Dagiti Misionero iti Gilead—Naipaay iti Maymaysa a Panggep
“IDI napan a lawas estudientekayo, inton umay a lawas misioneroskayton!” Dagidiay a sasao ti nangtanda a naimbag kadagiti rikrikna dagiti 23 nga estudiante a nagraduar iti maika-81 a klase iti Watchtower Bible School of Gilead. Kadakuada, agraman dagiti 4,262 a dadduma pay a nagatender, ti graduasion a naaramid idiay Jersey City Assembly Hall of Jehovah’s Witnesses, idi Setiembre 7, 1986, ket maysanto a malaglagip nga aldaw.
Ni Martin Poetzinger nanglukat babaen iti kararag ken kalpasanna ni Carey Barber, tsirman iti graduasion, ti nangiyam-ammo iti programa babaen ti panangibagana a kadagiti adun a tawtawen rinibribon kadagitoy a managebanghelio ti nagsanayen idiay Gilead a naipaay iti maymaysa a panggep: ti pannakaibaon kadagiti ungto ti daga kas pudno a misionero a mangikasaba iti namnama iti Pagarian. Anian a ragsaktayo a dagitoy a kabbaro a misionero, iti espiritu iti nagan a “Gilead,” agbalindanto a paset iti ‘bunton dagiti saksi’!
Babaen ti panangidaulo iti programa, ni Milton Henschel inlawlawagna a dagitoy a nagraduar, kas kadagiti apostoles idi aldaw ni Jesus, ti nagsaganan a maipaay iti dakkel a trabaho. Ti trabahador a misionero a ni Pablo inyebkasna a naimbag dagiti rikriknana iti trabahona idi kinunana: “Ta idinto a siwayawayaak kadagiti isuamin, pinaadipenak kadagiti isuamin, tapno mairagpatko dagiti ad-adu.”—1 Corinto 9:19.
Ania ti ipakita dagitoy a sasao ni Pablo? A dagitoy a kabbaro a misionero interesadoda kadagiti tattao. Tarigagayanda koma ti tumulong kadagiti amin a kita ti tattao babaen iti makaited-biag a mensahe iti kinapudno—uray pay dagidiay a nainaig a naimbag iti sabali a relihiuso nga organisasion.
Ti sumaganad a nagpalawag, ni Theodore Jaracz, impalagipna kadagiti kabbaro a misionero a, saan a kas kadagiti turista a mapan kadagiti luglugar tapno makitada laeng ti lugar, dagitoy ti naibaon kadagiti adu a nagduduma a siudad iti lubong a mangikasaba iti naimbag a damag. Pinaregtana ida a manglaglagip iti ulidan ni Jesus ken dagiti immuna nga ad-adalan agraman dagiti moderno-aldaw a misionero, nga adu kadakuada ti agtultuloy nga agserserbi a simamatalek iti destinoda. “Naipamaysa koma ti panunotyo,” inlawlawagna. “Dikay palubosan dagiti materialistiko a panggep a manglapped kadakayo. No addaankayo iti ‘naipamaysa’ a mata, ngarud naipamaysa met ti isipyo.” (Lucas 11:34) “Kas misioneros iti Gilead,” kinunana, “naipaaykayo iti maymaysa a panggep—ti panangsapul kadagiti maikari ken mangikasaba iti naimbag a damag.”
Ti naintiempuan a balakad ti inted ni Max Larson iti Komite ti Paktoria maipapan kadagiti addang nga alaenda no tumaud dagiti parikut iti destinoda a misionero. “Dikay agsarsardeng,” inlawlawagna, “Risotenyo dagiti parikutyo.” Kasano? “Babaen ti pananggun-odyo iti kapanunotan ti Dios maipapan iti banag.” (1 Corihto 2:11-16) Impaganetget ni Larson ti kinapateg iti panagkararag ken ni Jehova a maipaay iti tulong ken impaganetgetna ti kanayon a panangipategda iti relasion ti misionero iti Dios.
Ni Lon Schilling iti Komite ti Watchtower Farms impaganetgetna ti kinapateg iti panangpataud ken panangtaginayon iti umiso a panagpampanunot. “Kasano ti panagandar ti panunotyo no mapasanguankayo ti maysa a karit wenno kasasaad a kasapulanna ti panagbalbaliw?” inimtuodna. “Kas siwayawaya nga agtignay, datayo bilang indibidual ti makimbiang ti pagbanagan dagiti bambanag.” Impabigbigna a “saannatayo a tengtenglen [ti Dios] babaen iti nailangitan a sistema a pangtengngel iti adayo a lugar.” Gapuna, dagiti misioneros dida koma inanamaen manipud iti Dios ti banag a nalablabes ngem ti nainkalintegan. Dagidiay a mangipakita a situtulok a paiturong ken Jehova a Dios babaen iti Saona, ti espirituna, ken iti organisasionna mabaelandanto a taginayonen ti umiso a panagpampanunot.
“Kasano kasayaat ti panangipategyo kadagiti bambanag?” Dayta a saludsod ti inyimtuod ni Ulysses Glass, maysa nga instruktor iti Gilead. Babaen iti agsasaruno nga ilustrasion, daytoy a nabayagen nga instruktor impakitana a ti “natimbeng, maawatan, di maisin a panangipateg ti kankanayon a mamagtalinaed [kadagiti misionero] a mangipamaysa iti interes iti Pagarian.” Babaen ti panangitag-ayna ti maysa a selio tapno makita ti isuamin, kinunana a nupay no daytat’ bassit ti pategna, ti pakausaran ti selio buklenna ti abilidadna nga agtalinaed sadiay agingga a makagteng iti papananna. “Agbalinkayo a kas dayta a selio,” kinunana, “ket agtalinaedkayo iti maysa a banag—ti rebbengenyo a mangasaba—agingga a sitatalged a makagtengkayo iti papananyo, ti ballasiw ti dakkel a rigat.”
Ni Jack Redford, maysa nga instruktor ti Gilead ket maysa met idi a misionero, insalaysayna iti maudi a palawagna dagiti dadduma a karit a sanguen ti kabbaro a misionero. Impaganetgetna a babaen iti kaadda iti naan-anay a panagtalek ken ni Jehova mapagballigianda ti aniaman a lapped, dayta man ti panagsuro iti kabbaro a pagsasao, ti kinamanagiliw, pannakipagnaed kadagiti dadduma a tattao, panangawat iti naiduma a kultura, wenno panangrisot iti pagdumaan iti personalidad. Ti punto nga inlawlawagna ket: “Dikay aramiden dayta babaen iti bukodyo a pigsa. Kuna ti 1 Corinto 3:9, ‘Ta katulongnatayo ti Dios.’” Impanamnamana kadakuada: “Aramidenyo ti pasetyo ket siguradokayo a ni Jehova aramidenna ti pasetna.”
“Ti Watchtower Bible School of Gilead ket sagut iti Dios!” Babaen kadagita a sasao ni Frederick W. Franz, ti presidente ti Sosiedad, linuktanna ti maudi a palawag iti agsapa. Ti Gilead School, kinunana, “isu ti mangipaay kadagiti tattao nga agserbi kas saksina, maysa a sibibiag a pammaneknek iti kinapudno a ti Pagarian ti Dios babaen ken Jesu-Kristo agan-andaren.” Kalpasanna impalagipna iti maika-81 a klase a ti panangipamaysada iti daytoy maymaysa a panggep ti mangikabil kadakuada iti dakkel a rebbengen “agsipud ta mapanda iti tay-ak iti daytoy karirikutan a tiempo iti historia ti sangatauan. Ngarud ni Jehova imparebbengna kadatayo ti panangiwaragawagtayo ti naimbag a damag dayta a Pagarian ken itudo kadagiti amin a sangatauan iti adayo a suli ti daga ti dalan ti Dios a pagkamangan.”
Ti rag-o ken panagyaman iti pribilehio a nagatender iti Gilead School ti nalawag a makita bayat ti panangawat dagiti estudiante a nagraduar kadagiti diplomada. Babaen iti nalawagen a panggepda kas misionero, ti maika-81 a klase iti Gilead, iti suratna iti Governing Body ken ti pamilia ti Bethel, inkeddengda ti agserbi a sisusungdo kadagiti intereses ni Jehova a Dios ken ‘mangidayaw iti naganna’ kadagiti nasnasion. (2 Samuel 22:50) Iti malem, a simmaruno iti panangiparang iti buya dagiti napalabas a destino, idiay Nueva York ken iti tay-ak ti misionero, ken kasta met iti makasair a moderno-aldaw a drama, ti programa ti Gilead nagserra babaen iti kararag ni Lyman Swingle.
Dagiti 23 nga estudiante a nagraduar in-inanamaenda unay a buyogen ti rag-o ti panagserbi a misionero. Apay? Kas inlawlawag ti maysa a nagraduar:
“Kinuna ni Jesus, ‘Ilakom ti amin nga adda kenka, umayka surotennak, . . . ken ipakaammon ti pagarian ti Dios.’ [Mateo 19:21; Lucas 9:60] Ti kalat ti panagserbi a misionero ti natignay babaen ti tarigagaytayo a tumulong iti ingganat’ kabaelantayo kadagiti adu iti naespirituan, sadinoman ti pakasapulantayo ken mabalin a kaaduan a pakausarantayo.”—Frederick Steiner, a naidestino idiay Guatemala.
Mabalinyo kadi a palawaen ti panagserbiyo iti Dios ket pagbalinen dayta a nabungbunga pay? No kasta, gagetanyo, ket kasta ti inaramid dagitoy nga estudiante a nagraduar tapno makakualipikarda iti tay-ak ti misionero. Ti kadadakkelan a rag-oda, ken kasta met rag-oyo, ti masarakanto iti naan-anay a biag iti dedikado a panagserbi ken Jehova.—Malakias 3:10.
[Kahon iti panid 22]
“Ti palawag ni Kabsat Larson ti pudno a nangipasagepsep kaniak ti pannakasapul ti situtulok a panagbalbaliw. Tapno matungpalko ti rebbengek kas misionero, masapul a liklikak ti ‘linalasag a panagpampanunot’ ket sapulek, ketdi, ti panagpampanunot ni Jehova ken ti Anakna, ni Jesus.”—Alain Saint-Jean, a naidestino idiay New Caledonia.
[Kahon iti panid 23]
“Ti palawag ni Kabsat Glass ti nangtulong kaniak a makakita iti kinapateg iti kaadda ti umiso a panangipateg. Ditay koma maisisiasi babaen kadagiti babassit a bambanag. Masapul a natimbengtayo.”—Humphrey Hermanus, a naidestino idiay Suriname.
[Kahon iti panid 24]
“Babaen ti panagimdeng ken ni Kabsat Redford, nakariknaak iti kinatalged ta ammok a dagiti parparikut a masabettayo ket saanda a kabbaro. Dadduma ti nakapagballigin kadakuada, ket makapagballigitayo met no agpannuraytayo iti bileg ni Jehova a saan nga iti bukodtayo a bileg.”—Veronica Lipham, a naidestino idiay Papua New Guinea.
[Kahon iti panid 24]
ESTADISTIKA TI KLASE:
Bilang dagiti pagilian a nairaman: 7
Bilang dagiti pagilian a destinoda: 12
Promedio nga edad: 30.3
Promedio a tawen iti kinapudno: 13.4
Promedio a tawen iti amin-tiempo a ministerio: 9.3
[Kahon iti panid 23]
COSTA, Alan ken Betty Estados Unidos
GANSLMEIER, Anton ken Rita Alemania
GONZALES, John ken Cynthia Estados Unidos
GRAULICH, Uwe ken Catherine Alemania
HERMANUS, Humphrey ken Ludmila Netherlands Antilles
JOHANSEN, Bard ken Ester Norway
KLOOSTERMAN, Otto ken Yvonne Netherlands
LARSON, Gary ken Annette Canada
LIPHAM, Mark ken G. Veronica Estados Unidos
SAINT-JEAN, Alain Francia
STEINER, Frederick ken Helen Estados Unidos
SZYMANSKI, Cynthia Estados Unidos
WILKE, David Estados Unidos