Agtalinaed a Natibker iti Nakristianuan a Wayawaya!

Dagiti Tampok Manipud Taga Galacia

NI Jehova isut’ Dios ti wayawaya. (2 Corinto 3:17) Ni Jesu-Kristo, nga Anakna, kunana: “Ket maammuanyonto ti kinapudno ket ti kinapudno luk-atannakayto.” (Juan 8:32) Ken kas panangtulad ken Kristo, inkaskasaba ni apostol Pablo ti naimbag a damag ti wayawaya.​—Roma 6:18; 8:21.

Babaen ti panangiwaragawagna iti dayta makaited-wayawaya a mensahe, impasdek ni Pablo dagiti kongregasion ti Galacia (maysa a Romano a probinsia idiay Asia Menor) bayat ti umuna a panagdaliasatna a misionero (47-48 K.P.). Ammo dagiti taga Galacia ti pangngeddeng ti bagi a manarawidwid a saanen a kasapulan ti pannakakugit dagiti Kristiano. (Aramid 15:22-29) Ngem dagiti manangitandudot’ Judaismo sapsapulendat’ panangadipenda kadakuada babaen iti panangipilit a makugitda. Gapuna impaganetget ni Pablo ti Nakristianuan a wayawaya iti suratna kadagiti taga Galacia manipud Corinto wenno Antioquia idiay Siria idi agarup 50-52 K.P. Kas pangarigan, kunana: “Maipaay iti panagwayawaya linuk-atannatayo ni Kristo. Agtalinaedkayo ngarud a natibker, ket dikay paisangol manen iti babaen ti sangol ti pannakaadipen.”​—Galacia 5:1.

Ni Pablo Idepensana ti Kina-apostolna

Umuna nga impakita ni Pablo a ti kina-apostolna ket “gapu ken Jesu-Kristo ken ti Dios.” (1:1–2:14) Gapu iti maysa a sirmata, napan ni Pablo (a kadua ni Bernabe ken Tito) idiay Jerusalem maigapu iti parikut ti panagkugit. Sadiay nabigbig da Santiago, ni Cefas (Pedro), ken ni Juan nga isut’ naikkan pannakabalin nga agbalin nga apostol kadagiti nasnasion. Ket idi ti kamaudianan simmina ni Pedro manipud kadagiti manamati a Gentil idiay Antioquia gapu ta nagbuteng kadagiti Kristiano a Judio manipud Jerusalem, isut’ tinubngar ni Pablo.

Kasanot’ Pannakapalinteg?

Inaramid met ti apostol ti napigsa a punto a babaen laeng iti pammati ken Jesu-Kristo a mapalinteg ti maysa. (2:15–3:29) Inawat dagiti taga Galacia ti espiritu ti Dios, saan a gapu kadagiti aramid ti linteg, ngem babaen iti panangakseptar ti naimbag a damag iti pammati. Dagiti pudno nga annak ni Abraham addaandat’ pammati, ngem dagiti indibidual a mayat a mapalinteg babaen “kadagiti ar-aramid ti linteg addada babaen ti pannakailunod.” Apay? Ngamin ta saanda a masalimetmetan a naan-anay ti Linteg. Kina-agpaysuanna, ad-adda a pinaglatak ti Linteg dagiti salungasing ken “nagbalin a mangaywan tapno iturongnatayo ken Kristo.”

Agtalinaed a Natibker!

Babaen iti ipapatayna, ni Kristo ‘imbulosnan dagidiay adda iti babaen ti linteg.’ Ngem dagiti paspasurotna masapul nga agtalinaedda a natibker iti Nakristianuan a wayawaya. (4:1–6:18) Gapuna kasapulan a parmeken dagiti taga Galacia ti asinoman a mangpadpadas a mangallukoy kadakuada nga umawat ti sangol ti pannakaadipen. Mainayon pay, saanda koma nga abusaren ti wayawayada no di ket lisianda dagiti “aramid ti lasag” ket iparangarangda dagiti bunga ti espiritu ti Dios. Dagidiay agtarigagay a mangiyeg kadakuada iti pannakakayaw iti Linteg kayatdat’ “mangiparangarang iti nasayaat a langa iti lasag,” liklikan ti pannakaidadanes, ken maaddaan gapuanan nga agpasindayag. Nupay kasta, impakita ni Pablo nga awan kapapaayanna ti panagkugit wenno di panagkugit. Imbes ketdi, “ti baro a parsua ti adda kapapaayanna.” Inkararagna a ti talna ken kaasi maadda koma iti naespirituan nga Israel, dagidiay adda iti baro a pannakaparsua.

Ti surat ni Pablo kadagiti taga Galacia tinulonganna ida a mangparmek kadagidiay agsapsapul a mangadipen kadakuada iti naespirituan. Sapay koma ta daytat’ mangtulong kadatayo a mangipamatmat ti bunga ti espiritu ken agtalinaed a natibker iti Nakristianuan a wayawaya.

[Kahon/Ladawan iti panid 23]

Dagiti Marka: “Awan koma ti mangriribuk kaniak,” insurat ni Pablo, “ta adda iti bagik dagiti marka ti maysa nga adipen ni Jesus.” (Galacia 6:17) Kadagiti dadduma a pagano idi ugma, mamarkaan dagiti ad-adipen a mangipakaammo kadagiti makinkukua kadakuada. Nadumaduma a disenio ti maisinit wenno maikitikit iti lasagda. Awan duadua, dagiti adu a pisikal a panangabuso a naikapet iti bagi ni Pablo gapu iti Nakristianuan a serbisiona nakaibatida kadagiti sumagmamano a piglat, a mangpaneknek iti panagkunana kas matalek nga adipen a kukua ni Kristo, daydiay naidaddadanes gapu Kenkuana. (2 Corinto 11:23-27) Mabalin a dagitoy “dagiti marka” a tuktukoyen ni Pablo, wenno mabalin a pampanunotenna ti biagna kas maysa a Kristiano, a mangiparparangarang ti bunga ti espiritu ti Dios ken panangitungpal ti ministeriona.

[Ladawan]

Napilitan dagiti ad-adipen a Romano nga agserbi iti appoda, ngem ni Pablo maysa a napalungdo ken naragsak nga adipen ni Jesu-Kristo