‘Rumbeng Kadi nga Agpabautisarakon?’

KADAGITI amin a pangngeddeng nga aramidentayo iti biag, nalabit awanen ti napatpateg pay ngem daytoy: ‘Rumbeng kadi nga agpabautisarakon?’ Apay a nagpateg dayta? Wen ta ti desisiontayo iti daytoy a saludsod apektaranna saan laeng a ti kurso ti panagbiagtayo ita no di pay ket ti agnanayon a pagimbagantayo.

Naipasangokay kadi iti daytoy a pangngeddeng? Nalabit nabayagen a makiad-adalkayo iti Biblia kadagiti Saksi ni Jehova. Wenno nalabit insursuron kadakayo dagiti dadakkelyo ti Kasuratan sipud pay iti kinaubingyo. Ita nakagtengkayon iti punto a masapul nga agdesisionkayo no aniat’ rumbeng nga aramidenyo. Tapno matulongankayo a mangaramid iti umiso a pangngeddeng, masapul a maawatanyo no aniat’ iraman ti bautismo ken no asinot’ rumbeng a mabautisaran.

No Aniat’ Iraman ti Bautismo

Kas iti kasar, ti bautismo ket maysa a seremonia a mangpatalged iti relasion. No iti kasar, addaanen ti nasinged a relasion ti lalaki ken babai. Ti seremonia ti kasar ipakaammona laeng iti publiko ti nagtulaganda, a sumrekdan iti aktual a panagasawa. Lukatan met dayta dagiti pribilehio a tagiragsaken dagiti agassawa ken mangyeg kadagiti responsabilidad a masapul a tungpalenda iti panagbiagda.

Kasta met iti bautismo. Bayat nga adalentayo ti Biblia, maammuantayo dagiti naayat a bambanag nga inaramid ni Jehova agpaay kadatayo. Saan laeng a ti biagtayo ken isuamin a kasapulan tapno mataginayon dayta ti impaayna kadatayo no di ket uray ti bugbugtong nga Anakna tapno maikkan ti managbasol a sangatauan iti gundaway a sumrek iti pannakirelasion Kenkuana ken tapno magun-odan ti biag nga agnanayon iti paraiso a daga. No panunotentayo amin daytoy, saan kadi a magutugottayo nga agtignay?

Aniat’ mabalintay nga aramiden? Ibaga kadatayo ti Anak ti Dios, ni Jesu-Kristo: “No sinoman a tao ti mayat nga umay sumurot kaniak, paglikudanna ti bagina ket alaenna ti kayona a pagtutuokan ket surotennak a kankanayon.” (Mateo 16:24) Wen, mabalintay ti agbalin nga adalan ni Jesu-Kristo, a surotentay ti ulidanna iti panagserbi iti Amana, ni Jehova. Tapno maaramidantay dayta, nupay kasta, nasken a ‘tallikudantay’ ti bagitayo, kayatna a sawen, sibubulos a determinadotayo a mangiyun-una ti pagayatan ti Dios ngem ti bukodtayo; iramanna daytoy ti panangipaay, wenno panangidaton ti biagtayo iti panangaramid ti pagayatanna. Tapno maipakaammo daytoy a boluntario ken pribado a desision, maangay ti publiko a seremonia. Dayta a seremonia isu ti bautismo iti danum a mangisimbolo ti dedikasiontayo iti Dios iti publiko.

Asinot’ Rumbeng a Mabautisaran?

Binilin ni Jesu-Kristo dagiti pasurotna a ‘mapan ken mangaramid kadagiti ad-adalan kadagiti tao iti amin a nasion, a bautisaran ida iti nagan ti Ama ken ti Anak ken ti nasantuan nga espiritu, nga isuro kadakuada ti amin a bambanag nga imbilinna kadakuada.’ (Mateo 28:19, 20) Nalawag, nasken a nataenganen ti panunot ken puso dagidiay mabautisaran. Babaen ti personal a panagadalda iti Sao ti Dios, maawatanda a kasapulan ti ‘panagbabawi ken panangtallikud’ manipud iti sigud a wagas ti panagbiagda. (Aramid 3:19) Kalpasanna, mabigbigda a kasapulan a makipasetda iti trabaho a panagebanghelio nga inaramid ni Jesu-Kristo, nga agbalinda nga ad-adalanna. Maaramid amin daytoy sakbay ti bautismo.

Nagtenganyon kadi daytoy nga addang iti naespirituan nga irarang-ayyo? Tarigagayanyo kadi ti agserbi iti Dios? No kasta, buyogen ti kararag, usigenyo ti salaysay ti Biblia maipapan iti eunuko a taga Etiopia, kas nailanad idiay Aramid kapitulo 8. Idi nailawlawag iti daytoy a lalaki dagiti padto maipapan ken Jesus a Mesias, sinukimatna ti panunot ken pusona sana insaludsod: “Ania ti makapawil kaniak a mabautisaran?” Nalawag nga awan pulos ti mangpawil kenkuana; isu a nabautisaran.​—Aramid 8:26-38.

Adu met ita ti agsalsaludsod: “Ania ti makapawil kaniak a mabautisaran?” Kas resultana, 300,945 a kabbaro a dedikado ti nabautisaran idi 1991. Nangyeg daytoy iti dakkel a rag-o iti ili ni Jehova, ket maragsakan dagiti panglakayen iti kongregasion a tumulong kadagiti dadduma pay a nalinteg-panagpuspusona a tattao a rumang-ay ken makasabet kadagiti kualipikasion para iti bautismo.

Nupay kasta, mabalin nga isingasing dagiti panglakayen iti kongregasionyo nga aguraykay bassit. Wenno, no agtutubokayo, mabalin nga ibalakad kadakayo dagiti nagannakyo nga aguraykay pay laeng. Ania ngaruden? Dikay maupay. Laglagipenyo a serioso unay a banag ti iseserrek iti personal a pannakirelasion iti Kangatuan. Masapul a masabet ken mataginayon dagiti nangato a pagalagadan. Isu nga ipangagyo dagiti maipaay a singasing ken naimpusuan nga iyaplikaryo dagita. No diyo unay maawatan dagiti naited a rason, dikay agbain, no di ket agimtuodkayo inggana talaga a maawatanyo no ania a panagsagana ti kasapulan nga aramidenyo.

Iti sabali a bangir, mabalin nga agkedked dagiti dadduma nga agpabautisar. Maysakayo kadi kadakuada? Siempre, nalabit adda masnup a makagapu nga itantanyo pay laeng ti dedikasion ken bautismo. Ngem no kualipikadokayo ket agkedkedkayo pay laeng, nasayaat no saludsodanyo ti bagiyo: “Ania ti makapawil kaniak a mabautisaran?” Buyogen ti kararag, usigenyo ti kasasaadyo ket kitaenyo no talaga met laeng nga adda nainkalintegan a rasonyo a mangitantan iti panangipangagyo iti awis ni Jehova a sumrek iti personal a pannakirelasion kenkuana.

‘Ubingak Pay Laeng’

No maysakayo nga agtutubo, mabalin a pampanunotenyo, ‘Ubingak pay laeng.’ Pudno a no la ket ta agtalinaed a natulnog dagiti agtutubo kadagiti Kristiano a nagannakda ken iyaplikarda ti Kasuratan iti inggat’ kabaelanda, makapagtalekda a matmatan ida ni Jehova kas “nasantuan.” Kinapudnona, kunaen ti Biblia kadatayo a ti nadiosan a pananganamong kadagiti nalinteg a nagannak ramanenna met dagiti annak nga agpannuray pay laeng kadagiti nagannak. (1 Corinto 7:14) Nupay kasta, awan naited a naikeddeng a tawen idiay Biblia no kaano nga agpatingga ti panawen ti panagpannuray kadagiti nagannak. Gapuna, nasken a panunoten a naimbag dagiti Kristiano nga agtutubo ti saludsod a: ‘Rumbeng kadi nga agpabautisarakon?’

Paregtaen ti Biblia dagiti agtutubo a ‘lagipen ti Naindaklan a Namarsuada kadagiti aldaw ti kinaagtutuboda.’ (Eclesiastes 12:1) Iti daytoy a banag, addaantayo ti ulidan ni ubing a Samuel, a “nagannong iti sango ni Jehova, idinto nga ubing.” Adda met dita ti ulidan ni Timoteo, a sipud iti kinaubingna impapusona ti kinapudno nga insuro kenkuana ni nanangna ken ni lolana.​—1 Samuel 2:18; 2 Timoteo 1:5; 3:14, 15.

Kasta met ita, adu nga agtutubo ti nangidedikaren iti biagda nga agserbi ken Jehova. Kinuna ti 15-tawenna nga Akifusa nga isut’ tinulungan ti maysa a paset iti Gimong ti Serbisio nga agdesision nga agbautisar. Nagpabautisar ni Ayumi idi agtawen ti sangapulo. Kayatna ti agserbi ken Jehova gapu ta pudno nga inay-ayatna. Agtawen itan ti 13 ket nagpabautisar metten ti 12 ti tawenna nga iyad-adalanna ti Biblia, a maysa met a nakasursuro nga agayat ken Jehova. Nagpabautisar met ti adi a lalaki ni Ayumi a ni Hikaru idi agtawen ti sangapulo. ‘‘Kuna ti dadduma nga ubingak pay unay,” malagipna, ‘‘ngem ammo ni Jehova ti riknak. Determinadoak nga agpabautisar idi inkeddengko nga idedikar ti biagko tapno agserbi kenkuana iti amin a kabaelak.’’

Dakkel met nga impluensia ti ulidan dagiti nagannak, kas makita iti kapadasan ti maysa a balasitang a kabsat. Pinaritan ni tatangna ni nanangna a mangyadal iti Biblia kenkuana ken iti kabsatna a lalaki ken babai. Kabilenna ida no kua ken puoranna dagiti libroda. Ngem gapu iti panagibtur ken pammati ni nanangda, nabigbig dagiti ubbing ti kinapateg ti panagserbi ken Jehova a Dios. Nabautisaran daytoy a balasitang idi agtawen ti 13, ket tinulad ti adina a lalaki ken babai ti ulidanna.

‘Lakayak Unayen’

Kinuna ti salmista: “Dakayo a lallakay ken babbaro . . . idaydayawyo ti nagan ni Jehova.” (Salmo 148:12, 13) Wen, masapul a bigbigen met dagiti nataenganen a nasken a makidasigda ken Jehova. Nupay kasta, liklikan dagiti dadduma a nataengan ti mangaramid iti panagbalbaliw. Mariknada a “dika masuruan ti duduogan nga aso.” Kaskasdi, lagipenyo nga agtawen ti 75 ni Abraham idi kinuna kenkuana ni Jehova: “Pumanawka iti dagam ken kadagiti kakabagiam ket umayka iti daga nga isurokto kenka.” (Aramid 7:3; Genesis 12:1, 4) Walopulo ti tawen ni Moises idi imbilin kenkuana ni Jehova: “Ipanawmo ti ilik . . . iti Egipto.” (Exodo 3:10) Nakasimpan a nasayaat dagitoy a lallaki ken dadduma pay iti wagas ti panagbiagda idi kinalikaguman ni Jehova nga idemostrada ti ayat ken dedikasionda kenkuana. Impangagda ti awag ni Jehova.

Ita ngay? Pitopulo ket walo a tawenen a Budista ni Shizumu idi inrugina ti agadal iti Biblia. Isut’ binusor ti pamiliana, ket saanda pay a pinalubosan nga agadal iti mismo a pagtaenganna. Kalpasan laeng ti makatawen, natignay a nangidedikar ti bagina ken Jehova, ket nagpabautisar. Apay a nagbalbaliw? Kinunana: “Adu a tawen nga inallilawnak ti ulbod a relihion, ket kayatko nga itultuloy ti umawat iti kinapudno manipud ken Jehova iti agnanayon.”

‘Isu a Mangisalakan Ita Kadakayo’

Maib-ibusen ti panawen. Adu a biag, agraman ti biagyo, ti agpegpeggad. Nasken a panunotenyo a naimbag itan ti panangidedikaryo iti bagiyo ken Jehova ken ti panangisimbolo iti dayta babaen ti bautismo iti danum. Inyunay-unay ni apostol Pedro daytoy idi kinunana: “Isu . . . a mangisalakan ita kadakayo met, nga isu ti pammautisar.” Inlawlawagna pay a ti bautismo “saanna nga ikkaten ti rugit ti lasag” (inaramiden dayta ti maysa a tao sakbay a maikari a mabautisaran) “no di kas la dawat ti maysa a nasayaat a konsiensia iti Dios.”​—1 Pedro 3:21.

Gapu ta nasabetnan dagiti pagalagadan ni Jehova, addaanen ti bautisado nga adalan iti nadalus a konsiensia. Babaen ti panangitultuloyna a mangaramid iti amin a kabaelanna nga agserbi ken Jehova, tagiragsakenna ti talna ti panunot ken pannakapnek. (Santiago 1:25) Kangrunaan iti amin, isut’ makapagtalek a mangnamnama kadagiti agnanayon a bendision manipud ken Jehova iti mapasungad a baro a sistema. Sapay koma ta masagrapyo dayta bayat nga ipangagyo ti saludsod a: ‘Rumbeng kadi nga agpabautisarakon?’

[Ladawan iti panid 21]

Kas maysa nga ubing nagserbi ni Samuel ken Jehova

[Ladawan iti panid 22]

Walopulo ti tawen ni Moises idi isut’ dinutokan ni Jehova

[Dagiti ladawan iti panid 23]

Itatta makainanama agpadpada dagiti agtutubo ken nataenganen kadagiti agnanayon a bendision iti baro a sistema ti Dios