Iwaragawagyo ti Wayawaya!
TI MAIKALIMA BILION a tao ditoy daga ti naikuna a naipasngay idi Hulio 7, 1986. Ania a masakbayan ti masapul a sanguen daytoy maikalima bilion a tao, ken kinapudnona ti sangatauan? Adda aya aniaman a posibilidad a dagiti binilbilion iti sangatauan ti agangay ket tagiragsakendanto ti pudpudno a wayawaya? Sitatalek, maikunatayo ti wen. Ngem ania ti intay matarusan iti “wayawaya”? Kaipapananna kadi dayta ti lisiensia nga agaramid iti aniaman a kayat ti tunggal maysa? Saan, ta kas ti insurat ti maysa a nobelista nga Ingles idi maika-19 a siglo a ni Charles Kingsley; “Addada dua a wayawaya, daydiay palso a sadiay ti maysa ket siwayawaya nga agaramid ti kaykayatna, ken daydiay pudno nga isu ti siwayawaya a mangaramid iti rebbeng nga aramidenna.”
Ti tao magun-odannanto ti pudno a wayawaya babaen laeng ti panangaramidna ‘ti rebbengna nga aramiden.’ Ket ania ti rebbeng nga aramidenna? Idi adda ni Jesus ditoy daga, silalawag a kinunana nga addada dua a dadakkel a bilbilin—ti umuna, ti panangayat iti Dios iti amin a puso, kararua, isip, ken pigsa, ken ti maikadua, ti panagayat iti kaarruba kas ti bagina met laeng. (Marcos 12:29-31) Ti pudpudno a wayawaya ti magun-odan laeng dagidiay a mangipakpakita ti kasta a pudpudno a panagayat—panagayat iti Dios ken ti padada a tattao.—Juan 8:31, 32.
Ti kadi lubong itatta iparparangarangda dayta a kita ti ayat? Nakalkaldaang ta, saan. No awan ti ayat, ti palso a kita ti wayawaya ti rumangpaya. Iyesngaw dayta ti maysa nga inaagum, agwaywayas nga espiritu. Ipapilit dayta ti ‘panangaramidna iti kabukbukodanna nga aramid,’ a dina ipirpirit ti Dios wenno ti padana a tao. Daytoy nga espiritu lab-awanna ti indibidual nga agturong kadagiti komunidad, rasa, ken nasnasion. Ket bayat nga agtultuloy dayta siak nga umuna a kababalin, ti pamuon nga agpaay iti aniaman a wayawaya, ti aniaman a talna, ti aniaman a ragsak iti daytoy a daga, saanto a natibker. Laglagipenyo, kuna ni Jesus, “Ayatem ti kaarubam a kas iti bagim.” Ti kasta a panagayat iti kaarruba ti nasken nga agpaay iti panangtagiragsak iti pudpudno a wayawaya.
Ti organisasion ti Naciones Unidas ti nabuangay tapno wayawayaanna ti sangatauan babaen ti panangsandina ti saplit ti gubat iti “talna ken talged.” Iti maika-40 nga anibersariona, inwaragawag ti NU ti 1986 kas ti Internasional a Tawen ti Talna. Ngem nagbalin kadi daytoy a panangiwaragawag iti wayawaya nga addaan kadagiti sigurado a pananginanama iti talna? Napasardeng met laengen aya ti nakaam-amak a panaggastos kadagiti armas (nga itan ket agkidaren iti nasurok ngem $1,000 bilion iti makatawen)? Bimmasiten aya ti terrorismo ken ti panangbomba kadagiti kotse? Nagsardengen aya dagiti panagpipinnatay a maigapu iti relihion idiay Umamianan nga Irlandia, idiay Makintengnga a Daya, ken idiay Asia? Dagiti papangulo ti relihion makinamnamindan iti politika ken adu ti sasawenda maipapan iti talna. Ngem ti kalapati iti pudno a talna agparang a timmayaben iti nakangatngato a din matiliw ti NU ken dagiti relrelihion iti lubong.
Adda aya aniaman a grupo itatta a nangtallikuden iti kinaranggas, dagiti siak nga umuna a pamay-an daytoy a lubong? Wen, adda! Ti naipadto a “Prinsipe ti Kappia,” ni Jesu-Kristo, ti nangurnongen kadagiti managayat iti talna ‘manipud amin a tribo, pagsasao, il-ili, ken nasnasion.’ (Isaias 2:3, 4; 9:6, 7; Apocalipsis 5:9; 7:9) Pagragsakanda nga iti mabiiten ti Pagarian ti Dios babaen ken Kristo punasennanto aminen a kinadakes ket iyegnanton ti sangalubongan a paraiso iti talna, a sadiay ti pudno a wayawaya ti agsaknapton. Daytoy a grupo ket isuda ti pagaammo kas dagiti Saksi ni Jehova. (Daniel 2:31-35, 44; Isaias 43:10, 12; 65:17-25) Sangsangkamaysa, makiramraman dagitoy a Kristiano iti maysa a naragsak a panangiwaragawag nga inladawan dagiti ramramit iti urnos ti Jubileo iti kadaanan nga Israel. Iti tunggal maysa kadagiti 200 ken ad-adu pay a dagdaga iti intero a globo, siraragsak a pagtultulnogandan ti bilin ti Dios: “Iwaragawagyo ti wayawaya iti daga kadagiti amin nga agnaed kenkuana.” (Levitico 25:1) Nangngeganyon aya ken impangagyo dayta naragsak a panangipukkaw?