“Siiyamankayo Koma”
“Ket agari koma kadagiti puspusoyo ti talna ken Kristo. . . ket siiyamankayo koma.”—Colosas 3:15.
1. Maibusor iti ania ti masapul nga annadan dagiti Kristiano iti daytoy awan panagyamanna a lubong?
DAYTOY nariribuk a maika-20 a siglo nadanonnan ti tukad a sadiay adu a tattao nalipatandan no kasano ti panagyaman. Dagiti manangapresiar a sao a “pangngaasim” ken “pagyamanan” ti mammamo a mangmangngegen iti tunggal panaglabas ti tawen. Ti kinaawan-panagyaman nagbalinen a paset “ti angin,” ti naagum nga espiritu a mangiturturay kadagiti tattao daytoy a lubong. (Efeso 2:1, 2) Nupay dagiti Kristiano ket “saanda a paset ti lubong,” masapul nga agbiagda iti dayta agingga nga adda pay laeng ti agdama a sistema dagiti bambanag. (Juan 17:11, 16) Gapuna, masapul nga agannadda a daytoy awan panagyamanna nga espiritu ket saan nga umakar kadakuada, a mangpabassit met ti kinamanagyamanda.
2. (a) Ania dagiti sumagmamano a pamay-an a mabalin pangiyebkas ti ad-adipen ni Jehova ti kinamanagyamanda kenkuana? (b) Aniat’ kasapulan iti labes dagiti berbal a panangiyebkas ti panagyaman?
2 Ti panangipateg iti kinaimbag ti Dios ti mabalin a maiyebkas masansan babaen iti pannakipatpatang kadagiti kapammatian. Kaaduan kadagiti dedikado a Kristiano ti nalabit agyamyamanda iti nailangitan nga Amada, a ni Jehova, gapu kadagiti kinaimbagna adu a daras iti agmalem, nga ar-aramidenda dayta babaen iti personal a panagkarkararagda. Ti kinamanagyaman ti maiyebkas met kadagiti panagkararag ti kongregasion ken bayat ti panagkanta kadagiti kanta ti Pagarian kadagiti Nakristianuan a panaggigimong. Siempre, naglaka unay ti panangiyebkas ti panagyaman babaen iti sao. Ni apostol Pablo, nupay kasta, pinaregtana dagiti kakabsatna idiay Colosas a saan laeng a sawen ti panagyamanda no di ket ipakita wenno idemostra ti kinamanagyamanda iti inaldaw-aldaw a panagbiagda. Insuratna: “Ket agari koma kadagiti puspusoyo ti talna ni Kristo, isu met a nakaawisanyo iti maymaysa a bagi. Ket siiyamankayo koma.”—Colosas 3:15.
Aglaplapusanan a Gapuanan ti Kinamanagyaman
3. Apay nga amintayo rebbeng ti panagyamantayo iti Dios?
3 Tunggal maysa a sibibiag addaan aglaplapusanan a gapuanan ti kinamanagyaman. Ti kangrunaan a rason isu ti panangtagtagiragsak iti biag a mismo, ta isuamin nga adda kadatayo wenno mabalin nga iplanotayo ti kellaatto nga agbalin nga awan pategna no mapukawtay ti biagtayo. Inggunamgunam ni salmista David kadagiti isuamin a tao a laglagipenda nga “adda kenka [Jehova a Dios] ti ubbog ti biag.” (Salmo 36:9) Ken pinalagipan ni apostol Pablo dagiti lallaki ti Atenas ti isu met laeng nga agnanayon a kinapudno idi nagsao iti Areopago. (Aramid 17:28) Wen, uray laeng ti kaadda a sibibiag ket aglaplapusanan a gapuananen ti kinamanagyaman. Ket ti panangipategtayo ti umadalem no malagiptayo dagiti pannakabalin nga inted ti Dios kadatayo—dagiti sentido iti panagnanam, iti panagrikna, iti panagangot, iti panagkita, ken iti panagdengngeg—tapno tagiragsakentayo ti biag ken dagiti kinapintas ti panamarsua iti aglawlawtayo.
4. Aniat’ mangsaluad kadatayo manipud pananglaglag-an laeng kadagiti bendision ti biag?
4 Kaskasdi, adut’ manglaglag-an kadagitoy naimbag a bambanag. Into laeng a maawananda iti maysa a pannakabalin, kas ti panagkita wenno panagdengngeg, santo malasin ti adu a tattao dagiti bendision a saanda nga impatpateg idi nasayaat ti salun-atda. Dagiti dedikado a Kristiano ti kankanayon a kasapulan ti panagannadda a dida maiyanud iti umas-asping a kinakurang ti panangapresiar. Masapul a pagreggetanda unay a mataginayon ti isu met laeng a siyayaman a kababalin kas impamatmat ti salmista a nagkuna: “Aduda, O Jehova a Diosko, dagiti nakaskasdaaw nga ar-aramid nga inaramidmon ken dagiti pampanunotmo nga agturong kadakami; saan a mabalin nga intarenen iti sanguanam. No palawagek ket sawek koma ida, aduda ngem ti mabalin a bilangen.”—Salmo 40:5.
5. Agpapan pay dagiti kanayonan a bendision ni Jehova iti Israel, ania a nakababain a kurso ti sinurotda?
5 Ti maika-106 a Salmo mangted iti poetiko a pananggupgop dagiti mannakabalin nga ar-aramid ni Jehova a maipaay iti ilina, ti Israel. Ti pannakilangen ti Dios kadakuada ket kanayonan dagiti kinaimbag ken gagangay a bendision ti biag nga imparukpokna nga en heneral iti sangatauan. Agpapan pay kadagitoy a pagbentahian, nupay kasta, intudo ti salmista a di intultuloy dagiti Israelita nga impakita ti panangipateg iti naisalsalumina a bendisionda. Kuna ti Sal 106 bersikulo 13: “Nalipatanda iti apagbiit dagiti aramidna; saanda a nagpannuray iti pammatigmaanna.” Saan, ti panaglabas ti tiempo ket saan nga isut’ nagin-inut a nangpabassit ti kinamanagyamanda, tapno kadagiti sumaruno a pinulpullo a tawtawen ket saandan a malaglagip ti naaramidan ti Dios para kadakuada. Imbes ketdi, nalipatanda iti a dagus—iti uneg laeng ti sumagmamano a lawas dagiti nakaskasdaaw a milagro ni Jehova a maipaay kadakuada idiay Nalabaga a Baybay. (Exodo 16:1-3) Nakalkaldaang, ta impakita dagiti masanguanan a pasamak a ti kinaawan panagyamanda nagbalin a regular a padron iti panagbiagda.
No Kasanot’ Panangipakita ti Kinamanagyaman
6. Apay a ti pagalagadan ti apagkapullo saan a makaparigat?
6 Detaliado, imbinsabinsa ni Jehova dagiti tallo nga espesipiko a pamay-an a pangipakitaan dagiti Israelita ti pudpudno a panangipateg iti kinaimbagna. Ti maysa masapul ti panangitungpalna ti panangted ti apagkapullo babaen ti panangipaayda ken Jehova ti apagkapullo ti amin a bunga ti dagada ken ti arbanda. (Levitico 27:30-32) Saan a pakarigatan daytoy, ta ti Dios isut’ responsable iti init, ti nabunga a daga, ti tudo, ken ti milagro ti panagdakkel. Gapuna, ti panangted ti apagkapullo kadagiti papadi idiay santuario ni Jehova ket praktikal nga ebkas ti kinamanagyaman ken Jehova a mismo.
7. (a) Ania a dakkel a paggidiatan ti adda iti nagbaetan ti apagkapullo ken panangted kontribusion ken ni Jehova? (b) Aniat’ impalubos daytoy nga ipanayag dagiti Israelita maipapan iti bagbagida?
7 Ti sabali pay a pagannurotan ket isut’ panagaramid ti kontribusion iti Dios a sadiay ti kantidad ket ikeddeng ti kababalin ti puso ti indibidual nga Israelita. Yantangay awan ti naikeddeng a kantidad, dagiti kontribusion ket isuda koma dagiti umuna a bungbunga—ti umuna kadagiti binukel, ti arak, ken ti de lana dagiti arban. (Numeros 15:17-21; Deuteronomio 18:4) Mainayon pay, inyurnos ni Jehova a ti ilina ket ‘dida mapilpilit a mangted’ ken itedda “ti kasayaatan kadagiti umuna a bungbunga.” (Exodo 22:29; 23:19) Mangted gundaway daytoy kadagiti Israelita nga ipakita ti panagyamanda ken Jehova iti aktual a pamay-an. Maipamatmatda ti kinauneg ti kinamanagyamanda babaen iti kantidad dagiti kontribusionda. Mangteddanto laeng aya ti sangaraay nga ubas? Wenno ti managparabur a pusoda tignayenna ida a mangted ti sangabasket? No kasta, tunggal tao wenno pamilia maidemostrada ti kinamanagyamanda a di mapilpilitan.
8. (a) Ania ti dua a gunggona nga impaay ti urnos ti panagadas? (b) Kasano a maidemostra ti kinamanagparabur ken kinamanagyaman amin dagidiay nairaman iti urnos ti panagadas?
8 Ti maikatlo a masinunuo a pamay-an a panangipakita ti kinamanagyaman ket maipapan iti sagana ti Dios iti panagadas. Iti panagani, addada paset a maibati a di mapaganian a maipaay kadagiti napanglaw. Saan laeng nga insuro daytoy ti pannakipagrikna ken konsiderasion kadagiti napanglaw no di ket impasigurado dagitoy a saanda nga agbiag kadagiti makapakapuy a padpadawat laeng nga awan panagregget wenno panangikagumaan iti biangda. (Levitico 19:9, 10) No kasano kadakkel wenno kawadwad ti maibati nga agpaay kadagiti napanglaw ti saan a naipiho. Ngem no dagiti Israelita a mannalon ti mangipakita ti managparabur nga espiritu babaen ti panangibatida ti nawadwad iti ig-igid ti taltalonda ket iti kasta mangipakpakitada ti pabor iti napanglaw, dayta ti mangipadpadayag iti Dios. (Proverbio 14:31) Naipabiang kadakuada a mangikeddeng no mangibatida ti akikid wenno nalawa a paset a di napaganian. Ngem nainget ti panangted ti Dios kadagiti instruksion maipapan iti kinamanagparabur babaen iti panangibagana nga aniaman a pinungo a nalipatan idiay talon ken aniaman a bunga a nabati iti kayo wenno kaubasan ti rebbeng nga agpaay kadagiti managadas. (Deuteronomio 24:19-22) Ket, dagiti managadas maidemostrada met ti bukodda a kinamanagyaman ken Jehova iti daytoy a probision babaen ti panangtedda ti apagkapullo kadagiti naadasda idiay lugar ti pagdayawanna.
Kinamanagparabur iti Puso?
9. Apay a dagidiay mangipakpakita ti naimut a kababalin kinapudnona saksaktanda met laeng ti bagbagida?
9 No mangted dagiti Israelita ti nawadwad a kontribusion, umapay ti bendision ni Jehova kadagiti balbalayda. (Idiligyo iti Ezequiel 44:30; Malakias 3:10.) Ngem agpapan pay aglaplapusanan dagiti anida, masansan agmintis panangtedda kadagiti kontribusionda. Gapuna nagusar ti Dios kadagiti panangipalagip babaen kadagiti ari wenno mammadto a mangriing manen ti kinamanagyamanda. Iti aktualmente, dagiti naimut nga Israelita ti mapukpukawan, ta saan a mabendisionan ni Jehova dagidiay mangipaidam kadagiti kontribusion a nainaig iti panagdayawna wenno kadagiti napanglaw.
10. (a) Ania dagiti naragsak a resulta dagiti panangipalagip ni Ari Ezekias iti kinamanagyaman? (b) Nagtalinaed aya dagitoy a kasasaad?
10 Iti maysa nga okasion, dagiti palagip ni Ari Ezekias ti nagbanag iti naragsak a 14-aldaw a rambak idiay Jerusalem. Napasublian a naespirituan dagiti umili. Umuna, dinadaelda amin a ramramit ti panagdayaw iti ladawan ken “inkabilda ida a pinempen. . . Ket idi ni Ezekias ken dagiti pangpanguluen immayda ket nakitada dagiti pinempen, binenditoda ni Jehova ken ti ilina nga Israel.” (2 Cronicas 30:1, 21-23; 31:1, 6-8) Ngem, nakalkaldaang, ta kalpasan dagita a maulit-ulit a panagriing, nagalus-os manen dagiti tattao iti kinaawan-panagyaman. Kamaudiananna, naibusanen ti pasensia ti Dios, ket pinalubosanna a makayawan ti ilina idiay Babilonia. Ti siudadda ken ti napintas a temploda ti nadadaelda. (2 Cronicas 36:17-21) Idi agangay, kalpasan ti pannakaisubli, nagbalin manen a serioso unay dagiti kasasaad a gapu itoy inyarig ni Jehova ti kinaimutda iti panagtaktakaw kenkuana!—Malakias 3:8.
11. Ania a prinsipio a naadal manipud historia ti Israel ti makagunggona kadagiti Kristiano nga agbibiag kadagitoy a panawen?
11 Ania a prinsipio ti maadal manipud iti agkarabiddut a historia dagiti Israelita? Daytoy: Agingga a ti kinamanagyaman ket nagtalinaed a napigsa iti puspusoda, siraragsak nga indemostrada daytoy babaen iti panangtedda ti “pinempen” ken Jehova. Ngem idi ti kinamanagyaman ti nalipatanen wenno bimmaba unay, ti naragsak a material a panangted ti pudno met a simmardeng. Ti kadi kasta a dakes a kababalin ti maipamatmat met dagiti dedikado a Kristiano itatta? Wen, ta ti natauan a kinaimperpekto ti kaskasdi nga adda pay met laeng kadatayo. Anian a maragsakantayo nga impailanad ti Dios dagiti pannakilangenlangenna iti Israel tapno datayo, nga agbibiagen iti panungpalan daytoy a sistema dagiti bambanag, ti makaadal ken magunggonaan kadagita!—Roma 15:4; 1 Corinto 10:11.
12. (a) Kasano a ti ili ni Jehova itatta addada iti kasasaad nga umasping kadagiti Israelita? (b) Ania a salsaludsod ti rebbeng nga iyimtuodtayo?
12 Kas kadagiti Israelita, ti ili ni Jehova itatta ti addaan adu a rason a maipaay iti kinamanagyaman. Datayo ti immawat met ti ad-adu a bendision ngem ti tagtagiragsaken dagiti padatayo a tattao. Kinapudnona, ad-adut’ ammotayo maipapan iti pangpanggep ni Jehova ngem iti ili ti Israel. Naammuantayo no kasano a sibubulos nga insakripisio ti Dios ti Anakna, ket siaammotayo kadagiti bendision nga iyeg daytoy kadagidiay addaan nasantuan nga anamongna. Ken itatta napribilehiuantayo a maadda iti naespirituan a paraiso, ta nanipud pay 1919, namartuaten ni Jehova ti grande a naespirituan a kasasaad a maipaay iti ilina. Wen, adut’ nainayon a rason kadagiti Saksi ni Jehova a maipaay iti kinamanagyamanda. Gapuna kasapulan nga isaludsodtayo: Kasano kapigsa ti kinamanagyamantayo iti Dios? Ken kasano a maipakitatayo ti bagbagitayo a siiyaman iti daytoy maika-20 a siglo?
Dagiti Moderno—Aldaw a Katupag
13, 14. Nupay dagiti Kristiano awandan iti sidong ti Linteg ni Moises, adda aya aniaman a katupag ti maadaw kadagiti maipapan iti linteg ti apagkapullo?
13 Dagiti Kristiano ti awanda iti sidong ti Linteg ni Moises a nangibalabala no kasanot’ panangidemostra ti kinamanagyaman iti Dios. (Galacia 3:24, 25) Ti “datontayo” a panagdayaw ken Jehova isu “ti agaon kadagiti bibbibig a mangipaduyakyak iti naganna.” (Hebreo 13:15) Daytoy, ngarud, ti kangrunaan a pamay-an a mabalin a pangipakita dagiti dedikado a Kristiano ti kinamanagyamanda iti Dios. Ngem dagiti makapainteres a katupag ti mabalin a maadaw manipud ti linlinteg maipapan ti apagkapullo, dagiti kontribusion, ken ti panagadas.
14 Ti apagkapullo kaipapananna ti panangted ti espesipiko a gatad ti maysa a kakapullo—ket awan ti mapagpilian iti daytoy. Umas-asping met, addada itatta espesipiko a bilin a nakasadag kadagiti isuamin nga adipen ni Jehova, nga awan met ti mapagpilian. Datayo ti masapul nga agtataripnong a regular, ken masapul nga ikaskasabatayo a publiko ti naimbag a damag ti Pagarian ni Jehova ken tulongan dagiti dadduma nga agbalin nga ad-adalan ni Kristo.—Hebreo 10:24, 25; Mateo 24:14; 28:19, 20.
15. Ania a manangipamatmat kadagiti managparabur a puso kadagiti moderno a tiempo ti katupag dagidiay ipanayag dagiti urnos ti kontribusion ken ti panagadas idi kadaanan nga Israel?
15 Laglagipenyo met, dagiti urnos ti kontribusion ken panagadas. Dagiti espesipiko a gatad ti saanda a naikeddeng. Kasta met, saan a nangikeddeng ti Kasuratan iti espesipiko a panawen a busbosen ti tunggal maysa a Saksi ni Jehova iti sagrado a serbisio. Ti kaadu ti oras nga ipaay iti panagadal ti Sao ti Dios ken panangaskasaba kadagiti dadduma ket maipabiang iti panangtignay dagiti managparabur, nabulos a puspuso. Umasping pay met, ti kawadwad dagiti material a kontribusion a maipaay iti pannakaiyadelantar dagiti intereses ti Pagarian ket maipabiang iti puso ti kada indibidual nga idiktar. Ti kauneg ti kinamanagyaman ti mangdeterminar no ti maysa kadagiti adipen ti Dios itatta ket yegna ti “pinempen” wenno ti laeng kalalainganna tapno makalusot laeng. (2 Cronicas 31:6) Kas iti kaso ti Israel, nupay kasta, bayat a dakdakkel ti panangidemostra ti maysa ti kinamanagyamanna, ad-adda met nga aglaplapusanan dagiti bendision nga awatenna manipud iti Dios.
Dagiti Pamay-an a Panangipakita ti Kinamanagyaman
16-18. Kadagiti ania nga espesipiko a pamay-an a maipakita dagiti dedikado a Kristiano a siiyamanda?
16 Maysa kadagiti direkta unay a panangidemostra ti kinamanagyaman ken ni Jehova ket isut’ pannakiraman iti amin-tiempo a ministerio. Ti aya kinamanagyamanmo nawadwad kadakkelna tapno ti pusom ti maaddaan ti kasta a panagtarigagay? Napaliiwen a naimbag a ti naballigi a payunir ket umuna a kasapulanna ti tarigagay nga agserbi ken kalpasanna dagiti umiso a sirkumstansia. No ti kinamanagyaman ti napigsa, ti makaiduron a tarigagay nga agserbi a naan-anay iti Dios ti bumurayok iti manangapresiar a puso. Kasta aya ti riknayo? Uray no ti agdama a sirkumstansiayo dina iraman ti pannakibiangyo iti amin-tiempo a ministerio, di kasapulan a sebseban daytoy ti espiritu ti panagpayunir. Mabalinyo ti mangted ti amin-puso a panangsuportar ken pammaregta kadagiti payunir.
17 No diyo kabaelan ti agpayunir ita, mabalinanyo kadi ti ag-auxiliary payunir sagpaminsan? Addada naisangsangayan a tiempo kada tawen nga iparparegta ti kongregasion Kristiano ti ad-adu-ngem-gagangay a panagregget iti panangaskasaba. Dagiti bulan ti kalgaw, kas pangarigan, ti kalalaingan nga agpaay kadagiti adu, ken iti Oktubre adda kanayonan a trabaho maipapan iti kampania ti suskripsion iti magasin. Maipapan iti napadakkel a tiempo maipaay iti sagrado a serbisio, pumudno ti prinsipio a ti kinamanagyaman mangpataud iti naparabur a pannangted.
18 Ti sabali pay nga espesipiko a pamay-an a panangipakita ti kinamanagyaman ket babaen iti panangsuportar iti teokratiko a programa ti panagbangon a maar-aramid iti intero a daga. Kadagiti adu a daga, mabangbangon dagiti baro a Kingdom Hall, ken dagiti agdama a halls ti mapalpalawa gapu iti pannakapekpekdan. Maar-aramid met dagiti baro nga Assembly Halls, ken addada mainaynayon a kasilpo dagiti Pagtaengan a Bethel ken dagiti pabrika. Anian a praktikal a pamay-an ti panangidemostra ti kinamanagyaman ken Jehova-ti panangitulong ti pigsa wenno kuarta tapno maaywanan dagitoy a proyekto ti panagbangon.
Ti Nagsayaat nga Ulidan ti Napanglaw a Balo
19. Aniat’ ad-adda a namagsiddaaw kadakayo maipapan iti daydiay napanglaw a balo a babai idiay templo?
19 Ti nalatak unay a pangarigan ti Biblia a panangipakita ti kinamanagyaman babaen iti naparabur a material a panangted ket isut’ maipapan daydiay balo a babai a sinalaysay ni Jesus. (Lucas 21:1-4) Mabalin a pagaammona a ti dua a sinsiliona a nagbassitan ti balorna ket bassit unay ti pakaiyaspinganna no maipapan iti material a pagimbagan ti templo ken dagidiay agserserbi sadiay. Ngem saanna a minatmatan ti templo ken dagiti papadi nga agserbi sadiay ket sana kinuna iti bagina: ‘Nasaysayaat ti panagbibiagda ngem siak wenno addaanda ti nasaysayaat a balay ngem ti nanumo a pagtaengak.’ Pudno, ti templo ti ad-adda a naluho ken nakapimpintas. “No kasano ti pannakaarkosna kadagiti nalibnos a batbato ken sagsagut.” (Lucas 21:5) Ngem daytat’ saan a manglapped iti balo a babai manipud panangtedna ti kontribusion. Kayatna nga ipakita ti bagina a siiyaman ken Jehova, saan a kadagiti tattao nga agserserbi idiay templo.
20. Kasanot’ panangipamatmattayo ti isu met laeng a makaay-ayo a kababalin kas iti impakita ti napanglaw a babai a balo?
20 Ti ili ni Jehova ti makaadal manipud iti daytoy nga ulidan. Kas ti napanglaw a balo a babai, ammoda a dagiti kontribusionda, dakkel man wenno bassit, ti maipapaayda iti Dios. Ken maipasigurado kadakuada babaen iti panangammo a ti naindagaan nga organisasion ni Jehova ti nasangal nga awan indibidual ti magunggonaan a pinansial. Dagiti al-alikamen ti Sosiedad ti naaramidda ken mapapaandarda tapno makabalan dagiti nagaget a managtrabaho tapno magun-odan ti kadakkelan a resulta iti addaan kualidad a panagaramid kadagiti Biblia ken katulongan ti Biblia ken panagserbi kadagiti intereses ti Pagarian. Dakkel ti pannakaigiddiat daytoy kadagiti iskandaloso a panagusar kadagiti maidondonar a kuarta a nabiit pay a maipadpadamag maipapan kadagiti sumagmamano a manag-ebanghelio iti telebision.
Dagiti Palagip iti Kinamanagyaman Makagunggona
21, 22. Dagiti naasi a panangipalagip ti rebbeng ania nga epekto ti tignayenna kadagiti manangapresiar a puso tapno maipakitatayo a siiyamantayo?
21 Kasapulan dagiti Israelita ti masansan a panangipalagip iti annongenda ken Jehova, nangnangruna iti pannakasapul ti panangidemostra ti espiritu ti kinamanagyaman. Kaaduanna, no maiyeg dagitoy a banag iti atensionda, maparissik manen ti kinamanagyaman iti pusoda, ket daytoy ti mangibunga ti ad-adda pay a panangiyebkas iti sao ti siiyaman a panangapresiarda. Situtulokda a mangted kadagiti “pinempen” ti apitda ken Jehova a mausar idiay balay ti panagdayawna.
22 Gapuna, sapay koma ta dagidiay adda iti agdama-aldaw nga “Israel ti Dios” ken ti “dakkel nga umariwekwek” a kakaduada ti kanayon a kasta met ti riknada. (Galacia 6:16; Apocalipsis 7:9) Sapay koma ta ti managyaman a pusoda tignayenna ida a mangted kadagiti pinempen a dayaw ken Jehova. Iti kasta maikunadanto a pudpudno: “Ipakpakitami ti bagbagimi a siiyaman iti managparabur ken naayat a Diosmi, a ni Jehova.”
Malagipyo Pay Aya?
◻ Apay a dagiti Kristiano kasapulan a matmatanda a kanayon ti kawadwad ti kinamanagyamanda?
◻ Apay a ti ili ni Jehova kanayon nga adda kanayonan a gapuanan ti kinamanagyamanda?
◻ Kadagiti ania nga espesipiko a banag ti maaramidantayo a panangiyebkas ti kinamanagyaman?
◻ Aniat’ intay maadal manipud iti napanglaw a babai a balo idiay templo?
[Ladawan iti panid 7]
Impakita dagiti Israelita ti kinamanagyaman babaen ti panangtedda ti apagkapullo ken ti umuna a bungbunga ken ti panangipaay ti probision a pagadasan dagiti napanglaw kadagiti talonda
[Ladawan iti panid 8]
Nagyamanan ti salmista ken Jehova gapu kadagiti nakaskasdaaw nga ar-aramidna ken pampanunotna a maipaay iti ilina
[Ladawan iti panid 10]
Ipakpakita dagiti Saksi ni Jehova ti kinamanagyamanda babaen ti pannakiramanda iti tay-ak ti serbisio ken kadagiti teokratiko a proyekto ti panagbangon, agraman ti panangted kadagiti namaterialan a sagut