“Agtalek ken Jehova” a Kumbension Distrito—Diyo Palabsen Dayta!
Tallo a makapnek, makagunggona nga al-aldaw iti pannakaisuro iti Biblia ken makaay-ayo a Nakristianuan a pannakitimpuyog ti agur-uray kadakayo iti “Agtalek ken Jehova“ a Kumbension Distrito dagiti Saksi ni Jehova. Kabayatan ti Disiembre ken Enero, 32 a kumbension ti naiyeskediul iti intero a Filipinas laeng, gapuna addanto maysa nga asideg iti pagtaenganyo. Planuen nga addakayo manipud iti panglukat a sesion a mangrugi iti 9:10 t.b. ti Biernes, ket agtalinaedkayo agingga iti pangserra a sesion iti malem ti Domingo.
Ti panglukat a sesion itampoknanto ti makaisuro a palawag a “Maysa nga Ili a Naisina Manipud iti Lubong.” Iti malem, ti prangka ken nabileg a balakad ti maiturongto kadagiti nagannak ken kalpasanna kadagiti agtutubo. Matulonganto dagiti agtutubo nga agsalukag a maibusor iti panagbiag a mabalin nga awagan iti doble a kabibiag. Kalpasanna maitampokto daytoy a banag iti makatignay-puso a moderno-aldaw a drama.
Iti bigat ti Sabado itampoknanto ti palawag iti dedikasion ken bautismo, kasta met iti instruksion kadagiti wagas a mabalin a pangipakitaantay iti panagtalek ken Jehova, kas pannakibagay iti tema ti kumbension. Ti “Responsable a Panagpasngay iti Daytoy Panawen ti Panungpalan” isuntot’ kangrunaan a palawag iti programa iti malem, a mangserranto iti maysa a symposium dagiti palawag iti tema a “Ti Sao ti Dios ket Nabiag.”
Ti programa iti Domingo itampoknanto ti palawag a “Karimonyo a Naan-anay ti Nakababain a Kurso ti Lubong,” agraman ti maysa a drama iti Biblia a naan-anay ti pannakakawesna a mangiyilustrar iti kinaganat dagiti panawentayo. Iti malem, ti miting publiko nga “Iti Nakabutbuteng a Panawentayo, Asino ti Pudpudno a Mapagtalkanyo?” isuntot’ maysa pay a kangrunaan a paset ti kumbension.
Makiumankayo kadagiti lokal a Saksi ni Jehova a maipaay iti oras ken lugar iti maysa a kumbension a kaasitgan kadakayo.