Ni Jehova ti Nangpapigsa Kaniak

KAS INSALAYSAY NI EKUMBA OKOKA

NAIYANAKAK iti maysa a “Kristiano” a sangakabbalayan iti maysa a pagilian ti Central Africa, ket dimmakkelak nga addaan panagayat iti Dios. Ni tatangko ket maysa a naregta a laigo a predikador, ket masansan a kumuykuyogak kenkuana no mangisursuro idiay simbaan wenno kadagiti panaglulualo kadagiti pribado a pagtaengan. Yantangay kasla nasingpetak nga agtutubo a lalaki, dadduma kadagiti laigo a predikador ti nangpili kaniak nga agserbi a kadua ti padi no Misa. Kunada pay kaniak a maysa nga aldaw mabalin nga agadalakto nga agbalinto met a maysa a padi.

Iti rabii, nupay kasta, siak ti mangidadaulo a kumakanta ken sumasala iti lokal nga orkestra, ti Matumba-Ngomo. Iti dayta a kapasidad, nakikapponak kadagiti agtutubo a lallaki ken babbai iti distritomi iti isuamin a kita ti imoralidad. Ngem kaskasdi a kumitkitaak iti masanguanan a maaddaanto met laeng ti maymaysa nga asawa ken ti ipapankonto met idiay langit a makikadua kadagiti “santo.” Diak makita a kasapulan a dalusak ti panagbiagko ta, sigun iti doktrina a Katoliko, amin a basbasolko ti napakawanen kada rabii ti Sabado no agkumpesarak.

Mangrugi ti Rigrigat

Idi 1969, bayat nga ages-eskuelaak iti kolehio, mangrugi nga adda mariknak a sakit kadagiti susuopko. Diak ammo no aniat’ mangpatpataud kadakuada, ngem kadagiti simmaruno a bulbulan, kumarkaroda. Dagiti dadakkelko, agpapan pay nalalatakda a Katoliko, inkeddengda nga ipandak kadagiti nagduduma a managanting-anting, a nagkuna nga adda kano nangkulam kaniak, ngem maigapu kadagiti karkararag ken ag-agasda, umimbagakto. Nupay kasta, mangrugiakon a magna nga agsigking, ket idi 1970, diak pulos makapagnan, uray no agsarukodak. Iti dayta a punto, kunak no dagiti aldaw ti pampannagnak dandanidan agpatingga.

Idi Pebrero 1972 naikeddeng kamaudiananna ni tatangko nga ipannak idiay ospital ti Wembo Nyama. Addaak idiay ospital iti nakabaybayag ta rugiandak pay nga awaganen a siak ti makinkua! Umay dagiti tattao idiay ospital, maagasanda, pumanawdan, ket kalpasanna agsublidanto manen iti sabali pay a problema, ket kaskasdi nga addaakto pay la idiay! Ni tatangko kasapulan nga agawid maipaay iti panagani ti pagay, ngem itan adda asawakon, a duat’ annakko, ket ti ingungotek nga asawa, nupay 21 añosna laeng, ti nangay-aywan kaniak ket mapan agsapul ti trabaho tapno maaywananna dagiti kasapulanmi.

Nupay kasta, maleddaanganak iti intero a kasasaad. Iti edad a 24, kaskasdi a kumarkaro ti kasasaadko, bayat a dagiti gagayyemko nakasaysayaatdan, adu kadakuadan ti addaan kadagiti permanente a panggedan. Para kaniak kasla nasaysayaat para iti tunggal maysa a patayek ti bagikon. Gapu itoy, inwarasko aminen nga ik-ikutak kadagiti annakko ken kakabsatko, a diak imbagbaga ti addat’ panunotko. Awan imbatik a para kaniak malaksid ti paboritok a bado nga isunto ti pangitabonda kaniak.

Panangrugi ti Baro a Biag

Kalpasanna maysa kadagiti Saksi ni Jehova ti naituding iti kama a dumna kaniak. Nupay bulsek ti maysa a matana ken agpegpeggad a mapukaw ti panagkita ti maysa pay, dagdagus a kinaskasabaannak manipud iti Biblia maipapan ken Jehova ken ti Pagarian. Kalpasan ti sumagmamano nga aldaw, pimmanawen iti ospital, ngem impiarnak iti panangaywan ti sumagmamano a Saksi a nangsarsarungkar kenkuana. Kalpasan ti kanayonan a pannakipatpatang, dagitoy metten ti pumanaw, ngem maysa kadakuada ti nangitultuloy a nangadal kaniak babaen iti sursurat. Inikkannak pay ti nadumaduma a publikasion a pangadal ti Biblia, a binasbasak met a siraragsak.

Iti daytoy a pamay-an nakaawatak ti naespirituan a taraon, ket ti panagleddaangko nagin-inut a nasukatan ti ragsak. Kasla arigna a ti simbaanko ti mangmangted kaniak ti “asido” kas inumen, ngem ita siak ti siwayawayan nga umaw-awat ti danum ti biag. Nagyamanak a naimpusuan ken Jehova gaput’ panangwayawayana kaniak manipud kadagiti an-anito, kas ti Trinidad, ti di ipapatay ti kararua, panagbuteng kadagiti natay, ken panagdaydayaw kadagiti inapo.

Ngem ita kayatkon ti pumanaw iti ospital. Kalpasanna naammuak a dua a pamilia dagiti amin-tiempo a ministro ti maituding idiay Wembo Nyama, gapuna naikeddengkot’ agtalinaed agingga iti isasangpetda. Anian a ragsak ti nariknak idi immayda a mangsapul kaniak iti katrek ti ospital! Itan mabalinko met laengen a maitultuloy ti panagad-adal ti Biblia iti maysa a tao imbes a babaen iti koreo.

Kalpasan ti sumagmamano nga aldaw, dinamagko no addaanda ti panaggigimong iti maysa a Kingdom Hall, kas mabasbasak kadagiti magasin. Siaayat nga imbagada kaniak nga idadauloda amin a panaggigimongda iti bassit a kalapaw a pagindegan ti maysa kadakuada. Kunada pay met a maragsakanda a mangipan kaniak sadiay babaen iti bisikleta! Agpapan pay nakaro nga ut-ot ti dorik ken ti amin a susuopko, siraragsakak a timmabuno kadagiti amin a panaggigimong. Idi naragpatkon dagiti kualipikasion, nabalinakon ti nangited ti report kada bulan kas di bautisado nga agibumbunannag, nangrugi idi Abril 1974.

Tallo a bulan kamaudiananna, insimbolokon ti dedikasionko ken Jehova babaen ti pannakaitaneb iti danum. Nangaskasabaak kadagiti medical staff ti ospital, kadagiti pasiente idiay, kadagiti Protestante a misionero nga umay bumisita, ken kadagiti miembro ti pamiliak​—agpapan pay determinado nga ibubusor ti pamiliak. Iti daytoyen a tiempo, mangaskasabaak bayat a nakadataak iti kamak wenno nakasakay iti wheelchair nga impaay ti ospital kaniak agingga a makagatangak ti kabukbukodak.

Ti Panagibtur Nangyeg Gunggona

Agpapan pay ibubusor ti pamiliak, intultuloyko ti nagna iti dalan ni Jehova ket sibabaknang a nabendisionanak. Innala met ni baketko ti takderna iti kinapudno ket nabautisaran idi 1975. Naikeddengmi ti agnaed idiay Katako-Kombe, a sadiay adda naipasdeken a kongregasion. Madanagan dagiti dadakkelko maipapan kadakami ta adda nagkuna kadakuada nga amin dagiti Saksi papatayenda inton 1975. Idi madikami a mangisuko ti pannakitimtimpuyogmi, insardengdan ti panagipatulod ti taraonmi, ket narigatankami kadagiti material a kasapulan. Malagipko ti maysa nga okasion a ti buridek nga anakko a lalaki natalimudaw gaput’ bisin kalpasan ti saanmi a pannangan ti maysa ket kagudua aldaw. Ngem dagiti Kristiano a kakabsatmi nangyegdat’ ikan ken taraon kadakami. Kamaudiananna, dagiti dadakkelko ti nangrugi manen a tumulong kadakami, ngem dagiti kakabsatmi ti dida pulos nagsardeng a nangnangted ti material a tulong kadakami.

Idi Pebrero 1975 naparalisadon ti kannawanko ket nangrugin a kumuttong. Ngem sinalimetmetak ti pammatik ket determinadoak nga agserbi ken Jehova a sirarag-o. Maragsakanak a mangibaga a ti takkiagko kamaudiananna nangrugi a pumigsa manen, ket kaskasdi a daytat’ maigunayko pay agingga itatta, nga isut’ nakatulong kaniak a mangukrad ti Bibliak ken agusar kadagiti pagbasaan ti Sosiedad.

Maingel iti Sanguanan dagiti Agtuturay

Idi 1977 ti lokal a komisionado inakusarnak iti sanguanan ti komision ti rehion, a kabbaro a nangaresto ti maysa nga espesial payunir iti kabangibang a kongregasion. Maysa nga aldaw maysa a soldado ti immay kaniak nga addaan ayab. Nagkararagak a kadua ti pamiliak, pinaregtak ti kongregasion, kalpasanna kimmuyogak kenkuana. Pagyamanan iti espiritu ni Jehova, nabalinak ti nangted ti maingel a sungbat kadagiti darum, ket kalpasan ti nabayag a diskusion kadagiti agtuturay a sibil ken militar, imbulosdak a kadua ti espesial payunir.

Sumagmamano a bulan kalpasanna, siak manen ti pinaayaban ti sabali a komisionado, ket ditoy manen, babaen iti tulong ni Jehova, nabalinak nga indepensa ti naimbag a damag nga addaan ragsak ken tured. Naaddaanak ti nabayag a diskusion iti daytoy a tao, ket iti panagpatingga amin dayta, imbulosnakon ket personal pay nga induronna ti wheelchair ko iti ruar ti opisinana. Sana kuna a siuulimek kaniak: “Umayka idiay balaymi inton rabii.” Kalpasan ti sumagmamano a panagsarungkarko, nakairugiak ti panagadal ti Biblia kenkuana. Di nagbayag, addaanakon ti pito a panangyadal ti Biblia kadagiti pagtaengan kadagiti nadumaduma a tattao nga addaan kinaturay. Kaaduan kadakuada ti tumabtabuno kadagiti gimong ti kongregasion a maiyur-urnos a lokal.

Espesial a Serbisio

Indawatko ken Jehova a tulongannak, agpapan pay sakitko, a mangtungpal ti karik nga agserbi kenkuana iti amin a pigsak. Uray saanak opisial a nagpasalista, pinadpadasko a ragpaten dagiti kasapulan kas auxiliary payunir. Tinulongannak ni Jehova nga agballigi, gapuna intedko ti aplikasionko para itoy a serbisio para kadagiti bulan ti Hunio ingganat’ Oktubre. Kalpasanna inawat ti Sosiedad ti aplikasionko nga agbalin a regular payunir, ket rinugiak daytoy a serbisio idi Nobiembre 1976. Idi Setiembre 1977 naan-anay ti ragsakko idi inawatko ti pannakaitudingko kas espesial payunir iti kongregasion ti Katako-Kombe.

Kasanok a naar-aramidan daytoy? Saklawek ti teritoria babaen iti wheelchair ko babaen ti tulong ti ingungotek nga asawa ken dagiti kakabsat iti kongregasion. No maminsan mapanak nga agbukbukod babaen kadagiti sarukod. Naminsan wenno namindua a natnatuangak. Kalpasanna agurayak lattan, a di aggargaraw iti daga, agingga nga adda lumabas a tumulong kaniak a tumakder ket sana ited kaniak dagiti sarukodko. Malaglagipko a kanayon ti determinasion dagiti apostol ken adalan ni Jesus. (Aramid 14:21, 22; Hebreo 10:35-39) Tunggal matuangak, agkararagak ken Jehova a dinak koma palubosan a maupay, no di ket, ikkannak koma ti pigsa a makapagtultuloy nga agserbi kenkuana. Linaglagipko dagiti nakaskasdaaw a kari a nailanad iti padto ni Isaias, nga “iti kasta aglagtonto ti pilay a kas maysa nga ugsa.”​—Isaias 35:6.

Mientras nga ad-adda a pinarang-ayko ti serbisiok, ad-adda met a maparparmekko dagiti pisikal a pakarigatak. Idi 1978 naaddaanak ti pribilehio a tumabuno iti Kingdom Ministry School idiay Lubumbashi, a ramanen dayta ti panagdaliasat iti agdagup 2,000 kilometros babaen iti trak, barko, ken tren. Pudno unay, para iti daytoy a panagdaliasat pinawadwad ni Jehova ti pigsak. (Isaias 12:2; 40:29) Itan mabalinko payen ti magna​—buyogen ti adu a rigat​—agingga iti 100 metros nga awan sarukodna. Kumbinsidoak a ni Jehova dinengngegna ti kararagko idi 1973 nga ikkannak koma ti pigsa tapno makapagserbiak kenkuana nga addaan determinasion.

Baro a Pannakaituding

Idi 1984, kalpasan ti pito a tawen iti kongregasion ti Katako-Kombe, nakaawatak ti baro a pakaitudingan nga agtrabaho a kadua ti kongregasion idiay Lodja-Centre. Kalpasan ti makatawen nangirugikami ti baro a panagadal ti libro 12 kilometro ti kaadayona, ket di nagbayag nakairugikami manen ti sabali 30 kilometros manipud iti daytoy maysa. Daytoy naud-udi ti di nagbayag naorganisar a naiputputong a grupo ket idi 1988 naakseptar kas maysa a kongregasion, nga isut’ agdama a pagserserbiak a panglakayen.

Ti panagpayunir pudno a nakaim-imbag kaniak, agpadpada iti naespirituan ken iti nainlasagan. No addaak iti serbisio, a nakasarukod, naaramidak dagiti ehersisio nga inrekomendar dagiti doktor. Napigpigsaak itatta ngem idi nangrugiak nga agpayunir, ket ti tarigagayko isu komat’ pannakapagibtur iti daytoy a trabaho aginggat’ panungpalan. Mailiwak a makakita no kasanot’ panangtulong ni Jehova kaniak nga “aglagtonto a kas maysa nga ugsa” inton diakton ib-ibturan dagiti nakaro nga ut-ot daytoy a sakit.

Iti isuamin a pusok, agyamanak iti nailangitan nga Amatayo, a nangted kaniak ti pigsa, tured, ken ti amin-tiempo a serbisio. Agtawenakon ti 36, ket kalpasan ti 11 a tawtawen iti trabaho kas payunir, mangnamnamaak nga agtultuloy, aniaman ti addat’ masanguanan. Determinadoak a mangusar iti amin a pigsak a mangidaydayaw ken mangitantan-ok iti naindaklan a Dios a ni Jehova.