Ti Biag ken Ministerio ni Jesus

Maysa a Leksion iti Pammakawan

KAAWATAN a ni Jesus kaskasdi nga adda pay laeng iti balay idiay Capernaum a kadua dagiti adalanna. Pakisarsaritaanna kadakuada no kasano iti panangtaming kadagiti di pagkikinnaawatan kadagiti agkakabsat, gapuna insaludsod ni Pedro: “Apo, mamin-anonto a pakawanek ni kabsatko no makabasol kaniak?” Gapu ta insingasing dagiti Judio a narelihiusuan a mannursuro ti pammakawan agingga iti mamitlo a daras, nalabit impato ni Pedro a kinamanagparabur unay idi nga insingasingna: “Agingga iti mamimpito?”

Ngem ti intero nga idea ti panagidulin ti kasta a rekord ti di umiso. Ni Jesus kinorehirna ni Pedro: “Saanko a kuna kenka nga, Aginggat’ mamimpito, no di ket, Agingga iti mamimpitopulo-a-pito.” Ipakpakitana nga awan ti maikabil a pagpatinggaan iti bilang ti panangpakawan ni Pedro iti kabsatna.

Tapno maipasagepsep kadagiti ad-adalan ti obligasionda a mangpakawan, imbaga ni Jesus kadakuada ti maysa nga ilustrasion. Daytat’ maipapan iti maysa nga ari a kayatna ti makikuentaan kadagiti ad-adipenna. Maysa nga adipen ti naiyeg kenkuana a nakautang iti nakadakdakkel nga utang a 60,000,000 a denario (agarup $50,000,000). Awan pulos pamay-an a pannakapagbayadna iti dayta. Gapuna, kas inlawlawag ni Jesus, imbilin ti ari nga isu ken ti asawana ken dagiti annakna ti mailakoda ket iti kasta makapagbayad koma.

Idin daydi adipen nagparintumeng a nagpakpakaasi ken apona: “Anusannak kadi bassit ket bayadakto amin kenka.”

Natignay iti asi, ti apo ti siaasi a nangkanselar iti nakadakdakkel nga utang ti adipen. Ngem di pay nagbayag kalpasan ti panangaramidna iti kasta, intuloy ni Jesus, a daytoy nga adipen ti rimmuar ket nakakita ti padana nga adipen a nakautang laeng kenkuana ti 100 a denario (agarup $90). Ti lalaki ti nangtiliw iti padana nga adipen ket binekbekkelna, a kunkunana: “Bayadam ti utangmo kaniak.”

Ngem ti padana nga adipen awanan ti kuarta. Gapuna nagparintumeng iti sakaanan ti adipen a nakautanganna, a nagpakpakaasi: “Anusannak kadi ket bayadakto amin kenka.” Ngem saan a kas ti apona, ti adipen saan a manangngaasi, ket impaipisokna ti padana nga adipen iti pagbaludan.

Bueno, intuloy ni Jesus, dagiti dadduma nga ad-adipen a nakakita iti napasamak napan ket impulongda iti apoda. Ket iti kasta daydi apoda sipupungtot a pinaayabanna ti adipen. “Adipen a dakes,” kunana, “Pinakawanko ti amin nga utangmo, idi nagpakpakaasika kaniak. Saan aya a rebbeng met koma a kaasiam ti padam nga adipen, a kas met ti panangngaasik kenka?” Gaput’ pungtotna, ti apo inyawatna ti di manangngaasi nga adipen kadagiti agaywan ti pagbaludan agingga a mabayadanna met amin nga utangna.

Kalpasanna nagpatingga ni Jesus: “Kastanto met ti aramiden ni Amak a nailangitan no ti tunggal maysa kadakayo dina pakawanen iti pusona ni kabsatna.”

Anian a nagsayaat a leksion iti pammakawan! No iyar-arig iti nagdakkelan nga utang ti basol a nangpakawanan ti Dios kadatayo, aniaman a panagsalungasing a maaramidan ti maysa a Kristiano a kabsat a maibusor kadatayo ket pudno a nagbassit. Mainayon pay, ni Jehova a Dios ti nangpakawan kadatayo iti rinibribo a daras. Masansan, ditayo pay a pagaammo dagiti basbasoltayo a maibusor kenkuana. Gapuna, ditay aya mapakawan ti kabsattayo iti sumagmamano a daras, uray pay no addaantay ti lehitimo a pakaigapuan ti panagreklamo? Laglagipenyo, nga insuro ni Jesus idiay Sermon iti Bantay, ti Dios “pakawanennatayo kadagiti ut-utangtayo kas ti panangpakawantay kadagidiay nakabasol kadatayo.” Mateo 18:21-35; 6:12; Colosas 3:13.

◆ Aniat’ nangtignay ti panagsaludsod ni Pedro maipapan ti panangpakawan ti kabsatna, ken apay imbilangna ti panangisingasingna iti mamimpito a daras kas kinamanagparabur?

◆ Kasano a ti panagtignay ti ari iti panagpakpakaasi ti adipenna naiduma iti panagtignay ti adipen iti panagpakpakaasi ti padana met laeng nga adipen?

◆ Aniat’ maadaltayo manipud ilustrasion ni Jesus?