Maawiskayo kadagiti “Nadiosan a Talna” a Kumbension
ANIAN a sigagagar ti panagur-uray ti tunggal Kristiano a saksi ni Jehova kadagiti tinawen a kumbension distrito! Awan duadua no maipapan ti panagbalinda a tampok iti tunggal tawen ti kalendario. Dagiti nasasayaat a palawag, dagiti drama ti Biblia, dagiti baro a mairuar a pagbasaan, ti pannakilangenlangen—no maminsan uray pay ti dakkel a bilang dagiti tumabuno—ti agtitipon a mamagbalin kadagitoy a panagtataripnong a maysa a banag a pudpudno a naisangsangayan.
Usigenyo, kas pangarigan, ti sumagmamano kadagiti “Manangsalimetmet ti Kinatarnawna” a Kumbension a naangay idi napan a tawen. Ti dua idiay São Paulo ken Rio de Janeiro, Brazil, ti addaan iti kangatuan a bilang dagiti timmabuno a 249,351, nga adda 2,645 a nangisimbolo ti dedikasionda ken ni Jehova a Dios babaen ti bautismoda iti danum. Ti kumbension idiay Montreal, Canada, a tinabunuan ti 78,804, ti naisangsangayan agpadpada iti trailer parkna ken ti pannakaaramidna iti 11 a nagduduma a pagsasao. Dagidiay timmabuno ti kumbension idiay Zurich, Switzerland, ti nangipadamag a nikaanoman dida pay napaspasaran iti intero a panagbiagda ti aniaman nga umas-asping iti entusiasmo ken aglaplapusanan a rag-o. Dagiti delegado a timmabuno iti maysa wenno ad-adu pay a kumbension a naangay idiay Poland ti nangiyebkas kadagiti umas-asping a rikna.
Ti di pay kompleto a sangalubongan a report ipakpakitana ti timmabuno a 5,653,689 kadagiti 754 a “Dagiti Manangsalimetmet Kinatarnawna” a Kumbension, nga adda 75,202 a nabautisaran a baro a Saksi. Anian ti nakaskasdaaw a panangbendision ni Jehova kadagitoy a panagtataripnong ti ilina!
Maisupadi iti popular a pagsasao, para kadagiti timmabuno kadagitoy a kumbension ti kaitungpalan linab-awanna ti pananginanamada. Ngangngani awan naidumduma ti napampamaysa a konklusionda a ta ti kaudian isu pay latta ti kasasayaatan. Gapuna amin dagiti Saksi ni Jehova ti sigagagar a mangur-uray kadagiti “Nadiosan a Talna” a Kumbension Distrito iti daytoy a tawen, a maangay iti intero a sangalubongan—130 kadakuada ti naeskediol idiay Estados Unidos.
Anian a nagsayaat a tema para iti kumbension distritotayo: “Nadiosan a Talna”! Ita dagiti natauan a kagimongan ti natatek kadagiti gulo. Saan laeng a dagiti literal a gubgubat ti agdama a mapaglalabanan iti intero a daga ngem addada pay met dagiti dadduma a kita ti panagdadangadang: ekonomiko a panagdadangadang ken riribuk iti nagbaetan dagiti agassawa agraman nagbabaetan dagiti nagannak ken annak. Ngem iti dakkel a pannakaigiddiatna, adda ti talna iti tengnga dagiti dedikado nga ili ni Jehova. Ti talnada nadiosan nga aggapgapu iti Daydiay Nasantuan, ni Jehova a Dios, ti Dios ti talna a mangted ti talna. Addaanda ti talna kenkuana kas bunga ti pammati ken ar-aramidda, gapuna nabalinanda ti addaan ti talna iti maysa ken maysa, iti kongregasion ken iti uneg ti pamilia.—Filipos 4:7; Roma 16:20.
Rebbeng met koma a maammuan, a daytoy nadiosan a talna ket saan laeng a ti kinaawan ti gulo. Ti sao a talna iti Hebreo ket sha-lohm’, ket kaipapananna saan laeng a ti kinatalna no di ket iti salun-at ken kinarang-ay. Wen, tagtagiragsaken dagiti Saksi ni Jehova ti kinarang-ay agraman ti kinaawan gulo agsipud ta addadan iti naespirituan a paraiso. Daytoy a kumbension ti mamagbalin iti amin a tumabuno nga agbalin nga ad-adda a silalagip iti talna ken agbalin a maseknan maipapan iti panangitandudo ti talna, la ketdi no daytat’ adda iti pannakabalinda.—Roma 12:18.
Kas kadagiti napalabas a tawtawen, dagitoy a kumbension ti mangrugi iti malem ti Huebes iti 1:30. Tunggal aldaw ti addaan tema a nainaig iti talna, a ti umuna nga aldaw isu ti “Bendisionan ti Dios ti Ilina iti Talna,” a naibatay iti Salmo 29:11. Maisalaysay dagiti nabagas a kararag, ket ti sesion matampokanto iti palawag maipapan iti no kasano ti panagtultuloy ni Jehova a mamagbalin a baro iti isuamin a bambanag.
Iti Biernes ti tampok a palawag ket, “Nadiosan a Talna Agpaay Kadagidiay Sinuruan ni Jehova,” ipaganetgetnanto ti gubuayan ti talnatayo. Dadduma a paset ti programa isunto ti makaparagsak iti puso a drama ti Biblia nga isu ti mangisinggalut iti kadaanan a tiempo iti kaaldawantayo.
Mainayon iti palawag iti bautismo, ipaganetgetto ti programa iti agsapa ti Sabado dagiti Nakristianuan nga obligasiontayo iti maysa ken maysa ken ti pannakasapul ti panagbalin a narang-ay kas dagiti Kristiano a Saksi ni Jehova. Iti malem addanto ti nagsayaat a balakad nga agpaay kadagiti kamkameng ti pamilia ken kadagiti nadutokan a manangaywan.
Ti maysa a prangka ken nadagsen ti panangtirona a moderno-aldaw a drama ti maitampokto iti agsapa ti Domingo. Iti malem, ti napigsa a palawag publiko a “Talna Adtoyen!—No Agsao ti Dios” ti maysanto kadagiti tampok ti kumbension. Awan duadua nga amin a tumabuno iti kumbension pumanawdanto a ti riknada ket naan-anay ti pannakakabalda babaen iti Dios ti Talna a mangaramid ti pagayatanna.
Gapuna, umaykayo nga agpaay iti amin nga uppat nga aldaw nga addaan iti nasayaat a naespirituan a gana, a siririing a naan-anay iti naespirituan a kasapulanna. (Mateo 5:3) Iyurnosyo ti kabibiagyo tapno addakayto iti umiso nga oras para iti panglukat a kanta ken kararag iti tunggal aldaw. Umaykayo a sisasagana nga agala met kadagiti notas, ket ti panangisurat kadagiti kangrunaan a punto ti makatulong kadakayo a mangisentro iti ibagbaga ti agpalpalawag. Mainayon pay, dagiti maiyeb-ebkas a kapanunotan ti maipasagepsepto a naimbag iti puso ken isipyo.
Ngem ditay koma liplipatan ti kinapudno a ti nadalus a panagdayaw ken ni Jehova a Dios ket saan laeng a maysa a banag a panangawat. Dayta met ket maysa a banag iti panangted. Laglagipentay koma a kanayon ti prinsipio ti Biblia: “Ti agmula a nawadwad aganinto met iti nawadwad.” (2 Corinto 9:6) Nangnangruna pay ngem iti dayta, yantangay kinuna ni Jesus a “dakdakkel a ragsak ti panangted ngem ti umawat,” maaddaantay koma iti dakdakkel a rag-o a posible iti kumbension babaen ti panangted iti aginggat’ kabaelantayo, a sibubulos nga iboluntario ti serbisiotayo. (Aramid 20:35) Wen, nikaanoman saan koma a nesisita ti panagaramid ti panagapelar a maipaay iti tulong a boluntario.
Kasta met, alaentay koma a sisiserioso ti probision a pannakiraman iti tay-ak ti pangasabaan iti malem ti Biernes. Ket sisisiputtay koma kadagiti amin nga uppat nga aldaw kadagiti gundaway nga agaramid ti di pormal a panangaskasaba. Daytoy ti mangipalagip kadatayo iti sabali pay a prinsipio ti Biblia: Ti managparabur a kararua rumang-ayto, ket ti agsibug isu met laeng masibuganto. (Proverbio 11:25) Wen, awisentay amin a kabaelantayo nga awisen tapno maammuanda a mismo no kasano a dagiti Saksi ni Jehova ti pudpudno nga aglaplapusananda iti nadiosan a talna.