Ti Biag ken Ministerio ni Jesus

Saganaan ti Masanguanan Babaen iti Praktikal a Kinasirib

KAKKALPAS ni Jesus nga inistoria ti maipapan iti anak a napukaw iti umariwekwek a nakairamanan dagiti adalanna, dagiti nasuitik nga agsingsingir ti buis ken dadduma pay a mabigbigbig a managbasol, ken eskribas ken dagiti Fariseo. Ita, iti panagpalawagna kadagiti adalanna, salaysayenna manen ti pangngarig maipapan iti tao a nabaknang a nakaawat ti dakes a damag maipapan iti manangaywan iti balayna, wenno ti mayordomo.

Sigun ken Jesus, inayaban ti tao a nabaknang ti mayordomona ket imbagana kenkuana nga isut’ ikkatenna. “Anianto ti aramidek, ta ni apok ikkatennak a mayordomo?” kinunana iti nakemna. “Diak mabalin ti agkali, kabainko ti makilimos. A! ammok ti aramidekto, tapno inton maikkatak iti kinamayordomo, awatendakto kadagiti balbalayda.”

Aniat’ plano ti mayordomo? Ayabanna itan dagidiay nakautang ken apona. “Mano ti utangmo ken apok?” isaludsodna.

‘2,200 litros a lana ti olibo,’ insungbat di immuna.

‘Alaem kadi ti eskrituram ket agtugawka daras ket isuratmo ti 1,100,’ kunana kenkuana.

Ket sinaludsodanna manen ti sabali: ‘Ket sika, mano ti utangmo?’

‘22,000 litros a trigo,’ kinunana.

‘Alaem kadi ti eskrituram ket isuratmo ti 18,000.’

Ti mayordomo ket adda pay laeng iti kalinteganna a mangibaba ti utangda ken apoda, agsipud ta isu pay met laeng ti enkargado iti makukuarta ni apona. Gapuna babaen ti panangipababana kadagiti kantidad, isut’ makigaygayyem kadagidiay mabalinto a mangsupapak met kenkuana inton mapukawnan ti panggedanna.

Idi nadamag ti apo no aniat’ napasamak, isut’ nasdaawan. Kinapudnona, “dinayaw di apo daydi mayordomo, nupay di mapagtalkan, agsipud ta nagaramid a nainsiriban.” Pudno unay, innayon ni Jesus: “Ta dagiti annak daytoy a sistema dagiti bambanag nasirsiribda kadagiti kaputotanda ngem kadagiti annak ti silaw.”

Ita, babaen ti panangtedna ti leksion kadagiti adalanna, imparegta ni Jesus: “Pakigayyemyo dagiti kinabaknang a saan a pudno, tapno inton maibusen, awatendakayto kadagiti abong-abong nga agnanayon.”

Saan nga indayaw ni Jesus ti mayordomo gaput’ kinakillona no di ket ti natudio a panagkitana, ti praktikal a kinasirib. Masansan “dagiti annak daytoy a sistema dagiti bambanag” sisisiribda a mangus-usar ti kuartada wenno posisionda a makigayyem kadagidiay makaisubli ti pabor kadakuada. Gapuna ti ad-adipen ti Dios, “dagiti annak ti silaw,” kasapulan met nga usarenda ti material a sanikuada, “dagiti kinabaknang a saan a pudno,” iti nainsiriban a pamay-an a makagunggona kadakuada.

Ngem kas kinuna ni Jesus, rebbeng a makigayyemda babaen kadagitoy a kinabaknang kadagidiay mabalin nga umawat kadakuada “kadagiti abong-abong nga agnanayon.” Kadagiti kameng ti bassit nga ipastoran, dagitoy nga abong-abong ket idiay langit; agpaay kadagiti sabsabali a karnero, addadanto idiay Paraiso a daga. Yantangay ni laeng Jehova a Dios ken ti Anakna ti makaawat kadagiti tattao kadagitoy nga abong-abong, rebbeng a nagagettay koma iti panangusar iti aniaman a “kinabaknang a saan a pudno” nga adda kadatayo a mangsuportar kadagiti intereses ti Pagarian ket iti kasta sukayen ti pannakipagayam kadakuada. Ket, inton mapaayen wenno mapukawen dagiti material a kinabaknang, a siguradonto a mapasamak, ti agnanayon a masakbayantayo ti naipasiguron.

Intuloy a kinuna ni Jesus a dagiti tattao a matalek iti panangaywan uray kadagitoy a material, wenno babbabassit, a bambanag ket matalekdanto iti panangaywan kadagiti bambanag a dakdakkel ti pategna. “No ngarud,” intuloyna a kinunana, “no kadagiti kinabaknang a saan a pudno dikayo napagtalkan, asinonto ti mangted kadakayo iti kukuayo, [kayatna a sawen, dagiti intereses a naespirituan, wenno, iti Pagarian]? Ket no iti kukua ti sabali dikay napagtalkan [dagiti intereses ti Pagarian nga isut’ italek ti Dios kadagiti ad-adipenna], asinonto ti mangted kadakayo iti kukuayo [ti gunggona a biag kadagiti abong-abong nga agnanayon]?”

Ditay mabalin ti agbalin a pudno nga ad-adipen ti Dios ket maigiddato iti dayta agbalin nga ad-adipen ti kinabaknang a saan a pudno, dagiti material a kinabaknang, kas panagpatingga ni Jesus: “Awan ti adipen a makabalin nga agserbi iti dua nga apo; ta guraennanto ti maysa ket ayatennanto ti sabali, wenno makidekketto iti maysa ket laisennanto ti sabali. Dikay mabalin ti agserbi iti Dios ken kadagiti kinabaknang.” Lucas 15:1, 2; 16:1-13.

◆ Kasanot’ pannakigayyem ti mayordomo iti pangngarig ni Jesus kadagidiay makatulongto kenkuana iti kamaudianan?

◆ Ania “dagiti kinabaknang a saan a pudno,” ket kasanotay a makigayyem babaen kadakuada?

◆ Asino dagiti mabalin nga umawat kadatayo “kadagiti abong-abong nga agnanayon,” ket ania a luglugar dagitoy nga abong-abong?