Dagiti Naragsak nga Agtutubo iti Serbisio ni Jehova

“Uray ti ubing maammuan babaen iti tigtignayna, no ti kababalinna ket nadalus ken nalinteg.”​—PROVERBIO 20:11, New International Version.

1. Aniat’ sumagmamano kadagiti nakaskasdaaw a bambanag a kunat’ Biblia maipapan ken Samuel?

MABALIN a ni agtutubo a Samuel agtawen laeng idi ti tallo ingganat’ lima idi isut’ nangrugi nga “agserbi” iti tabernakulo ni Jehova idiay Silo. Maysa kadagiti annongenna isut’ pananglukat kadagiti “ruruangan ti balay ni Jehova.” Kuna ti Biblia a ni “Samuel dimmakkel ken immadu kenkuana ti parabur ni Jehova ken kasta met kadagiti tattao.” Idi nataenganen, insublina ti Israel iti pudno a panagdayaw. Sinerbianna ti Dios “amin nga al-aldaw ti panagbiagna.” Uray idi isut’ “lakayen ken ubananen” kaskasdi nga inlungalongna iti umili nga “agbutengkayo ken Jehova, ken . . . agserbikayo iti kinapudno.” Saan kadi a nakaay-ayat no ti tattao ket maikunada dagitoy nasasayaat a bambanag maipapan kadakayo kas ti panagkuna ti Biblia maipapan ken Samuel?​—1 Samuel 1:24; 2:18, 26; 3:15; 7:2-4, 15; 12:2, 24.

2. Aniat’ maadal dagiti ubbing iti panaggigimong ti ili ni Jehova itatta?

² No maysakay kadagiti Saksi ni Jehova wenno umat-atenderkayo ti Nakristianuan a panaggigimongda, kumitakayo iti aglawlaw ti Kingdom Hall a pakaadalan iti daytoy a leksion. Makakitakayo ti tattao iti amin nga edad. Nalabit addada tattao a “lakayen ken ubananen.” Addada met nagannak, agtutubo, ub-ubbing, ken uray pay dagiti maladaga a maub-ubba. Makaad-adal met aya dagiti babassit? Wen. Saludsodanyo laeng dagidiay mismo a naitugtugot kadagita a panaggigimong idi babassitda pay. Ibagada a sipupudno kadakayo a manipud kinaganosda, maad-adaldan a pagraeman ti Dios, nga ayaten ti ilina, ken apresiaren dagiti luglugar a pakadaydayawanna. Bayat ti panaglabas ti panawen, dagiti babassit nakaadaldan kadagiti nakaskasdaaw a kinapudno. Adu nga agtutubo, kalpasan ti irarang-ayda iti pannakaammo ken panangipategda, agbalinda a paset dagiti ‘babbaro ken babbalasang, lallakay ken ub-ubbing’ a nangidagadagan ti salmista nga “idaydayaw koma ti nagan ni Jehova, ta ti naganna laeng ti maitan-ok.”​—Salmo 148:12, 13.

3. Kasano a dagiti agtutubo a makaammo ti Biblia naidumat’ panangmatmatda iti biag manipud kadagidiay saan a makaammo?

³ No maysakay nga agtutubo a ti nagannakna ket regular a mangitugtugot kadakayo kadagita a paggigimongan, benditokay unay. Adu a sabsabali nga agtutubo ti mariribukan kadagiti parparikut toy lubong. Agbutbuteng dagiti dadduma di la ket ta dadaelen dagiti tattao ti daga. Ammoyo a ti Dios dinanto ipalubos a mapasamak ti kasta, ta dinanto palubosan dagiti tattao a mangdadael itoy nagpintas a planeta. Imbes a palubosanna a mapasamak ti kasta, ti Dios, sigun iti Biblia, ket “dadaelenna dagidiay mangrebbek iti daga.” Ammoyo a ti Biblia ikarkarina a ti maysa a naraniag a masakbayan idiay nalinteg a baro a lubong ti Dios ket asidegen.​—Apocalipsis 11:18; Salmo 37:29; 2 Pedro 3:13.

Ti Mismo a Pammatiyo

4. Ti panangammo iti daldalan ti Dios iyegna ti ania a responsabilidad kadagiti agtutubo, ken kasano a ni agtutubo a Samuel nasayaat nga ulidan iti daytoy?

⁴ Idi damo, ti dalan ti Nakristianuan a kinapudno ti sursuroten dagiti dadakkelyo. Nalabit immaykayo kadagiti Nakristianuan a gimong gapu ta itugtugotdakayo, ken mabalin met a nakiramramankayo iti nadiosan a serbisio gapu ta isuda makiramramanda met. Kaskasdi, bayat ti ilalabas ti panawen, ti panagserbi ken panagtulnog ken Jehova agbalinto metten a pagrag-oanyo a mismo. Ti ina ni agtutubo a Samuel ti nangirugi kenkuana iti umiso a dalan, ngem isu a personal ti masapul a mangsurot met iti dayta. Mabasatayo: “Uray ti ubing maammuan babaen iti tigtignayna, no ti kababalinna ket nadalus ken nalinteg.”​—Proverbio 20:11, NIV.

5. (a) Aniat’ dakkel a pateg ti Biblia? (b) Aniat’ kinuna ni Pablo ken Timoteo maipapan iti kinapateg ti naisurat a Saot’ Dios?

⁵ Ibaga dagiti Kasuratan kadatayo no aniat’ kayat ti Dios kadatayo. Ipakitada a silalawag kadatayo no kasanot’ panangparagsak kenkuana, a mangted naruay nga impormasion nga adut’ maipaayna a pagsayaatan kadatayo. Ni apostol Pablo ti nagkuna ken agtutubo a Timoteo a katulonganna: “Isuamin a Surat ket impaltiing ti Dios ken naimbag a pakasursuruan, pakatinggaran, pakababalawan, ken pakaadalan iti kinalinteg, tapno ti tao ti Dios makabael a naan-anay koma, ken nakabalan a naan-anay a maipaay iti tunggal aramid a nasayaat.”​—2 Timoteo 3:16, 17.

6. Aniat’ kuna ti libro ti Proverbio maipapan ti kinapateg ti pannakaammo ken nadiosan a sirib?

⁶ Ibaga met ti Biblia kadatayo nga “iyallingag ti disiplina ket agbalin a nasirib.” Kunana nga “ipempentay” dagiti bilbilin ti Dios, nga “awagan ti kinasaririt,” ken “itultuloy a biruken” ti pannakaawat kas panangbiruk kadagiti nalmeng a gamgameng. No surotenyo daytoy a pammagbaga, iti kasta “maawatamto ti panagbuteng ken ni Jehova, ken masarakamto ti pannakaammo iti Dios.” Masarakantay met daytoy a balakad: “Ita ngarud, O annakko, dumngegkayo kaniak; ta, bendito dagiti mangsalimetmet kadagiti daldalanko. Denggenyo ti pannursuro ket sumiribkayo, ken dikayo koma agkedked kenkuana. Naragsak ti tao a dumngeg kaniak . . . Ta siasinoman a makasarak kaniak masarakanna ti biag, ket magun-odnanto ti parabur ni Jehova.” Kasta aya kadakkel ti panangipategyo ti Biblia ket ipakpakitayo ti kasta a kita ti panagregget a mangammo kadagiti bambanag nga ibagbagana?​—Proverbio 2:1-5; 8:32-35.

Gun-odem ti Pannakaammo

7. Ania dagiti nasken a bambanag a rebbengtay a maammuan?

⁷ Dadduma nga agtutubo ammoda amin nga estadistika dagiti ay-ayam, wenno maibagada amin kadakayo maipapan kadagiti paboritoda a tumutokar a grupo. Masarakanda dagitoy a bambanag a nalaka laeng a maammuan ken lagipen agsipud ta interesadoda kadakuada. Ngem ti kapapatgan a saludsod ket, Aniat’ ammoda maipapan iti Dios? Panunotenyo laengen dagiti naar-aramidannan. Inaramid ti Dios ti uniberso. Impadtona no aniat’ aramiden dagiti tattao ken no aniat’ mapasamak mabayag pay sakbay a mapagtengda. Saan laeng nga ibaga ti Biblia kadatayo maipapan iti Dios no di ket isurona kadatayo no kasanot’ panangay-ayotay kenkuana. Ipakitana kadatayo no kasano a maaddaantay ti naragsak a panagbiag itan ken no kasano a magun-odantayo ti biag nga agnanayon iti nalinteg a baro a lubongna. Saan kadi a napatpateg nga amang dayta ngem ti panangammo no asinot’ nangabak iti ay-ayam ti bola wenno panangammo ti nagnagan dagiti tumutokar a mabiitto laeng a malipatan dagiti tattao?​—Isaias 42:5, 9; 46:9, 10; Amos 3:7.

8. Ania a nasayaat nga ulidan ti impaay nga agpadpada da Josias ken ni Jesus?

⁸ Idi ni agtutubo nga Ari Josias ket agtawen ti 15, “isu nangrugi nga agsapul iti Dios ni David nga amana.” Idi ni Jesus ket 12, isut’ natumpunganda a “situtugaw iti tengnga dagiti mamasirib idiay templo ni Jehova, a “dumdumngeg ken agsalsaludsod kadakuada.”a Aniaman ti edadyo, napatanoryon aya, kas kada Josias ken Jesus, ti pudpudno nga interes iti panangammo maipapan kadagiti bambanag a naaramidanen ti Dios ken aramidennanto pay?​—2 Cronicas 34:3; Lucas 2:46.

9. (a) Ania a parikut ti adda kadagiti adu nga agtutubo? (b) Aniat’ mamagbalin iti panagbasa ken panagadal a nalaklaka, ket personal kadi a nakitayo a pudno daytoy?

⁹ Nupay kasta, mabalin a maikunayo: ‘Ngem narigat ti agadal.’ Adu a tattao, agtutubo man ken natataenganen, ti di unay nawadwad ti nabasbasadan tapno agbalin a nalaka koma ti panagbasada. Mientras ad-adu ti basaenyo, agbalinto a nalaklaka ti panagbasbasayo. Mientras ad-adut’ adalenyo, agbalinto a nalaklaka ti panagad-adalyo. Mabalinyo nga inaig dagiti baro nga ideya kadagiti bambanag nga ammoyon, a pagbalinenna a nalaklaka ti pannakaawatyo ken pannakalagipyo kadakuada.

10. (a) Kasano nga ad-adut’ magun-odanyo manipud Nakristianuan a panaggigimong? (b) Aniat’ bukodyo a kapadasan iti daytoy?

¹⁰ Aniat’ makatulong kadakayo a makaammo ti ad-adu maipapan iti Dios? Nalabit mabalinyo ti agbalin nga ad-adda a regular iti itatabuno kadagiti Nakristianuan a panaggigimong. Mabalinyo kadi ti agsagana a nasapsapa ken talaga a makiraman? Kas pangarigan, mabalinyo aya ti gumun-od ti naun-uneg a tukad ti pannakaammo manipud itoy a leksion babaen ti panangkitayo kadagiti teksto a Kasuratan a naisitar ngem saanda a naadaw? Nakaisuratkay aya ti maysa wenno dua a sao iti margin a mangipalagip kadakayo no aniat’ inayon dagitoy a teksto iti parapo wenno iti leksion? Naipaugaliyon aya ti mangiraman ti uray maysa laeng kadagitoy a teksto iti komento a mangidemostra ti panangapresiaryo iti Nainkasuratan a diskusion? Maysa a panglakayen ti kongregasion a nakaat-atenderen a regular kadagiti gimong iti adun a tawtawen ti nagkuna: “Marigatanak a mamagtalinaed ti isipko iti aniaman a leksion a talaga a diak napagsaganaan, ngem makaparagsak a naan-anay ti panangsurot iti maysa a napagadalak a naan-anay.”

11. Kasano nga ad-adut’ maalayo manipud kadagiti palawag a naibatay iti Biblia, ket apay a nasken unay daytoy?

¹¹ No dumdumngegkayo kadagiti palawag ti Biblia, mangal-alakay aya kadagiti ababa a nota a mangtulong kadakayo a mangusig no kasano ti pannakabukel ti palawag ken tapno mapagtalinaed iti isipyo ti adda a maibagbaga? Idildiligyo aya ti nangngegyo iti dati nga ammoyon tapno ad-adda a nalaklakayo a matarusan dayta ken malaglagipyo a nasaysayaat? Ni Jesus inkararagna: “Daytoy kaipapananna ti biag nga agnanayon, ti panangammoda kenka, a maymaysa a pudno a Dios, ken daydiay imbaonmo, nga isu ni Jesu-Kristo.” (Juan 17:3) Saan kadi a ti pannakaammo a mangiturong iti biag ti kasasayaatan a pannakaammo a mabalinyo a magun-odan? Kitaenyo no aniat’ maikuna ti Biblia maipapan iti daytoy: “Ta ni Jehova mangted iti sirib; agtaud iti ngiwatna ti pannakaammo ken pannakaawat. Ta ti sirib sumrekto dita pusom ket ti pannakaammo makaay-ayonto ita kararuam, ti abilidad nga agpanunot saluadannakanto, ti pannakaawat igaganakanto.”​—Proverbio 2:6, 10, 11.

Dumakkelkayo iti Panangapresiar

12. Aniadat’ sumagmamano kadagiti naisangsangayan a bambanag a naaramidanen ti Dios para kadatayo?

¹² Talaga aya nga ap-apresiarentay ti naaramidanen ti Dios kadatayo? Pinarsuana ti nagpintas a daga ken insaganana dayta nga agpaay iti biag. Pinarsuana dagiti immuna a nagannak kadatayo, gapuna pinagbalinna a posible ti pannakaiyanaktayo. Inyurnosna ti pannakasuportartayo babaen kadagiti pamilia ken ti naayat a kongregasion. (Genesis 1:27, 28; Juan 13:35; Hebreo 10:25) Imbaonna ti inauna nga Anakna ditoy daga tapno sursuruannatayo ti ad-adu pay maipapan Kenkuana ken tapno itden ti subbot a mamagbalin a posible iti biag nga agnanayon. Talaga kadi nga ap-apresiarenyo dagita a nakaskasdaaw a sagsagut? Dagita aya ti mangtignay kadakayo a mangawat ti awisna a mangammo maipapan kenkuana ken agserbi kenkuana?​—Mateo 20:28; Juan 1:18; Roma 5:21.

13. Apay a patienyo a ti Dios interesado kadagiti indibidual?

¹³ Ti Namarsua iti uniberso interesado kadagiti tattao. Inawaganna ni Abraham a “gayyemko,” ken kinunana ken Moises: “Siak am-ammoka iti nagan.” (Isaias 41:8; Exodo 33:12) Ipamatmat ti libro ti Apocalipsis a ti Dios addaan simboliko a libro, wenno “lukot ti biag,” a naglaon iti nagnagan dagiti matalek nga ad-adipenna “manipud pannakabangon ti lubong.” Mairamanto aya ti naganyo sadiay?​—Apocalipsis 3:5; 17:8; 2 Timoteo 2:19.

14. Kasano a ti panangsurot kadagiti prinsipio ti Dios parang-ayenna ti biagyo?

¹⁴ Dagiti prinsipio ti Dios agkurrida. Ti panangaramid kadagiti bambanag iti pamay-anna parmekenna dagiti adu a parparikut​—ti imoralidad, adiksion ti droga, alkoholismo, ti di pagay-ayatan a panagsikog, sakit a benereal, kinaranggas, panangpapatay, ken ti atiddog a listaan dagiti dadduma pay a saksakit. Ti panangsurot ti pagayatanna makatulongda pay met kadakayo a makasarak kadagiti pudno a gagayyem ken agbiag a naragragsak. Saan kadi a maikari nga aramiden dayta? (1 Corinto 6:9-11) Uray pay ti agtutubo a talaga a determinadon a mangaramid kadagiti bambanag iti pamay-an ti Dios magun-odannat’ ad-adu a bileg a mangaramid iti naimbag. Kuna ti Biblia: “Iti nasungdo [ni Jehova] agparangto a nasungdo.” Ipasigurona met kadatayo a dinanto “baybay-an dagiti nasungdo kenkuana” wenno “panawan ti ilina.”​—Salmo 18:25; 37:28; 94:14; Isaias 40:29-31.

Umabante iti Panagserbi iti Dios

15. Ania a nadiosan a pammagbaga ti inted ni Salomon kadagiti agtutubo?

¹⁵ Naisentro kadi dagiti kalatyo iti matmatayen a daan a lubong wenno iti daydiay nalinteg a baro a lubong? Dumdumngegkay aya iti Dios, wenno dumdumngegkayo kadagiti mamasirib a tattao itoy a lubong a sumuppiat kenkuana? Ti kadi panaglinglingay, nangato nga adal, wenno dagiti makaibus ti tiempo a nailubongan a karera ti umun-una iti Dios ken iti serbisiona? Insurat ni masirib nga Ari Salomon ti intero a libro ti Biblia ti Eclesiastes tapno ipakitana no aniat’ rebbeng nga umun-una iti biagtayo. Isut’ nagpatingga: “Lagipem met, ita, ti Naindaklan a Namarsua kenka kadagiti aldaw ti kina-agtutubom, iti sakbay ti idadateng dagiti dakes nga aldaw, ken yaadani dagiti tawen, inton kunaem: ‘Awan ti panagragsakko kadakuada.’ Daytoy isu ti pagbanagan ti panggep, amin nangngegan: Agbutengka iti pudno a Dios ken salimetmetam dagiti bilbilinna. Ta daytoy isu ti dagup ti obligasion ti tao.”​—Eclesiastes 12:1, 13.

16. Kasano a rumagpat dagiti agtutubo kadagiti kanayonan a pribilehio?

¹⁶ Amin dagiti natataengan a Kristiano a kakabsat nga am-ammoyo​—dagiti panglakayen, dagiti payunir, ken dagiti manangaywan ti sirkito ken distritoyo​—idi naminsan ub-ubbingda met. Aniat’ nakaiturong kadagiti bendision a tagtagiragsakenda itatta? Inayatda ti Dios ken kayatda ti agserbi kenkuana. Adu kadakuada iti kina-agtutuboda ti nanggundaway ti kanayonan a panawen nga adda kadakuada a manggun-od ti pannakaammo ken kapadasan. Nagadalda ken nakiramanda iti panaggigimong. Nakiramanda iti panangisuro, ken gimmaw-atda kadagiti kanayonan a pribilehio​—ti panagpayunir, serbisio idiay Bethel, wenno dadduma pay a makagunggona nga ar-aramid. Saanda a ‘super nga agtutubo’; ngem addaanda kadagiti normal nga intereses ken pakaseknan kas adda kadakayo. Kaskasdi, inyaplikarda ti bagbagida a maitunos iti balakad a: “Dagup ti aramidenyo, aramidenyo iti amin-kararua a kas la maipaay ken Jehova, ket saan a maipaay kadagiti tattao.”​—Colosas 3:23; idiligyo ti Lucas 10:27; 2 Timoteo 2:15.

17. Aniat’ makatulong kadagiti agtutubo a rumang-ay iti serbisio ti Dios?

¹⁷ Dakayo ngay? Pudno aya nga apresiarenyo dagiti nadiosan a bambanag? Pumilpilikayo aya kadagiti gagayyem kadagidiay mangipangpangruna ti naespirituan a bambanag? Parparegtaenyo aya dagiti dadduma a makiraman kadakayo iti Nakristianuan nga aramid? Mapmapankay aya iti Nakristianuan a serbisio a kadua dagiti natataengan, dagidiay ad-adut’ kapadasanna tapno makaadal kadakuada, tapno maramanan ti rag-oda, ken tapno maparegta babaen kadagiti naimbag nga ar-aramidda? Maysa a Saksi malaglagipna pay ti aldaw, ngangngani 20 a tawen ti napalabasen, idi iti damona maysa a natataengan a tao ti siaayat a nangawis kenkuana a kumuyog iti tay-ak ti ministerio. Daytoy, sigun itoy a babai, ti namalbaliwan ti biagna: “Iti damdamona rumrummuarak gapu ta kayatko, saan a gapu ta dagiti dadakkelko ti mangikuykuyog kaniak.”

18. Ania a bambanag ti panunoten sakbay nga idatag ti maysa ti bagina maipaay ti bautismo?

¹⁸ No rumangrang-aykayo iti panagar-aramid ti bambanag iti pamay-an ti Dios, mabalin nga iti mabiiten mangrugin a pampanunotenyo ti bautismo. Nasken a laglagipen a ti bautismo ket saan a maysa a seremonia a lasaten nga agturong iti kina-adulto. Saan nga ipakita dayta a dumakdakkelkayon, wenno saan met a banag nga aramidenyo agsipud ta innala dagiti gagayyemyo daytoy nga addang. Sakbay nga ikalikagumyo ti pannakabautisaryo, rebbengna nga addaankayo iti pamunganayan a pannakaammo ti kinapudno ken agbibiagkayon a maitunos iti Saot’ Dios. Rebbeng nga addaankay metten ti rasonable a kapadasan iti panangiranranud iti dayta a pannakaammo kadagiti sabsabali ken bigbigen a daytoy ket nasken a paset ti pudno a panagdaydayaw. (Mateo 24:14; 28:19, 20) Rebbeng met a maammuanyo a kalpasan ti panangalayo itoy nasken a Nakristianuan nga addang mainanama ti panagbiagyo a maitunos kadagiti nalinteg a prinsipio ti moral iti Biblia.b Iti pusoyo, rebbeng nga indedikaryon ti biagyo iti nayaat a nailangitan nga Amayo.​—Idiligyo ti Salmo 40:8, 9.

19. Kaanot’ rebbeng a pannakabautisar ti maysa a tao?

¹⁹ Ti bautismo ket isut’ addang nga alaenyo no naikeddengyon a sititibker nga aniaman ti mapasamak iti nabati pay a panagbiagyo, ket agserbikayto iti Dios. Daytat’ tanda iti publiko a nangaramidkayon ti naan-anay, awan ikedkedkedna, ken awan kondisionna a dedikasion ken Jehova baeten ken Jesu-Kristo a mangaramid ti pagayatan ti Dios. Maysa a Kristiano a panglakayen malaglagipna pay ti aldaw, ngangngani kagudua siglo ti napalabasen, idi a nabigbigna: “Rebbeng nga adda aramidek maipapan iti dayta!” Ni Michelle, maysa nga agtutubo a Saksi a nabautisaran idiay Newcastle, Inglatera, sumagmamano a tawen ti napalabasen, kunana: “Iti edad a 13, nabigbigko a rebbeng nga idedikarkon ti biagko ken mabautisaran; awanen ti rebbeng nga innak aramiden no di ti panagserbi iti Dios.”

20. (a) Ania a nagsayaat nga ulidan ti impakitan ti pinulpullo ribo nga agtutubo? (b) Kasanot’ rebbeng a panangmatmat itoy nga addang?

²⁰ Pinulpullo a ribo nga agtutubo ti nabautisaranen ti nabiit pay. Napagadalanda ti Saot’ Dios ken naadalda dagiti daldalanna, ket kalpasanna, babaen iti bautismo ti danum, siraragsak a kimmapponda kadagiti adu a natataengan iti publiko a panangisimbolo ti dedikasionda iti Dios. Ammoda a ti bautismo saan nga isut’ pagpatinggaan no di ket isut’ pangrugian ti pudpudno a dedikado a wagas ti panagbiag a determinadoda nga agtultuloy iti serbisio ni Jehova iti agnanayon.

[Dagiti Footnote]

Kasanot’ Panangsungbatyo?

◻ Apay a nasken unay ti pannakaammo iti Saot’ Dios?

◻ Kasanot’ pannakagun-odyo ti ad-adu manipud Nakristianuan a panaggigimong?

◻ Ania a bendision manipud iti Dios ti rebbeng a mangtignay iti panagtulnogtayo kenkuana?

◻ Kasano a makapagabantekayo iti serbisio ti Dios?

◻ Kaano ti rebbeng a pannakabautisar ti maysa?