“Naimbag a Bigatyo! Ammoyo Kadi No Aniat’ Nagan ti Dios?”
NAAWAT ti sanga nga opisina dagiti Saksi ni Jehova idiay Brazil ti sumaganad a surat a naggapu iti 12-años a singin a babbai idiay siudad ti Fortaleza:
“Idi 1990, idi addakami iti maikalima a grado, nangiyurnos ti eskuelaanmi iti pabuya panggep iti siensia, arte, ken kultura. Inlawlawagmi iti maestrami a kayatmi a naiduma ti presentasionmi manipud iti ipalplano nga isagana dagiti dadduma nga estudiante. Yantangay nangngegnakamin idi a nagsao maipapan ken Jehova ken iti Biblia, insingasingna: ‘Ala ngarud, mabalinyo ti agsurat maipapan iti Diosyo!’
“Nakitami a nasayaat a gundaway daytoy a mangted ti pammaneknek ket inkeddengmi nga iparang iti literatura ti Biblia a nakasentro iti nagan ni Jehova. Impadakkelmi dagiti sasao ti Salmo 83:18 ket impigketmi dayta iti retrato ti nakaukrad a Biblia. Inkabilmi met iti lamisaan dagiti nagduduma a patarus ti Biblia a naglaon iti nagan ni Jehova. Iti isu met la a lamisaan, nangiparangkami iti nadumaduma a literatura ti Biblia. Iti ungto ti lamisaan, nangisimpakami iti VCR ken TV tapno ipakita kadagiti sangaili ti maysa a pangarigan no sadino a naaramat ti nagan ni Jehova iti popular unay a pelikula.
“Bayat ti pabuya, no adda umasideg iti lamisaanmi, kunami: ‘Naimbag a bigatyo! Ammoyo kadi no aniat’ nagan ti Dios?’ Urayenmi a sumungbat ti sangaili, sami ituloy a kunaen: ‘Kitaenyo ditoy! Adu a patarus ti Biblia ti mangipakita a ti naganna ket Jehova,’ bayat nga itudtudomi ti nagan iti nagduduma a Biblia, kas ti João Ferreira de Almeida, The Jerusalem Bible, ken ti New World Translation. Kalpasanna ipabuyami ti eksena a nangitampokan ti bida iti pelikula iti nagan ti Dios a Jehova. No mangipakita dagiti tao iti interes, ikkanmi ida iti magasin wenno tract a naglaon iti ad-adu pay nga impormasion.
“Maysa kadagiti agtutubo nga immasideg iti lamisaanmi ti nagkiddaw iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Sinukimat ti maestrami ti libro a Panangparagsak ti Biag ti Pamiliayo ket kinunana: ‘Nagsayaat ketdin daytoy a libro!’ Iti panaggibus ti pabuya, nakaipaimakami iti 7 a libro, 18 a tract, ken 67 a magasin. Dakami ti nakagun-od iti maikatlo a puesto iti pabuya. Ngem kangrunaan iti amin, maragsakankami unay iti pribilehiomi a nangipakaammo ti nasantuan a nagan a Jehova.”