Kasanot’ Panangmatmatyo iti Sangapulo a Bilbilin?

NADUMADUMA a pamay-an ti panangmatmat dagiti tattao iti Sangapulo a Bilbilin idiay Biblia. Kuna dagiti Sabatista a ti Sangapulo a Bilbilin ti maipaalagad kadagiti amin a tattao. Ibilang ida dagiti Luterano a “kasasayaatan a dagup dagiti pagalagadan a naited pay laeng a sadiay ti pangibangonan ti maysa a tao ti biagna.” “No umiso ti pannakaawatna,” inlawlawag ti pannakangiwat a Katoliko, “ti Sangapulo a Bilbilbin kaskasdi a mangted ti pangibatayan ti Nakristianuan a panagbiag.”

Ngarud, nupay dadduma a narelihiusuan a grupo patienda a rebbengtay ti agtulnog a naan-anay iti Sangapulo a Bilbilin, dadduma ibilangda laeng ida a pakaiwanwanan iti nasin-aw a moral a kababalin. Pudno unay, sigun iti Encyclopædia of Religion and Ethics, “nalabit awan pay ti natauan a dokumento a nangwatwat ti kadadakkelan nga impluensia iti narelihiusuan ken moral a panagbiag ngem iti Dekalogo [Sangapulo a Bilbilin].” Apay a kasta daytoy? Usigenyo nga umuna no aniat’ ibagbagada. Dagitat’ nagababa, nakasaksaknap, ken napuersa. Ngem kasanot’ rebbeng a panangmatmatyo iti Sangapulo a Bilbilin? Aniat’ kaipapananda kadakayo?

[Kahon iti panid 3]

TI SANGAPULO A BILBILIN

1. Dika maaddaan ti sabali a didios iti sangok.

2. Dika mangaramid iti maipaay kenka a ladawan a kinitikitan, uray ania a katulad ti adda idiay ngato sadi langit wenno ti adda iti baba ditoy daga wenno ti adda iti danum iti uneg ti daga. Dika iruknoy ti bagim kadakuada wenno pagserbian ida . . .

3. Dika aramaten iti barengbareng ti nagan ni Jehova a Diosmo . . .

4. Laglagipem ti aldaw a panaginana tapno santipikarem, kadagiti innem nga aldaw agtrabahokanto. . . . Dika agtrabaho iti uray ania, sika wenno ti anakmo a lalaki wenno ti anakmo a babai wenno ti adipenmo a lalaki wenno dagiti animalmo wenno ti ganggannaetmo nga adda iti uneg dagiti ruanganmo . . .

5. Dayawem ni amam ken ni inam . . .

6. Dika mamapatay.

7. Dika makiabig iti dika asawa.

8. Dika agtakaw.

9. Dika agsaksi iti ulbod a maibusor iti padam a tao.

10. Dika aguman ti balay ti padam a tao, dika aguman ti asawa ti padam a tao, uray ti adipenna a lalaki wenno ti adipenna a babai wenno ti bakana wenno ti asnona wenno uray aniaman a kukua ti padam a tao.​—Exodo 20:3-17.