Maysa nga Edukado a Tao
“KITAENYO ti panangayabna kadakayo, kakabsat, ta saan nga adu a mamasirib iti linalasag ti naayaban, saan nga adu a mannakabalin, saan nga adu a natan-ok.” (1 Corinto 1:26) Kas ipamatmat dagitoy a sasao, adda pagdaksan ti pannakaigamer iti nailubongan a sirib wenno pannakaadda iti natan-ok a takder iti kagimongan. Mabalin a dagita a bambanag ti manglapped iti maysa nga umawat iti naimbag a damag.—Proverbio 16:5; Marcos 10:25.
Nupay kasta, idi tiempo ni Pablo adda met dagidiay mamasirib iti linalasag nga immawat iti kinapudno, ket maysa kadagitoy isu ni Pablo a mismo. Edukado ken nalabit naggapu iti mabigbigbig a pamilia, maysa a naregta a managebanghelio ni Pablo. Impakitana ngarud a mabalin dagiti natan-ok a tattao iti daytoy a lubong ti agserbi ken Jehova no la ket ta umiso ti panagpuspusoda. Mabalinda pay nga usaren dagiti sekular nga abilidadda iti serbisio ni Jehova.—Lucas 16:9.
Maysa a Tubo ti Tarso
Nayanak ni Pablo idiay Tarso, “siudad a saan a nanumo,” kas panangiladawanna iti dayta idi agangay. (Aramid 21:39) Nalabit a sadiay ti nagadalanna kadagiti pagsasao—kangrunaanna ti kinalaing iti Griego—a nakapatpateg iti trabahona kas misionero. Iti panagnaedna idiay Tarso, saan laeng a dagiti kadawyan dagiti Judio ti nasursuro ni Pablo no di pay ket ti kultura dagiti Gentil, kapadasan nga inusarna kadagiti naud-udi a tawtawenna kas apostol kadagiti nasion. Ammona no kasano nga iyebkas ti kinapudno iti wagas a maawatanda. (1 Corinto 9:21) Kas pangarigan, usigenyo ti palawagna kadagiti taga-Atenas a nailanad idiay Aramid kapitulo 17. Sadiay, nakasaysayud ti panangilagana kadagiti reperensia iti relihion dagiti taga-Atenas ken uray ti panangadawna iti maysa kadagiti mannaniwda iti panangiparangna ti kinapudno.
Maysa a Romano
Adda pay maysa a nailubongan a gunggona ni Pablo. Isut’ maysa a Romano, ket inusarna met daytoy iti panangitandudo iti naimbag a damag. Idiay Filipos, isut’ namalmalo ken naibalud agraman dagiti kaduana a dida man la nausig. Ilegal daytoy iti maysa a Romano, ket idi impakaammo ni Pablo daytoy kadagiti agtuturay, isut’ pinalubosanda nga agtalinaed ken agserbi iti kongregasion sakbay a napan iti sumaruno a destinona.—Aramid 16:37-40.
Idi agangay, idi dimmatag iti saklang ni Gobernador Festo, inaprobetsar ni Pablo ti kina-Romanona iti panangiyamangna ti kasona ken Cesar. Iti kasta, indepensana ti naimbag a damag iti sanguanan ti kangatuan nga agturay ti Imperio ti Roma.—Aramid 25:11, 12; Filipos 1:7.
Immawat ni Pablo iti panagsanay iti praktikal a wagas a nakatulong kenkuana idi kamaudiananna. Nasursurona ti panagaramid iti tolda, nalabit babaen ti amana. Yaman pay iti daytoy, nabalinanna a sinuportaran ti bagina iti ministeriona no kasta nga agkurang kadagiti masapsapul. (Aramid 18:1-3) Isut’ immawat met iti adelantado a relihiuso nga edukasion. Isut’ dimmakkel kas “maysa a Pariseo, anak dagiti Pariseo.” (Aramid 23:6) Kinapudnona, isut’ nasursuruan ken Gamaliel, maysa kadagiti mararaem unay a mannursuro dagiti Judio. (Aramid 22:3) Ti kasta nga edukasion, a nalabit maipada iti de kalidad nga edukasion iti unibersidad ita, isingasingna a mabigbigbig unay ti pamiliana.
Umiso a Panangmatmat
Nangidiaya ti nalikudan ken pannakasanay ni Pablo iti naraniag a masakbayan iti Judaismo. Naballigi koma unay. Nupay kasta, apaman nga inawatna ni Jesus kas Mesias, nagbaliw dagiti kalat ni Pablo. Iti panagsuratna kadagiti taga-Filipos, dinakamatna ti sumagmamano kadagiti napalabas a nailubongan a gunggonana ket kinunana: “Dagidiay bambanag a gunggona kaniak idi, imbilangko ida a pukaw gapu ken Kristo. Nangnangruna pay, isuamin dagiti banag ibilangko ida a pukaw gapu iti napateg unay a pannakaammo ken Kristo Jesus nga Apok.”—Filipos 3:7,8.
Di kinailalaan daytoy nga edukado a tao ti naaramidanna koma gapu iti nailubongan nga adalna; ket dina met inusar ti “adu nga adal[na]” tapno pagsiddaawen dagiti sabsabali. (Aramid 26:24; 1 Corinto 2:1-4) Imbes ketdi, nagtalek a naan-anay ken Jehova a Dios, tinukoyna dagiti napalabas a gundawayna, a kunana: “Lipatek dagiti bambanag a nalikudan ken kamakamek dagiti bambanag a masanguanan, agtarayak a sipipinget nga agturong iti kalat a maipuon iti gunggona ti natan-ok a panangawis ti Dios gapu ken Kristo Jesus.” (Filipos 3:13, 14) Impateg ni Pablo dagiti naespirituan a bambanag.
Nupay kasta, inusar ni Pablo dayta a napalabas a pannakasanay iti serbisio ni Jehova. Idi kinunana maipapan kadagiti Judio, “Paneknekak ida nga adda regtada a maipaay iti Dios,” isut’ nagsao manipud iti mismo a kapadasanna. (Roma 10:2) Kas maysa nga aktibo a Pariseo, isut’ napasnek a maipaay iti Dios ken iti Kasuratan. Idi maysan a Kristiano ni Pablo, napakuyogan ti regtana iti umiso a pannakaammo, ket nausarna ti napalabas nga adalna iti umiso a panggep. Iti libro ti Hebreo, kas pangarigan, inusarna ti nauneg a pannakaammona iti historia ti Israel ken panagdaydayaw iti templo tapno ipakitana ti kinasuperior ti Nakristianuan a sistema.
Ipangpangag met ita dagiti dadduma a mamasirib iti linalasag ti naimbag a damag. Adu a de adal a tattao, agraman dagidiay naggapu iti amin a kita ti propesion ken trabaho, ti immawat iti kinapudno ken inusarda ti napalabas a pannakasanayda iti serbisio ni Jehova. Nupay kasta, aniaman ti sekular nga edukasionda, sipapanunot a kanayon dagiti Kristiano a dagiti nasken a kualipikasion ket naespirituan. Dagitoy ti “napatpateg a bambanag” gapu ta maiturongdatayo iti biag nga agnanayon.—Filipos 1:10.