No Apay Dadduma Binaliwanda ti Relihionda

PARA iti maysa a tao a mangala iti naan-anay a panagbaliw ti relihionna, masapul nga isut’ addaan kadagiti naimbag a rason. Dagiti gunggona ket masapul a lab-awanda dagiti aniaman a disbentaha.

Ibilangyo aya ti panangammo iti Namarsuayo ken panangpatanor iti relasion kenkuana kas naimbag a rason? Isu dayta ti pudno kadagiti adu. Tapno makapataud iti relasion iti maysa, masapul nga ammuentayo a naimbag dayta a persona. Kas pangarigan, ti maysa a bassit nga ubing mabalin nga agbuteng nga umiggem iti ima ti maysa nga estranghero agingga nga isut’ maam-ammona. Kasta met kadatayo, masapul nga ammuentayo a naimbag ti Dios, sakbay a makapagtalektayo kenkuana. Pudno, kaaduan a relihion addaanda ti maysa a kangrunaan a daydayawen kas Dios. Ngem saan met aya a pudno nga iti kaaduan a tattao ti Dios ket maysa a kasla nakaliblibeg ken nakaad-adayu nga awan ti nalawag pannakadepinarna a personalidad? Gapuna kasanotayo ngarud a makiam-ammo kenkuana?

No kumitatay iti bambanag iti aglawlawtayo, agsidsiddaawtayo iti intay makitkita. Mailasintayo ti kinapintas, kinasaririt, ken pannakabalin. Ti namunganayan amin daytoy ti mamagsiddaaw iti adu, ngem adda maysa a libro a mangilawlawag a naimbag iti dayta. Isu dayta ti Biblia. Kadagiti panidna, maammuantayo a dagitoy a pagsidsiddaawan ket namunganayda iti Namarsua nga addaan nagan ken personalidad. Bayat a siaannad nga ad-adalentay ti Biblia, ti personalidad ti Dios ket agbalin a nakalawlawag kadatayo. Isut’ makitatayo kas maysa a Dios iti ayat ken dungngo. “Ti Dios isu ti ayat,” kuna ti Biblia. (1 Juan 4:8) Maallukoytayo iti daytoy nadayag a personalidad, a naan-anay ti pannakatimbengna iti ayat, kinasirib, kinahustisia, ken pannakabalin. Sumarsarunon ti maysa a nasinged a relasion.

Ni Misae ket naglasat iti kasta a kapadasan a pannakaallukoy ken Jehova. Isu ti nangilawlawag: ‘Kas maysa nga ubing, naisursuro kaniak a nagadu dagiti didios. Adda ti dios para iti danum, dios dagiti kaykayo, ken maysa para iti balay. Nupay nagduaduaak iti kaaddada, namatiak nga adda ti maymaysa a pudno a Dios. Ti nainget a pannakapadakkelko iti Buddhist-Shinto ti nangtignay kaniak a mangpanunot iti Dios kas maysa a nakabutbuteng, maysa a mangdusa gapu kadagiti dakes nga ar-aramid. Nupay adda tarigagayko a mapan iti simbaan ken mangammo ti maipapan iti Nakristianuan a Dios, ti nalikudak kas Buddhista ti nangmedmed kaniak. Kalpasanna immay ti maysa a babai iti balaymi ket intukonna ti panagadal ti Biblia kaniak. Babaen iti dayta a panagadal, naammuak a ti Dios ket adda naganna, nga isu ti Jehova. Maragsakanak a makaammo nga isut’ saan a Dios a nakabutbuteng no di ket naayat, a kanayon a mangbambantay kadatayo, saan a mangdusa, no di ket mangtulong. Tinarigagayak ti agserbi iti dayta a Dios, gapuna binaliwak ti relihionko.’ Isu ti mangtagtagiragsaken iti maysa a makapnek a pannakirelasion iti Dios iti agangay 29 a tawtawen.

Relasion a Mangted Wayawaya ken Namnama

Adda pay kanayonan a gunggona nga inawat dagiti adu babaen ti panangpataud iti relasion iti Dios. Bayat a dagiti dadduma a relasion ket bumabbaba ti pategda iti panagbiagda, adu ti nakagun-od iti wayawaya manipud pannakaadipen iti panagbuteng iti tao ken iti makapadagsen a kustombre nga awan pudpudno a kaipapananna ken pategna. Gapuna, nawayawayaanda manipud kadagiti makapadagsen a ngina ti panangsalimetmet iti langlanga ken tradisionda, nga isu ti kanayon a mangilumlumlom iti adu a pamilia iti utang. “Ti panagbuteng iti tao mangiyeg iti silo,” impakdaar ti Biblia, sana innayon ti pammasiguro a, “Ngem ti agkammatalek ken ni Jehova natalgedto.”​—Proverbio 29:25.

Ti sabali pay a wayawaya a magun-odan isu ti wayawaya manipud panagbuteng ken patay. Ti naadaw iti ngato a ni Misae ti nagkuna: “Idi agtawenak iti 22, nagsakitak iti tipos. Bayat nga addaak a nakaidda sadiay a kasla awanen ti puotko, mangmangngegko dagiti gagayyem ken dagiti miembro ti pamiliak a pagsasaritaandak a kaslattay inanamaenda a matayakon. Ngem agbutengak ken patay. Ti kakaisuna a panunotko ket tarigagayak ti agbiag, ket pagsayaatanna ta immimbagak. Babaen iti panagad-adalko iti Biblia iti kamaudiananna, nawayawayaanak manipud iti dayta a panagbuteng ken patay. Naammuak a ni patay ket maysa laeng a kinaawan.” Kuna ti Biblia: “Ngem dagiti natay, dida ammo ti aniaman.” (Eclesiastes 9:5, 10) No adda matay, adda ti nakaskasdaaw a namnama ti panagungar agsipud ta salsalimetmetan ti Dios dagiti natay a sibibiag iti lagipna.​—Juan 5:28, 29.

Adu pay a dadduma a nagad-adal ti Biblia ti nakasarak met a dagiti banag a naadalda ti nangted pudpudno a kaipapanan ken namnama iti panagbiagda. Daytoy ti maysa a rason no apay a naisurat ti Biblia, awan sabali, tapno “maaddaantayo koma ti inanama.” (Roma 15:4) Ti Buddhismo awan isursurona maipapan iti Namarsua wenno ti Dios. Maikunkuna a ti kinadakes ken panagsagaba ket kanayon nga adda ken agtultuloy pay iti agnanayon babaen iti awan inggana a panagrikrikos iti maulit-ulit a pannakaiyanak. Kaaduan a relihion iti Laud isursuroda a ti naimbag ket mapan idiay langit, maysa nga awan pihona a lugar, ngem no maipapan iti aramidenda sadiay, saanda a sigurado. Maisupadi kadagitoy a narelihiusuan a pilosopia a mangmangted bassit unay nga inanama wenno kaipapanan ti panagbiagda, isursuro ti Biblia a ti tao ket naaramid a mangtagiragsak nga agnanayon ti biag ditoy daga kas manangaywanna. (Genesis 2:15-17; Isaias 45:18) Iti kasta mabigbigtayo a ti biag ket rebbeng a mabusbos saan laeng nga iti panagurnong iti sanikua ken panagserbi iti bagbagitay a bukod no di ket tapno agserbi iti Dios ken kadagiti dadduma iti awan-agumna a pamay-an.​—Eclesiastes 12:13; Mateo 22:37-39.

Pananggun-od ti Kinapudno ken ti Pudno a Gagayyem

Dadduma ti mapilit a mangbaliw ti relihionda gapu iti dadduma a rason. Ti maysa kadakuada isu ti tarigagay a mangsapul iti narelihiusuan a kinapudno. Siempre, patien dagiti adu a tattao nga awan ti kasta a banag kas ti naan-anay a kinapudno ket, kas kunaen ti Biblia, ‘saanda nga agsukimat.’​—Salmo 10:4.

Ngem addada dagidiay mangaramid iti kasta a panagsukimat. Ni Sakae, nga agindeg iti sentro ti Japan, ti nagalla-allatiw manipud maysa a sekta a Buddhista a napan iti sabali iti 25 a tawtawen nga agsapsapul ti kinapudno. Isut’ di pulos a napnapnek. Bayat nga isu ti umasenso kadagiti responsable a saad iti tunggal organisasion, kanayon nga isut’ makakita kadagiti bambanag a makaitibkol kenkuana, kas ti komersialismo, imoralidad, ken pananggunggundaway. Isut’ nagdaliasat pay idiay India tapno sukimatenna dagiti nakairamutan ti Buddhismo kadagiti historiko a luglugar a nagnanaedan ken nangisursuruan ni Buddha. Isut’ napaay unay a makakita iti nagbassitan nga interes iti Buddhismo iti dayta a pagilian a Hindu. Ket iti pannakipatpatangna kadagiti Saksi ni Jehova, naibaga kenkuana a saan nga amin a relihion ket nagtaud iti Dios no di ket naggapu iti kabusorna, ni Satanas a Diablo.​—1 Corinto 10:20.

Daytoy ti nangkellaat ken ni Sakae, ngem daytat’ namagpanunot kenkuana ket nagimbestigar. Binasana ti libro a What Has Religion Done for Mankind?a ken dagiti dadduma pay a publikasion ti Biblia. Mangrugi a makitana a nupay ti Buddhismo, a maal-alagad idiay Japan, ket naglasat kadagiti adu a panagbalbaliw kadagiti adu a tawtawen, ti Biblia ket nagtalinaed a di nabalbaliwan iti rinibribo a tawtawen. Idi agangay nagunggonaan met laeng ti panagsukimatna. Nasarakanna ti kinapudno a nabayagnan a sapsapulen. Ti rag-ona ket kas ti rag-o daydiay tao iti pangngarig ni Jesus a nakakita iti nailemmeng a gameng iti maysa a talon: “Ket iti ragsakna gapu iti daytoy napan ket inlakona ti amin nga adda kenkuana ket gatangenna dayta a talon.”​—Mateo 13:44.

Dagidiay nakasarak iti narelihiusuan a kinapudno ipakpakitada ti “dungngoda” kadagiti dadduma nga agsapsapul iti dayta. (1 Pedro 3:8) Kinapudnona, ti kinabara ken pudpudno nga ayatda ti ummuna a makaatrakar kadagiti adu iti panagadal iti Biblia. “Gapu itoy mailasindanto a dakayo ti adalak, no adda ayatyo iti maysa ken maysa,” kuna ni Jesus. (Juan 13:35) Sadino ti pakasarakantayo iti kasta a naayat a kababalin itatta? Ni Kazuhiko Nagoya, a nagsurat iti binatogna a maipaay iti Daily Yomiuri iti Tokyo, nagkomento maipapan iti nabara a pannakatratona idi isut’ simmarungkar iti paggigimongan dagiti Saksi ni Jehova. “Iti is-isemda,” kuna ni Nagoya, “agparang a kasla nabigbigdak manipud iti napalabas a pannakigimong ket maragsakanda a makakita manen kaniak.” Ngem saan nga isu daytoy ti kaso. “Miningmingak a naimbag ti ruprupada ket nakitak nga isudat’ naananay nga estranghero kaniak.” Idi nagisem met dagiti dua a sabali a tattao, “maragsakanak unay,” malaglagip ni Nagoya. “Kasta ti wagas a panagisem dagidiay a tattao iti maysa nga estranghero, no isu ti masirpatanda iti aniaman kadagiti paggigimonganda.”

Ti kinabara ken ayat ket saan a resulta laeng dagiti tattao a makaammo a naimbag iti maysa ken maysa agsipud ta agtataripnongda a lokal iti regular a pamay-an. Imbes ketdi, dagitoy ti resulta iti kanayon a panagad-adalda ti Biblia ken ti panangiyaplikarda kadagiti prinsipiona iti panagbiagda. Adu a tattao a naawis a tumabuno iti 1985-86 a “Manangsalimetmet Kinatarnawna” a Kumbension Distrito dagiti Saksi ni Jehova kadagiti ganggannaet a dagdaga ti natignay unay iti ayat ken kinamanagpadagos nga impakita dagiti manangsangailida. Maysa nga agtutubo a pagassawaan manipud Japan a timmabuno ti kumbension idiay Filipinas ti nagkomento: “Idi a sangsangkamaysakami a nangkanta ti maudi a kanta, tunggal maysa ket agkankanta iti kabukbukodanna a pagsasao, dakami ti natignay unay. Nariknami iti damdamona no aniat’ kaipapanan ti pannakaitimpuyog iti maysa a pudno nga internasional a panagkakabsat.”

Kamaudiananna, adu ti mangibaga kadakayo kadagiti dakkel a panagbalbaliw nga inaramidda kas resulta ti panagad-adal ti Biblia ken panangiyaplikar iti dayta. Dagiti tattao nga addaan dati a personalidad kas panagduma ti karnero ken dagiti lobo ket makapagtitimpuyogda a naimbag itan a sitatalna kadagiti Nakristianuan nga asamblea. (Isaias 11:6) Dadduma ti managpungpungtot ken di nainggayyeman, managsimsimron ken managbutbutengda pay. Dadduma mariribukda kadagiti panagladingit. Kaskasdi dadduma ti managbabain ken agimbubukodan. Adu dagiti addaan dakes nga ugali a parmeken. Ngem babaen ti kinaanepda, a nabuyogan iti panagtarigagay a mangay-ayo iti Dios, nabalinanda ti nangaramid kadagiti dakkel a panagbalbaliw.

Dakayo met ngay? Adda aya aniaman kadagiti rason nga adda iti ngato a makaawis kadakayo a mangaramid iti panagbalbaliw? No kasta, paregtaendakayo a mangaramid iti nainget a panagadal iti Biblia. Ipakita ti Biblia nga amin dagiti ulbod a relihion dandanidan makidungpar iti Dios iti Biblia. Kas iti piloto a nadakamat iti napalabas nga artikulo, mabalin a kasapulan ti panangalayo ti insigida a panagtignay tapno maispalyo ti biagyo ken ti biag dagiti ay-ayatenyo. “Akaba ti ruangan ken nalawa ti dalan a mangiturong iti pakadadaelan,” kuna ni Jesus, “ket adu dagiti sumrek kenkuana; ta nailet ti ruangan ken akikid ti dalan a mangiturong iti biag.” (Mateo 7:13, 14) Wen, no magmagnakayo iti “akaba ken nalawa” a dalan, adda naimbag a rason a pangbalbaliwanyo iti relihionyo!

[Dagiti Footnote]

[Ladawan iti panid 5]

Ti nainget a pannakapadakkelko iti Buddhist-Shinto ti nangtignay kaniak a mangpanunot iti Dios kas maysa a nakabutbuteng

[Ladawan iti panid 7]

‘Akikid ti dalan a mangiturong iti biag’