiti party. Awan mamaay wenno panggep ti biag. Imtuodek ti bagik, ‘Sadino ti pakasarakak iti nasaysayaat pay a banag?’”

Ti kapadasan ni Jim iti daytoy a banag ti mangipalagip kadatayo iti kapadasan ni Ari Salomon. Isu, met, naammuanna ti kinaubbaw ti panangpadas a mangsapul iti rag-o babaen iti panagimbubukodan:

“Kinunak iti pusok: ‘Umayka ita, padasenkanto babaen ti panagragsak. Gapuna, nga agrag-oka iti ragsak.’ Ket, adtoy! daytoy met kinabarengbareng. Iti panagkatawa: ‘Kinamauyong!’ ken iti kinaragsak: ‘Ania ti aramidenna?’ Siak sinukimatko itoy pusok no kasano ti panangparagsak ti arak iti lasagko, ti pusok pay laeng ti mangidalan kaniak a sisisirib, ken no kasano ti panangpetpetko iti kinamaag agingga iti makitak koma idi no ania ti naimbag a maipaay kadagiti annak dagiti tattao tapno aramidenna koma iti baba ti langit ti amin nga al-aldaw ti biagda. Inaramidko a maipaay kaniak dagiti dadakkel nga ar-aramid. Nangbangonak kadagiti balbalayko; nagmulaak kadagiti kaubasak. Inaramidko dagiti minuyongak ken plasa . . . ket aniaman a kinalikaguman dagiti matak diak impaidam kadakuada. . . . Idin, kinitak dagiti amin nga ar-aramid a pinataud dagiti im-imak ken ti aramid a nagbannogak nga inaramid, ket, adtoy! isuda amin barengbarengda ken maysa a pananagagawa iti angin.”​—Eclesiastes 2:1-5, 10, 11.

Adda kadi wagas iti panagbiag a saan a barengbareng, maysa a mangyeg iti rag-o uray pay iti nakarigrigat a kasasaad?

Ti Gubuayan ti Pudno a Rag-o

“Ti rag-o ni Jehova isu ti pigsayo,” kuna ni Nehemias. (Nehemias 8:10) Wen, ti rag-o agtaud iti Mannakabalin-amin a Dios agsipud ta, maysa a makagapu, isu ti Namarsua kadagiti isuamin a nasayaat a bambanag a makaiyeg iti pudno a rag-o. “Ti kinapigsa ken kinaragsak addada iti taengna,” kuna ti Biblia. (1 Cronicas 16:27) Ti pudno a pamay-an ti pananggun-od ti rag-o, ngarud, isu ti maaddaan iti pannakipagayam, maysa a relasion iti Namarsua a mismo kas ti tinagiragsak ni Abraham! (Santiago 2:23) Makaiyeg kadi ti kasta a pannakipagayam iti rag-o? Usigenyo ti kinuna ti salmista: “Ti pannakipagayam ti Dios[yo] nasaysayaat ngem ti biag.” (Salmo 63:3, The Bible in Living English) Kasta met paliiwenyo koma a ni Jim kabayatanna dimteng iti panangapresiar kadagitoy a kinapudno. Itan isut’ maysan a naragsak a Kristiano.

Kasano a ti pannakipagayam iti Dios mangyeg rag-o? Ti maysa, ti Dios isu “ti manggunggona kadagidiay a sipapasnek a mangsapul kenkuana.” (Hebreo 11:6) Iti panagserbi iti Dios, ti maysa masapul a saan nga agbuteng a dagiti panangikagumaanna ket awan ti mamaayna wenno saan a madmadlaw. Ti kababassitan a tignay iti debosion apresiarenna unay. (Idiligyo ti Marcos 12:41-44) Ket no bendisionan ni Jehova dagiti matalek a gagayyemna, ti bendisionna “mangpabaknang ket saanna nga anayan iti ladingit.” (Proverbio 10:22) Kinapudnona, dagiti managayat iti Dios inanamaenda ti panangtagiragsak ti gunggona nga agnanayon a biag idiay Baro nga Urnosna a sadiay “agtaengto ti kinalinteg.” (2 Pedro 3:13) Ti kasta a namnama ti pudno a pagtaudan iti rag-o iti Kristiano!

Ti sabali pay a banag nga usigen a ta ti “rag-o” ket maysa a bunga ti espiritu ti Dios. Ngem sipaparabur nga ipaay ti Dios ti espirituna kadagiti gagayyemna no dawatenda dayta. (Galacia 5:22; Lucas 11:13) Ania ti banagna? Ti salmista inyebkasna, “Naragsak ti umili a ti Diosna ni Jehova!”​—Salmo 144:15.

Panangtaginayon iti Rag-otayo

Nupay kasta, uray pay dagiti napulotan a Kristiano idi kaaldawan ni Pablo nakariknada iti liday iti dadduma a panawen. (1 Tesalonica 5:14) Ket ita dagiti panagaburido ken rigrigat iti biag mangipaayda iti dakdakkel pay a pakarigatan. Ngem agsipud ta ti rag-o ket maysa a kualidad nga adda iti uneg ti puso ti maysa, dagitoy a pakaaburiduan saan koma a mangpukaw iti rag-oyo. Usigenyo, kas pangarigan, ni Jesu-Kristo. Napaliiwtayo a nasaksakbay a “gapu iti rag-o a naikabil iti sanguananna inibturanna ti kayo a pagtutuokan.” (Hebreo 12:2) Nupay no ti pannakailansa ket nalawag a nakasasaem a kapadasan, ti relasion ni Jesus iti amana ad-adda a nabilbileg a di nangipalubos kenkuana a mangisentro iti panunotna iti panangngaasi iti bagina met laeng. Ti kangrunaan a pinanunot ni Jesus ket nalawag a “ti rag-o a naikabil iti sanguananna”: ti pribilehio a panangitan-ok iti nagan ni Jehova, ti inanama a mangisalakan iti intero a natauan a rasa manipud basol, ti dayaw ti panagserbi kas Ari iti Pagarian ti Dios! Uray pay kadagiti karirikutan a kanito, mabalin a pampanunoten ni Kristo dagitoy a bambanag ket isut’ addaan iti kasta unay a rag-o!

Dagiti immuna a Kristiano inibturanda met ti pannakaidadanes, uray pay ti ‘siraragsak a panangibtur iti pannakaagaw dagiti sanikuada,’ saan a gapu ta maaddaanda iti ragsak iti panagrigrigatda, no di ket gapu ta dagiti is-isipda naipamaysa iti no apay a masapul nga ibturanda dagitoy a bambanag. Mabalinda ti agrag-o “agsipud ta naibilangda a maikari a nagsagaba ti nakababain gapu iti naganna.” Mabalinda ti agrag-o gapu iti ‘namnama iti agnanayon’ a biag a naikabil iti sanguananda.​—Aramid 5:41; Tito 1:2.

Ita mabalin a taginayonentayo ti rag-otayo, uray pay no mapasanguantayo kadagiti naririkut a parikut. Imbes nga isinatayo dagiti bagbagitayo ket kankanayon a pampanunotentayo dagiti parikuttayo, mabalin a padasentayo a palagipan dagiti bagbagitayo kadagiti bendision iti pannakipagayam ken Jehova ken ti panangsuportar dagiti naayat a kakabsattayo a lallaki ken babbai. Masansan daytoy umdasen a mamagbalin iti panagsagabatayo a kasla nakabasbassit. Ni Jesus inyilustrarna daytoy a banag iti kastoy a pamay-an: “Ti babai, no aganak, adda ladingitna, ta dimteng ti orasna; ngem inton naipasngayna ti ubing, saanna a malagipen ti rigat gapu iti rag-o ta naiyanak ti maysa a tao itoy lubong.”​—Juan 16:21.

Iti kongregasion Kristiano ita addada adu a nagsayaatan nga indibidual a mangipalubos iti rag-o a mangringbaw kadagiti parparikutda. Maysa a Kristiano a babai a managan Evelyn, kas pangarigan, ti nagsagaba kadagiti nadumaduma a saksakit, agraman kanser. Isut’ marigatan a magna ken masansan a madlaw nga agsagsagaba iti ut-ot. Ngem isut’ kanayon nga agatender kadagiti gimgimong ken gagangay nga addaan iti naraniag nga isem. Aniat’ sekreto ti rag-ona? “Agpannurayak ken Jehova,” kanayon a kunkunana. Wen, imbes a pampanunotenna ti rigrigatna, ikagumaanna ti panangipamaysana iti panunotna kadagiti rason a masapul a pagrag-oanna. Daytoy ti mangipaay kenkuana iti bileg nga agballigi kadagiti saksakitna. Siempre, nalaka laeng a mapukawtayo ti rag-otayo. Dadduma ti maipamaysada a naimbag kadagiti tarigagay iti namaterialan a bambanag wenno panaglinglingay. Mabaybay-anda dagiti Nakristianuan a gimgimong, personal a panagadal, ken ti panagserbi iti tay-ak. Imbes a mangyeg rag-o iti biagda, ti maysa nga agtarigagay iti namaterialan a kinabaknang ‘masalput kadagiti adu a ladladingit.’​—1 Timoteo 6:10.

Ti panangitultuloy a manggun-od iti naagum nga “ar-aramid iti lasag” ti sabali pay a pamay-an a panangdadael iti rag-o ti maysa a tao. Ti pannakiabig, kinarugit, wenno nalulok a kababalin ti mabalin a mangyeg iti apagbiit a ragsak, ngem dagitoy pudno unay a maibusorda iti espiritu ti Dios a mangpataud iti rag-o. (Galacia 5:19-23) Ti maysa nga agaramid kadagitoy a dakes nga ar-aramid irisgona ti panangisinana iti bagina met laeng manipud iti Gubuayan iti rag-o​—ni Jehova!

Anian a nagsayaat, ngarud, para iti maysa a Kristiano a siinget a mangsalaknib iti rag-ona. No, gapu kadagiti dadduma a rason, masarakanyo ti bagiyo met laeng nga agkurang iti rag-o, kitaenyo no ania ti mabalinyo a maaramidan tapno mapasubli dayta. Nalabit adda ti pannakasapul iti biangyo ti ad-adda pay a panagadal ken panagmennamenna iti Biblia. Babaen laeng iti kanayon a panangipalagip iti bagbagitayo iti namnama a mabalin nga “agrag-otayo iti namnama” nga adda iti sanguanantayo, uray pay no agsagsagabatayo kadagiti rigrigat. (Roma 12:12) Wenno nalabit adda ti pannakasapul iti pannakipaset nga ad-adda pay iti panangikasaba ti “naimbag a damag ti pagarian.” (Mateo 24:14) “Ti pannangted” iti kastoy a pamay-an kasapulan unay a mangyeg iti ad-adda pay a rag-o!​—Aramid 13:48, 52; 20:35.

Ti napnuan-parikut a lubongtayo agtultuloyto a mangpataud iti parikut. Ngem babaen iti iyaadani a sisisinged iti nailangitan a Gayyemtayo, masalimetmetantayo ti rag-otayo ket makastrektayo iti Baro nga Urnos ti Dios a sadiay dagiti amin a lapped iti rag-o mapukawdanton!​—Apocalipsis 21:3, 4.