Kinahustisia Dandanin iti Isuamin a Nasion

“Kinahustisia​—ti laeng kinahustisia ti surotemto, tapno agbiagka ken agtawidka iti daga a ni Jehova a Diosmo itedna kenka.”​—DEUTERONOMIO 16:20.

1. Aniat’ orihinal a panggep ti Dios iti tao, ken kasano laeng a matungpal dayta?

TI PANGGEP ni Jehova a Dios iti panangparsuana ti lalaki ken babai ket tapno mapunno ti daga kadagiti perpekto a parparsua. Aminda ti mangidaydayawto kenkuana ken aramidenda ti pasetda a mangtaripato iti daga. (Genesis 1:26-28) Yantangay ti tao naparsua a kaasping ken iti ladawan ti Dios, isut’ naikkan kadagiti kualidad ti kinasirib, kinahustisia, ayat, ken pannakabalin. Babaen laeng iti natimbeng a panangalagad kadagitoy a kualidad a matungpal ti tao ti panggep ti Namarsua kenkuana.

2. Kasano kapateg iti panangsurot ti kinahustisia para kadagiti annak ti Israel?

² Kas nakitan iti napalabas nga artikulo, immalsa ti tao kadagiti pamay-an ti Dios a panagaramid kadagiti bambanag ket nasentensiaan ti ipapatay. Ita, gapu iti kinaimperpekto, imposiblen ti panangitungpalna iti orihinal a panggep ti Dios iti sangatauan. Ti saanen a pannakaipakita ti tao iti perpekto a kinahustisia ti dakkel a rason iti daytoy a pannakapaay. Saan ngaruden a pagsiddaawan, a pinalagipan ni Moises dagiti annak ti Israel: “Kinahustisia​—ti laeng kinahustisia ti surotemto”! Ti biagda ken ti abilidadda a mangtagikuanto iti Naikari a Daga ket agpannuray iti panangsurotda iti kinahustisia.​—Deuteronomio 16:20.

Anniniwan iti Iyaay ti Naimbag a Bambanag

3. Apay a ti panangsukimat iti pannakilangen ni Jehova iti Israel nasken kadatayo itatta?

³ Dagiti pannakilangen ni Jehova iti nasion ti Israel ti mangpabileg ti panagtalektayo a sigurado nga ibatadnanto kadagiti amin a nasion ti kinahustisiana baeten ken Jesu-Kristo, ti pinilina nga Adipen. Kastoy ti panangilawlawag ni apostol Pablo kadagiti bambanag: “Ta dagup dagiti immun-una a naisuraten naisuratdan tapno pakasursuruantayo, tapno gapu iti panagibturtayo ken iti liwliwa dagiti Kasuratan maaddaantayo koma ti inanama.” (Roma 15:4) Yantangay ti Dios ket “managayat ti kinalinteg ken kinahustisia,” imbilinna a dagiti Israelita isu komat’ tuladenda no kadagiti amin a pannakilangenda iti maysa ken maysa. (Salmo 33:5) Agbatad daytoy no usigentayo ti sumagmamano laeng kadagidiay 600 a linteg a naited iti Israel.

4. Kasano a nataming dagiti parikut iti sibil a kalintegan iti sidong ti Linteg ni Moises?

⁴ Awan idi dagiti parparikut ti sibil a kalintegan idi masursurot ti Linteg ni Moises. Maipapan iti kaso dagiti di Israelita a nagnaed iti daga, kuna ti Levitico 19:34: “Ti ganggannaet a makipagtaeng kadakayo maibilangto kadakayo a kas kailianyo; ket ayatenyonto a kas iti bagiyo.” Anian a nalinteg ken naayat nga urnos! Mainayon pay, nabalakadan dagiti ukom ken testigo: “Dika agtestigo iti maysa a suppiat a sumiasika a sumurot iti adu a manglabsing iti kinahustisia. No maipapan iti daydiay napanglaw, dimo kanunongan iti ringgorna.” (Exodo 23:2, 3) Agasenyo dayta​—agpadpada a naipakita ti hustisia iti nabaknang ken iti napanglaw!

5. Idiligyo dagiti lilinteg kriminal iti sidong ti Linteg ni Moises kadagiti linlinteg itatta?

⁵ Iti sidong ti kodigo a Linteg Mosaico, dagiti linteg maipapan iti krimen ad-adda a superiorda ngem ti aniaman a paglintegan dagiti nasion itatta. Kas pangarigan, ti agtatakaw saan a naibalud tapno di pay isut’ pakadagsenan dagiti managbannog nga umili a managtulnog iti Linteg. Masapul nga isu ket agtrabaho tapno bayadannat’ doble wenno ad-adu pay daydiay tinakawna. Iti kasta awan pukaw daydiay biktima. Kas pangarigan ti nagtakaw dina kayat ti agtrabaho ken agbayad. No kasta, isut’ mailako kas tagabo agingga a mabayadanna ti tinakawna. No itultuloyna ti kinasubegna, isut’ mapapatay. Iti daytoy a pamay-an nailapat ti hustisia iti dayta biktima, ken nagserbi pay daytoy a lapped tapno di agtaktakaw dagiti dadduma. (Exodo 22:1, 3, 4, 7; Deuteronomio 17:12) Mainayon pay, agsipud ta ti biag ket sagrado kadagiti mata ti Dios, napapatay ti siasinoman a mammapatay. Daytoy ti nangikisap iti managdakdakes, mammapatay a tao manipud iti nasion. Nupay kasta, naited ti asi iti nakapapatay a dina inranta dayta.​—Numeros 35:9-15, 22-29, 33.

6. Iti ania a konklusion ti pangiturongan kadatayo ti panangsukimat iti linlinteg ti Israel?

⁶ Ngarud, asinot’ mangilibak a ti kinahustisia saan a nagminar kadagiti amin a pannakilangen ti Dios iti Israel? Gapuna, anian a liwliwa, anian a namnama, ti manglapunos kadatayo bayat nga ut-utobentayo inton ti kari ti Dios idiay Isaias 42:1 ket agaplikarton baeten ken Kristo Jesus! Naipasigurado kadatayo sadiay: “Yegnanto ti kinahustisia kadagiti amin a nasion.”

Kinahustisia a Natimbeng iti Asi

7. Deskribiren ti naasi a pannakilangen ni Jehova iti Israel?

⁷ Ti kinahustisia ti Dios napakuyogan iti asi. Naibatad daytoy idi nangrugi dagiti Israelita a nagrebelde a maibusor kadagiti nalinteg a dalan ti Dios. Imdenganyo ti panangdeskribir ni Moises iti naasi a panangtaming ni Jehova kadakuada bayat ti 40 a tawen a kaaddada idiay let-ang: “Isu sinarakna iti maysa a let-ang a daga, ken iti walang, nakaal-alingget a disierto. Isu linikmutna, tapno aywananna, tapno saluadanna kas ti bukel ti matana. Kas maysa nga agila a mangwagwag iti umokna, nga agpayakpak iti rabaw ti urbonna, nga iyukradna dagiti payakna, innalana ida, inawitna ida iti rabaw dagiti payakna, ni Jehova laeng ti nangiwanwan kenkuana.” (Deuteronomio 32:10-12) Kamaudiananna, idi nagapostata dayta a nasion, immararaw ni Jehova: “Agsublikayo kaniak, ket agsubliakto kadakayo.”​—Zacarias 1:4a.

8, 9. (a) Iti ania a kawadwad nga impakita ti Dios ti naasi a kinahustisiana kadagiti Judio? (b) Ania a kamaudianan a didigra ti dimteng kadakuada, ngem aniat’ maikuna iti pannakilanglangen ti Dios kadakuada?

⁸ Ngem dida impangag ti panangngaasi ni Jehova. Babaen ken propeta Zacarias, kuna ti Dios: “Ngem dida impangag, ket dida nagimdeng kaniak.” (Zacarias 1:4b) Ti naasi a kinahustisia ti Dios isut’ nangtignay kenkuana iti panangibaonna ti bugbugtong nga Anakna tapno tulonganna ida nga agsubli Kenkuana. Ni Juan a Mammautisar inyam-ammona ti Anak ti Dios a kunkunana: “Adtoy, ti Kordero ti Dios a mangikkat ti basol ti lubong!” (Juan 1:29) Iti sumagmamano a tawtawen, di nauma ni Jesus a nangisursuro kadagiti Judio kadagiti nalinteg a dalan ti Dios, a nangaramid iti nakaad-adu a milagro ket iti kasta pinaneknekanna nga isu ti naipadto a Manangispal. (Lucas 24:27; Juan 5:36) Ngem dagiti umili dida immimdeng wenno namati. Gapuna, napilitan ni Jesus a nagkuna: “Jerusalem, Jerusalem, a namapatay kadagiti mammadto ken nangubor kadagiti naibaon kenkuana,​—namin-ano a kinayatko nga urnongen koma dagiti annakmo, a kas iti maysa nga upa urnongenna dagiti piekna iti sirok dagiti payakna! Ngem dakayo nga umili diyo kinayat. Adtoy! Ti balayyo mabaybay-anen kadakayo.”​—Mateo 23:37, 38.

⁹ Inggawid ti Dios ti pannusana iti sabali pay a 37 a tawen, agingga iti 70 K.P. Kalpasanna pinalubosanna dagiti Romano a nangdadael ti Jerusalem ket kinautiboda dagiti rinibo a Judio. No amirisentayo ti mabayag a panagitured ken anus ni Jehova iti unos dagiti adu a siglo, asinot’ di makakita ti panagminar ti kinahustisia kadagiti amin a pannakilangenna iti balay ti Israel?

Kinahustisia Agpaay iti Amin a Nasnasion

10. Kasano a ti kinahustisia ti Dios naidanon iti amin a nasion?

¹⁰ Kalpasan nga inlaksid ti Israel ni Jesus, kinuna ni Santiago: “Damo unay a ti Dios inturongna ti atensionna kadagiti nasion tapno mangala kadakuada ti ili a maipaay iti naganna.” (Aramid 15:14) Daytoy nga “ili,” agraman dagidiay sumagmamano a Judio a nangakseptar ken Jesus kas Mesias, nagtitiponda a mangbukel “ti [naespirituan nga] Israel ti Dios” ket buklen dayta ti 144,000 a naiyanak-iti-espiritu a paspasurot ni Kristo Jesus. (Galacia 6:16; Apocalipsis 7:1-8; 14:1-5) Ti damo a di nakugit a Gentil a namati isu ni Cornelio. Idi isu ken ti sangakabbalayanna inakseptarda ti dalan ti panangisalakan ti Dios, kinuna ni Pedro: “Kinapudnona a makitak a ti Dios saan a mangidumduma, ngem iti tunggal nasion ti tao nga agbuteng kenkuana ken agaramid ti kinalinteg makaay-ayo kenkuana.” (Aramid 10:34, 35) Pinalawa ni Pablo ti kinalinteg ti di panangidumduma ni Jehova idi a kinunana: “Awan ti Judio wenno Griego, awan ti adipen wenno agwayawaya, awan lalaki wenno babai; ta dakayo amin maymaysa a persona a naitimpuyog ken Kristo Jesus. Mainayon pay, no kukuanakayo ni Kristo, talaga a dakay ti bin-i ni Abraham, dagiti agtawid kas iti kari.”​—Galacia 3:28, 29.

11. Ania a kari ti naited ken Abraham, ket kasanonto a matungpal dayta?

¹¹ Ditoy mapalagipantayo iti nakaskasdaaw a kari ni Jehova nga intedna ken Abraham. Naibatay iti kinasungdo ti patriarka a mangidaton ken Isaac a dungdungnguenna nga anak, kuna ti Dios kenkuana: “Gapuna ta inaramidmo daytoy ket dika inkedked ti anakmo, ti bugbugtongmo, sigurado a bendisionankanto . . . Ket iti bin-im mabendisionanto amin dagiti nasion ti daga.” (Genesis 22:16-18) Kasanontot’ pannakatungpal daytoy a kari? Ti “bin-i ni Abraham,” a buklen ni Kristo Jesus ken ti 144,000 a napulotan a pasurot nga agkammatalek inggat’ patay, isudantot’ agturay iti sangatauan manipud kadagiti langlangit iti sangaribo a tawen. (Apocalipsis 2:10, 26; 20:6) Maipapan iti dayta a bendito a panawen, insierto ni Jehova: “Ti idadakkel ti panangiturayna ken ti kappia awanto ti inggana.” Apay? Ngamin ta “ti panangiturayna” dayta a Mesianiko a Pagarian ‘masalimetmetan babaen ti kinahustisia ken kinalinteg inggat’ panawen a di nakedngan.’​—Isaias 9:7.

12. Kasano kawadwaden a malaklak-aman dagiti bendision ti Abrahamiko a tulag?

¹² Ngem di kasapulan nga ur-urayentayo inggat’ panangrugi ti Sangaribo a Tawen a Panangituray ni Kristo Jesus tapno tagiragsakentayo dagiti pammendision ti Abrahamiko a tulag. Tagtagiragsakenen dagitoy ti “dakkel nga umariwekwek” dagiti umili “a naggapuda kadagiti amin a nasion ken dagiti tribo ken dagiti inilin-ili ken dagiti dila.” Babaen ti simboliko a ‘panangbuggoda kadagiti pagan-anayda ken panangpapudawda iti dara ti Kordero,’ a ni Jesu-Kristo, naaddaandat’ nalinteg a takder iti saklang ni Jehova. Kas ken Abraham, nagbalindan a gayyem ni Jehova! Ti kinahustisia pudno nga agmimminaren iti dalan ti panangisalakan ni Jehova kadagiti minilmilion manipud iti amin a nasion.​—Apocalipsis 7:9, 14.

Ab-abrasaenyo Aya ti Nalinteg a Daldalan ti Dios?

13, 14. (a) Ania a personal a panangsukimat ti puso ti rebbeng nga aramidentay amin? (b) Kasano a maiyebkas ti panagyamantayo ken Jehova?

¹³ Natignay ken nagutugot kadi ti pusoyo gaput’ kinahustisia ken panagayat ti Dios babaen ti pannangtedna ti bugbugtong nga Anakna a kas subbot kadakayo? Agasenyo ti rikna ni Abraham idi binilin ti Dios nga idatonna ti kakaisuna nga anakna, daydiay inay-ayatna unay! Ngem ad-adda a nasasaem pay ti rikna ti Dios. Utobenyo ti rikna ni Jehova idi nga agsagsagaba ti dungdungnguenna nga Anak kadagiti pannakaibabain, ti pananglais dagidi limmabas, ti nakasasaem a rigatna idiay pagtutuokan a kayo. Agasenyo ti reaksion ti Dios iti ikkis ni Jesus: “Diosko, Diosko, apay a binaybay-annak?” (Mateo 27:39, 46) Nupay kasta, ti kinahustisia kinalikagumanna a ni Jehova a Dios ipalubosna a matay ti Anakna iti dayta a pamay-an tapno mapaneknekanna ti kinatarnawna kas panangalangon ti kinalinteg ti Dios. Mainayon pay, babaen panangipalubosnat’ ipapatay ti Anakna, linuktan met ni Jehova ti dalan ti pannakaisalakan para kadatayo.

¹⁴ Sigurado, ngarud, ti panagyamantayo ken Jehova ken ti Anakna tignayennatay koma a mangannugot a silalatak: “Ti pannakaisalakan utangtayo iti Diostayo . . . ken iti Kordero.” (Apocalipsis 7:10) No kastoy a positibo ti panagtignaytayo, ipakpakitatayo a mamatitayo kadagiti sao ni Moises: “Amin a dalan [ni Jehova] kinahustisia.” (Deuteronomio 32:4) Anian a kinaragsak ti maiyegtayo iti puso ni Jehova ken iti Anakna bayat a bigbigbigen ken kalpasanna suroten dagiti nalinteg a pamay-an ti Dios nga agpaay ti pannakaisalakan ti tao!

15. Aniat’ pateg dagiti sasao ni Jesus ken ni Nicodemo kadatayo?

¹⁵ Ditay aya maragsakan ta dagiti kakabsattayo idi 1870’s ket natibker ti takderda no iti isyu ti subbot? Ditay aya maragsakan ta kamengnatay ti maysa nga organisasion itatta a determinado a mangitandudo iti nalinteg ken naayat a dalan ti Dios para ti pannakaisalan ti tao? No kasta, ngarud imdengantay koma a naisangsangayan ti imbaga ni Jesus ken Nicodemo: “Ta saan nga imbaon ti Dios ti Anakna iti lubong a mangukom iti lubong, no di ket tapno ti lubong maisalakan gapu kenkuana. Ti mangalagad pammati kenkuana saanto a maukom. . . . Ti agaramid iti pudno umay iti lawag, tapno dagiti aramidna maiparangarang a naaramidda a maiyannurot iti Dios.” Tapno maliklikantayo ti pannusa ti Dios, paneknekantay koma ti pammatitayo iti Anak babaen ti panangtaming ‘kadagiti aramid a maitunos iti Dios.’​—Juan 3:17, 18, 21.

16. Kasano a maipadayag dagiti adalan ni Jesus ti nailangitan nga Ama?

¹⁶ Kinuna ni Jesus: “Daytoy ti pakaidayagan ni Amak, nga agawaanyo ti agbunga ti adu ket paneknekanyo a dakayo dagiti adalak. No salimetmetanyo dagiti bilinko, agtaengkayto iti ayatko, kasla iti panangsalimetmetko kadagiti bilin ni Amak ket agtaengak iti ayatna.” (Juan 15:8, 10) Aniada ti sumagmamano kadagitoy a bilin? Ti maysa adda idiay Juan 13:34, 35, a kinuna ni Jesus kadagiti adalanna: “Maysa a bilin a baro ti itdek kadakayo, tapno ayatenyo ti maysa ken maysa . . . Gapu itoy mailasindanto a dakayo dagiti adalak, no adda panaginnayan-ayatyo.” Ti bunga ti ayat nakalalasin kadagiti Saksi ni Jehova. Imbilin pay ni Jesus: “Inkayo ngarud ket pagbalinenyo nga adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo ida a salimetmetanda dagiti amin a banag nga imbilinko kadakayo.” (Mateo 28:19, 20) Personal kadi a tamtamingenyo dagitoy nga ‘aramid a maitunos iti Dios’?

17. Ania a resulta ti mangipakita a ti trabaho a panangasaba ken panangisuro ket demostrasion ti kinahustisia ni Jehova?

¹⁷ Ti kinahustisia iti pamay-an ni Jehova a panangipalubosna kadagiti pasurot ni Jesus a mangtaming kadagitoy aramid a panangasaba ken panangisuro agbatad no amirisentayo ti nagapuanan dagiti Saksi ni Jehova iti maysa la a tawen. Bayat ti 1988, addada 239,268 a kabbaro a disipulo a nabautisaran! Dina kadi pagragsaken ti pusoyo daytoy?

Ti Dios ti Kinahustisia Agtignayton a Sipapartak

18. Ania a salsaludsod ti mabalin a mapataud gapu iti pannakaidaddadanes ti ili ni Jehova?

¹⁸ Di maar-aramid ti trabaho a panangasaba nga awan ibubusor. Imbaga ni Jesus kadagiti pasurotna: “No indadanesdak, idadanesdakayto met.” (Juan 15:20) Ti moderno-aldaw a historia dagiti Saksi ni Jehova paneknekanna a pudno dayta a sao. Dagiti panangiparit, pannakaibalud, pannakapangpang-or, agraman pay panangtutuok isut’ napasaran dagiti Saksi kadagiti nagduduma a daga. Maipalagip manen kadatayo ti naimpadtuan a sasao ni Habacuc: “Ti linteg nabibineg, ket ti kinahustisia saanen a pulos a magna.” Gapuna, no dadduma, kasla kayat payen nga iyimtuod ti ili ni Jehova: ‘Apay a buyaen ni Jehova dagidiay agaramid a sililiput? Apay nga agtalna ti Dios no ti nadangkes alun-unenna daydiay nalinlinteg ngem isu?’​—Habacuc 1:4, 13.

19. Ania nga ilustrasion ti inted ni Jesus a mangtulong kadatayo a makatarus kadagiti bambanag manipud panangmatmat ti Dios?

¹⁹ Nangted ni Jesus ti ilustrasion a tumulong kadatayo a manganag iti punto de bista ti Dios. Idiay Lucas 17:22-37, dineskribir ni Jesus dagiti naranggas a kasasaad a mangtanda iti panungpalan daytoy sistema dagiti bambanag. Kinunana a maiyarigdanto kadagiti kasasaad idi sakbay ti Layus ni Noe ken iti pannakadadael ti Sodoma ken Gomorra idi tiempo ni Lot. Idin, kas nadeskribir idiay Lucas 18:1-5, sinango ni Jesus dagiti adalanna ket “insaona kadakuada ti maysa a pangngarig ti pannakasapul nga agnanayon ti panagkararag ken saan a pannakapaay.” Sinarita ni Jesus maipapan iti balo nga agkasapulan unay ken iti “maysa nga ukom” a kabaelanna nga ipaay ti kasapulan ti balo. Nagpakpakaasi ti balo: “Kitaem ta magun-odak koma ti hustisia manipud kabusorko.” Gaput’ kinaunay-unay ti balo, kamaudiananna ti ukom ‘intedna ti hustisia kenkuana.’

20. Ania a leksion ti salsalimetmetan ti ilustrasion ni Jesus kadatayo?

²⁰ Aniat’ leksionna kadatayo itatta? Kas panangidilig ni Jesus iti dayta a nakillo nga ukom ken ni Jehova, kinuna ni Jesus: “Denggenyo ti kinuna ti ukom, nupay nakillo! No kasta ngarud, ti Dios dinanto aya aramiden ti kinahustisia kadagidiay pinilina nga umaw-awag kenkuana iti aldaw ken rabii, nupay mabayag ti panagituredna kadakuada? Kunak kadakayo, aramidennanto a sipapartak ti kinahustisia kadakuada.”​—Lucas 18:6-8a.

21. Kasanot’ rebbeng a panangmatmattayo ken panangtamingtayo kadagiti personal a parikuttayo?

²¹ Laglagipenyo a kankanayon a no maipapan kadagiti personal a parikuttayo, aniaman a kasla pannakaitantan ti sungbat dagiti dawattayo saan a maigapu dayta iti panagkedked ti Dios. (2 Pedro 3:9) No agsagsagabatay man ti pannakaidadanes wenno kinadangkok a kas iti dayta a balo, maaddaantayo iti pammati a ti Dios itdennanto ti hustisia. Kasanotay a maipakita ti kasta a panamati? Babaen ti di agressat a panagkarkararagtayo satay pasarunuan dagiti kararagtayo iti matalek a panagtignay. (Mateo 10:22; 1 Tesalonica 5:17) Babaen iti kinamatalektayo, paneknekantayo nga adda pammati ditoy daga, nga addada dagidiay pudno nga agayat ti kinahustisia, ket naibilangtayo kadagita.​—Lucas 18:8b.

“Agragsakkayo, Dakayo a Nasion, a Maitimpuyog iti Ilina”

22. Iti ania a sasao ti panagballigi a nginuduan ni Moises ti kantana?

²² Adu a siglo ti napalabasen, ingngudo ni Moises ti kantana kadagitoy a sasao ti panagballigi: “Agragsakkayo, dakayo a nasion, a maitimpuyog iti ilina, ta ibalesnanto ti dara dagiti adipenna, ket itednanto ti pammales kadagiti kabusorna ket talaga nga aramidennanto ti pangabbong iti daga ti ilina.” (Deuteronomio 32:43) Ti aldaw nga ibabales ni Jehova ti umas-asideg nga umas-asideg. Anian ti yamantayo ta ipakpakitana pay laeng ti anusna agraman kinahustisia!

23. Ania a naragsak a pagtungpalan ti agur-uray kadagidiay makiramraman iti panagragsak ti ili ti Dios?

²³ Silulukat pay laeng ti dalan para kadagiti amin a nasion “nga agturong iti panagbabawi,” ngem awanen tiempo nga intay sayangen. Impakdaar ni Pedro: “Ti aldaw ni Jehova umayto a kas mannanakaw.” (2 Pedro 3:9, 10) Ti kinahustisia ti Dios kalikagumanna a din agbayag madadaelen daytoy a dakes a sistema. Inton umay dayta, sapay koma ta maysatayto kadagidiay simmungbat iti naragsak nga awag: “Agragsakkayo, dakayo a nasion, a maitimpuyog iti ilina.” Wen, maysatayto koma kadagidiay naragsak a nakapaliiw a ti kinahustisia agminar kadagiti amin a dalan ti Dios!

Kasanoyo a Sungbatan?

◻ Apay a ti Linteg ni Moises pabilgenna ti pammatitayo iti kinahustisia ti Dios?

◻ Aniat’ mangpilit kadatayo a mangabrasa kadagiti nalinteg a daldalan ti Dios?

◻ Kasano a maipadayag ni Jehova?

◻ Itatta, sadino laeng ti pakasarakan ti pudpudno a panagragsak?

[Ladawan iti panid 25]

“Kinapudnona a makitak a ti Dios saan a mangidumduma kadagiti tao, no di ket uray ania a nasion dagiti agbuteng ken agaramid ti kinalinteg makaay-ayoda kenkuana.”​—Aramid 10:34, 35

[Ladawan iti panid 28]

Iyegto ti Dios ti kinahustisia kadagiti pinilina nga umkis kenkuana