Dagiti Kustombre Wenno Prinsipio ti Biblia—Aniat’ Mangiturturong ti Biagyo?
TI LALAKI a Hapones a bumisbisita iti sabali a daga ti Asia nakellaat ti langana a kasla di mamati. Ti mangsangsangaili kenkuana, nga inusarna ti bukodna a chopsticks, pinidutna ti karne iti pagbugbugnoan a plato, nangpili iti kalalainganna a gerret, ket sana inkabil dayta iti malukong nga ayan ti inapoy ti sangailina! Idiay Japan, maibilbilang daytoy kas dakes a kababalin. Awan mangusar iti mismo a chopsticksna a mangala iti taraon manipud iti pagpunggaan malaksid no dagiti chopsticks ti umuna a pinagbaliktadda tapno daydiay murdongna a nausar iti ngiwatna ket saan a maidekket iti taraon. Ngem ti manangsangaili kenkuana kinapudnona ket sapsapulenna laeng ti panangpadayawna kenkuana, saan a tapno babainenna. Ti nakababain idiay Japan ket maysa a panangiparang iti panagraem iti daytoy a daga!
Anian ti panaggigiddiat dagiti kustombre! Anian nga awan kaes-eskanna ti adu kadagiti kustombre! Ket asinot’ makaibaga no aniada dagiti kasayaatan? Nupay kasta, dadduma a kustombre naibatayda kadagiti an-anito wenno ulbod a pannursuro. Kadagidiay ti konsiensiada ti nasanay iti Biblia, dagita a kustombre ti nalawag a masapul a liklikan. Aniat’ makatulong iti maysa a tartarigagayanna a paragsaken ti Dios a mangikeddeng no ania a kuskustombre ti rebbeng a salimetmetan ket sadino ti pagpatinggaanna? Ti panangsurot kadagiti prinsipio ti Biblia ti makatulong, ta ti maysa a Kristiano awatenna ti Biblia kas ti pagannurotanna sadinoman ti pagnanaedanna.
Panangiyaplikar kadagiti Prinsipio ti Biblia
Nawadwaden ti pannakaidemostrana a ti Sao ti Dios ti addaan dakkel a pannakabalin a mangtignay iti puso ti tao a napakumbaba ken mangiyeg nga ad-adda iti biagna a maitunos kadagiti pamay-an ti Dios. Kuna ni apostol Pablo a dagiti Kristiano a taga Tesalonica inawatda ti Sao ti Dios “kas pudno a sao ti Dios, nga agaramid met kadakayo a mamati.” (1 Tesalonica 2:13) Nagpigsa unay dayta a Sao a, kas intudo ti 1 Corinto 6:9-11, daytat’ namagtignay kadagiti adu idiay kadaanan a Corinto, nga agdindinamag ti kinalulokda, a panawan dagiti napalabas a kababalinda kas mannanakaw, mannakiabig, mammartek, ken homoseksual. Ti kadi Sao ti Dios ti agtigtignay met kadakayo? Dagiti prinsipiona ti mangiturturong iti biagyo iti naan-anay aginggat’ pakabalinanna, nga isut’ nakatulong kadakayo a mangilasin no aniat’ aramidenyo no maipasangokayo kadagiti lokal a kustombre?
No maminsan nalawag a ti maysa a kustombre ti direkta a maisuppiat kadagiti prinsipio ti Biblia. Kadagita a kaso daydiay makaammo kadagiti pagalagadan ni Jehova ken tarigagayanna ti agbalin a makaay-ayo kenkuana lisianna dagita a kustombre. Kas pangarigan, mabalin a ti kustombre ket daydiay panangpuor ti insenso iti maysa a pannakipamumpon tapno patalnaen daydiay natay wenno ti “pimmusay a kararuana” wenno tapno isut’ maikkan iti nasayaat a pammalubos ket pagbalinen a naragsak ti “kararuana.” Wenno mabalin a dagiti modelo a balbalay, iti TV, kotse, ken dadduma pay, ket mapuoranda a pagpagarupen nga isu ti panangipaay kenkuana iti pagtagiragsakanna idiay espiritu a disso. Nupay kasta, ti Kristiano a mamati iti kuna ti Biblia a dagiti natay ket “dida ammo ti aniaman” ammona a dagita nga ar-aramid ket naibatay iti ulbod a pammati ket iti kasta liklikanna ida.—Eclesiastes 9:5, 10; Salmo 146:4.
Nupay kasta, no ti kustombre ket saan a direkta a maisalungasing kadagiti prinsipio ti Biblia ngem pagbalinenna laeng nga ad-adda a narigrigat ti panagserbi a naan-anay ken Jehova a Dios, narigrigat nga ikabil ti pagbeddengan ken ipakita a dagiti prinsipio ti Biblia ti mangiturturong ti biagyo. Ti nangato unay a panangipateg ti edukasion ken ti material a panagballigi, ti kapaumpaut ti biag a panagpasakop kadagiti nagannak, ken ti panangpili dagiti nagannak ti asawa iti maysa ti sumagmamano kadagiti nasaknap a kustombre a mabalin a mangapektar ti pannakirelasion ti maysa ken ni Jehova. Kasano a maiyaplikar dagiti prinsipio ti Biblia kadagiti kasasaad a kas kadagitoy?
[Ladawan iti panid 3]
Panangpuor kadagiti modelo iti panamumpon