Ti Naindaklan a Namarsuatayo ken Dagiti Aramidna
ANIAN A NAINDAKLAN! Ti dumaranudor a dissuor ti Iguaçú wenno Niagara, dagiti nadaeg a gingginget ti Arizona wenno Hawaii, dagiti nangayed a fjord (danum iti baet dagiti bambantay) ti Norway wenno New Zealand—pudno a makakayaw dagitoy natural a pagsidsiddaawan! Ngem bunga laeng aya dagitoy ti nakaparsuaan? Saan, saan laeng a kasta! Dagitoy dagiti nakaskasdaaw nga aramid ti Naindaklan a Namarsua, maysa a naayat a nailangitan nga Ama a maipapan kenkuana insurat ni Ari Salomon: “Isu inaramidna ti tunggal banag a naimnas iti panawenna. Kasta met nga isu insaadna ti kinaagnanayon idiay pusoda, nupay kasta ti tao, dina matontonan ti aramid nga inaramid ti Dios nanipud idi punganay agingga iti panungpalan.” (Eclesiastes 3:11) Pudno unay, kasapulan ti agnanayon a panawen tapno matontonan dagiti tao amin a nadayag nga aramid nga inkabil ti Namarsuatayo iti uniberso.
Anian a Naindaklan ti Namarsuatayo! Ket anian a ragsaktayo ta daytoy mannakabalin iti isuamin a Dios “kadagitoy maud-udi nga aldaw, kinasaonatayo babaen ti Anakna, isu a tinudinganna nga agtawid kadagiti isuamin nga adda, a gapu kenkuana inaramidna ti amin a lubong.” (Hebreo 1:2) Daytoy nga Anak, ni Jesu-Kristo, inapresiarna dagiti nakaay-ayat a bambanag a pinarsua ni Amana. Masansan a tinukoyna dagitoy iti panangiyilustrarna kadagiti panggep ni Amana ken iti panangparegta kadagiti managdengngegna. (Mateo 6:28-30; Juan 4:35, 36) “Babaen ti pammati” maawatan ti adu a dagiti pagsidsiddaawan ti sangaparsuaan “nabukelda gapu iti sao ti Dios.” (Hebreo 11:3) Rumbeng nga iyanninaw ti inaldaw a panagbiagtayo ti kasta a pammati.—Santiago 2:14, 26.
Pudno a naindaklan dagiti parsua ti Diostayo. Nakaskasdaaw ti panangiyanninawda iti sirib, pannakabalin, kinalinteg, ken ayatna. Kas pangarigan, impatingigna ti dagatayo ken pagrikosenna dayta iti aglikmut ti init tapno ti masanguanan a parsuana, ti tao, matagiragsakna ti makaay-ayo a panagsasaruno dagiti panawen. Ti Dios kinunana: “Bayat ti kaadda ti daga, ti panagmula ken ti panagapit, ken ti lam-ek ken ti pudot, ken ti kalgaw ken ti sibabasa, ken ti aldaw ken ti rabii saandanto nga agsardeng.” (Genesis 8:22) Mainayon pay, aglaplapusanan nga inabastuan ti Dios ti dagatayo kadagiti napateg a mineral. Kangrunaanna, nangipaay iti nawadwad a danum, nga iti agangay agbalin a nasken a sangkap ken mangtaginayon iti biag ditoy daga.
Iti naurnos a panagsasagadsad dagiti innem nga ‘aldaw ti panamarsua,’ a tunggal aldaw rinibribo a tawen ti kapautna, insagana ti “aktibo a puersa ti Dios” ti daga a pagnaedan ti tao. Ti lawag a babaen dayta makakitatayo, ti angin nga ang-angsentayo, ti namaga a daga a pagtataengantayo, dagiti mula, ti panagsinnublat ti aldaw ken rabii, dagiti ikan, tumatayab, animal—amin dagitoy ti agsasaruno a pinarsua ti Naindaklan a Namarsuatayo nga agpaay iti pagimbagan ken pakaragsakan ti tao. (Genesis 1:2-25) Pudno unay, mabalintay a danggayan ti salmista a mangidir-i: “O Jehova, anian a nagadu dagiti ar-aramidmo! Nainsiriban ti panangaramidmo kadakuada amin. Ti daga napno iti pagsanikuaam.”—Salmo 104:24.
Ti Obra Maestra a Parsua ti Dios
Idi dandanin agngudo ti maikanem nga “aldaw” ti panamarsua, inaramid ti Dios ti lalaki ket kalpasanna ti katulonganna, ti babai. Anian a nakangayngayed a tampok ti naindagaan a sangaparsuaan, a nakaskasdaaw nga amang ngem kadagiti amin nga immun-una a pisikal a parsua! Ipakaammo kadatayo ti Salmo 115:16: “Dagiti langlangit isuda dagiti langlangit ni Jehova, ngem ti daga intedna kadagiti annak dagiti tattao.” Dinisenionatayo ni Jehova kas natauan a kararua tapno agpadpada a matagiragsak ken mausartayo dagiti immun-una a pinarsuana ditoy daga. Anian a yamantayo ta dagiti matatayo—a mas nasulit ngem ti kasayaatan a kamera—makitada ti namaris a lubong iti aglawlawtayo! Addaantayo kadagiti lapayag—a nasaysayaat ngem ti aniaman nga aramid-tao a sound system—a tumulong kadatayo a mangtagiragsak iti panagsasarita, musika, ken ti nasam-it a kanta dagiti billit. Addaantayo iti naisigud a mekanismo ti panagsao, agraman ti adut’ usarna a dila. Dagiti sagibsib ti panagraman ti dila, a nabuyogan ti sentido ti panagangottayo, kabalannatayo a mangnanam iti nakaad-adu a kita dagiti taraon. Ken anian ti panangapresiartayo iti apros ti naayat nga ima! Pudno nga agyamantayo iti Namarsuatayo, a kas iti salmista a nangikuna: “Agyamanakto kenka ta nakaam-amak ken nakaskasdaaw ti pannakaaramidko. Nakaskasdaaw dagiti aramidmo, ket daydayta ammuen unay toy kararuak.”—Salmo 139:14.
Ti Naayat a Kinamanangaasi ti Namarsuatayo
Insurat ti salmista: “O pagyamananyo ni Jehova, ta isu naimbag . . . ; isu a kakaisuna nga Agaramid kadagiti dadakkel a datdatlag: ta ti naayat a kinamanangaasina agnanayon.” (Salmo 136:1-4) Dayta naayat a kinamanangaasi ti mangtigtignay ita kenkuana a mangaramid kadagiti nakaskasdaaw a banag nga adayo a nadadaeg ngem dagiti amin a parsuana a kadakdakamattayo. Wen, uray bayat ti panaginanana manipud panangparsua kadagiti material a bambanag, isut’ mangparparsua iti naespirituan a kita. Ar-aramidenna daytoy kas sungbat iti dakes a karit a direkta a naiturong kenkuana. Kasano a kasta?
Naisaad ti immuna a lalaki ken babai iti nadayag a paraiso ti Eden. Nupay kasta, pinagbalin ti maysa a nasukir nga anghel, ni Satanas, ti bagina kas dios ket sinugsoganna ti immuna a pagassawaan nga umalsa ken ni Jehova. Nainkalintegan a sinentensiaan ida ti Dios iti ipapatay, ket kas nagbanaganna, naipasngay dagiti annakda, ti intero a sangatauan, iti managbasol, matmatay a kasasaad. (Salmo 51:5) Ipakita ti salaysay ti Biblia maipapan ken ni Job a kinarit ni Satanas ti Dios, nga imbagana nga awan kano ti tao a mangsalimetmet iti kinatarnawna iti sidong ti pakasuotan. Ngem pinanenekan ni Job, agraman dagiti dadduma pay a matalek nga adipen ti Dios idi tiempo ti Biblia ken agingga iti kaaldawantayo, nga ulbod a namimpinsan ni Satanas. (Job 1:7-12; 2:2-5, 9, 10; 27:5) Ni Jesus, kas perpekto a tao, inyulidanna ti awan kapadana a panangsalimetmet iti kinatarnaw.—1 Pedro 2:21-23.
Gapuna, naikuna ni Jesus, “Ti prinsipe ti lubong [ni Satanas] awan ti kukuana kaniak.” (Juan 14:30) Kaskasdi, agpapan ita “ti isu-amin a lubong adda iti babaen ti managdakdakes.” (1 Juan 5:19) Gapu iti panangsupiatna iti kinalinteg ti kinasoberano ni Jehova, naikkan ni Satanas iti agarup 6,000 a tawen tapno makita no agballigi met laeng ti panangiturayna iti sangatauan. Anian a pannakapaayna, kas agtultuloy a paneknekan dagiti dumakdakes a kasasaad ditoy lubong! Asidegen nga ikkaten ti naayat a Diostayo, ni Jehova, daytoy bulok a kagimongan ti lubong, a patalgedanna ti nainkalintegan a kinasoberanona iti intero a daga. Anian a naragsak a pannakabang-ar ti iyegto dayta kadagiti tattao a mailiw iti natalna, nalinteg a turay!—Salmo 37:9-11; 83:17, 18.
Nupay kasta, saan laeng a dayta! Maipakitanto pay ti naayat a kinamanangaasi ti Dios maibatay kadagiti sasao ni Jesus idiay Juan 3:16: “Ta kasta la unay ti panagayat ti Dios iti lubong [ti sangatauan] nga intedna ti Anakna a bugbugtong, tapno amin a mangalagad ti pammati kenkuana, saan a mapukaw, no di ket adda biagna nga agnanayon.” Daytoy a panangisubli ti namnama a biag nga agnanayon iti sangatauan ditoy daga iramanna ti panangparsua kadagiti baro a banag. Ania dagitoy? Kasanoda a gunggonaan ti umas-asug a sangatauan? Dayta ti salaysayen ti sumaganad nga artikulomi.