No Apay a Masapul a Tumabunokayo Kadagiti Nakristianuan a Panaggigimong
ADUN a bulan a payad-adalan ti Biblia ken ni Elizabeth ni Rosario, nga agnanaed idiay Sud America. Maragsakan ni Rosario a makaammo maipapan iti Pagarian ti Dios ken no kasano a yegnanto dagiti kasasaad iti Paraiso a daga. Nupay kasta, kanayon nga agkedked tunggal awisen ni Elizabeth a makigimong idiay Kingdom Hall. Impagarupna nga umanayen ti panagadal ti Biblia idiay pagtaengan ken ti panangtungpal iti ibagbagana, uray no saan a tumabuno kadagiti gimong ti kongregasion. Pinampanunotyo met kadin no talaga met laeng nga adda ipaayna kadakayo a pagimbagan dagiti Nakristianuan a panaggigimong? Apay a binilin ti Dios dagiti tattaona nga agtataripnongda?
Yantangay naiduma unay dagiti Kristiano idi umuna a siglo kadagiti tattao iti aglawlawda, nagpateg iti pannakaisalakanda ti umiso a panagtitimpuyog. Nagsurat ni apostol Pablo iti maysa a kongregasion dagiti nagkauna a Kristiano: ‘Awan ti pakababalawanyo ket nadaluskayo iti tengnga ti maysa a kaputotan a nakillo ken managdakdakes, nga iti tengngada aglawlawagkayo a kasla silsilaw iti lubong.’ (Filipos 2:15) Narigat ti kasasaad dagiti Kristiano idiay Judea, isut’ gapuna a nagsurat ni Pablo kadakuada: “Agpipinnanunottayo a maipaay iti pannakaparegtatayo iti ayat ken kadagiti naimbag nga aramid, a ditay baybay-an dagiti panaggigimongtayo, kas iti kadawyan dagiti dadduma, no di ket agpipinnabilegtayo, ket nangnangruna gapu ta makitayo nga umas-asideg ti aldaw.” (Hebreo 10:24, 25) Kasanotay a makapagpipinnaregta iti ayat ken kadagiti naimbag nga aramid babaen ti panaggigimong?
No Kasano nga “Agpipinnatadem” Dagiti Kristiano
“Panangpatadem” ti literal a kayulogan ti Griego a sao nga inusar ni Pablo ken naipatarus nga “agpipinnaregta.” Ilawlawag ti maysa a proverbio iti Biblia no kasano nga “agpipinnatadem” dagiti Kristiano, a kunkunana: “Ti landok patademenna ti landok. Kasta met ti maysa a tao patademenna ti langa ti sabali a tao.” (Proverbio 27:17; Eclesiastes 10:10) Remienta ti kayarigantayo, a kasapulan a mapatadem a kanayon. Yantangay ti panangiyebkas ti ayat ken Jehova ken ti panangaramid kadagiti pangngeddeng a naibatay iti pammatitayo kaipapananna ti panagbalin a naiduma iti lubong, masapul a kanayon a naiduma ti kababalintayo kadagiti kaaduan a tao.
Ti panangikagumaan nga agbalin a naiduma mabalin a pangudelenna ti regtatayo nga agaramid iti naimbag. Ngem no kaduatayo dagiti dadduma nga agay-ayat ken Jehova, agpipinnatademtayo—agpipinnaregtatayo iti ayat ken kadagiti naimbag nga aramid. Iti sabali a bangir, no agmaymaysatayo, adda ’tay pagannayasan a ti la bagitayo ti pampanunotentayo. Mabalin a sumiplot iti panunottayo ti imoral, inaagum, wenno minamaag a kapanunotan. “Ti suminsina birukenna ti tarigagayanna met laeng; ket karungsotna ti amin a natarnaw a kinasirib.” (Proverbio 18:1) Dayta ti gapuna a nagsurat ni Pablo iti kongregasion idiay siudad ti Tesalonica: “Itultuloyyo ti aglilinniwanliwa ken agpipinnaregta, kas iti ar-aramidenyo.”—1 Tesalonica 5:11.
Idi naturpos ni Rosario ti panagadalna kadagiti pamunganayan a sursuro ti Biblia, agkedked pay laeng a makitimpuyog iti kongregasion. Isu nga idi awanen ti ammo ni Elizabeth nga itulong pay, saannan a sinarsarungkaran ni Rosario. Kalpasan ti sumagmamano a bulan, sinarungkaran ti maysa nga agdaldaliasat a manangaywan ni Rosario ket sinaludsodna: “Uray no agkakaimas a taraon ti kankanen ti tunggal kameng ti pamilia idiay restauran, aniat’ maliwayanda no saanda nga agsasango a mangan idiay balayda?” “Saanda a makapaglalangen,” insungbat ni Rosario. Naawatanna ti punto ket rinugianna ti tumabuno a regular kadagiti gimong. Nakitana a makagunggona unay dagiti panaggigimong, ket manipud idin gistay awan a pulos naliwayanna a gimong.
Makaparegta ti pannakangngeg kadagiti dadduma a mangiyebkas iti pammati kadagiti bambanag a patpatienyo met, kasta met ti pannakakita no kasano a binalbaliwan ti kasta a pammati ti kabibiagda. Ammo daytoy ni Pablo iti mismo a kapadasanna, ket nagsurat iti kongregasion idiay Roma: “Il-iliwek a makitakayo, tapno ipaayankayo iti naespirituan a sagut tapno mapatibkerkayo; wenno, kunak ketdi, tapno adda koma panagsisinnukat iti pammaregta iti nagtetengngaanyo, iti tunggal maysa babaen ti pammati ti sabali, agpadpada iti pammatiyo ken kaniak.” (Roma 1:11, 12) Kinapudnona, adu a tawen ti naglabas sakbay a nakapan ni Pablo idiay Roma. Iti daydi nga isasarungkarna, ni Pablo ket bambantayan ti maysa a soldado a Romano kas maysa a balud. Ngem idi nakitana dagiti kakabsat a naggapu idiay Roma a nagnagna iti nasurok nga 60 a kilometro manipud iti siudad tapno inda sabaten, “nagyaman ni Pablo iti Dios ket napabileg ti nakemna.”—Aramid 28:15.
Pananggun-od iti Naespirituan a Taraon iti Napeggad a Panawen
Idi adda a sibabalud iti maysa a balay idiay Roma, nagsurat ni Pablo kadagiti Hebreo maipapan iti di panangliway iti panaggigimongda. Napateg kadatayo dagiti sasao nga innayonna: “Nangnangruna gapu ta makitayo nga umas-asideg ti aldaw.” (Hebreo 10:25) Nabayagen nga ipakpakita dagiti Saksi ni Jehova manipud iti Kasuratan a nangrugi ti panawen ti panungpalan daytoy a lubong idi tawen 1914 ken asidegen “ti aldaw ti pannakaukom ken ti pannakadadael dagiti tattao a nadangkes.” (2 Pedro 3:7) Sigun iti libro ti Biblia nga Apocalipsis, idi naitappuak ti Diablo manipud langit iti rugi ti panawen ti panungpalan, kasta unay ti pungtotna ket “napanna ginubat dagiti nabati . . . a mangsalsalimetmet kadagiti bilin ti Dios ken addaan iti trabaho a mangsaksi ken Jesus.” (Apocalipsis 12:7-17) Ngarud, nangnangruna a narigat ita ti panangsalimetmet kadagiti bilin ti Dios; ad-adda a kasapulantayo ti makitaripnong kadagiti kapammatiantayo. Dagiti panaggigimong tulongannatayo a mangpatibker ti pammatitayo ken ti ayattayo iti Dios tapno kabaelantayo a sarangten ti iraraut ti Diablo.
Ti ayat iti Dios ken ti pammati ket saan a kas kadagiti pasdek nga agtalinaed apaman a maipatakderda. Mayarigda ketdi kadagiti sibibiag a banag nga in-inut a dumakkel bayat a naynay a mataraonan ngem kumapsut ken matayda no awan ti ipaunegda. Dayta ti gapuna a mangipapaay ni Jehova iti regular a naespirituan a taraon tapno kumired dagiti tattaona. Kasapulantay amin ti kasta a taraon, ngem sadino pay ti pakagun-odantayo iti dayta malaksid iti organisasion ti Dios ken kadagiti gimong? Awanen.—Deuteronomio 32:2; Mateo 4:4; 5:3.
Adda saludsod nga indatag ni Jesus a makatulong kadatayo a makakita no kasano ti panangpakanna iti kongregasion Kristiano. Sinaludsodna: “Siasino ngarud ti matalek ken naannad nga adipen nga inkabil ni apona nga agaywan iti sangakabbalayanna, tapno ikkanna ida ti taraon iti umiso a tiempo? Naragsak dayta nga adipen a masarakanto ni apona inton umay a kasta ti ar-aramidenna.” (Mateo 24:45, 46) Siasino ti dinutokan ni Jesus idi umuna a siglo a mangpakan kadagiti pasurotna, ket siasino ti nasarakanna a simamatalek a mangpakpakan kadakuada iti panagsublina a buyogen ti pannakabalin ti Pagarian? Nalawag nga awan ti tao a nagtalinaed a sibibiag iti panaglabas ti adu a siglo. Ipakita ti pammaneknek a ti adipen isu ti kongregasion dagiti napulotan-espiritu a Kristiano, no kasano a nagserbi ti nasion ti Israel kas adipen ti Dios kasakbayan ti panawen Kristiano. (Isaias 43:10) Wen, ipapaay ni Jesus ti naespirituan a taraontayo babaen dayta sangalubongan a bagi dagiti napulotan-espiritu a Kristiano, a mangipapaay ita ti naespirituan a taraon babaen kadagiti lokal a kongregasion dagiti Saksi ni Jehova.
Ti wagas a panangipaay ni Jesus iti naespirituan a taraon ket dineskribir pay ni apostol Pablo: “‘Idi nga immuli iti ngato impanawna dagiti nakayawan; nangted iti sagsagut kadagiti tattao.’ . . . Intedna dagiti dadduma kas apostol, dagiti dadduma kas mammadto, dagiti dadduma kas ebanghelista, dagiti dadduma kas papastor ken mannursuro, a maipaay iti pannakapaan-anay dagiti sasanto, maipaay iti aramid a panagserbi, a maipaay iti pannakapabileg ti bagi ni Kristo, agingga iti makagtengtay amin iti panagmaymaysa ti pammati ken ti pannakaammo iti Anak ti Dios, iti kasasaad ti tao a nataengan, iti rukod ti kinatayag ti pannakapunno ni Kristo.”—Efeso 4:8, 11-13.
Kangrunaanna nga iti uneg dagiti lokal a kongregasion—kadagiti panaggigimong—a pabpabilgen dagitoy a “sagsagut kadagiti tattao” dagiti kakabsat. Idiay Antioquia, kas pangarigan, “ni Judas ken ni Silas, idinto a mammadtoda met, pinaregtada dagiti kakabsat iti adu a diskurso ken pinakiredda ida.” (Aramid 15:32) Dagiti palawag nga ipapaay dagiti lallaki a kualipikado iti naespirituan pakirdenda met ti pammatitayo tapno saantay a kumapsut wenno agbalin nga inaktibo.
Mabalin a pudno a nasayaat ti irarang-aytayo gapu iti personal a tulong ti maysa a kameng ti kongregasion uray no saantay pay a makigimgimong. Kunaen ti Biblia nga adda ti tiempo a “masapulyo ti mangisuro kadakayo manipud pangrugian kadagiti pamunganayan a bambanag kadagiti nasantuan a sasao ti Dios; ket . . . masapulyo ti gatas, a saan a ti taraon a nakired.” (Hebreo 5:12) Ngem saan a mabalin a gatas lattan ti ipapaunegyo. Mangipapaay dagiti Nakristianuan a panaggigimong iti agtultuloy a programa a panangisuro iti Biblia a nairanta a mangtaginayon ti ayattayo iti Dios ken ti pammatitayo kenkuana a nabiag, kasta met mangipaay iti praktikal a tulong iti panangiyaplikar “ti amin a pammagbaga ti Dios.” (Aramid 20:27) Saan laeng a “gatas” daytoy. Kuna pay ti Biblia: “Ti taraon a nakired maipaay kadagiti tattao a nataenganen, kadagidiay a gapu iti pannakaasaasda, dagiti riknada nairuamdan a mangilasin ti naimbag ken dakes.” (Hebreo 5:14) Kadagiti gimong, adu a suheto ti mausig a mabalin a saan a masaklaw iti panagadal ti Biblia idiay pagtaengan, kas iti bersikulo-por-bersikulo a panangusig kadagiti agkakapateg a padto ti Biblia ken nauneg a panangsalaysay no kasanotay a matulad ti Dios iti panagbiagtayo.
Dagiti Palagip ni Jehova—Kasla Timek iti Likudanyo
Babaen ti kakasta a panagadal ti kongregasion, kanayon a palagipannatayo ni Jehova maipapan iti kita ti tao a rumbeng a pagbalinantayo. Nagpateg ti kakasta a palagip. No awan dagita nalakatay la nga agduyos iti panagimbubukodan, kinatangsit, ken kinaagum. Dagiti palagip iti Kasuratan tulongannatayo a mangtagiragsak iti nasayaat a relasion kadagiti sabsabali ken iti Dios a mismo. “Inut-utobko dagiti daldalanko, ket inturongko dagiti sakak kadagiti palagipmo,” impudno ti nagsurat iti Salmo 119:59.
No regular a tumabunotayo kadagiti Nakristianuan a panaggigimong, mapasarantayo ti kaitungpalan ti padto ni Jehova babaen ken Isaias, a kunana: “Saanton nga aglemmeng ti Naindaklan a Mannursuroyo, ket dagiti matayo makitadanto ti Naindaklan a Mannursuroyo. Ket dagiti lapayagyo makangngegdanto iti maysa a sao iti likudanyo a kunkunana: ‘Isu daytoy ti dalan. Magnakayo kenkuana, dakayo a tattao.’” Palpaliiwen ni Jehova ti irarang-aytayo ken siaayat nga ilintegnatayo no agbidduttayo. (Isaias 30:20, 21; Galacia 6:1) Ket saan la a dayta ti tulong nga ipapaayna.
Pananggun-od iti Nasantuan nga Espiritu Babaen ti Kongregasion
No regular a tumabunotayo kadagiti Nakristianuan a panaggigimong dagiti Saksi ni Jehova, pakirdennatayo ti nasantuan nga espiritu ti Dios, nga agtataeng kadagiti tattaona. (1 Pedro 4:14) Maysa pay, dagiti Kristiano a manangaywan iti kongregasion ket dinutokan ti nasantuan nga espiritu. (Aramid 20:28) Addaan daytoy aktibo a puersa nga aggapu iti Dios iti napigsa nga impluensia iti maysa a Kristiano. Kuna ti Biblia: “Ti bunga ti espiritu isu ti ayat, rag-o, talna, mabayag a panagitured, kinaanus, kinaimbag, pammati, kinaemma, panagteppel.” (Galacia 5:22, 23) Ti nasantuan nga espiritu, nga agtigtignay babaen ti organisasion ti Dios, tulongannatay met a gumun-od iti nakaskasdaaw kalawagna a pannakaawat kadagiti bambanag nga insagana ni Jehova kadagiti agayat kenkuana. Kalpasan ti panangilawlawagna a saan a maawatan dagiti nalatak a tattao iti daytoy sistema dagiti bambanag ti pangpanggep ti Dios, insurat ni Pablo: “Ti Dios impakaammona ida kadatayo babaen ti espirituna.”—1 Corinto 2:8-10.
Malaksid pay iti makapabileg-pammati a naespirituan a taraon, mangipapaay ti kongregasion iti panagsanay para kadagiti agtarigagay a makipaset iti kangrunaan a trabaho ti kongregasion. Ania kadi dayta?
Ti Panagsanay nga Ipapaay ti Kongregasion
Ti kongregasion Kristiano ket saan a maysa a sosial a gunglo a pangtagiragsakan laeng dagiti tao iti paglinglingayan ken nalabit pagpipinnaregtaanda a mangpasayaat iti panagbiag. Binilin ni Jesus ti kongregasion nga idanon ti naimbag a damag ti Pagarian kadagiti agbibiag iti naespirituan a kinasipnget. (Aramid 1:8; 1 Pedro 2:9) Manipud iti aldaw a pannakaipasdekna, idi Pentecostes 33 K.P., maysa dayta nga organisasion dagiti manangaskasaba. (Aramid 2:4) Napadasanyo kadin nga insarsarita iti maysa a tao ti maipapan iti pangpanggep ni Jehova ngem diyo nakumbinsir? Mangipapaay dagiti Nakristianuan a panaggigimong iti personal a panagsanay iti arte ti panangisuro. Babaen ti panangusig kadagiti pangarigan idiay Biblia, masursurotayo ti mangipasdek iti punto a pagtunosantayo iti tao a kasasaotayo, no kasano nga usaren ti Kasuratan a kas pakaibatayan ti lohikal nga argumento, ken no kasano a matulongan dagiti sabsabali nga agrason babaen ti panangusar kadagiti saludsod ken ilustrasion. Matulongannakayo ti kakasta nga abilidad a maaddaan iti aglaplapusanan a rag-o nga agtaud iti panangtulong iti maysa a tao a mangtarus iti kinapudno iti Biblia.
Iti daytoy nariribuk, imoral a lubong, ti kongregasion Kristiano ket pudno a maysa a naespirituan a kamang. Nupay buklen dagiti imperpekto a tattao, maysa dayta a taklin a napnuan talna ken ayat. Gapuna, regular a tumabunokayo kadagiti amin a gimong ket mapaneknekanyo a pudno dagiti sasao ti salmista: “Kitaenyo! Nagimbagen ken anian a makaay-ayo ti panagtitimpuyog dagiti agkakabsat iti kinamaymaysa! . . . Ta sadiay inkumit ni Jehova ti bendision, ken biag iti agnanayon.”—Salmo 133:1, 3.