Ti Biag ken Ministerio ni Jesus

Sinagidna ti Pagan-anayna

TI DAMAG ti panagsubli ni Jesus manipud Decapolis ti dimmanon idiay Capernaum, ket nagtataripnong ti dakkel a bunggoy idiay igid ti baybay tapno isu ti abrasaenda. Awan duadua nangngeganda a pinaulimekna iti bagyo ken inagasanna dagiti nagunggan ti sairo a tattao. Itan, idi isut’ dumsaag, isudat’ nagaribumbong kenkuana a magagaran ken dakkel pananginanamada.

Maysa kadagidiay magagaran a makakita ken ni Jesus isu ni Jairo, a pangulo iti sinagoga. Isut’ nagrukbab kadagiti saksakana ket nagpakpakaasi unay: “Ti anakko a balasang ngangngani matay. Umayka kadi ket ipataymo kenkuana dagiti imam tapno umimbag ket agbiag koma.” Yantangay isut’ kakaisuna nga anakna ken agtawen laeng ti 12, isut’ nakapatpateg unay ken ni Jairo.

Ket ni Jesus nakikuyog kenkuana, ket simmurot kenkuana dagiti umariwekwek a tattao, nagturongda idiay balay ni Jairo. Mabalin a mailadawantayo ti ragsak dagiti tattao bayat nga agur-urayda manen iti sabali pay a milagro. Ngem ti atension ti maysa a babai a kadua ti umariwekwek ti naipamaysa iti bukodna a nakaro unay a problema.

Iti 12 a naunday a tawtawen daytoy a babai ti agsagsagaba manipud panagbulos ti dara. Isun ti napan iti agsasaruno a doktor, a nangbusbos ti amin a kuartana iti panagpaagas. Ngem isut’ saan a natulongan; imbes ketdi ad-adda ketdi a kimmaro ti parikutna.

Kas nalabit maapresiaryo, malaksid ti panangpakapuy unay kenkuana, ti sakitna ti makaibabain met unay ken makaipababa. Kaaduanna saan a sarsaritaen ti maysa iti publiko ti kasta nga an-anayen. Mainayon pay, iti sidong ti Linteg Mosaiko ti panagbulos ti dara pagbalinenna a narugit ti maysa a babai, ket asino man a mangsagid kenkuana wenno iti namantsaan-dara a pagan-anayna ket kasapulan ti inna panagbuggo ken pannakaibilang a narugit aginggana iti rabii.

Nangngegan ti babai dagiti datdatlag ni Jesus ket isu itan ti sinapsapulna. Gapu iti kinarugitna, isu ti immasideg a nakilinnetlet kadagiti umariwekwek iti pamay-an a di unay nadnadlaw, a pinakpakinakemna: “No koma mabalinko a sagiden uray ti pagan-anayna laeng maagasanakto.” Idi sinagidna nga agpayso, naigiddato a naabbatan kenkuana daydi ubbog ti darana!

“Siasino ti nangsagid kaniak?” Anian ti panangkigtot dagiti sasao ni Jesus kenkuana! Kasanona a naammuan? ‘Mannursuro,’ kinuna ni Pedro, ‘makitam a dagiti adu a tao iletendaka ken nagaaribongbongda kenka, ket kunam, “Siasino ti nangsagid kaniak?”’

Idi kumita iti aglawlaw tapno sapulenna ti babai, inlawlawag ni Jesus: “Adda nangsagid kaniak, ta nariknak nga adda rimmuar a pannakabalin kaniak.” Pudno, daytat’ saan a gagangay laeng a panangsagid, ta ti pannakaagas ti nangibunga iti panagsayasay ti pigsa ni Jesus.

Idi makita ti babai nga isut’ nadlawda, immay ti babai ket nagparintumeng iti sanguanan ni Jesus, a sibubuteng ken agpigpigerger. Ket imbagana iti sanguanan dagiti amin nga umili, ti kinapudno maipapan iti sakitna ken no kasano ti pannakapaimbagna.

Gaput’ pannakatignayna iti naan-anay a panangipudnona, siaasi a liniwliwa ni Jesus ti babai: “Anak, ti pammatim inagasannaka. Inka a sitatalna, ket maagasanka iti saplitmo.” Anian a nagsayaat a maammuan a Daydiay pinili ti Dios nga agturay iti daga ket maysa a naayat, manangngaasi a persona, nga agpadpada nga adda pannakaseknanna kadagiti tattao ken addaan pannakabalin a mangtulong kadakuada! Mateo 9:18-22; Marcos 5:21-34; Lucas 8:40-48; Levitico 15:25-27.

◆ Asino ni Jairo, ket apay nga immay ken ni Jesus?

◆ Ania a parikut ti adda iti maysa a babai, ket apay a ti iyaay ken ni Jesus a maipaay iti tulong ti narigat para kenkuana?

◆ Kasano a naagasan ti babai, ket kasanot’ panangliwliwa ni Jesus kenkuana?