Ti Biag ken Ministerio ni Jesus

Ti Estoria ti Naiyaw-awan nga Anak

DAGITI Fariseo ti nangbabalaw ken Jesus gaput’ pannakikuykuyogna kadagiti pagaammo a managbasol, ket kas sungbat kakkalpasna a sinalaysay ti pangngarig maipapan ti pannakaipasubli ti napukaw a karnero ken ti napukaw a drakma. Ita itultuloyna babaen iti sabali manen a pangngarig, a daytoy ket maipapan iti naayat nga ama ken ti panangtratona kadagiti dua nga annakna a lallaki, a tunggal maysa addaan kadagiti nainget a biddut.

Umuna, adda daydiay anak a buridek, ti kangrunaan a karakter iti pangngarig. Innalanan ti tawidna, nga awan panagkedked nga inted kenkuana ni amana. Kalpasanna isut’ pimmanawen iti pagtaenganda ket naigamer iti narugit unay a wagas ti panagbiag. Ngem denggenyo bayat a salaysayen ni Jesus ti estoria, ket kitaenyo no madeterminaryo no asinot’ nairanta nga irepresentar dagiti karakter.

“Maysa a tao,” inrugi ni Jesus, “addaan ti dua nga anakna a lalaki. Ket ti inaudi kinunana ken amana, ‘Ama, itedmo kaniak ti paset dagiti kukuam a panakabagik.’ Ket [ti ama] biningayna kadakuada ti kukuana.” Aniat’ aramiden ita daytoy inaudi iti inawatna?

“Ket,” inlawlawag ni Jesus, “idi napalabas ti sumagmamano nga aldaw, ti inaudi nga anak inurnongna amin ket napan iti maysa a daga nga adayo, ket idiay dinadaelna ti kukuana a nagbiag a nagdakdakes.” Ti kinapudnona ket, binusbosna ti kuartana a nakipagtataeng kadagiti balangkantis. Kalpasanna dimteng ti panawen ti kinarigat, kas ituloy a salaysayen ni Jesus:

“Ket idi nagastona aminen, napasamak idiay a daga ti dakkel a bisin ket isu nangrugi a nagsagaba ti kirang. Ket napan ket immasideg iti maysa kadagiti umili ti daydi a daga, ket isu imbaon daydi kadagiti taltalonna tapno agtaraken kadagiti baboy. Ket isu tarigagayanna ti agbussog kadagiti algarrobas a kanen dagiti baboy, ket awan ti nangted kenkuana.”

Anian a nakababain ti pannakapilit nga agtaraken ti baboy, ta dagitoy nga an-animal ket narugitda sigun iti Linteg! Ngem ti nasakit unay iti anak isut’ nakaro a panagbisin a tinarigagayanna pay ti taraon a maipakpakan kadagiti baboy. Gapu itoy nakakaskas-ang a didigrana, kuna ni Jesus, “ngem idi nagpanunot.”

Iti panangituloyna ti estoriana, inlawlawag ni Jesus: “Kinunana [iti bagina], ‘Nagadu dagiti mangmangged idiay balay ni amak nga agsobsobraanda iti taraon, ket siak addaak ditoy a matmatay iti bisin! Tumakderakto ket innakto ken ama ket kunaekto kenkuana: “Ama, nakabasolak iti maikaniwas iti langit ken iti sanguanam. Diak maikarin a managan ti anakmo. Ikabilnak a kas maysa kadagiti mangmangged kenka.”’ Ket timmakder ket napan ken amana.”

Adtoy ti banag nga usigen: No simmango ni amana kenkuana ket sipupungtot a nangbugkaw kenkuana idi pimmanaw, saan koma a masinunuo ti anak no aniat’ rebbeng nga aramidenna. Naikeddengna koma ti agsubli ket sana padpadasen ti agsapul ti panggedan iti sabali a lugar idiay ilida tapno saannan a makitkita a rupanrupa ni amana. Nupay kasta, awan kasta a panunot a simrek iti isipna. Idiay pagtaenganda ti kayatna a papanan!

Nalawag, ti ama iti pangngarig ni Jesus irepresentarna ti naayat, naasi a nailangitan nga Amatayo, a ni Jehova a Dios. Ken nalabit nabigbigyo met a ti napukaw, wenno naiyaw-awan, nga anak irepresentarna dagiti pagaammo a managbasol. Dagiti Fariseo, a pakisarsaritaan ni Jesus, ti nangbabalaw ken Jesus iti napalabas gaput’ pannakipangpanganna a kadua dagitoy.

Ngem asinot’ irepresentar ti inauna nga anak a lalaki? Ken aniat’ aplikasion ti pangngarig ni Jesus iti maika-20 a siglotayo? Ti sumaganad a bilang daytoy a magasin ti mangsungbat kadagitoy a salsaludsod inton usigen dayta ti dadduma a paset ti estoria ni Jesus maipapan iti anak a naiyaw-awan a nasarakan met laeng. Lucas 15:11-20, 30; Levitico 11:7, 8.

◆ Siasinot’ pangibagbagaan ni Jesus iti daytoy a pangngarig, wenno estoria, ken apay?

◆ Asino ti kangrunaan a karakter iti estoria, ken aniat’ napasamak kenkuana?

◆ Siasinot’ ireprepresentar ti ama ken ti unaudi nga anak a lalaki?

◆ Ania nga impormasion ti urayentayo iti sumaganad a bilang daytoy a magasin?