Dagiti Saludsod Manipud Kadagiti Managbasa
◼ Adda kadi kababaan nga edad para iti maysa a Kristiano a lalaki a mairekomendar kas ministerial nga adipen iti kongregasion?
Awan, awan inkeddeng ti Biblia nga aniaman a kababaan nga edad.
Iti kadaanan nga Israel, iti sumagmamano a kaso inyespesipiko ti Dios dagiti edad. Dagiti lallaki nga agparehistro iti serbisio militar masapul a 20 ti tawenda; dagiti ub-ubbing a lallaki saanda a maibaon iti pagbabakalan, kas mapaspasamak itatta iti dadduma a luglugar. Ti edad ket maysa met a nasken a banag kadagiti Levita. Dagiti annak ni Coat nga agserserbi idiay tabernakulo masapul nga addada iti 30 ingganat’ 50 años. Apay? Daytoy a limitasion ti nadakawat maipapan iti “agannong iti panagserbi ken ti trabaho a panagbaklay kadagiti aw-awiten iti tolda ti gimong.” (Numeros 4:3, 47) Agparang a mabalinan dagiti Levita ti mangrugi nga agaramid kadagiti nalaglag-an a trabaho iti 25, ngem masapul a 30 ti tawenda sakbay a makibiangda kadagiti nadagdagsen a trabaho ken kadagiti ad-adda a responsable a pribilehio ti panagwarwar, panagbunag, ken panangsangal iti tabernakulo. (Numeros 8:24-26) Ti kasta a nabantot a trabaho saanton a kasapulan iti kamaudiananna idiay templo, gapuna dagiti Levita nangrugidan nga agserbi iti edad a 20.—1 Cronicas 23:24.
Ngem idi insardengen ni Jehova nga usaren ti nainlasagan nga Israel ken rinugiannan nga usaren ti naespirituan nga Israel, adda kadi inkeddengna a kababaan nga edad para kadagiti ministerial nga ad-adipen (dagiti diakono) iti kongregasion Kristiano?
Mabalin a panunoten ti maysa dayta, naibatay iti rekord kadagiti simmaruno a siglo. Iti Iglesia Katolika Romana, ti diakono ket “maysa nga ordinado a ministro, a sumarsaruno a dagus iti ranggo ti padi, iti nasantuan pannakaipasdekna a herarkia dagiti orden iti Iglesia.” Kuna ti Antiquities of the Christian Church ni Bingham: “Dagiti obispo ken presbitero [dagiti panglakayen] . . . ti saan a gagangay a madutokan sakbay ti tallopulo; ngem dagiti diakono mapalubosanda a madutokan iti duapulo ket lima, ket saan sakbayna. Daytoy ti termino nga agpadpada nga inkeddeng ti linteg a sibil ken ti relihion . . . Mammano a makasaraktayo ti maysa a nadutokan sakbay ti edad a duapulo ket lima, iti amin a historia ti Iglesia.”
Ngem, ania, dagiti kualipikasion a masarakan iti Biblia? Dagidiay laeng naited isudat’ nadakamat iti 1 Timoteo 3:8-10, 12, 13: “Kasta met dagiti ministerial nga adipen nataknengda, saan a dua ti dilada, saanda a managinum ti adu nga arak, saanda a naagum ti pirak, a kupikupanda ti palimed ti pammati a buyogen ti nadalus a nakem. Ket dagitoy masuotda nga umuna ket iti kasta tumulongda a kas ministro, no awanto ti pakapilawanda. Dagiti ministerial nga adipen assawa koma ida ti maymaysa a babai, nga urnosenda a naimbag dagiti annak ken balbalayda. Ta dagiti lallaki nga agserbi a naimbag iti saad a ministro makagun-odda ti maysa a naimbag a kasasaad a maipaay kadakuada ken ti naindaklan a wayawaya ti panagsao iti pammati ken Kristo Jesus.”
Makitatay ditoy nga awan ti kababaan nga edad maipaay ti pannakadutok a naikeddeng iti maysa a ministerial nga adipen. Gapuna no agtataripnong dagiti panglakayen a mangusig kadagiti kualipikasion dagiti lallaki iti kongregasion, mabalinda a laglagipen nga awan ti pakaibatayan ti Biblia nga agkasapulan a ti maysa a lalaki a Kristiano ket 20, 25, wenno 30 años sakbay nga isut’ mairekomendar ken agserbi. Ti Biblia ti mangtuktukoy kadagidiay mangiggem ti daytoy a saad kas “lallaki nga agserbi a naimbag iti saad a ministro,” gapuna narigat a namnamaentay ida nga addada iti nasapa pay wenno katengngaan a tawtawen ti kinatin-edyer. Kas mangpaneknek iti daytoy, kuna ti Biblia a dagita a ministerial nga ad-adipen mabalin a naasawaandan ken addaanda payen ti annak mismo.
Mainayon pay, dagiti lallaki a mairekomendar kas ministerial nga ad-adipen rebbeng a “masuotda nga umuna,” a mangteddat’ pammaneknek nga addaandat’ pannakaawat ti responsabilidad. Saan a panangibagbaga dayta nga agserbida iti pakasubokan a pamay-an. Imbes ketdi, masapul a nakaipakitadan ti Nakristianuan a kinanataengan iti kalalainganna a rukod ti panawen (a nabautisarandan ti di kumurang a makatawen), lallaki a situtulok ken makabael a mangtaming kadagiti bambanag a naituding kadakuada. No ti maysa a “serioso” nga agtutubo a lalaki ti mangidemdemostra kadagitoy a kualidad, ket isut’ napakumbaba ken maragpatnan dagiti dadduma a kualipikasion, mabalin nga isut’ irekomendar dagiti panglakayen a madutokan uray no isu ket awan pay 20 añosna. Mabalin a dadduma a lallaki ket natataenganda pay bassit no mangipakpakitada a sibabatad a naragpatdan dagiti kualipikasion nga “agserbi a naimbag iti saad a ministro, a makagun-odda ti maysa a naimbag a kasasaad a maipaay kadakuada ken ti naindaklan a wayawaya ti panagsao.’