Usaren a Siuumiso ti Nakristianuan a Pannakawayawaya
DAGITI Kristiano “naayabanda iti panagwayawaya,” ngem napakdaaranda a dida “koma nga aramaten daytoy a panagwayawaya a pangabbong iti kinadakes iti lasag.” (Galacia 5:13; 1 Pedro 2:16) Anian a nakalkaldaang no koma ti maysa a Kristiano ket abusarenna ti Nakristianuan a pannakawayawaya tapno mangabaruanan manen ti pannakaadipenna! Mangalatayo ti maysa a pangarigan.
Adu a narelihiusuan a tattao ti nasursuruan a ti panaginum kadagiti de alkohol ket maysa a basol. Ti umiso a pannakaammo iti Biblia ti mangwayawaya kenkuana manipud iti daytoy biddut a kapanunotan, yantangay saan a ti panaginum no di ket ti panagbartek ti kondenaren ti Biblia. (Idiligyo iti Salmo 104:14, 15 iti 1 Corinto 6:10 ken 1 Pedro 4:3.) Gapuna ita mabalin a ti maysa a nawayawayaan a Kristiano mariknana nga isu ti siwayawaya a mangtagiragsak iti sagpaminsan a panaginum. Ngem no rugiannan nga “aramaten daytoy a wayawaya a mangabbong iti kinadakes ti lasag,” mabalinna a labsen dayta, a makapatanorto ti panagpannurayna iti alkohol, nga mangadipento pay iti dayta.
Gapuna, kalpasan iti pannakawayawaya manipud iti ulbod a panangmatmat, iti panaglinglingay, panagkawkawes ken panagbubuok, wenno kadagiti sosial a kababalin, ti maysa a Kristiano ti di koma napuskol ti rupana nga agturong iti daydiay sabali a kinamanaglablabes: panangbusbos iti agsobsobraan a panawen wenno kuarta kadagiti bambanag a dati maiparit ngem itan maipalubosen. Daytoy ti panangabuso iti Nakristianuan a pannakawayawaya. Daytat’ mabalin a maaddaan kadagiti serioso a bungbunga.
Ikasaba ti Namnama ti Pannakawayawaya
Nangnangruna manipud pannakaipasdek ti Mesianiko a Pagarian ti Dios idi 1914 a ti karina a “ti sangaparsuaan maluk-atanto iti panangadipen iti panagrupsa a maipaay iti nabayag a wayawaya dagiti annak ti Dios” ket sipapardasda nga agturturongen iti kaitungpalanna. (Roma 8:21) Ni Kristo winayawayaannan ti langit manipud impluensia ni Satanas. (Apocalipsis 12:7-12) Iti mabiiten dadaelennanton ti Babilonia a Dakkel nga isut’ nangadipen iti tao babaen kadagiti narelihiusuan nga erradoda. Kalpasanna iti daydiay gubat ti Dios a Har–Magedon, wayawayaannanton ti sangatauan manipud kadagiti imperpekto a natauan a gobierno babaen ti panangburakburakna kadakuada. (Daniel 2:44; Apocalipsis 18:21; 19:11-21) Wayawayaannanto pay dagiti tattao manipud iti kangrunaan a mangipapaay iti panangadipen inton mapagbalinen nga awan gawgaway ni Satanas, a dinanto mabalin nga “allilawenen dagiti nasnasion agingga iti maturpos dagiti sangaribo a tawen.”—Apocalipsis 20:2, 3.
Inton panagngudon ti Sangaribo a Tawen a Panagturayna, naan-anayton ti panangwayawaya ni Kristo manipud kadagiti dakes nga epekto nga imbunga ti orihinal a tignay ti pannakawayawaya idiay Eden. Dagiti mamalmaltrato a grupo dagiti rasa nawayawayaandanton manipud kinaulpit ken manangidumduma a pannakatrato. Dagiti babbai nawayawayaandanto metten manipud iti manangirurumen a panangituray ti lalaki. Dagiti saksakit ket mawayawayaandanto metten manipud an-anayenda. Dagiti lallakay a tattao mawayawayaandanto metten manipud kadagiti makapakapuy nga epekto ti kinalakay. Ken, pagsidsiddaawan kadagiti isuamin, dagiti agladladingit a tattao mawayawayaandanto manipud iti sensennaay, ta dagiti ing-ingungutenda a natay a kabagyanda mawayawayaandanton manipud kadagiti tanem!—Apocalipsis 20:13–21:5; kitaenyo met ti Salmo 146:5-10.
Babaen ti panangikasaba iti daytoy nasantuan a mensahe iti pannakawayawaya, dagiti Saksi ni Jehova ita us-usarenda ti Nakristianuan a pannakawayawayada iti makagunggona a pamay-an. Anian a kinakurang panangmatmat iti masanguanan ti panangsuportarda iti natauan a tigtignay iti pannakawayawaya, a mangiyeg laeng iti apagbassit a pannakabang-ar ken, iti kinapudnona, pakudrepenna ti pudpudno a namnama ti pannakawayawaya.
Panunotenyo dayta: Addaankay ti gundaway nga agbiag tapno mapasaran ti pannakawayawaya nga adayo a dakdakkel ngem ti pannakawayawaya a nasao ni Patrick Henry. Mainayon pay, addaantay ti gundaway a mangtagiragsak kadagiti bendisionna kalpasan ti Armagedon, agingga iti kinaagnanayonen!