Agbibiagtayon Aya iti “Panawen ti Panungpalan”?

“Ngem sika, O Daniel, punitam dagiti sao ket timbream ti libro, agingga met laeng iti panawen ti panungpalan.”​—Daniel 12:4.

TI MANGMANGAN mariruan unay. Bayat a tumantan-aw iti tawa iti maysa a restaurant idiay makintengnga a Manhattan a mangtantannawag iti Times Square, Siudad ti Nueva York, agsublisubli dagiti matana iti nagbabaetan dagiti tallo a nagsisina a digital a relo, nga aminda ti mangipakpakita ti oras kadagiti napalalo ti kadakkelna a letra. Maysa a relo ti mabasa 11:28. Ti sabali, a kasla agduadua iti kinaladawen ti oras, ti maud-udi iti 11:26, idinto a ti maikatlo ti di makaan-anus a makaun-una iti 11:29.

‘Ti maysa wenno dua a minuto ket saan unay a dakkel,’ mabalin a maikunayo. Padasenyo a kumbinsiren ti maysa a tao iti dayta, nupay kasta, a di nakalugan iti bus, tren, wenno eroplano, saan a babaen iti sumagmamano a minutos no di ket babaen laeng iti segundos! Ti panangammo ti umiso nga oras nasken unay. Ti panangammo no sadino ti ayantayon iti pagorasan ti Dios ti ad-adda pay a napatpateg.

Ti Posibilidad ti Aldaw ti Panungpalan

Siempre, kas pagaammoyon, pagsasaritaanen dagiti tattao ti maipapan “iti panawen ti panungpalan”​—a kunaen dagiti dadduma ‘ti panungpalan ti lubong’ wenno ‘aldaw ti panungpalan’​—iti adun a siglo. Nagsao ni mammadto Daniel maipapan iti dayta 25 a siglo ti napalabasen. (Daniel 12:4) Ngem kadagitoy nga al-aldaw, sigun iti maysa nga agwaywayas a mannurat a ni James David Besser, “saannan a kasapulan ti narelihiusuan wenno napigsa unay a pammati tapno awaten ti posibilidad ti aldaw ti panungpalan; kasapulan laeng dayta ti iyaasideg kadagiti damdamag iti telebision.” Umanamongkayo aya?

Awan duadua, pinagbalin dagiti telebision dagiti damdamag ti lubong a nalaka a magun-odan babaen ti panangiyakar ti aksion iti mismo a salasyo. Pagbalinen dayta dagiti parikut a nakaas-asideg unay ken ad-adda a personal. Ipalagip dayta kadatayo a ti siudad wenno ili a rinebbek ti maysa a posible a nuklear a gubat, ti anak a lalaki wenno babai a naparigat iti maysa a posible nga allon ti krimen, ti ina wenno ama a kinemmegda iti maysa a posible nga iraraut ti terrorista​—a manamnama, nga amin dagitoy a parikut ti mabalin a parikuttayo. Kaskasdi, no dagitoy laeng a posibilidad ket dina paneknekan a ti aldaw ti panungpalan ket dandanin nga adda kadatayo. Ngem pagbalinen daytoy a pudno nga asidegen, a mamagbalin iti saludsod nga, Agbibiagtayon aya iti “panawen ti panungpalan?” nga ad-adda a naganat.

Ni Jesus, Daniel, ken ti Panungpalan ti Lubong

Kadagiti napalabas a 19 a siglo, dagiti adalan ni Jesus ti nagsaludsod kenkuana: “Anianto ti pagilasinan ti kaaddam ken ti panungpalan ti sistema dagiti bambanag (“ti panungpalan ti lubong,” King James Version]?” (Mateo 24:3) Iti panangtedna kadakuada ti pagilasinan, sinarita ni Jesus ti maipapan kadagiti nagadu a pammaneknek, nga aminda ket iti napampamaysa a pamay-an ipamatmatna a nagtengantayon “ti panungpalan iti sistema dagiti bambanag.” Ukagenyo ti Bibliayo idiay Mateo kapitulo 24 ken 25, Marcos kapitulo 13, ken Lucas kapitulo 21, ket basaenyo ti maipapan kadakuada a maipaay kadakayo met laeng.

Mabalin a makellaatkayo a makakita a ti basbasaenyo ket ngangngani umas-asping iti pannakagupgop dagiti damdamag ti telebision kadagitoy nga al-aldaw. Mabasayo ti maipapan kadagiti gubgubat, dadakkel a ginggined, saksakit, ken bisin​—nga amin mapaspasamak iti intero a lubong. Mabasayo met ti maipapan iti “rigat dagiti nasnasion, a dida ammo ti ruaranda,” ken maipapan kadagiti tattao nga “agkapuydanto gapu iti buteng ken danagda kadagiti maar-aramid nga umayto iti amin a mapagnaedan a daga.” Adda aya masarakanyo nga ad-adda pay a maiyanatop a sasao a panangiladawan iti kasasaad ti lubong, nga isu ti adu nga ibagbaga kadatayo dagiti programa ti telebision kadagitoy nga aldaw?​—Lucas 21:10, 11, 25, 26.

Daytoy napigsa a pammaneknek ti kasasaad nga agbibiagtayon “iti panawen ti panungpalan” saan laeng nga isu ti adda kadatayo. Kas ti nakitatayon iti ngato, makakitatayo kadagiti kanayonan a pammaneknek babaen iti panagsublitayo iti 500 a tawtawen kadagiti kaaldawan ti Judio a mammadto a ni Daniel. Ni Jesus ti nangtukoy kenkuana iti nagan, ket intudona ti kaitungpalan ti padtona. (Idiligyo iti Mateo 24:3, 15, 21 iti Daniel 11:31; 12:1, 4.) Babaen ti panangaramid iti daytoy, impakita ni Jesus a dina imbilang dagiti sasao ni Daniel idiay “Daan a Tulag” kas saanen a naintiempuan wenno awan mamaayna. Kastatay met koma.

Kitaenyo ti panagasping dagiti sasao ni Daniel ken sasao ni Jesus kas nailanad iti ngato. Kalpasanna saludsodanyo ti bagiyo, ‘Saan kadi a maymaysa a banag ti sarsaritaenda?’

Nalawag nga agpadpada a ni Daniel ken ni Jesus impadtoda ti isu met laeng a banag, “ti panawen ti panungpalan,” a bayat iti dayta a tiempo ni Kristo addanton iti naarian a pannakabalin. Iti ngudo dayta a panawen, ikisapnanton amin dagiti kabusorna ditoy daga iti maysa a dakkel a rigat. Ngem makalasatto ti ili ti Dios.

Kayatyo aya a maysakayto met kadagidiay a makalasat? Ngarud usigenyo ti pammaneknek nga idatag ni Daniel maipapan iti “panawen ti panungpalan.” Daytat’ makatulong kadatayo a makaammo nga eksakto no sadinot’ ayantayon iti nadiosan a pagorasan.

[Kahon iti panid 4]

DANIEL

“Ket iti panawen ti panungpalan . . . agtakderto ni Miguel [ni Jesu-Kristo] . . . ket sigurado nga addanto panawen ti riribuk isu nga awan idi uray kaanoman nanipud idi kaadda ti nasion. . . . Ket iti dayta a panawen ti ilim maispalto.”​—Daniel 11:40; 12:1.

JESUS

“Anianto ti pagilasinan ti kaaddam ken ti panungpalan toy sistema dagiti bambanag? . . .

“Ta addanto dakkel a rigat a nanipud idi punganay ti lubong . . .

“Ket no dagita nga aldaw saanda koma a mapaababa, awan koma ti lasag a maisalakan; ngem . . . dagita nga aldaw mapaababadanto.”​—Mateo 24:3, 21, 22.