Ti Biag ken Ministerio ni Jesus

Ni Jesus Mangisuro Idiay Jerico

DI NAGBAYAG ni Jesus ken ti umariwekwek a tattao a nagdaliasat a kaduana simmangpetdan idiay Jerico, maysa a siudad nga agarup agmalem a pagnaen manipud Jerusalem. Mabalin a doble a siudad ti Jerico, ti daan a siudad a Judio agarup maysa ket kagudua a kilometro manipud iti barbaro a siudad a Romano. Bayat a rumrummuar ti umariwekwek a tattao manipud iti daan a siudad ken umasidegdan iti baro, dua a bulsek ti nakangngeg ti ilalabasda. Maysa kadakuada ti agnagan Bartimeo.

Idi naammuanna a ni Jesus daydiay lumablabas, rinugian ni Bartimeo ken ti kaduana ti agikkis: “Kaasiannakami, Apo, Anak ni David!” Ket idi inungtan ida dagiti adu a tattao tapno agulimekda, ad-adda ti panangiyikkisda: “Kaasiannakami, Apo, Anak ni David!”

Idi mangngegna ti arimbangaw, nagsardeng ni Jesus. Dinawatna kadagidiay kakaduana nga awaganda dagidiay agpukpukkaw. Dagitoy ti napan kadagiti bulsek nga agpalpalama ket kunada iti maysa kadakuada: “Manginanamaka, tumakderka, ta ayabannaka.” Iti aglaplapusanan a ragsakna, inwaksi daydi lalaki a bulsek ti kagayna, limmagto, ket napan ken Jesus.

“Ania ti kayatyo nga aramidek koma kadakayo?” insaludsod ni Jesus kadagiti dua a lallaki.

“Apo, maluktan koma dagiti matami,” impakpakaasida.

Simnek ti asina, inaprusan ni Jesus ti matmatada. Sigun iti salaysay ni Marcos, kuna ni Jesus iti maysa kadakuada: “Inkan, ti pammatim inagasannaka.” Dagdagus dagiti bulsek nga agpalpalama nakakitada, ket awan duadua isuda a dua ti nangrugi a mangitantan-ok iti Dios. Idi amin dagiti tattao nakitada no aniat’ napasamak, nagdaydayawda met iti Dios. Awan taktak, nangrugi a sumuroten ni Bartimeo ken ti kaduana ken Jesus.

Idi a lumablabas ni Jesus iti Jerico, umariwekwek dagiti tattao. Tunggal maysa kayatda a makita daydiay nakaagas kadagiti lallaki a bulsek. Naggarasugas dagiti tattao ken Jesus manipud amin a direksion, ket gapu itoy, dadduma ti saanen a makakita kenkuana. Maysa kadagitoy isu ni Zaqueo, ti turayen dagiti agsingsingir ti buis iti uneg ken iti aglawlaw ti Jerico. Isu pay met ti pandek tapno makita no aniat’ mapaspasamak.

Gapuna timmaray ni Zaqueo ket immuli iti maysa a kayo a sikomoro nga adda idiay pagnaan ni Jesus. Manipud itoy nangato a disso, makitana a naimbag no aniat’ mapaspasamak. Idi umadanin ti umariwekwek, immawag ni Jesus iti adda idiay kayo: “Zaqueo, umulogka daras ta ita masapul nga agdagusak idiay balaymo.”

Immulog ni Zaqueo a maragragsakan ket daras a nagawid tapno isaganana dagiti bambanag maipaay iti madaydayaw a bisitana. Ngem idi a makita dagiti tattao ti mapaspasamak, nagtanabutobda amin. Imbilangda a di umiso para ken Jesus nga agbalin a sangaili ti kasta a tao. Ngamin, ta bimmaknang ni Zaqueo iti siuulbod a panagtaktakaw ti kuarta iti negosiona a panagsingsingir ti buis.

Adu a tattao ti sumursurot, ket idi a simrek ni Jesus iti balay ni Zaqueo, nagtanabutobda: “Napan nakidagus iti maysa a tao a managbasol.” Ngem nakita ni Jesus ken Zaqueo ti panginanamaan ti panagbabawi. Ket saan a napaay ni Jesus, ta nagtakder ni Zaqueo ket inyanunsiona: “Adtoy! Ti guddua dagiti kukuak, Apo, itedko kadagiti napanglaw, ket no adda nangulbodak iti asinoman a tao isublik ti mamimpat pay a kaadu.”

Pinaneknekan ni Zaqueo a pudpudno ti panagbabawina babaen ti panangtedna iti kagudua ti kukuana kadagiti napanglaw ken panangusar ti kagudua a pangbayad kadagidiay kinuskusitna. Kaawatan a mabalinna a kalkularen manipud rekord dagiti buisna no kasano kadakkel ti utangna kadagitoy a tattao. Gapuna inkarina nga aramiden ti mamimpat a daras a panangisubli, maitunos iti kuna ti linteg ti Dios: ‘No ti maysa a tao agtakaw iti maysa a karnero, bayadanna ti uppat a karnero ti maysa a karnero.’

Maragsakan ni Jesus iti panangikari ni Zaqueo a panangiwaras ti sanikuana, ta kinuna ni Jesus: “Ita nga aldaw immay ti pannakaisalakan iti daytoy a balay, ta isu anak met ni Abraham. Ta toy Anak ti tao immay nga agsapul ken mangisalakan iti napukaw.”

Iti nabiit pay, impangarig ni Jesus ti kasasaad ‘iti napukaw’ babaen iti estoriana maipapan ti anak a naiyaw-awan. Ita addaantayon ti pudpudno a pangarigan iti maysa a napukaw ket nasarakanen. Uray no dagidiay papangulo a relihiuso ken dagidiay sumursurot kadakuada ket agtantanabutob ken agrekreklamoda maipapan ti atension ni Jesus kadagiti tattao kas ken Zaqueo, intultuloy ni Jesus ti mangsapul ken mangisubli kadagidiay napukaw nga annak ni Abraham. Mateo 20:29-34; Marcos 10:46-52; Lucas 18:35–19:10; Exodo 22:1.

◆ Kaawatan a sadinot’ nakasabatan ni Jesus kadagiti bulsek nga agpalpalama, ket aniat’ inaramidna agpaay kadakuada?

◆ Asino ni Zaqueo, ket apay nga immuli iti kayo?

◆ Kasano a pinaneknekan ni Zaqueo ti panagbabawina?

◆ Ania a leksion ti maadaltayo manipud panangtrato ni Jesus ken ni Zaqueo?