Ti Biag ken Ministerio ni Jesus
TI ARTIKULO a “Turposen ni Jesus ti Amin a Kiddawen ti Dios,” kadagiti sumaganad a panid, ket maudi a benneg ti atiddug a seryetayo a “Ti Biag ken Ministerio ni Jesus.” Daytoy a salaysay nagparang iti Ti Pagwanawanan iti nasurok nga innem a tawen, iti 149 nga agsasaruno a ruar, nangrugi iti Oktubre 1, 1985, a ruar.
Inanamaenmi a daytoy a serye iti Ti Pagwanawanan tinulongannakayo a mangsurot ti balakad ni apostol Pablo a ‘kumita ken Jesus’ ken ipangag ti bilin ti Dios a “dumngeg kenkuana.” (Hebreo 12:2, 3; Mateo 17:5) Kabayatan dagiti tawen, adu ti nagsurat a nangikuna a natulonganda a mangaramid iti daytoy. “Kasla addaak sadiay a dumdumngeg kenkuana ken mangbuybuya ti ar-aramidenna,” insurat ti maysa a managbasa. “Ad-adda nga isut’ inayatko gapu kadagitoy nga artikulo.”
Sabali pay a managbasa ti nagsurat: “Tunggal ruar naglaon ti punto a nalabtawak no agbasbasaak iti salaysay ti Biblia. Tinagiragsakko ti mangpampanunot kadagiti pasamak iti biag ni Jesus iti nasaysayaat a kronolohikal nga urnos babaen ti panangbasa iti tunggal artikulo.” Adu ti nangiyebkas ti umas-asping nga apresasion iti panangadal no kaano ken sadino a nangisuro ni Jesus ken nangaramid kadagiti bambanag kabayatan ti ministeriona.
Maysa a babai idiay España kinunana: “Indulinko amin dagiti artikulo manipud damona. Makaisuroda unay para kadagiti nataenganen kasta met kadagiti ubbing. Agtawenak ti 44, ket maay-ayatanak no basaek dagitoy a salaysay. Kasla addaak a presente iti tunggal historikal a pasamak.”
Maysa nga ina idiay Estados Unidos nagsurat: “Gapu iti kinaababa dagiti artikulo ken dagiti simple a pannakaiyebkasda, nakikadua ti asawak iti panagadal ti pamiliami. Ti agtawen-walo nga anakko a lalaki kiniddawna nga agsuratak tapno agyaman kadakayo ta ti amana agad-adal itan ti Biblia. Kidkiddawenna nga iti masanguanan inton makompleton ti serye maipablaak koma dagiti artikulo iti maysa a libro tapno mairamanna ida kadagiti kaeskuelaanna.”
Nalabit makipadakayo iti rikrikna ti maysa a managbasa a nangisennaay iti nabiit pay: “Maladingitanak bassit a mangpanunot nga agpatingganton iti mabiit ti serye bayat a maus-usig dagiti maudi nga al-aldaw ti biag ni Kristo. Pudno a mail-iliwakto iti lugarda iti Ti Pagwanawanan.” Inanamaenmi a tagiragsakenyo ti maudi a paset ti seryetayo, “Ti Biag ken Ministerio ni Jesus.”