Dagiti Saludsod Manipud Kadagiti Managbasa
◼ Apay nga inyusuat ni Jesus ti Pananglaglagip a kadua laeng dagiti apostol ket saanna a kadua dagiti dadduma nga adalan a maiyeg iti baro a tulag?
Daytoy a saludsod kasla naibatay iti biddut a pagarup a nakitipon ni Jesus kadagiti apostolna iti dayta a rabii tapno iyusuat ti Pangrabii ti Apo a kadua ti kongregasion Kristiano dagiti napulotan nga addan iti baro a tulag. Imbes ketdi, idi Nisan 14, 33 K.P., ti kongregasion Kristiano di pay nabuangay, ken nakikadua ni Jesus kadagiti apostolna para ti tinawen a pannangan iti Paskua dagiti Judio.
Siempre, addaan ni Jesus kadagiti adalan malaksid ti 12 a pagaammo nga apostol. Ti tawen sakbay ti ipapatayna, imbaonna ti 70 nga adalan iti panangasaba a biahe. Kalpasan panagungarna, “nagparang kadagiti nasurok a limagasut a kakabsat iti naminsan.” Ket adda idi “agsangagasut ket duapulo” nga adalan naguurnong iti aldaw ti Pentecostes. (1 Corinto 15:6; Aramid 1:15, 16, 23; Lucas 10:1-24) Ngem usigentay ti grupo a kadua ni Jesus idi inyusuatna ti tinawen a rambak a pagaammo kas ti Pangrabii ti Apo.
Ited ti Lucas 22:7, 8 ti tiempo ti pasamak, a kunana: “Ket dimteng ti aldaw ti awan lebadurana a tinapay, a masapul a maparti ti karnero ti paskua; ket imbaonna da Pedro ken Juan, a kinunana: ‘Inkay agsagana iti maipaay kadatayo a paskua tapno mangantayo.’” Itultuloy ti salaysay: “Kunaenyo iti akinkua iti balay, ‘Ti Manursuro kunana kenka: “Adino ti ayan ti pakasangailiak a panganak ti paskua agraman dagiti adalak?”’” Gapuna iti dayta a rabii kadua ni Jesus ti 12 para iti Judio a rambak. Kinunana kadakuada: “Tinarigagayak iti nasged unay ti makipangan kadakayo iti daytoy a paskua ita ta diak pay agsagaba.”—Lucas 22:11, 15.
Nanipud pannakairugina idiay Egipto, ti Paskua ket maysa a rambak ti pamilia. Iti panangiyussuat ti Paskua, imbaga ti Dios ken Moises a maysa a karnero ti maparti agpaay iti tunggal sangakabbalayan. No ti pamilia ket bassitda a mangibus iti sangabukel a karnero, maawis a makipangan ti kaarruba a pamilia. Gapuna, nainkalintegan a para iti Paskua idi 33 K.P., kaaduan kadagiti adalan ni Jesus ket gagangay a nakipagurnongda kadagiti bukodda a pamilia para iti daytoy a pannangan.
Ngem “nasged a tinarigagayan” ni Jesus ti makiraman iti maudi a nainkalintegan a Paskua, ken iti maudin a rabii sakbay ti ipapatayna, a kadua dagiti kasisingedan a pasurotna a nakipagdaliasat kenkuana bayat ti kaaduan a paset iti ministeriona. Idi agleppas dayta a pannangan iti Paskua, impakaammo ni Jesus kadakuada ti baro a rambak nga itultuloyto dagiti amin a pasurotna iti masanguanan. Ti arak iti dayta masanguanan a rambak dagiti Kristiano irepresentarna ti dara “ti baro a tulag” a mangsukat iti Linteg ti tulag.—Lucas 22:20.
Idi rabii ti Nisan 14, 33 K.P., nupay kasta, ti baro a tulag ket di pay nagkurri, gapu ta ti mamatalged a daton—ni Jesus—di pay naidiaya. Agtigtignay pay laeng idi ti Linteg ti tulag. Di pay nailansa iti kayo. Mainayon pay, di pay nalawag agingga idi aldaw ti Pentecostes a ti daan a tulag iti natural nga Israel ket sinuktanen ti baro a tulag iti naespirituan nga Israel.—Galacia 6:16; Colosas 2:14.
No kasta, dagiti 11 a matalek nga apostol wenno asinoman kadagiti dadduma nga adalan awanda iti baro a tulag iti dayta a rabii. Ken saan a mangipakpakita ni Jesus ti aniaman a di iyaanamong kadagiti dadduma nga adalan a Judio babaen ti panangipalubosna nga aguurnongda a kadua dagiti pamiliada tapno rambakan ti Paskua.