Malagipyo Pay Aya?

Inapresiaryo kadi ti nangbasa kadagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

▫ Aniat’ inladawan dagiti nainayon a pribilehio ti serbisio a naited kadagiti Netineo ken kadagiti annak a lallaki dagiti adipen ni Salomon iti panagsublida manipud pannakakayaw idiay Babilonia?

Ita, bayat nga agtultuloy a bumassit ti natda iti naespirituan nga Israel ditoy daga, agtultuloy nga umadu ti sabsabali a karnero. Sumagmamano kadagitoy a marakarnero a tattao, kas kadagiti Netineo ken dagiti annak a lallaki dagiti adipen ni Salomon, ti natudinganen ita kadagiti nadagsen nga annongen iti sidong ti panangaywan ti natda. (Isaias 61:5)​—4/15, pinanid 16-17.

▫ Aniat’ kayat a sawen ni mammadto Sofonias idi kinunana: “Nalabit a dakayo maitalimengkayto iti aldaw ti pungtot ni Jehova”? (Sofonias 2:2, 3)

Tapno masalakniban ti maysa bayat ti umay a “dakkel a rigat,” dayta ket saan a banag a naminsan a naispal, kankanayonen a maispal. (Mateo 24:13, 21) Ti pannakaitalimeng iti dayta nga aldaw agpannurayto iti panagtultuloy ti maysa a mangaramid kadagiti tallo a banag: Masapul a birukenna ni Jehova, birukenna ti kinalinteg, ken birukenna ti kinaemma.​—5/1, pinanid 15-16.

▫ Iti ania a pamay-an a ni Miguel “agtakderto” iti “panawen ti panungpalan”? (Daniel 12:1, 4)

Sipud idi pannakaitronona kas Ari idi 1914, ‘agtaktakderen’ ni Miguel maipaay iti ili ni Jehova. Ngem iti mabiiten ni Miguel “agtakderto” iti naisangsangayan unay a pamay-an​—kas Ahente ni Jehova a mangikkat iti amin a kinadakes manipud iti daga ken kas Manangispal iti ili ti Dios.​—5/1, panid 17.

▫ Iti ania nga agpannuray ti pudno a kinaragsak?

Ti pudno a kinaragsak agpannuray iti nasudi a pannakirelasiontayo ken Jehova, iti anamongna, ken iti bendisionna. (Proverbio 10:22) Gapuna, ti pudno a kinaragsak maragpat babaen ti panagtulnog ken Jehova ken narag-o a panagpasakop iti pagayatanna. (Lucas 11:28)​—5/15, pinanid 16, 19.

▫ Idi inaramid ni Jesus dagiti namilagruan a panangagasna, nasken aya ti pammati iti biang daydiay naagasan?

Kasapulan ti pammati iti biang dagiti adu tapno mapanda agpaagas ken Jesus. (Mateo 8:13) Nupay kasta, saan a nakalikaguman ti panangipudno ti pammati tapno makaaramid ni Jesus kadagiti milagro, kas idi inagasanna ti maysa a lugpi a lalaki a dina ammo no asino ni Jesus. (Juan 5:5-13) Insubli ni Jesus uray ti napingas a lapayag ti adipen ti nangato a padi, a naitimpuyog iti maysa a grupo dagiti kabusor ni Jesus. (Lucas 22:50, 51) Naaramid dagitoy a milagro gaput’ pannakabalin ti nasantuan nga espiritu ti Dios, saan a gaput’ pammati ti tao a masakit.​—6/1, panid 3.

▫ Aniat’ iladawan ti “iket” a nadakamat iti pangngarig ni Jesus idiay Mateo 13:47-50?

Ti “iket” iladawanna ti maysa a naindagaan nga instrumento nga agak-aklon kas kongregasion ti Dios ken agur-urnong kadagiti “ikan.” Inramanna agpadpada ti Kakristianuan ken ti kongregasion dagiti napulotan a Kristiano, a ti naud-udi intultuloyda ti mangurnong kadagiti ‘nasayaat nga ikan,’ iti sidong ti panangiwanwan dagiti anghel, kas maitunos iti Mateo 13:49.​—6/15, panid 20.

▫ Ania dagiti sumagmamano a prinsipio a masapul nga ipakat dagiti ukom idiay Israel iti panangitungpal kadagiti annongenda?

Agpapada a kinahustisia maipaay iti nabaknang ken napanglaw, nainget a di panangidumduma, ken di panangawat ti pasuksok. (Levitico 19:15; Deuteronomio 16:19)​—7/1, panid 13.

▫ Aniat’ rebbeng a ragpaten dagiti panglakayen babaen kadagiti hudisial a panangusig?

Maysa a panggep isut’ panangtakuat kadagiti kinapudno iti kaso, nga aramiden daytoy buyogen ti ayat. Iti kanito a maammuan dagitoy, masapul nga aramiden dagiti panglakayen ti aniaman a maiparbeng tapno salakniban ti kongregasion ken taginayonen dagiti nangato a pagalagadan ni Jehova ken ti nawaya a panagayus ti espiritu ti Dios. Ti panangusig ispalenna met, no mabalin, ti agpegpeggad a managbasol. (Idiligyo ti Lucas 15:8-10.)​—7/1, pinanid 18-19.

▫ Apay a dagiti arapaap mainaig iti narugit a sekso ket makadangran unay?

Iti lawag dagiti sasao ni Jesus idiay Mateo 5:27, 28, amin dagidiay agtultuloy a maigamer kadagiti arapaap mainaig iti narugit a sekso ket agbasolda iti pannakikamalala kadagiti pusoda. Ken adda napaypayso a peggad a ti kakasta nga arapaap nalabit agturong iti imoralidad.​—7/15, panid 15.

▫ Kadagiti ania a pamay-an a nalabit tulongannatay ni Jehova a mangmatmat a siuumiso kadagiti pakasuotantayo ket iti kasta maibturantay ida?

Mabalin a maiturong iti imatangtayo dagiti Kasuratan babaen ti kapammatian wenno bayat ti panagadal ti Biblia. Dagiti pasamak nga inmaniobra ti Dios nalabit tulongannatay a makakita no aniat’ aramiden. Nalabit makiraman dagiti anghel a mangiwanwan kadatayo, wenno nalabit umawattay ti pannakaiwanwan babaen ti nasantuan nga espiritu. (Hebreo 1:14)​—7/15, panid 21.

▫ Impasdek aya wenno pinasingkedan ti Konsilio ti Nicaea idi 325 K.P. ti doktrina a Trinidad?

Saan, ti Konsilio ti Nicaea impatasna laeng ti Anak iti Ama iti panagbalinda a “maymaysat’ kasasaadna.” Ti kapanunotan a ti Ama, Anak, ken ti nasantuan nga espiritu ket pudnoda amin a Dios​—maysa a tallo-iti-maysa a Dios​—ket saan a pinartuat dayta a konsilio ken uray dagidiay immuna nga Amma ti Simbaan.​—8/1, panid 20.

▫ Ni laeng aya Job ti tao a matalek ken Jehova idi kaaldawanna? (Job 1:8)

Saan, ipasimudaag a mismo ti libro ti Job a ni Eliu ket inanamongan ti Dios. Kasta met, bayat ti kaaldawan ni Job, adu dagiti Israelitas nga agnanaed idiay Egipto, ket awan rason a panunotentayo nga amin dagitoy ket di matalek ken di inanamongan ti Dios.​—8/1, panid 31.