Panagbalin nga Ordinado a Ministro iti Pamay-an ti Dios!
MAYSA a bisita ti mabalin a nagpanunot—nalabit nasdaawan pay—iti nangngegna. Ti eksena ket maysa a kumbension dagiti Saksi ni Jehova. Maysa a palawag ti maipalpalawag iti grupo dagiti tattao a ngangnganin mabautisaran. Iti pakasdaawan, imbaga ti nagpalawag kadagitoy a kandidato iti bautismo: “Ti kaaddayo iti daytoy a grupo dagiti kandidato iti bautismo ipamatmatna ti tarigagayyo nga agbalin a maysa nga ordinado a ministro iti Pagarian.”
‘Kasano a mabalin dayta?’ mabalin nga iyimtuod ti maysa a bisita. ‘Saan kadi a ti bautismo ket agpaay kadagiti tattao a kabbaro pay laeng a naisarang iti Kinakristiano—ken agpaay kadagiti ubbing? Saan kadi a dayta kasapulanna ti adu a tawtawen nga adut’ saklawenna a panagsanay ken edukasion tapno agbalin nga ordinado a ministro?’ Nalabit mabalin nga umasping iti dayta ti panagrasonyo. Ngem ti pudno a kunaen ti Biblia maipapan iti bautismo ken ordinasion ti mabalin a mangpasiddaaw kadakayo.
Sakbay a Mabautisaran ti Maysa
Umuna iti amin, ti bautismo ket saan nga agpaay kadagiti tattao a bassit pay ti pannakaammoda iti Nakristianuan a mensahe. Ti Biblia, idiay Aramid 8:12, ipakitana a dagiti tattao idi immuna a siglo ket nabautisaranda kalpasan a “namatida.” Ti Mateo 28:19 ipakitana met a ti maysa a tao masapul nga agbalin nga ‘adalan’ sakbay ti bautismo. Ket kasano ti panagbalin ti maysa a ‘manamati,’ wenno ‘adalan,’ (nasursuruan’)? Babaen iti naannad a panagadal iti Biblia! Iti kastoy a pamay-an, ti maysa a tao makagun-od iti umiso a pannakaammo ken Jesus ken ni Jehova a Dios. (Juan 17:3) Kalpasan laeng iti pannakagun-od iti daytoy a pannakaammo a ti maysa nga estudiante ket adda iti kasasaad nga usigenna ti panagpabautisar. Idi umuna a siglo, dagiti mabigbigbigen a Kristiano nangitedda iti kasta a pammilin kadagiti kabbaro a nakumberte.—Aramid 8:31, 35, 36.
Kadagiti kongregasion dagiti Saksi ni Jehova itatta, naaramid met dagiti umasping nga urnos para kadagiti interesado nga indibidual a mangtagiragsak iti libre a panagadal iti Biblia iti pagtaengan. Ti maysa a tao nga umawat ti pusona ti main-inot a mangapresiar iti masursurona. Isut’ matignay a mangiraman kadagiti kabbaro a nasarakanna a pammati kadagiti dadduma. (Roma 10:8-10) Isut’ mangrugi a tumabuno a regular kadagiti Nakristianuan a gimgimong, a sadiay makagun-od iti ad-adu pay a pannakaisuro iti Biblia. (Hebreo 10:24, 25) Ket kalpasan iti adu a lawlawas wenno bulbulan iti kastoy a panagadal, ti kabbaro a manamati makapataud iti tarigagay a mangsurot iti balakad idiay Roma 12:1: “Dawatek ngarud kadakayo kakabsat, gapu kadagiti kaasi ti Dios, nga ipaayyo dagiti bagbagiyo kas daton a sibibiag, nasantuan, ken makaay-ayo iti Dios, maysa a sagrado a panagserbi nga addaan iti pannakabalin nga agrason.”
Ti pannakaammo laeng, nupay kasta, dina pagbalinen ti maysa a kualipikado a mangaramid iti daytoy a dedikasion. Ti maysa masapul met nga agbabawi ken “agsubli.” (Aramid 3:19) Apay a kastoy? Sipaprangkesa, dadduma ti addaan iti imoral nga estilo ti panagbiag sakbay ti pannakaammoda kadagiti pagalagadan ti Dios. Dadduma ti nangipamaysa kadagiti inaagum nga ar-aramid. Ngem tapno maiparangda ti bagbagida iti Dios kas “nasantuan, makaayayo,” masapul a mangipakitada iti panagbabawi kadagiti napalabas a tigtignayda. Masapul a kagurada ti panangusarda iti biagda, pigsada, ken dagiti abilidadda iti di nainkasuratan nga ar-aramid. Ti kasta a pananggura masapul met a mapakuyogan iti umiso a panagtignay tapno pudno nga “agsublida,” wenno baliwanda ti wagas ti panagbiagda.
Tapno matulongan pay ti baro a manamati, dagiti Kristiano a papanglakayen iyurnosda ti makipagkita kenkuana ken mangbusbosda iti tiempo a mangrepaso kadagiti kangrunaan a sursuro iti Biblia. Daytoy, pay ti maysa a banag, a mangipasigurado kadagiti papanglakayen a ti mainanama a Kristiano nakagun-oden iti umiso a pannakaammo kadagiti pangpanggep ti Dios. Ken, siempre, ti repaso ket makatulong unay iti estudiante. Kas iti kasapulan, dagiti dadduma a bambanag a saanda a siuumiso a naawatan ket malawlawagan.
Ti bautismo kaaduanna a maaramid a mainaig kadagiti kumbension wenno asamblea dagiti Saksi ni Jehova. Kadagita nga okasion, maysa a direkta a palawag ti maited kadagiti kandidato iti bautismo. Dagitoy mapalagipanda a ti bautismo ket saan laeng a maysa a banag a pannakitimpuyog iti maysa a baro a relihion. Kinuna ni Jesus: “No siasinoman a tao ti mayat nga umay sumurot kaniak paglikudanna ti bagina ket alaenna ti kayona a pagtutuokan, ket surotennak.”—Mateo 16:24.
Dagiti kandidato mapalagipanda pay iti nauneg a kinapateg iti bautismo. Ti teksto idiay 1 Pedro 3:21 ket masansan a mabasa: “Isu a napaypayso a kaasping ti pammautisar, a mangisalakan ita kadatayo met (a saanna nga ikkaten kadatayo ti rugit ti lasag, no di kasla dawat ti maysa a nasayaat a nakem iti Dios,) gapu iti panagungar ni Jesu-Kristo.” Ditoy, ni Pedro idiligna ti bautismo iti kapadasan ni Noe a nakalasat kadagiti dandanum iti Layus. Nupay no dagidiay a dandanum ti napaneknekan a makapapatay kadagiti nadangkes iti daga, dagitoy ti napaneknekan a makaispalbiag ken Noe ta sitatalged a nangawit kenkuana iti arka. Kasta met, ti bautismo ‘isalakanna’ dagiti Kristiano manipud iti daytoy dakes a lubong. No adda maysa, maibatay iti pammatina iti gunggona iti ipapatay ken panagungar ni Jesu-Kristo, a mabautisaran, ti kasta a tao, kaiyariganna, ket adda iti “naisalakan” a kasasaad iti imatang ti Dios. Isut’ saanen a maibilang a paset daytoy dakes a kaputotan a naikeddengen a madadael.—Kitaenyo ti Aramid 2:40.
Ngarud, ti panagbautisar ket saan a maysa nga addang a masapul nga alaen gapu iti panagregget, kas ti masansan a mapaspasamak kadagiti relihiuso a gimgimong iti pannakaisubli. Ti mangipaganetget iti daytoy isu ti kinapudno a sakbay a maitaneb nga aktual ti maysa nga adalan, ti ministro a mangay-aywan iti bautismo ti mangisaludsod kadakuada kadagiti dua a makasukisok a salsaludsod. Dagiti sungbatda a wen ket “deklarasion iti publiko” iti pammatida iti subbot ken ti kinapudno nga indedikardan ti bagbagida nga awan ti kondisionna ken Jehova. (Roma 10:9, 10) Itan sisasaganadan a maipaay iti bautismo iti danum.
Ordinado kas Ministros iti Pagarian
Ti naan-anay a pannakaitaneb iti danum ket maysa a maitutop a simbolo iti dedikasionda iti Dios. Iti uneg ti danum, dayta ket kaiyariganna a kasda la natay iti dati a kurso ti panagbiagda. No rumkuasda iti danum, dayta kaiyariganna a kasda la sibibiagen iti baro a kurso ti managsakripisio iti bagi a panagserbi iti Dios.—Idiligyo iti Roma 6:2-4.
Kasano, nupay kasta, a ti pannakaordin ket maitutop iti tignay iti bautismo? Paliiwenyo ti kunaen ti M’Clintock and Strong’s Cyclopædia of Biblical, Theological, and Ecclesiastical Literature (1877), Tomo VII, panid 411: “Ti ordinasion kaipapananna ti pannakatuding wenno designasion iti maysa a tao iti ministerial a saad, dayta man ket addaan wenno awanan iti makatulong a seremonia.” (Kuami dagiti italiko.) Daytoy ti mangipabigbig nga awan ti kasapulan a nalabor a seremonia wenno sertipiko iti ordinasion tapno agbalin a maysa a Ministro a Kristiano.
Ngem isuro kadi ti Biblia daytoy? Usigenyo ni Jesu-Kristo. Awan duadua nga isu ti kangrunaan a ministro iti Dios. Nupay kasta, naaddaan kadi iti nalabor a seremonia ti ordinasion sakbay ti panangrugina iti trabahona a panangasaba? Addaan kadi iti sertipiko a mangilasin kenkuana a kas maysa a ministro? Maisupadi ketdi. Idi laeng kalpasan ti panagbautisarna iti danum nga inyebkas ti Dios ti anamongna ken Jesus kas ti Anakna ken inordinanna kas ti ministrona.—Marcos 1:9-11; Lucas 4:18-21.
Dagiti met ngay immuna-siglo a Kristiano? Awan ti damag iti aniaman a naparammag nga ordinasion dagitoy nga immuna a ministro a Kristiano. Ti rekord iti Aramid maulit-ulit nga ibagana iti pannakaaramid iti simple a bautismo dagiti manamati. Daytoy ti sarunuen iti naregta a pannakiramanda iti ministerio iti publiko.—Kitaenyo ti Aramid 2:41-47; 8:36-39; 22:14-16.
Ania ti pammaneknek dagita a ministros iti pannakaordinda? Kuna ni Pablo idiay 2 Corinto 3:1-3: “Baliwanmi manen aya nga italek dagiti bagbagimi met laeng? Wenno masapul ngata, a kas kadagiti dadduma, dagiti sursurat a panangitalek a maipaay kadakayo wenno iti biangyo? Ti suratmi dakayo met laeng, a naisurat iti pusomi nga ammo ken basaen dagiti isuamin a tattao. Maiparangarang a dakayo ti maysa a surat ni Kristo, nga inaywananmi a nasuratan saan nga iti tinta, no di ket iti espiritu ti Dios a sibibiag, saan a kadagiti taptapi a bato, no di ket kadagiti taptapi a puspuso a naglasag.” Ti epekto iti espiritu ti Dios kadagitoy a nasursuruan a puspuso makapataud iti baro a Nakristianuan a personalidad, a mabasa dagiti isuamin a makapaliiw. Daytoy ket umdasen a pammaneknek a ti Dios ti pudno a nangordin kadagiti makiramraman iti panangisuro kadagitoy kabbaro nga adalan.
Panagregta iti Ministerio
Kasta met itatta, ti maysa a ministro ket mabigbig babaen kadagiti ar-aramidna. Isut’ napasnek iti ‘panagregtana a mismo’ iti ministeriona. (Lucas 13:24) Matmatanna ti ministeriona a kas maysa a naindaklan a pribilehio manipud iti Dios. Saanna a laglag-anen dayta.—1 Timoteo 1:12-16.
Ti panangasaba iti pagarian isu ti kangrunaan nga obligasion dagita a ministros. Dagiti amin a dadduma nga ar-aramid masapul a limitadoda tapno ‘naan-anay a maibanagda iti ministerioda.’ (2 Timoteo 4:2, 5) Siempre, masapul nga aywananda a naimbag dagiti pisikal a kasapulanda ken kasapulan ti pamiliada. Nupay kasta, ‘kontentoda no addaandan iti taraon ken kawes.’ Saanda a palubosan dagiti personal a tarigagayda a manglapped kadakuada manipud iti ministerioda. (1 Timoteo 5:8; 6:7, 8; Filipos 2:20-22) Siguraduenda dagiti “napatpateg a bambanag.” (Filipos 1:10) Ikagumaanda a salimetmetan ti nasayaat nga ulidan ni Jesu-Kristo, a ti biagna ket naisentro iti panangasaba iti Pagarian.—Lucas 4:43; Juan 18:36, 37.
Nupay kasta, no nabautisaran ti maysa a tao kas ordinado a ministro, isut’ aktual nga adda iti panagserbi iti Dios iti umuna pay laeng nga addang. Pudno, isut’ nakagun-oden iti pannakaammo ken Kristo Jesus ken ni Jehova a Dios. Isut’ nakaaramid metten kadagiti adu a panagbalbaliw iti panagbiagna tapno ti Nakristianuan a ministeriona saan a matulawan. (2 Corinto 6:3) Ti kabbaro a nabautisaran a Kristiano, adu pay laeng nga irarang-ay ti aramidenna. Ti bautismona, a kaipapananna ti pannakaordinna, ket maysa laeng a napateg nga addang iti irarang-ayna kas maysa a Kristiano. (Filipos 3:16) Ngarud, tunggal ordinado a ministro masapul nga itultuloyna ti mangibangon iti panangapresiar kadagiti naespirituan a bambanag. Masapul a mangeskediol iti tiempo a maipaay iti personal a panagadal. Masapul a gundawayanna dagiti amin a probision iti kongregasion a panagtitipon. Masapul nga ikagumaanna a parang-ayen ti kualidad ti karkararagna, nga agbanag iti nasingsinged a personal a relasion iti Dios.—Lucas 6:45; 1 Tesalonica 5:11; 1 Pedro 4:7.
Inanamaenmi a dagitoy a Nainkasuratan a kapanunotan ket matulongandakayo nga umawat no apay a ti titulo iti unibersidad ket saan a kasapulan dagidiay nga agtarigagay nga agserbi kas ministros iti Dios. Nasurok a tallo a milion kadagiti Saksi ni Jehova ti simamatalek nga agserbi iti Dios kas dagiti ministrosna, a mangiwaragawag iti kinapudno a naibalabala iti Saona. Apay a dikay palubosan ti maysa kadakuada a tumulong kadakayo a manggun-od iti pannakaammo iti Biblia?
[Ladawan iti panid 29]
Sigun iti Biblia, ti maysa a Kristiano a ministro ket naordinan iti bautismo