Ti Biag ken Ministerio ni Jesus

Kararag, ken Talek iti Dios

BAYAT ti panangitultuloy ni Jesus iti sermonna, inlunodna ti kinamanaginsisingpet dagiti tattao a mangipakpakita iti makunkuna a kinanadiosanda. “Ngarud inton manglimoska,” kunana, “dikanto pagunien ti tangguyob iti sanguanam, a kas iti aramiden dagiti aginsisingpet.”

“Kasta met,” intuloy ni Jesus, “inton agkararagka, saankay a kas kadagiti managinsisingpet; ta isuda ayatenda ti agkararag kadagiti sinagoga ken kadagiti lanlansangan dagiti daldalan a sitatakder tapno makita ida dagiti tattao.” Imbes ketdi, imbilinna: “Ngem sika, inton agkararagka, sumrekka iti silidmo ket, inton nairikepen ti ruangan, agkararagka ken Amam nga adda iti nalimed.” Ni Jesus mismo ti nagkararag iti publiko, gapuna saanna a konkondenaren dagitoy. Ti ilunlunodna ket dagiti karkararag a maar-aramid tapno pagsiddaawenna laeng dagiti managdengngeg ket awatendanto ti pammadayaw dagiti tattao.

Intuloy pay ni Jesus ti nangbalakad: “Ngem iti panagkararagyo, dikay aramaten dagiti awan kapapayanna a panangulit-ulit, a kas ti aramiden dagiti tattao iti nasnasion.” Di kayat a sawen ni Jesus a ti panangulit-ulit a mismo ket dakes. Iti naminsan, uray isu met inulit-ulitna nga inusar “dagiti isu met laeng a sasao“ idi agkararag. Ngem ti saanna nga anamongan isu ti panangusar kadagiti naimemoria a sasao a “panangulit-ulit,” kas kadagidiay agus-usar ti rosario bayat nga ulit-ulitenda dagiti karkararagda a saandan nga agpampanunot.

Tapno matulongan dagiti managdengngegna nga agkararag, nangipaay ni Jesus ti modelo a kararag a nangiraman kadagiti pito a dawdawat. Ti umuna a tallo umiso ti panangbigbigna iti turay ti Dios ken dagiti pangpanggepna. Indawatda a ti nagan ti Dios ti masantipikar, nga umay koma ti Pagarianna, ken maaramid ti pagayatanna. Dagiti mabatbati nga uppat ket personalda a panagdawat, awan sabali, a maipaay ti inaldaw a taraon, pannakapakawan dagiti basbasol, ti di pannakaiyeg ti sulisog nga aglablabes ngem ti panagibtur ti maysa, ken ti pannakaispal iti managdakdakes.

Ti panagtuloyna, inlawlawag ni Jesus ti silo ti panangikabil iti di maiyanatop a panangipaganetget kadagiti material a sanikua. Ingunamgunamna: “Saankayo nga agurnong kadagiti gupgupit nga agpaay kadakayo ditoy daga, isu a ti sanga ken ti lati dadaelenda ida, ken isu a dagiti mannanakaw kalienda ken takawen.“ Saan laeng a dagita a gupgupit ti mapukaw no di ket saanda pay a makaibangon iti aniaman a merito iti Dios.

Gapuna, kuna ni Jesus: “Ngem agurnongkayo, kadagiti gupgupit sadi langit.” Maaramidan daytoy babaen ti panangipangpangruna iti serbisio ti Dios iti biagyo. Awan asinoman a makaipanaw ti merito a naurnongyo iti Dios wenno ti dakkel a gunggonana. Kalpasanna innayon ni Jesus: “Ta no adino ti yan ti gupityo, addanto met idiay ti pusoyo.”

Iti panangitultuloyna pay iti silo ti materialismo, nangted ni Jesus ti pangngarig: “Ti pagsilawan ti bagi isu ti mata. Gapuna, no ti matam nadalusto, amin a bagim nalawagto; ngem no ti matam dakes, amin a bagim nasipngetto.” Ti mata nga umiso ti panagandarna ket iti bagi kaiyariganna ti nasindian a pagsilawan nga adda iti nasipnget a lugar. Ngem tapno umiso ti pannakakita, masapul a ti mata naipamaysa, kayatna a sawen, daytat’ nakasentro iti maysa a banag. Ti mata a di umiso ti nakaisentruanna ti mangiturong iti biddut a panangpattapatta kadagiti bambanag, ti panangipangpangruna kadagiti material a bambanag ngem ti serbisio iti Dios, a daytat’ mamagbalin a nasipnget iti “intero a bagi.”

Pinagpatingga ni Jesus daytoy a banag babaen ti napigsa pay a pangngarig: “Awan ti tao a makabalin nga agserbi iti dua nga appo; ta guraennanto ti maysa ket ayatennanto ti sabali, wenno sumurotto iti maysa ket umsienna ti sabali. Dikay mabalin ti agserbi iti Dios ken iti Kinabaknang.”

Kalpasan ti panangtedna iti daytoy a balakad, impasiguro ni Jesus kadagiti managdengngegna a saanda koma nga agagawa kadagiti material a kasapulanda no ipangpangrunada ti serbisio ti Dios. “Imutektekanyo dagiti tumatayab ti langit,” kunana, “ta dida agmula wenno dida agani ket dida agurnong kadagiti kamkamalig; ket ni Amayo a nailangitan taraonanna ida.” Kalpasanna insaludsodna: “Saankayo aya a napatpateg ngem isuda?”

Sumaganad, intudo ni Jesus dagiti lirlirio iti talon ket sana kinuna nga “uray pay ni Salomon agraman ti isuamin a kinadayagna saan a nakawesan a kas iti maysa kadakuada. Ket no,” intuloyna, “ti Dios kasta ti panangawesna ti ruot kadagiti kataltalonan, . . . saan aya a nangnangruna a dakayo ti kawesannanto, o dakayo a bassitan ti pammati?”

Gapuna nagpatingga ni Jesus: “Dikay ngarud agagawa a kunkunayo, ‘Ania ti kanenminto?’ wenno, ‘Ania ti inumenminto?’ wenno, ‘Ania ti pagan-anayminto?’ . . . Ta ni Amayo a nailangitan ammona ti pannakasapulyo amin kadagitoy. Ngem itultuloyyo a biruken nga umuna ti pagarian ken ti kinalintegna, ket isuamin dagitoy a bambanag mainayondanto kadakayo.” Mateo 6:1-34; 26:36-45.

◆ Ania a pannursuro maipapan iti kararag ti impaay ni Jesus?

◆ Apay a nasaysayaat dagiti nailangitan a gupit, ket kasano ti pannakagun-odda?

◆ Ania dagiti pangngarig a naited a mangtulong iti maysa a maliklikan ti materialismo?

◆ Apay a kuna ni Jesus a saan a kasapulan ti panagagawa?