Ti Kaiyulogan dagiti Damdamag
Putahe iti Didigra
“Bayat iti immuna nga al-aldaw iti telebision, ti kinaranggas saan unay a mailadladawan ken saan a napudno a kas itatta,” kuna ni Dr. Paul Wilson iti Australian Institute of Criminology. Nupay kasta, iti panangdeskribirna no ania ti ibilangna a putahe iti sosial a didigra ken anarkia, kinuna pay ni Wilson: “Itan, agayusen ti dara manipud kadagiti sugsugat ti bagi ket ti ipapatay ti mabuyan bayat ti panagpaut ti kinaranggasna. . . . Dagiti tin-edyers mapapatayda ken mapugsat ti angesda a main-inot manipud iti naiwa a tengnged ket ti ipapatayda ti pagay-ayat nga alaen dagiti kamera.”
Iti artikulona a nagparang iti The Sydney Morning Herald, ni Dr. Wilson ti nagkomento maipapan iti rigat dagiti reporter iti pagiwarnak a nangala ti ladawan iti paginteresan iti publiko iti Australia maipapan iti awan-darana a coup dʹetat iti asideg a Fiji. Ti rason? “Ti kinaranggas ti paguadan iti moderno a paglinglingayan,” kuna ni Wilson. Umiso ti padamag dagiti TV ken ti pagiwarnak, naannad a nausig, ken pudno, ngem “awan dagiti kankanayon a rummuar a ladladawan iti kinaranggas iti telebision ken dagiti parapo iti pagiwarnak a mangdeskribir kadagiti panagderraaw,” inlawlawagna.
Anian a nagsayaatan ti pannakaibagay daytoy umad-adu a derrep iti pananglinglingay iti kinaranggas iti deskripsion iti Biblia maipapan kadagidiay agbibiag “iti maudi nga al-aldaw” iti agdama a sistema dagiti bambanag! Iti daytoy napeggad a maudi a kaputotan, nadeskribir dagiti tattao nga “awan panagteppelda, nauyongda, gumurgurada kadagiti naimbag.”—2 Timoteo 3:1, 3.
Monogamia Wenno Poligamia?
Rebbeng kadi nga awaten ti iglesia dagiti miembro nga addaan iti nasursurok ngem maysa nga asawa? Tapno masungbatan daytoy a saludsod, ti Iglesia Anglicano idiay Uganda ti nangtuding iti maysa a grupo a mangadal iti “poligamia ken ti Nakristianuan a pamilia.” Ti Ecumenical Press Service ipadamagna a, sigun iti maysa a miembro iti maysa a panagadal iti grupo, ni Obispo Christopher Senyonjo, ti kaadda iti ad-adu nga asawa saan laeng a maawat no di ket makagunggona pay. Apay a kasta ti mariknana? Ti poligamo a panagasawa, kunaenna, makatulong a mangpasardeng iti panagsaknap iti sakit nga AIDS. Kangrunaanna, kunana a ti poligamia ket saan nga inkapilitan kadagiti Kristiano, a kunkunana a ni Kristo “pagbalinennanto a nasam-it nga arak dagiti dakes ken awan ragsakna a panagasawa, dayta man ti monogamo wenno poligamo.”
Kaskasdi, nalawag ti panangipakita ti Biblia a ni Jehova a Dios, ti Namunganay iti monogamo a panagasawa, di umanamong iti dayta. Pinaltiinganna ni apostol Pablo a mangisurat: “Tunggal lalaki adda koma asawana, ket tunggal babai adda koma asawana.” (1 Corinto 7:1) Nakapatpateg, ni Pablo kamaudiananna nagsurat maipapan iti kualipikasion dagidiay a mangipastor iti arban: “Masapul ngarud a ti obispo awan ti pakapilawanna, asawa ti maymaysa a babai.”—1 Timoteo 3:2, King James Version.
Gapuna, dagiti pudno a Kristiano idiay Africa, ken iti sadinoman, matmatanda ti poligamia iti pudno a kasasaadna—maysa a panangsalungasing iti linteg ti Dios.
Panangasaba Maipaay iti Maysa a Gatad
Dagiti papadi ken ti Iglesia Luterano iti Sweden ket saanda a naragsakan iti sueldoda gapu ta, kas naipadamag, dagiti sueldoda ket “nababa no idilig kadagidiay a naibayad kadagiti propesion dagiti nababbaba ti adalda wenno pannakasanayda.” Nupay kasta, sigun iti serbisio ti pagiwarnak iti World Council of Churches, sumaysayaaten dagiti bambanag. Kalpasan iti “napaut ken ngangngani napinget a kampania, dagiti papadi nabiit pay a nagun-odanda ti 40-oras a lawas ti panagtrabaho. Ngem no ngay kasapulan dagiti Sueko ti tulong dagiti papadi kalpasan ti oras ti trabaho? Ti baro a tulagan maipapan iti trabaho ipanamnamana met ti sueldo iti overtime a maipaay iti kanayonan nga oras iti panangipastor. Ti kasta a sueldo iti overtime ti mainanama a mangnayon iti tinawen a sueldoda iti 10 agingga iti 12 porsiento.
Maisuppadi iti pakaseknan dagiti Sueko a papadi maipaay iti nasaysayaat a sueldo a maipaay iti panagserbida, idi imbaon ni Jesus dagiti ad-adalanna a mangasaba, imbagana kadakuada: “Ti inawatyo nga awan bayadna, itedyo nga awan bayadna. Dikay agbalon iti balitok, uray pirak, uray cobre kadagiti barikesyo.” (Mateo 10:8, 9) Ania ti kayatna a sawen? Ti naimbag a damag ti Pagarian saan koma a maaramid a komersio, wenno mausar man dayta a maipaay iti inaagum a personal a pagimbagan. Impangag dagiti adalan ti panangiturong ni Jesus, ket naibanag ti ministerioda. Apay? Agsipud ta tinaginayon ida ti Dios iti ministerioda.