Report dagiti Manangiwaragawag ti Pagarian

Ni Jehova ti ‘Nangted Panagdakkel’ idiay Fiji

NAIPARANGARANG ti pammendision ni Jehova kadagiti matalek a manangiwaragawag ti Pagarian kadagiti napipintas a purpuro idiay Fiji. Adda itan 1,049 a saksi ni Jehova iti isla, maysa a 10-porsiento nga irarang-ay iti napalabas a tawen. Nagmula ken nagsibugda, ket ti Dios ti nangpadakkel kadagiti bambanag.a​—1 Corinto 3:6, 7.

Kuna ti sanga nga opisina ti Watch Tower Society a “giddato latta a naginteres dagiti tattao iti panagadal iti Biblia.” Dagiti kamkameng ti maysa a kongregasion ti nangtrabaho ti maysa a naiputputong a purok a sadiay nagkapuy ti pannakaawatda kadagiti napalabas. Ngem iti daytoy nga okasion ti pangulo ti purok ti nangiyanunsio kadagiti isuamin nga agnanaed iti dayta a purok nga aggianda koma kadagiti balbalayda tapno denggenda dagiti Saksi ni Jehova ket kalpasanna dagiti babbai ti mangisagana koma ti pagpalammiis dagiti kakabsat idiay pagtataripnongan ti komunidad. Idi panagsublina kalpasan ti dua a lawas, nasarakan ti regular a payunir dagiti 28 a tattao a sisasagana a makipagadal iti Biblia. Nanipud idin, daytoy a purok ti masarsarungkaran babaen iti naimbag a damag iti kada dua a lawas tapno tulongan dagiti interesado. Iti tunggal panagsarungkar “addada dagiti kabbaro a mainaynayon iti panagadal.”

Maysa kadagiti 68 a kabbaro a nabautisaran iti nabiit pay a kumbension distrito ket isut’ maysa a mangisursuro iti Sunday-school iti las-uden ti siam a tawen. Isu ti naggapu iti relihiuso unay a pamilia. Isu ti sinarungkaran dagiti dua a Saksi iti panagbalaybalayda, ket “kalpasan ti atiddog a diskusion ken adu a panagsarungkar, narugian met laeng ti panagadal iti kamaudiananna.” Kalpasan ti dua a bulan a panagadal ti Biblia, isut’ nagikkaten iti saadna kas mannursuro iti Sunday-school, innalana ti takderna iti kinapudno, ket nabautisaran kalpasan ti maysa a tawen. Babaen iti panangtuladna kadagiti sasao ni apostol Pablo, kunana: “Nangngeganyo ti kinaregtak iti ulbod a relihion idi nakaregregtaak pay kadagiti tradision dagiti ammak. Ngem itan nasarakakon ti kinapudno, ket maragsakanak nga agserserbi ken ni Jehova a kaduayo.”​—Idiligyo iti Galacia 1:13, 14.

Idi 1984 naaddaan ti Fiji ti dua a kumbension distrito iti damdamo unay. Duapulo ket dua a panglakayen manipud iti kangrunaan nga isla ti nangitukon, iti bukodda a gasto, a mangsuportar iti programa iti maikadua a basbassit a kumbension iti sabali a puro. Inyurnos ti sanga nga opisina ti panagbiaheda ket manamnama a 90 a kakabsat ti tumabuno manipud iti kadakkelan nga isla. Nupay kasta, 115 ti nagdalliasat babaen iti espesial nga eroplano ken 320 babaen iti inarkila a barko. Gapu iti nagsayaat a kababalin dagiti Saksi, maysa kadagiti piloto ti eroplano ti nagkuna: “Masdaawanak unay iti kababalinyo, ta sisasaganakayo a sumurot kadagiti instruksion. Idi inyanunsiok a masapul a bumaba dagiti pasahero iti eroplano gapu iti maysa a problema a mekanikal, siuulimek a rimmuarkayo iti eroplano nga awan pulos ti panagdaydayengdeng wenno panagreklamo. Idi mapaglugankayo manen, inaramidyo a siraragsak dayta, siuulimek, nga awan pulos ti panagdidinnuron. Sapay koma ta amin a pasahero ti eroplano ket kas kadakayo a tattao.”

Ti pangulo nga inheniero ti naarkila a barko ti nagkomento: “Nagsayaaten ti pannakaaddayo a tattao kas pasahero, ta dakayo ti naidumduma la unay manipud ti agtutubo a grupo dagiti Kristiano nga inluganmi a nagturong iti sabali nga isla. . . . Maysakayo a nadalus ken nalaka a pakitunosan a tattao.” Maysa a padada a pasahero ti nagkuna: “Adda banag a nakitak a diak pulos napaspasaran pay idi . . . Matmaturogak idi iti maysa a naglamiis a proa ti barko idi maysa kadagiti kabsatyo a babai ti nangited ken ni baketko ken kasta met kaniak iti kutsonda a pagiddaanmi. Nabayagen nga agsapsapulak iti maysa a relihion a kas iti daytoy.” Daytoy a tao ti timmabuno iti kumbension tapno makakita ken makaadal pay iti ad-adu.

Kinapudnona, ti nasayaat a kababalin amin dagitoy a kakabsat isu ti rebbeng a manamnama manipud kadagiti pudno a Kristiano. Kuna ni Jesus: “Tunggal kayo a nasayaat mangted bungbunga a nasayaat.” (Mateo 7:17) Makaparagsak a makita ti irarang-ay nga ipapaay ni Jehova kadagiti matalek a managdaydayawna idiay Fiji. Ket awan duadua nga adu pay ti mangabrasa ti naimbag a damag bayat a dumngegda ken agtultuloyda a mangpaliiw iti nagsayaat nga ug-ugali dagiti tattao ni Jehova.

[Dagiti Footnote]