Iti Mabiit Awanton Sakit Wenno Ipapatay!

AWAN pagragsakanna ti agsakit, wenno kayat dagiti tattao ti matay. Ipaganetget ti maysa a propesor ti medikal a sosiolohia: “Ti panangsapsapul ti napapaut a biag kasla ngangnganin sapasap dayta kabayatan ti historia ken iti kaaduan a sosiedad. Nainaig dayta iti kangrunaan a panagregget iti panangtaginayon ti bagi . . . Ni Ponce de Leon ti kakaisuna a kalatakan iti atiddug a linia dagiti tattao a nangbusbos ti biagda a nagsapsapul ti at-atiddug a biag. Kaaduan kadagiti medikal a siensia ti naidedikar iti panangtaginayon ti at-atiddug a biag babaen ti pananglaban ti sakit ken ipapatay.”

Ti ipapatay salungasingenna unay ken mangpataud ti rigat iti akin-uneg a kasisigudtayo a no abakenna dagiti gagayyem ken miembro ti pamilia, ngangngani gagangay a padpadasentayo a palag-anen ti epektona. Ti libro a Funeral Customs the World Over napaliiwna: “Awan grupo, nupay primitibo iti maysa a murdongna wenno sibilisado iti sabali, a nabaybay-an nga is-isuna ken iti laeng kabaelanna dina ibelleng dagiti bagi dagiti miembrona iti seremonia. . . . Pennekanna dagiti nauneg a sapasap a karirikna. Ti panangaramid iti dayta ti kasla ‘umiso,’ ken ti saan a panangaramid iti dayta, nangnangruna para kadagidiay nasinged pannakainaigna iti pamilia, rikna, panagbiag, agpadpada a kapadasan wenno dadduma a singgalut, ti kasla ‘di umiso,’ maysa a di natural a panangikkat, maysa a banag a pagpadispensaran wenno pagbainan. . . . [Ti tao] ket maysa a nabiag a mangipumpon ti minatayna buyogen ti seremonia.”

Ti Namunganayan ti Sakit ken Ipapatay

Ti ideya a dumtengton ti pannakaikkat ti sakit ken ipapatay ket ngarud addaan napigsa nga awis, ngem adda kadi pakaibatayan ti kasta a pammati? Pudno nga adda, ken agpadpada a rasonable, mapagtalkan, ken di agkurang. Dayta ti napaltiingan a Sao ti Namarsua​—ti Nasantuan a Biblia.

Ilawlawag dayta a libro ti namunganayan ti natauan a rigat. Ibagana kadatayo a ti immuna a tao, ni Adan, ti pinarsua ti Dios ken naisaad iti maysa a paraiso a minuyongan a pagtaengan a masarakan iti maysa a lugar idiay Makintengnga a Daya. Naparsua a perpekto ni Adan; dina ammo no ania ti sakit ken ipapatay. Di nagbayag isut’ kinadua ti maysa nga asawa a babai a kapadpadana a perpekto, ket tinagiragsakda a dua ti inanama ti agnanayon a biag ditoy daga.​—Genesis 2:15-17, 21-24.

Daytoy natalna a kasasaad di nagpaut. Apay? Agsipud ta siaagum a pinili ni Adan ti wagas ti panagbiag nga agwaywayas iti Dios. Ti narigat a panagtrabaho, rigat, sakit, ken idi agangay ipapatay ti nagresulta. (Genesis 3:17-19) Tinawid dagiti annakna ti di naragsak a kita ti panagbiag a pinili ni Adan. Ilawlawag ti Roma 5:12: “Gapu iti maysa a tao simrek ti basol ditoy lubong ken ti ipapatay gapu iti basol, ket iti kasta immay ti ipapatay iti isuamin a tattao agsipud ta nagbasolda amin.” Inayon ti Roma 8:22: “Ta ammotayo a ti sangaparsuaan agsasaibbekda ken agrigrigatda a sangsangkamaysa agingga ita.”

Ditoy Daga wenno Idiay Langit?

Uray pay kasta, ipasiguro ti Biblia kadatayo a ti Dios isublinanton iti mabiit ti natulnog a sangatauan iti naragsak a kasasaad a napukaw da Adan ken Eva. Kunaen ti Apocalipsis 21:3, 4: “Ti Dios a mismo addanto kadakuada. Ket punasennanto ti amin a lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat. Dagiti immuna a bambanag napalabasdan.” Ti maysa a mammadto idi ugma umas-asping a nasirmatana ti tiempo inton “awanen ti umili nga agkunanto: ‘Masakitak.’”​—Isaias 33:24.

Mapanunotyo kadi ti lubong nga awanen dagiti ospital, puneraria, ken pagitaneman? Mapanunotyo kadi ti agtultuloy nga agbiag, siwayawaya manipud peggad ti panagsagaba ken ipapatay? Wen, ti kari ti Dios sagidenna dagiti rikna iti kaunggantayo amin. Kaskasdi, kasanot’ pannakasigurotayo a daytoy nakaskasdaaw nga inanama ket agpaay iti planetatayo a Daga​—saan a para ti langit? Imutektekanyo ti konteksto dagiti immuna a naibagan a teksto iti Kasuratan. Dagiti umuna a bersikulo ti Apocalipsis kapitulo 21 bersikulo 1-3 saritaenda ti “maysa a baro a langit ken baro a daga.” Ti nalawag a sasao naaramid a ti Dios addanto iti sangatauan ket agbalindanto a tattaona. Ti kari idiay libro ti Isaias nga awanton ti agsakit ket sinaruno ti panangtukoy iti “tattao nga agnanaed iti daga,” dagidiay a “napakawanen ti basbasolda.”

Gapuna dagidiay a makaparegta a karkari tuktukoyenda ti biag ditoy daga! Ket makitunosda iti kararag ni Jesus iti Amana: “Maaramid koma ti pagayatam, no kasano sadi langit, kasta met ditoy daga.”​—Mateo 6:10.

Apay Mabiiten?

Natulonganen dagiti Saksi ni Jehova ti minilion a mangbigbig a dagitoy a karkari matungpaldanto iti asidegen a masanguanan. Iti ania a pakaibatayan, nupay kasta, a masiguradoda daytoy? Maibatay iti aglaplapusanan nga ebidensia nga agbibiagtayon iti “maudi nga al-aldaw” ti agdama a sistema, wenno urnos, dagiti bambanag ditoy daga. (2 Timoteo 3:1-5) Dagiti adalan ni Jesus inimtuodda ti pagilasinan no kaanonto ti panungpalan ti sistema dagiti bambanag. Kas sungbat impadto ni Jesus a detaliado dagiti rumangrang-ay a paspasamak ti lubong a napasamaken nanipud pay ibebettak ti Gubat Sangalubongan I idi 1914.a Kalpasanna innayonna: “Inton makitayo amin dagitoy, ammuenyo nga isu asidegen kadagiti ruangan. Pudno kunak kadakayo a dinto pay lumabas daytoy a kaputotan maaramidton amin dagitoy a bambanag.” Gapuna dadduma iti kaputotan nga agbibiag idi 1914 agbiagdanto a makakita iti panungpalan ti agdama a sistema ti lubong.​—Mateo 24:33, 34.

Iti dayta a tiempo ibaonto ni Jehova a Dios ti Anakna, ni Kristo Jesus, a mapan ken mangdadael ti amin a pakaigapuan ti panagsagaba ken rigat manipud ti rabaw daytoy napintas a planeta a Daga. Saritaen ti Biblia ti pannakaikkat ti kinadakes kas “ti gubat ti dakkel nga aldaw ti Dios a Mannakabalin Amin” idiay Armagedon.​—Apocalipsis 16:14, 16.

Ti dakkel a bilang dagiti managbuteng-Dios a tattao makalasatdanto iti nakaam-amak a pasamak ken agbiagda tapno kitaen ti panangrugi ti natalna a panagturay ni Kristo Jesus. (Apocalipsis 7:9, 14; 20:4) Nupay ti panagturayna ket manipud langit, dagiti makagunggona a resultana ti tagiragsakento amin dagidiay agbibiag ditoy daga​—agpadpada dagiti makalasat iti gubat ti Armagedon ken dagiti minilmilion a sumarsaruno a mapagungar manipud kadagiti natay. Agbalinton a napaypayso ti kari: “Ta isu [ni Kristo] masapul nga agari agingga iti panangikabilna kadagiti kabusorna iti babaen ti saksakana. Ti maudi a kabusor, a mapukawto isu ni patay.”​—1 Corinto 15:25, 26.

Mabalintay ngarud a sitatalek nga ipukkaw: “Iti mabiit awanton ti sakit wenno ipapatay!” Saan a panagpantasia daytoy, wenno panagar-arapaap. Dayta ti sigurado a kari ni Jehova a Dios, “a dina mabalin ti agulbod.” Agtalekkayto kadi iti daytoy a namnama? Magunggonaannakayo iti agnanayon!​—Tito 1:2.

[Footnote]

[Ladawan iti panid 7]

Ti sakit ken ipapatay masuktanton iti mabiiten iti nasalun-at a rikna ken agnanayon a biag