Ti Biag ken Ministerio ni Jesus

Ti Panglaglagip a Pangmalem

KALPASAN panangbuggo ni Jesus iti saksaka dagiti apostolna, inadawna ti kasuratan idiay Salmo 41:9, a kunkunana: “Isu a nakikaan iti kanek inkugtarna ti mukodna kaniak.” Sa, iti pannakariribuk ti espirituna, inlawlawagna: “Ti maysa kadakayo iyawatnakto.”

Nagliday dagiti apostol ket kunada ken Jesus a sinaggaysa: “Siak aya, Apo?” Uray ni Judas Iscariote timmipon met a nagsaludsod. Ni Juan, a nakasadag a dumna ken Jesus iti lamisaan, nagsadag iti barukong ni Jesus ket nagsaludsod: “Apo, siasino?”

“Maysa kadagiti sangapulo ket dua, dayta makikamalukong kaniak,” insungbat ni Jesus. “Pudno, ti Anak ti tao mapan a pudno, kas adda a naisurat maipapan kenkuana, ngem asi pay dayta tao a gapu kenkuana maliputan ti Anak ti tao! Naim-imbag koma iti dayta a tao no pulos a di nayanak.” Kalpasan dayta, simrek manen ni Satanas ken Judas, a ginundawayanna ti pannakalukat ti pusona, a nagbalin a dakes. Iti dayta met la a rabii, apagpag-isu ti panangawag ni Jesus ken ni Judas “ti anak ti pannakadadael.”

Ni Jesus kunana ita ken Judas: “Ti aramidem, aramidem iti madaras.” Awan kadagiti dadduma nga apostol ti makaawat no aniat’ kayat a sawen ni Jesus. Impapan dagiti dadduma nga idinto ta ni Judas ti agig-iggem ti kahon ti kuarta, ibagbaga ni Jesus kenkuana: “Gatangem ti masapultayo a maipaay iti piesta,” wenno isut’ mapanen ket mangted kadagiti napanglaw.

Kalpasan ti ipapanaw ni Judas, rinugian ni Jesus ti interamente a baro a selebrasion, wenno pananglaglagip, a kadua dagiti matalek nga apostolna. Isut’ nangala ti maysa a tinapay, nagkararag ti panagyaman, pinispisina dayta, ket sana inted kadakuada, a kunkunana: “Alaenyo, kanenyo.” Inlawlawagna: “Daytoy kaipapananna ti bagik a maited gapu kadakayo. Itultuloyyo nga aramiden daytoy a panglaglagip kaniak.”

Idi tunggal maysa ti nakapanganen ti tinapay, nangala ni Jesus ti maysa a kopa ti arak, nalabit ti maikapat a kopa a nausar iti serbisio ti Paskua. Isut’ nagkararag met ti panagyaman, sana impasa dayta kadakuada, a dinawat nga uminumda iti dayta, sana kuna: “Daytoy a kopa kaipapananna ti baro a tulag gapu iti darak, a maibuyat gapu kadakayo.”

Gapuna, daytoy iti kinapudona, ket pananglaglagip ti ipapatay ni Jesus. Kada tawen iti Nisan 14 daytat’ maulit, kas kinuna ni Jesus, a panglaglagip kenkuana. Daytat’ mangipalagip kadagiti mangrambak no aniat’ naaramidan ni Jesus ken ti nailangitan nga Amana a mangted ti pakalasatan ti sangatauan manipud iti panangilunod ni patay. Kadagiti Judio a nagbalin a paspasurot ni Kristo, ti selebrasion sukatanna ti Paskua.

Ti baro a tulag, a daytat’ pinagtignay ti naiparukpok a dara ni Jesus, sinukatanna ti daan a Linteg ti tulag. Daytat’ imbabaet ni Jesu-Kristo kadagiti dua a partido​—iti maysa a bangir, isu ni Jehova a Dios, ket iti sabali a bangir, dagiti 144,000 a naiyanak iti espiritu a Kristiano. Malaksid iti panangtedna ti pannakapakawan dagiti basol, impalubos met ti tulag ti pannakabukel ti maysa a nailangitan a nasion dagiti ari ken papadi. Mateo 26:21-29; Marcos 14:18-25; Lucas 22:19-23; Juan 13:18-30; 17:12; 1 Corinto 5:7.

◆ Ania a padto ti Biblia ti inadaw ni Jesus maipapan ti maysa a kadua, ket ania nga aplikasion ti inaramidna iti dayta?

◆ Apay a nagliday unay dagiti apostol, ken aniat’ insaludsod ti tunggal maysa kadakuada?

◆ Aniat’ imbaga ni Jesus nga aramiden ni Judas, ngem kasanot’ panangipatarus dagiti dadduma nga apostol kadagitoy a bilbilin?

◆ Ania a selebrasion ti rinugian ni Jesus kalpasan ti ipapanaw ni Judas, ken aniat’ panggep a serbianna?

◆ Asinoda dagiti partido iti baro a tulag, ken ania ti magapuanan ti tulag?