Kasano a ni Jesu-Kristo Mammadto a Kas ken Moises?

NI Jehova a Dios ket saan nga agulbod. (Tito 1:2; Hebreo 6:18) No kasta, dagiti padto ti Saona, ti Biblia, ket mapagtalkan ken napudno. Sigurado a matungpalda.

Maysa kadagitoy nadiosan pannakaipaltiingna a padto ket daydiay inrekord ni Hebreo a mammadto a Moises maipanggep iti Mesias. Iti panangkutarna ken Jehova, kuna ni Moises: “Mamangonakto kadakuada [dagiti Israelitas] iti mammadto nga aggapu kadagiti kakabsatda, a kas kenka [ni Moises]; ket ikabilkonto dagiti sasaok iti ngiwatna, ket sawennanto kadakuada amin ti ibilinkonto kenkuana.”​—Deuteronomio 18:17, 18.

Inyaplikar ni apostol Pedro daytoy a padto ken Jesu-Kristo idi inyebkasna: “Ta ni Moises kinunana, ‘Ni Jehova a Dios ibangonannakayto manipud kadagiti kakabsatyo ti maysa a mammadto a kas kaniak. Isu denggenyonto kadagiti aniaman nga isaona kadakayo.’” (Aramid 3:22) Kinapudnona, kinuna a mismo ni Jesus: “Ta no pinatiyo ni Moises pinatidak koma, ta isu nagsurat iti maipapan kaniak.” (Juan 5:46) Kadagiti ania a pamay-an nga agasping da Jesus ken Moises?

Agasping kadagiti Nasapa a Karerada

Agpada da Moises ken Jesus nalasatanda ti pannakapapatay dagiti ubbing a maladaga a lallaki. Nailemmeng ni maladaga a Moises kadagiti ruot iti igid ti Karayan Nilo ket ngarud nalasatanna ti pannakapapatay dagiti maladaga a lallaki nga Israelitas kas mandar ni Faraon ti Egipto. Kas maysa nga ubing, nalasatan met ni Jesus ti pannakapapatay dagiti ubbing a lallaki agingga kadagiti agtawen ti dua idiay Betlehem ken kadagiti distritona. Daytoy a nadawel a panagpapatay ket immandar ni Ari Herodes a Dakkel, a, kas ken Faraon, ket maysa a kabusor ti Dios ken ti Ilina.​—Exodo 1:22–2:10; Mateo 2:13-18.

Ti naemma, wenno nanakman, nga espiritu ket imparang nga agpada da Moises ken Jesus. Nupay napadakkel kas anak idiay sangakabbalayan ti mannakabalin nga ari ti Egipto, ni Moises nagbalin a “kaeemmaan kadagiti isuamin a lallaki nga adda iti rabaw ti daga.” (Numeros 12:3) Maidilig unay, nagserbi ni Jesus kas ti nabileg a prinsipe Miguel idiay langit ngem sipapakumbaba nga immay ditoy daga. (Daniel 10:13; Filipos 2:5-8) Kasta pay met, adda pannakipagrikna ni Jesus kadagiti tattao ket maibagana: “Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana kadagiti kararuayo.”​—Mateo 11:29; 14:14.

Maigapu iti serbisio ni Jehova, agpada a pinanawan da Moises ken Jesus dagiti natan-ok a saad ken nawadwad a kinabaknang. Tapno pagserbianna ni Jehova ken ti ilina, inidian ni Moises ti kinabaknang ken nangato a saad idiay Egipto. (Hebreo 11:24-26) Umasping unay, pinanawan ni Jesus ti naanamongan unay a saad ken kinabaknang idiay langit tapno pagserbianna ti Dios ken ti Ilina ditoy daga.​—2 Corinto 8:9.

Agpada a nagbalin da Moises ken Jesus a pinulotan ti Dios. Ni mammadto a Moises nagserbi kas pinulotan ni Jehova iti nasion ti Israel. Kas kinuna ni apostol Pablo, ni Moises “impagarupna a dakdakkel a kinabaknang ti pannakaumsi ti [panagbalin a] Kristo [napulotan] ngem dagiti kinabaknang ti Egipto.” (Hebreo 11:26; Exodo 3:1–4:17) Kaano a ni Jesus nagbalin a Kristo, wenno Daydiay napulotan? Napasamak daytoy idi isut’ napulotan iti nasantuan nga espiritu ti Dios, wenno aktibo a puersa, apaman pannakabautisarna. Iti Samaritana idiay ubbog ni Jacob sadi Sicar ken iti imatang ti nangato a padi ti Israel idi isut’ maus-usig, pinaneknekan ni Jesus nga isu ti Mesias, wenno Kristo.​—Marcos 14:61, 62; Juan 4:25, 26.

Agpada a nagayunar da Moises ken Jesus iti 40 nga aldaw. Iti rugi ti karerana kas pannakangiwat ti Dios, nagayunar ni Moises iti 40 nga aldaw bayat nga adda idiay Bantay Sinai. (Exodo 34:28) Nagayunar ni Jesus iti 40 nga aldaw idiay let-ang ket linabananna ti pannulisog ni Satanas iti nasapa a karerana kas ti naikari a Mesias.​—Mateo 4:1-11.

Agpada nga Impadayagda ni Jehova

Agpada nga inusar ni Jehova da Moises ken Jesus tapno itan-okna ti nasantuan a naganna. Imbaga ti Dios ken Moises a mapan kadagiti Israelitas iti nagan ni ‘Jehova a Dios dagiti ammada.’ (Exodo 3:13-16) Imbagi ni Moises ti Dios iti sango ni Faraon, a nagtultuloy ti kaaddana tapno maipakita ti pannakabalin ni Jehova ken maipakaammo ti naindaklan a Naganna iti intero a daga. (Exodo 9:16) Immay met ni Jesus iti nagan ni Jehova. Kas pangarigan, kuna ni Kristo: “Immayak iti nagan ni Amak, ket saandak nga awaten.” (Juan 5:43) Impadayag ni Jesus ni Amana, ket imparangarang ni Jesus ti nagan ni Jehova kadagiti tao nga inted ti Dios kenkuana, ken impakaammona dayta ditoy daga.​—Juan 17:4, 6, 26.

Babaen nadiosan a pannakabalin, agpada a nagaramid da Moises ken Jesus kadagiti milagro a nangipadayag iti Dios. Nagaramid kadagiti milagro ni Moises tapno paneknekanna nga isut’ binilin ni Jehova a Dios. (Exodo 4:1-31) Iti intero a karerana, ni Moises, nga inusar ti Dios tapno bisngayenna ti Nalabaga a Baybay, intultuloyna ti nagaramid kadagiti milagro a nangipadayag ken Jehova. (Exodo 5:1–12:36; 14:21-31; 16:11-18; 17:5-7; Salmo 78:12-54) Umasping unay, nangiyeg dayag ni Jesus iti Dios babaen panangaramidna kadagiti adu a milagro. Kasta a talaga ti kaso ta maibaga ni Jesus: “Patiendak nga addaak ken Ama ket ni Ama adda kaniak; wenno no saan, patiendak gapu kadagiti aramid met laeng.” (Juan 14:11) Maysa kadagiti milagrona ket isu ti panangpatalnana iti bagio, ket nagtalna ti Baybay ti Galilea.​—Marcos 4:35-41; Lucas 7:18-23.

Sabsabali Pay a Napateg a Pagaspingan

Agpada a naitimpuyog da Moises ken Jesus iti namilagruan a panangipaay ti taraon. Ni Moises ket agdama a mammadto ni Jehova idi simimilagro a naipaay ti taraon para kadagiti Israelitas. (Exodo 16:11-36) Umasping unay, namindua iti rekord ti Biblia, simimilagro a pinakan ni Jesus dagiti umariwekwek iti material a taraon.​—Mateo 14:14-21; 15:32-38.

Ti manna manipud langit ket nainaig agpada iti serbisio da Moises ken Jesus. Idadauluan ni Moises dagiti Israelitas idi naipaayanda ti manna manipud langit, kaiyariganna. (Exodo 16:11-27; Numeros 11:4-9; Salmo 78:25) Iti maidilig ngem nakapatpateg unay a pamay-an, impaay ni Jesus ti mismo a lasagna kas manna manipud langit maipaay iti biag ti natulnog a sangatauan.​—Juan 6:48-51.

Agpada nga indauluan da Moises ken Jesus dagiti tattao iti iruruar manipud pannakaadipen agturong iti wayawaya. Inusar ti Dios ni Moises tapno idauluanna dagiti Israelitas iti iruruar manipud pannakaadipen kadagiti Egipcio ken agturong iti wayawaya kas Ilina. (Exodo 12:37-42) Umasping unay, idadauluanen ni Jesu-Kristo dagiti pasurotna agturong iti wayawaya. Idauluanto pay ni Jesus ti natulnog a sangatauan agturong iti wayawaya manipud pannakaadipen iti organisasion ni Satanas a Diablo, kasta met manipud basol ken ipapatay.​—1 Corinto 15:24-26; Colosas 1:13; 1 Juan 5:19.

Agpada nga imbabaet da Moises ken Jesus ti tulag. Ni Moises isu ti manangibabaet ti Linteg ti tulag, iti nagbaetan ni Jehova a Dios ken dagiti Israelitas. (Exodo 19:3-9) Ni Jesus ti manangibabaet ti baro a tulag, iti nagbaetan ti Dios ken ti naespirituan nga Israel.​—Jeremias 31:31-34; Lucas 22:20; Hebreo 8:6-13.

Agpada a naipabaklay ti panangukom kada Moises ken Jesus. Nagserbi ni Moises kas ukom ken manangited-linteg iti nainlasagan nga Israel. (Exodo 18:13; Malakias 4:4) Agserserbi ni Jesus kas Ukom ket impaayanna ti naespirituan nga “Israel ti Dios” kadagiti linteg ken bilin. (Galacia 6:16; Juan 15:10) Kuna a mismo ni Kristo: “Ta ti Ama awan ti ukomenna, no di ket isuamin a panangukom intedna iti Anak, tapno dagiti isuamin padayawanda ti Anak a kas met iti panangpadayawda iti Ama. Ti saan a mangpadayaw iti Anak saanna a padayawan ti Ama a nangibaon kenkuana.”​—Juan 5:22, 23.

Agpada a naitalek kada Moises ken Jesus ti kinaulo iti balay ti Dios. Nagmatalek ni Moises kas ulo iti balay ti Dios iti kadaanan nga Israel. (Numeros 12:7) Maidilig unay, naaramid ni Jesus nga Ulo ti naespirituan a balay dagiti annak ni Jehova ket pinaneknekanna nga isut’ matalek iti dayta. Pudno, ni Jesus “nagmatalek iti Daydiay nangtuding kenkuana, a kas met ken Moises iti isuamin a balayna. Ta daydi naibilang a maikari iti dakdakkel a dayaw ngem ni Moises, a kas iti nangbangon iti balay dakdakkel ti dayawna ngem iti balay. . . . Ket ni Moises napagtalkan idi iti isuamin a balayna kas maysa nga adipen a maipaay a pammaneknek kadagidiay banag a maipakaammonto idi, ngem matalek ni Kristo kas maysa nga Anak nga agaywan iti balayna. Ket datayo ti balayna, no taginayonentayo ti wayawayatayo nga agsao ken ti panangipannakkeltayo iti inanama a sititibker agingga iti panungpalan.”​—Hebreo 3:2-6.

Uray iti ipapatayda, agasping da Moises ken Jesus. Kasano a kasta? Bueno, inikkat ni Jehova ti bagi ni Moises, linapdanna ngarud dagiti tattao manipud panangmulitda wenno panangdayawda iti dayta. (Deuteronomio 34:5, 6; Judas 9) Umasping unay, indulin ti Dios ti bagi ni Jesus, a dina pinalubosan nga agrupsa ket ngarud linapdanna ti panagbalin dayta a pakaitibkolan iti pammati.​—Salmo 16:10; Aramid 2:29-31; 1 Corinto 15:50.

Ipangagyo ti Padto

Isu dagitoy dagiti pamay-an a ni Jesu-Kristo ket nagbalin a mammadto a kas ken Moises. Anian a nakaskasdaaw ti pannakatungpal dagiti sasao ti Dios ken Moises maipanggep iti iyaay dayta a mammadto!

Awan duadua nga intungpal ni Jehova ti propetiko a karina a mamangon ti maysa a mammadto a kas ken Moises. Dagiti sao ti Deuteronomio 18:18 ket natungpal iti biag ken kapkapadasan ni Jesu-Kristo. Ken ti kasta a kaitungpalan mangipaay kadatayo ti rason a maaddaan panagtalek kadagiti sabsabali pay a propetiko a tampok ti Sao ti Dios. Ngarud, kankanayon koma nga ipangagtayo ti padto ti Biblia.