“Napno Kadagiti Nagnagan a Tabbaaw”
TI LIBRO ti Biblia nga Apocalipsis deskribirenna ti maysa a sirmata “maysa nga animal a nalabaga a napno kadagiti nagnagan a tabbaaw.” Daytat’ naadda iti apagbiit, kalpasanna napan iti abut a mangliwengliweng nga iti kamaudianan rummuarto dita. (Apocalipsis 17:3, 8) Masansan, ti pinanid daytoy a magasin ti mangilaslasin iti daytoy animal a nalabaga, idi umuna, kas ti Liga de Naciones ket, iti kamaudianan, ti kasunona, nga isu ti Naciones Unidas. Ngem apay a daytoy animal a nalabaga ti makunkuna a “napno kadagiti nagnagan a tabbaaw”?
Ti umuna a balabala ti Tulag ti Liga de Naciones, a naibasar kadagiti napagtipon a proposision a Britaniko ken Americano, ti naipanayag iti publiko idi Pebrero 14, 1919. Iti sumaganad nga aldaw, iti editorial a napauluan “Ti Liga ti Talna,” kuna ti The Times idiay London: “Maysa a gapuanan ti lehitimo a pagpannakkelan a bigbigen iti Tulag ti dakkel nga ar-aramid dagiti Ingles. . . . Mabalintay a maikuna a dayta ti kapapatgan pay laeng a naipablaak nga internasional a dokumento.” Ni George Thayer, ministro ti First Congregational Church of Cincinnati idiay Estados Unidos, dineskribirna dayta kas “ti katataknengan unay a deklarasion ti pagayatan ken tarigagay ti nalawlawagan a tattao ditoy daga a naikabil pay laeng iti papel.” Ti dayaw naggapu met kadagiti ganggannaet-pagsasaona a pagiwarnakan. “Daytat’ saan a Biblia,” kuna ti periodiko a Pranses a L’Homme Libre, “ngem kabaelanna ti agbalin a dakdakkel ngem dayta, ta uray ti Biblia, wenno ti asinoman nga Ebanghelista saanda a nalapdan dagiti tattao nga agpipinnatay iti maysa ken maysa. Ti idealismo nagbalinen a kinapudno.” Ti periodiko a Pranses a Victoire ti nangiladawan iti dayta kas “ti kadadakkelan a napagtitipon a panagregget a naaramid pay laeng nanipud panangrugi ti lubong a maipaay iti panangibangon ti rason ken kinahustisia ditoy rabaw ti daga.”
Kalpasan ti pannakaipasdek ti Liga de Naciones, ni Heneral Jan Smuts, maysa kadagiti pannakabagi ti Britania iti dayta a komision, ti nagsurat: “Ti tulag ket maysa kadagiti naindaklan a napartuat a dokumento iti natauan a historia. . . . Masapul a daytat’ agballigi, agsipud ta awan sabalin a dalan nga agpaay iti masanguanan ti sibilisasion. . . . In-inot a dagiti tattao nga adda pay laeng iti ruar ti tulag sumurotdanto iti daytoy a wagayway nga isuntot’ pagmartsaan ti natauan a rasa nga agturong iti panagballigi ti natalna nga organisasion ken ti raragpaten.”
Amin dagita a pananginanama ket napaneknekan nga ulbod idi bimtak ti Gubat Sangalubongan II idi 1939. Ti Liga napaay. Daytat’ maysa laeng a natauan nga organisasion a buklen dagiti imperpekto a tattao. Kastanto met ti simmuno iti dayta, ti Naciones Unidas. Kaskasdi, idi aldaw a napirmaan ti Karta ti UN, inawagan dayta ti editorial ti The New York Times kas “ti kayo ti talna” ken kinunana, “Naipasngay ti maysa a dakkel a namnama . . . Umayto dagiti dadakkel a bambanag.” Umasping pay, dagiti papangulo ti simbaan ti nangawag iti UN kas “ti kakaisuna a namnama” a maipaay iti talna ken “ti maudi a namnama.”
Ti panangipabiang kadagiti natauan nga organisasion ti bambanag a ti laeng Pagarian ti Dios ti makaaramid ket tabbaaw. Gapuna, impadto ti Biblia a kalpasan ti ababa a kaaddana, ti Naciones Unidas “mapan iti pakapukawan.” Ti laeng perpekto a nailangitan a gobierno ti Dios ti makaiyeg ti manayon a talna iti sangatauan.—Apocalipsis 17:11, 12; Isaias 9:6, 7; Daniel 2:44.