Dagiti Saludsod Manipud Kadagiti Managbasa

◼ Idi adda iti kayo a pagtutuokan, impukkaw ni Jesus: “Diosko, Diosko, apay a binaybay-annak?” Isu aya ti nagkurang iti pammati, a pinatina a ti Dios ti nangpanawen kenkuana?

Apaman a mabasa dagitoy sasao idiay Mateo 27:46 wenno Marcos 15:34, impato dagiti dadduma nga idi naipasango ni Jesus iti nakasasaem nga ipapatay, nagduadua iti panagtalekna iti Dios. Kuna dagiti dadduma a daytoy ti natauan laeng a rikna ni Jesus, maysa a maawatan nga ikkis ti pannakapaay ti maysa a tao iti lasag ken dara nga agas-asug. Adda naimbag a rason, nupay kasta, a kumita iti labes ti natauan a panangtingiting nga ibasar laeng kadagiti makinruar a langana. Nupay awan kadatay itatta ti makaammo a sigsigurado iti amin a nairaman iti dayta a panagikkis ni Jesus, adda dua a mabalbalin a motibo nga intay imutektekan.

Pagaammo unay ni Jesus nga isu ti “mapan idiay Jerusalem ken aglak-am kadagiti adu a banag; . . . ken matay ken agungar iti maikatlo nga aldaw.” (Mateo 16:21) Idiay langit napalpaliiw ti Anak ti Dios ti linak-am uray pay dagiti imperpekto a tattao a makatuok nga ipapatay bayat a salsalimetmetanda ti kinatarnawda. (Hebreo 11:36-38) Gapuna awan rason a pamatian a ni Jesus​—maysa a perpekto a tao ket kemmegen ti buteng iti adda a naipasango kenkuana; wenno ti ipapatay iti maysa a kayo ti mangisingasing kenkuana a ni Amana ti nangilaksid kenkuana. Ammo a nasapsapa ni Jesus no “ania a kita ti patay ti ipapataynanto,” kayatna a sawen, ti ipapatay babaen iti pannakailansa. (Juan 12:32, 33) Isu met ti sigurado, nga iti maikatlo nga aldaw isunto ti mapagungar. Kasano, ngarud, a maikuna ni Jesus nga isu ti binaybay-an ti Dios?

Umuna, mabalin a kayatna a sawen dayta iti limitado a kaipapanan nga inikkat ni Jehova ti pannalaknibna iti Anakna tapno masuot ti kinatarnaw ni Jesus aginggana iti pagpatinggaanna, maysa a nakasasaem ken nakababain nga ipapatay. Ngem ti panangipalubos ti Dios ken ni Jesus a matnag iti panagpungtot dagiti kabusor nga iturturong ni Satanas dina impamatmat a naan-anay a nabaybay-an. Intultuloy nga impakita ni Jehova ti ayatna ken ni Jesus, kas pinaneknekanna idi maikatlo nga aldaw idi pinagungarna ti Anakna, a pagaammo ni Jesus a mapasamak.​—Aramid 2:31-36; 10:40; 17:31.

Nainaig iti pasamak isut’ mabalbalin a maikadua a rason kadagiti insawang ni Jesus bayat nga adda iti kayo a pagtutuokan, a babaen ti panangusarna kadagitoy a sasao tungtungpalenna ti maysa a propetiko a mangipamatmat iti kinamesiasna. Sumagmamano nga oras sakbayna imbaga ni Jesus kadagiti apostolna dagiti bambanag a mapasamak “kas adda a naisurat maipapan kenkuana.” (Mateo 26:24; Marcos 14:21) Wen, kayatna nga itungpal dagiti bambanag a naisurat, agraman dagiti bambanag idiay Salmo 22. Mabalin a makitayo a makailawlawag ti panangidilig iti Salmo 22:7, 8​—Mateo 27:39, 43; Salmo 22:15​—Juan 19:28, 29; Salmo 22:16​—Marcos 15:25 ken Juan 20:27; Salmo 22:18​—Mateo 27:35. Ti Salmo 22, nga isut’ nangted kadagiti adu a naimpadtuan a mangipamatmat kadagiti kapadasan ti Mesias, ti nangrugi: “Diosko, Diosko, apay-apay a binaybay-annak?” Gapuna, idi impukkaw ni Jesus ti kas iti inaramidna, isut’ mangnaynayon iti rekord dagiti padto a tinungpalna.​—Lucas 24:44.

Di namati ti salmista a ti Diosna ti nangilaksid wenno nangbaybay-a kenkuana, ta intuloy a kinuna ni David a ‘iparangarangnanto ti nagan ti Dios kadagiti kakabsatna,’ ket ingunamgunamna kadagiti dadduma nga idaydayawda ni Jehova. (Salmo 22:22, 23) Kasta met, ni Jesus, a makaammo un-unay iti Salmo 22, ti addaan met rason nga agtalek a ti Amana ti kaskasdi a nanganamong kenkuana ken agayat kenkuana, agpapan pay panangipalubos ti Dios kenkuana a lak-amen ti kayo a pagtutuokan.