No Kasanotay a Maam-ammo ti Dios

PATIEN dagiti dadduma a tattao a ti Dios ket adda iti isuamin a lugar, adda kadagiti bituen ken planeta, iti bulalayaw, iti payak ti tumatayab, adda iti maysa a bulong ti ruot. Nupay kasta, isursuro ti Biblia a ti Dios, kas maysa a Persona, adda iti masinunuo a lugarna. Kinuna ni masirib nga Ari Salomon iti maysa a kararagna iti Dios: “Sika denggem ngarud ti kararagda ken ti ararawda sadi langit a pagnaedam.” Ket idiay libro ti Biblia nga Isaias, ti Dios mismo ti naadaw a kunkunana: “Ti langit isu ti tronok.”​—1 Ar-ari 8:49; Isaias 66:1.

Nupay ti Dios mismo ket saan a presente iti sangaparsuaanna, dagiti kababalin ti personalidadna naisarmingda sadiay. Kuna ni apostol Pablo idiay Roma 1:20: “Kadagiti bambanagna a di makita nga isuda ti agnanayon a pannakabalin ken ti Kinadiosna maipakaammoda a silalawag, ta maipakitada gapu kadagiti inaramidna manipud pannakaparsua ti lubong.” Umas-asping met ti insurat ni salmista David: “Dagiti langlangit ipalawagda ti dayag ti Dios; ket ti law-ang ipakitana ti aramid ti imana. Iti inaldaw iyesngawda ti sao, ket iti rinabii iparangda ti pannakaammo.”​—Salmo 19:1, 2.

Wen, tumangadkay laeng iti nabituen a rabii ket panunotenyo iti apagkanito ti aglaplapusanan a kinasirib ken pannakabalin a kasapulan iti panangparsua ken panangtaginayon iti unibersotayo! (Idiligyo iti Isaias 40:26.) Pudno unay, ti sangaparsuaan ket maysa a di maibus a gubuayan ti impormasion maipapan iti personalidad ti Dios. Ket ti tao nikaanoman dinanto maawatan a naan-anay ti aglaplapusanan nga iyaw-awengna a pammaneknek maipapan kadagiti kualidad ken galad ti Dios. Ti libro ni Job ipalagipna kadatayo: “Adtoy! Dagitoy isuda laeng dagiti paspaset a naruar kadagiti daldalanna, ket anian a nagbassit ti maysa a dayamudom a mangngegtayo kenkuana!” (Job 26:14) Adda ti pagsasao ti kadaanan a Sueko: ‘Ti apo ket dakdakkel ngem dagiti ar-aramidna.’ Gapuna, no ti sangaparsuaan ket dakkel, rebbengna a ti Dios ket dakdakkel pay; no ti sangaparsuaan iparangarangna ti kinasirib, rebbengna a ti Dios ket nasirsirib pay; no ti sangaparsuaan idemostrana ti pannakabalin, rebbengna a ti Dios ket ad-adda a dakdakkel pay ti pannakabalinna!

Ti Biblia​—Ti Libro ti Dios

No kasta ti sangaparsuaan itdenna ti adu nga impormasion maipapan iti Dios. Nupay kasta, ti kadi panagadal ti sangaparsuaan ibagana kadakayo ti nagan ti Dios? Ipanayag kadi dayta no ania ti panggep iti likudan ti sangaparsuaan wenno apay a pinalubosanna ti kinadakes? Ti sungbat dagita a salsaludsod kasapulanna ti ad-adda pay ngem basta panagadal ti namaterialan nga ar-aramid ti Dios. Nagasat ta, pinanggep ti Dios a ti kasta nga impormasion maipapan kenkuana ket naibalabala idiay Biblia.

Idiay ti Dios ket nikaanoman dina iparang kas maysa a di mailadawan, di madepinar a kinasaririt wenno maysa a siaadda a puersa wenno pannakabalin. Mabasatayo idiay Aramid 3:19 ti maipapan “ti persona ni Jehova.” Idi a ti Anakna a ni Jesu-Kristo, ket napagungar manipud kadagiti natay, kuna ti Biblia nga isut’ simrek idiay langit a mismo tapno agparang iti sanguanan “ti persona [iti literal, “rupa”] iti Dios.” (Hebreo 9:24, Kingdom Interlinear) Siempre, nikaanoman di inaw-awagan ni Jesus ti Dios a Dakkel a Puersa, Awan Inggana a Kinasaririt, wenno aniaman pay a dadduma a di nalawag a termino no isut’ agsasao maipapan kenkuana wenno agkarkararag kenkuana. Iti kasunganina, masansan nga isut’ aw-awaganna iti nailangitan nga Ama, maysa a termino a mangipanayag iti nauneg a kinasingedna iti Dios.​—Mateo 5:48; 6:14, 26, 32.

Ngarud ti Dios ket saan a maysa nga awan naganna a “Banag” no di ket maysa a Persona nga addaan nagan. Kuna ti Salmo 83:18: “Bareng maammuanda koma a siksika laeng nga agnagan Jehova, ti Kangatuan a ringbawam ti amin a daga.” Pudno, us-usaren met ti Biblia dagiti titulo wenno dagiti makailadawan a termino a maipaay ti Dios: “Mannakabalin-amin,” “Ari ti kinaagnanayon,” “manangisalakan,” “Pastor,” “Dati a Lakay,” “manangaywan,” “Naindaklan nga Instruktor,” “Naindaklan a Manangaramid,” “Bato.” (Ruth 1:20; 1 Timoteo 1:17; Isaias 43:11; Salmo 23:1; Daniel 7:9, 13, 22; 1 Pedro 2:25; Isaias 30:20; 54:5; Deuteronomio 32:4) Dagita a termino, nupay kasta, ipanayagda dagiti kanayonan pay a parupa ti personalidad ti Dios, kas iti kinamannakabalin-aminna, ti naayat a pannakaseknanna iti ilina, ken ti di matukod a kinasiribna.

Agsipud ta ti Dios ket maysa a Persona, isut’ addaan met kadagiti kaykayat ken di kaykayat​—agraman pay kadagiti rikrikna. Ibaga ti Biblia kadatayo no kasano ti panangayatna iti ilina (1 Ar-ari 10:9), pagrag-oanna ti ar-aramidna (Salmo 104:31), kagurana ti managdayaw iti ladladawan (Deuteronomio 16:22), ken masaktan riknana iti kinadakes. (Genesis 6:6) Idiay 1 Timoteo 1:11 isu met ti maaw-awagan “ti naragsak a Dios.”

Panangammo a Sisisinged iti Dios

Pudno, awan natauan nga isip nga umdas kadakkelna a manglaon iti intero a panangipanayag iti personalidad ti Dios. “O nagunegen dagiti kinabaknang ti sirib ken ti met pannakaammo ti Dios! Ania ketdin ti saan a pannakatukod kadagiti pakinakemna ken ti saan a pannakasukimat kadagiti kadawyanna! Ta ‘siasino ti nakaammo iti panunot ni Jehova, wenno siasino ti nangbalbalakad kenkuana?’” (Roma 11:33, 34) Nupay kasta, iti maysa nga addaan pammati, ti Dios ket agbalin kas pudpudno kas iti aniaman a sabali a persona. Ibaga ti Biblia kadatayo a ni “Noe nakipagna iti pudno a Dios,” a kasla ni Jehova ti adda iti sibayna. (Genesis 6:9) Ti Dios ti pudpudno met ken ni Moises a kasla isu ket “kitkitaenna Daydiay saan a makita.” (Hebreo 11:27) Ket naikuna met maipapan ken Abraham nga isu ti “gayyem ni Jehova.”​—Santiago 2:23.

Siempre, impanayag ti Dios a personal ti bagina ken ni Noe, Abraham, ken ni Moises. ‘Bueno, no impanayag ti Dios ti bagina kaniak iti kasta a personal a pamay-an,’ mabalin a kunaen ti dadduma, ‘isu met ti agbalin a pudpudno kaniak.’ Laglagipenyo, nupay kasta, a ni Noe, Abraham, ken ni Moises ket awananda ti Biblia. Dida naam-ammuan ti maipapan ken ni Jesu-Kristo wenno amin dagiti dinosdosena a padpadto a tinungpalna. Kas resultana, amin nga impanayag ni Jesu-Kristo maipapan iti Dios ket saanda a pagaammo. Iti sidong dagita a kasasaad, nesesita ken maiyanatup para iti Dios a mangaramid kadagita kasta a direkta a panangipanayag maipapan kenkuana.

Itatta, nupay kasta, agpadpada nga addaantayon ti Biblia ken ti panangmatmat kadagiti sinigsiglo a kaitungpalan dagiti padpadto ti Biblia. Addaantayo ti Ebanghelio a rekord ti panagbiag, ar-aramid, ken sasao ni Jesu-Kristo. Ken kinuna ni Pablo: “Ta kenkuana [ni Kristo] agtaeng ti naan-anay a nadiosan a kababalin a sibubukel.” (Colosas 2:9) Wen, addatay iti kasasaad a makaammo iti Dios nga addaan kinasinged a di pulos posible iti kaaldawan dagiti patriarka. Saan kadi nga aglaplapusanan iti panangsupapak daytoy iti kinapudno a saanna a direkta nga impanayag ti bagina kadatayo?

Ti Panagbasa ti Biblia Iyasidegnatayo nga Ad-adda iti Dios

Mabasatayo idiay Santiago 4:8: “Umadanikayo iti Dios, ket isu umasidegto kadakayo.” Babaen ti panagbasa iti Biblia, mabalintayon ti umadani iti Dios. Ngem kasano? Umuna, babaen ti panagbasa iti paset ti Biblia kada aldaw, maammuanyo dagiti baro a kababalin ken galad ti personalidadna. Bayat nga agbasbasakayo, maulit-ulit nga agsardeng ken saludsodanyo ti bagiyo: ‘Aniat’ naadalko maipapan iti Dios iti daytoy a bersikulo wenno paset?’ Mainayon pay, mabalinyo nga ikararag ti espiritu ti Dios nga agtignay kas maysa a “katulongan” iti pannakaawatyo ken iti iyaadaniyo iti Dios.​—Juan 14:26.

“Inap-apresiarko ti panangala iti nasaysayaat a pannakaawat ken Jehova kas maysa a persona,” kinuna ti maysa a babai a Kristiano a nakabasa iti interamente a Biblia. Isut’ maysa nga estudiante idiay Watchtower Bible School of Gilead, a mangsansanay kadagiti misionero a maipatulod iti intero a lubong. Ania a metodo ti panagadal ti Biblia ti maus-usar iti daytoy nga eskuelaan? Inlawlawag ti maysa kadagiti instruktor: “Nangrugikami iti proyekto a panagadal ti intero a Biblia kas maysa a grupo. Mangal-alakami iti sangapulo inggana iti sangapulo ket lima a panid kada aldaw, a kadua amin . . . dagiti estudiante a managsuksukimat ken makipaspaset iti panagsasaritami. No maipasangokami iti maysa a narigat a bersikulo, usigenmi (1) ti konteksto, (2) dagiti kasasaad idi panawen a pannakaisuratna, ken (3) ti kaipapanan dagiti kangrunaan a sasao iti teksto. Masansan nga isalsaludsodmi, ‘Aniat’ ibagbaga kadatayo daytoy maipapan ken ni Jehova ken dagiti kualidadda?’ Masarakanmi a daytat’ kanayon a mangibagbaga kadakami ti maysa a banag maipapan kenkuana.”

Nupay awanankay ti pribilehio nga agadal iti Biblia a pormal iti daytoy nga eskuelaan, dadduma kadagitoy a metodo ti panagadal ti mabalin nga agkurri a naimbag kadakayo ken iti pamiliayo. Kas pangarigan, kadagiti Saksi ni Jehova maiyugalin ti panagadal iti sumagmamano a kapitulo ti Biblia kada lawas a mainaig iti panaggigimong ti kongregasionda. Apay a dikayo suroten daytoy nga eskediol ti panagbasa ti Biblia kas maysa a pamilia? Mainayon pay, agipabpablaak ti Watch Tower Society kadagiti katulongan ti panagsirarak, kas ti Aid to Bible Understanding ken ti New World Translation Reference Bible, a makatulong kadakayo kadagiti naririkut a paset ti Biblia.a Maysa a regular a programa iti panagbasbasa iti Biblia ti makatulong iti dakkel iti panangipategyo iti personalidad ni Jehova.

Mabalinyo met ti agpili iti maysa a paset ti Biblia nga addaan partikular a panangawis kadakayo. No, kas pangarigan, pilienyo nga adalen ti 17 a bersikulo idiay Salmo 86:1-17, makakitakayo ti di kumurang 15 a kababalin iti personalidad ti Dios: Isu ti naimbag, sisasagana a mamakawan, aglaplapusanan iti kinamanagayat, sidadaan a mangsungbat kadagiti kararag, awan pakaipadaanna kadagiti didiosen, awan pakaipadaanna kas maysa a manangpartuat a managaramid, maysa a soberano nga agturay, naindaklan a managaramid kadagiti nakaskasdaaw a bambanag, manangispal ken patay, manangngaasi, managparabur, naanat nga agpungtot, aglaplapusanan iti kinapudno, maysa a katulongan, ken manangliwliwa. Ania pay ti nasaysayaat a kalat ngem ti panangpadpadas a maammuan ti Manamarsuayo?

Dagiti Dadakkel a Gunggona iti Panangammo iti Dios

Ti pananggun-od iti pannakaragpat iti ultimo a kalat iti biag nga agnanayon ket saan laeng nga isu ti maysa kadagiti gunggona iti pannakaammo iti Dios. (Juan 17:3) Mainayon pay, adda met ti gunggona a maaddaan iti inaldaw-aldaw a kadua a mangaywan kadakayo ken kas katibker ti maysa a bato. (Salmo 18:31) Idi narikna ni Ari David a nalikmut kadagiti kabkabusor ken mapadpadagsenan kadagiti parikutna, nasarakanna ti Dios nga isu ti kakaisuna a pudpudno a katulonganna. Gapuna kinunana: “Iyallatiwmo ta awitmo ken ni Jehova ket saranayennakanto. Dinanto ipalubos a magaraw ti nalinteg.”​—Salmo 55:22.

Uray met dakayo, mabalinyo a tagiragsaken ti kasta a pannakirelasion iti Dios, no ikkanyo laeng ti tiempo ti panangammo kenkuana. Saan unay a narigat dayta. Pagreggetanyo a basaen ti Saona. Makitimpuyogkayo kadagidiay ti biagda idemdemostrada nga ammoda ti Dios, kas kadagidiay nangiyeg kadakayo iti daytoy a pagbasaan. Umawagkayo ken ni Jehova iti kararag. Ta ti Dios ket saan a maysa nga impersonal a puersa nga ipatulengna dagiti panagikkisyo. Isut’ maysa a sibibiag a Dios ken “Managdengngeg iti kararag.” Ken “no isu sapulem, isu masarakamto.”​—Salmo 65:2; 1 Cronicas 28:9.

[Dagiti Footnote]

[Ladawan iti panid 5]

Impanayag ti Dios a personal ti bagina ken ni Noe, Abraham, ken ni Moises

[Ladawan iti panid 7]

Ti sangaparsuaan ket maysa a di maib-ibus a gubuayan ti impormasion maipapan iti personalidad ti Dios