Ti Mannangted ti “Isuamin a Sagut a Nasayaat”
“Iti naminsan inayabanak ti ministro ti Reformed Church. Kayatna a maammuan no kasanok nga imammanehar ti iglesiak. Kinunak kenkuana: . . . ‘Awan susuelduanmi; awan ti mamagririri kadagiti tao. Pulos a dikam agkolekta.’ ‘Kasanoyo a patauden ti kuarta?’ insaludsodna. Insungbatko, ‘Ita, Dr.——, no ibagak kenka ti kasisimplean a kinapudno nalabit saanka a mamati. No adda interes dagiti tao iti daytoy a pamay-an, dida urayen nga adda maipasiar a supot iti tunggal maysa. Ngem makitada nga adda dagiti paggastuan. Kunada iti bagbagida, “Adda nagastos daytoy a patakder. . . . Kasanoak a makaidonar ti kuarta maipaay iti daytoy?”’ Pinerrengnak a kas man la kunkunana, ‘Ania ti panagkunkunam kaniak—awan ammona?’ Kinunak, ‘Ita, Dr.——, ibagak kenka ti bin-ig a kinapudno. . . . No naparaburan ti maysa, ken addaan aniaman a material a sanikua, tarigagayanna nga usaren dayta a maipaay iti Apo. No awan ti mabalinna, apay ketdin a pilitenmi?’”
—Charles T. Russell, ti immuna a presidente ti Watch Tower Society, “The Watch Tower,” Hulio 15, 1915.
MANGTEDTAYO agsipud ta ni Jehova ti immuna a nangted. Ti pannangtedna nangrugi iti panamarsua, di mabilang a tawenen ti napalabas—ti kaunaan unay a parsuana, ti “bugbugtong nga Anak[na].” (Juan 3:16) Gapu iti ayat, impaayna ti sagut a biag kadagiti sabsabali.
Ti Anak ti Dios, ni Jesu-Kristo, ti kadakkelan a sagut ni Jehova kadatayo. Ngem saan a ti Anak ti Dios a mismo ti pagpatinggaan ti pannangted ti Dios. ‘Ti nawadwad unay a di kaikarian a kinamanangaasi ti Dios’ isu ti aw-awagan ni apostol Pablo a ‘di mailadawan a sagut [ni Jehova].’ (2 Corinto 9:14, 15) Nabatad nga iraman daytoy a sagut ti dagup ti amin a kinaimbag ken naayat a kinamanangaasi nga intuyang ti Dios kadagiti tattaona babaen ken Jesus. Nakaskasdaaw unay ti kasta a di kaikarian a kinamanangaasi ta lab-awanna ti pannakabalin ti tao a mangiladawan wenno mangiyebkas. Nupay kasta, adda dadduma pay nga ebkas ti pannangted ti Dios.
Idi un-unana nga aldaw, siuumiso ken sipapakumbaba a binigbig ti maysa nga ari nga aniaman a naimbag a bambanag nga itedna kas sagut ket kinaagpaysona kukua ni Jehova. Kinunana: “Ta amin nga adda kadagiti langlangit ken iti daga kukuam. Kukuam ti pagarian, O Jehova, ket maitan-okka a kas ulo iti rabaw ti isuamin. . . . Ngem, asinoak ken ania ti ilik, tapno kabaelanmi koma ti mangidaton iti sibubulos a nakem a kas iti daytoy a kita? Ta naggapu amin a bambanag kenka, ket kukuam ti itdenmi kenka.”—1 Cronicas 29:11-14.
Ti Ulidan ti Dios
Ammo ni Santiago, maysa nga adalan ni Jesu-Kristo, a ni Jehova a Dios ti gubuayan ti aniaman a banag a naan-anay a naimbag iti amin a banag. Bin-ig a perpekto a sagut ti aggapu kenkuana. Kinuna ni Santiago: “Isuamin a sagut a nasayaat ken isuamin a sagut a naan-anay aggapuda iti ngato, bumaba nga aggapu iti Ama dagiti lawag, a kenkuana awan ti aniaman a panagbalbaliw ti turongen ti anniniwan.”—Santiago 1:17.
Uray iti panangited ti sagut, nakita ni Santiago no kasano a naiduma ti Dios kadagiti tao. Makaipaay dagiti tao kadagiti naimbag a sagsagut ngem dida aramiden dayta a kankanayon. Mabalin nga aggubuay dagitoy a sagut iti inaagum a motibo, wenno maaramat dagita a pangsulisog iti tao nga agaramid iti dakes. Iti biang ni Jehova awan ti panagduduma; saan nga agbalbaliw. Gapuna, saan nga agbalbaliw ti kalidad dagiti sagutna. Kankanayon a nasin-awda. Kankanayon nga itandudoda ti pagimbagan ken pagragsakan ti sangatauan. Kankanayon a naimbag ken makatulongda, pulos a saan a mangranggas.
Dagiti Motibo iti Pannangted iti Sagsagut
Idi kaaldawan ni Santiago, ar-aramiden dagiti nalatak a relihiuso a papangulo ti pannangted ti sagut tapno laeng makita dagiti tao. Mangipaayda a buyogen ti dakes a motibo. Iti gagarda a dayawen ida dagiti tao, inkompromisoda dagiti nalinteg a pagalagadanda. Nupay kasta, naiduma dagiti Kristiano. Binagbagaan ni Jesus ida: “Intono manglimoska, dikanto pagunien ti tangguyob iti sanguanam, a kas iti aramiden dagiti aginsisingpet kadagiti sinagoga ken kadagiti kalkalsada, tapno madayawda kadagiti tattao. Pudno kunak kadakayo, Inawatdan ti gunggonada. Ngem sika intono manglimoska, saan koma a maammuan ti makatigidmo ti aramiden ti makanawanmo, tapno ti limosmo nalimed; ket ni Amam a makakita iti nalimed gunggonaannakanto.”—Mateo 6:2–4.
Ti panggep ti Kristiano a mangited ti sagut isut’ panangtulong kadagiti dadduma a mangpunno iti kasapulan wenno panangparagsak kadakuada wenno panangitandudo iti pudno a panagdaydayaw. Saan a maipaay iti bukod a pannakaidayaw. Kinapudnona, sumarot ti panagkita ni Jehova iti kaunggan ti pusotayo. Makitana ti kaunggan a motibo iti likudan dagiti limostayo.
Ikagkagumaan dagiti Saksi ni Jehova a suroten ti ulidan ni Jehova ken ti Anakna iti pannangted ti sagut. Ipaayda ti adda kadakuada. Adda kadakuada ti naimbag a damag ti Pagarian, ket ipaayda daytoy a pakabendisionan dagiti sabsabali. Ammoda a kunaen ti Proverbio 3:9: “Pagdayawmo dagiti napateg a sanikuam ken Jehova, ken dagiti umuna a bunga ti amin a maapitmo.” Agsipud ta pagreggetan ti tunggal sanga nga opisina, kongregasion, ken indibidual ti tumulong iti pagsayaatan ti amin, bimmileg ken rimmang-ay iti naespirituan ti intero a panagkakabsat. Ti kinarang-ay iti material saan a mangituggod iti kinarang-ay iti naespirituan, ngem ti kinarang-ay iti naespirituan mangyeg iti material a kinarang-ay nga umdas kadagiti kasapulan ti trabaho ni Jehova.
Dagiti Pamay-an Iti Itutulong
Adu ti pamay-an tapno personal a makatulong ti tunggal maysa a mangsuportar iti naimbag a damag. Ti maysa a pamay-an ket mainaig kadagiti Kingdom Hall. Us-usaren dagiti amin a kameng ti kongregasion ti Kingdom Hall. Adda nangipaay kadagiti pundo maipaay iti pannakaipatakder wenno abang dayta, lighting, temperature control, ken pannakamantiner daytoy. Yantangay nasken ti suportar ti tunggal maysa iti kongregasion, maikabil dagiti kahon ti kontribusion idiay Kingdom Hall, ket dagiti maawat a boluntario a donasion mausar a pagbayad kadagiti paggastuan ti kongregasion. No adda sobra, mabalin nga idonar iti lokal a sanga ti Watch Tower Society, sigun iti pagnunumuan ti kongregasion.
Mabalin nga ipatulod dagiti kontribusion iti sanga ti Sosiedad a mismo maipaay iti panangsanay ken panangsuportar kadagiti misionero ken espesial payunir kadagiti paset ti lubong a saan pay a naidanon ti naimbag a damag iti kaaduan a populasion. Dagiti dadduma a paggastuan iti panangisaknap ti naimbag a damag ket mainaig iti trabaho dagiti agdaldaliasat a manangaywan. Ni apostol Pablo, a nangituyang ti ulidan iti trabaho a panagdaliasat idi umuna a siglo, kinomendaranna ti kongregasion idiay Filipos: “Masansan a nangipaw-itkayo ti maipaay iti pakasapulak.” (Filipos 4:14-16) Malaksid iti mabusbos kadagitoy a paset ti amin-tiempo a serbisio, nga as-asikasuen ti amin a sanga, masapul met ti pangmantiner iti tunggal pagtaengan a Bethel ken dagidiay agnanaed ken agtartrabaho sadiay. Ti panagsurat ken panagimprenta iti literatura a naglaon ti napintas a mensahe ti naimbag a damag ket kinapudnona pribilehio nga inted ti Dios, ngem nasken met ti panagiwaras ti literatura, ket adda magastos. Sa addayta pay ti paggastuan kadagiti asamblea ken kumbension, malaksid pay kadagiti kaso iti korte a mailablaban tapno ‘masalakniban ken maipasdek ti naimbag a damag iti legal a pamay-an.’—Filipos 1:7.
Ti tiempo a busbusbosen ti tunggal adipen ni Jehova iti panangikaskasaba ti naimbag a damag ket boluntario, ken kasta met ti pannangtedna kadagiti material a pundo. Ti regular a panangilasin ti kuarta a mausar iti panangsuportar iti irarang-ay ti pudno a panagdaydayaw ket imbalakad ni apostol Pablo: “Ita no maipapan iti maurnong a maipaay kadagiti sasanto, . . . tunggal umuna nga aldaw ti lawas, tunggal maysa kadakayo, mangilasin ti idulinna kas iti irarang-aynanto.”—1 Corinto 16:1, 2.
No mangidonar ti maysa a tao, masansan a dina ammo ti apag-isu a pakausaranto dayta, ngem makitana dagiti resulta iti panagsaknap ti panangikaskasaba ti Pagarian. Ipakita dagiti report iti 1993 Yearbook of Jehovah’s Witnesses a ti naimbag a damag ti Pagarian ket maikaskasaban iti nasurok a 200 a daga ken purpuro iti baybay babaen ti nasurok a 4,500,000 a Kristiano a ministro. Makapabileg dagitoy a report. Ngarud, aniaman a sagut, bassit man wenno dakkel, makatulong iti panangisaknap ti naimbag a damag iti sangalubongan.
Masupsuportaran daytoy a trabaho babaen ti ragup a pannangted ti amin. Dadduma ti makabael a mangted ti ad-adu, a makatulong iti trabaho a panangasaba iti dakdakkel a pamay-an. Dagiti dadduma bassit la ti mabaelanda. Ngem saan a kasapulan a mabain dagidiay bassit laeng ti maidonarda a kas ket ‘tay awan kapapay-an ti tulongda. Sigurado a saan a kasta ti panagrikna ni Jehova. Imbatad ni Jesus daytoy idi impakitana no kasanot’ panangapresiar ni Jehova ti bassit a tulong nga impaay ti balo. “Ket nakitana ti maysa a napanglaw a balo a nangipisok met sadiay ti dua a maravilis, ket kinunana: ‘Kinapudnona kunak kadakayo, Daytoy a balo, nupay napanglaw, nangitinnag ti ad-adu ngem isuda amin. Ta amin dagitoy nangidatonda iti paset ti sobrada, ngem daytoy a babai iti kinapanglawna intedna amin ti pagtaraon nga adda kenkuana.’”—Lucas 21:2-4.
Uray pay ania ti kasasaadtayo iti pinansial, makaitedtayo kadagiti pamay-an a makaay-ayo ken Jehova. Nagsayaat ti pananggupgop ti salmista no kasano a maidaydayawtayo iti Ari ken Ukomtayo. Kinunana: “Ipadayawyo ni Jehova ti dayag a mainugot iti naganna; mangyegkayo iti daton ket umaykayo kadagiti paraanganna.” (Salmo 96:8) Ngarud, tuladentay koma ti naayat nga ulidan ti nailangitan nga Amatayo babaen ti naragsak a pannangtedtayo ti sagut agsipud ta isu ti immuna a nangted kadatayo.
[Kahon iti panid 30]
NO KASANOT’ ITUTULONG TI DADDUMA ITI TRABAHO A PANANGIKASABA TI PAGARIAN
◻ KONTRIBUSION ITI SANGALUBONGAN A TRABAHO: Adu ti mangilasin wenno mangibadyet ti kantidad nga itinnagda kadagiti kahon ti kontribusion a nasuratan iti: “Kontribusion para iti Sangalubongan a Trabaho ti Sosiedad—Mateo 24:14.” Binulan nga ipatulod dagiti kongregasion dagitoy a kantidad iti sangalubongan a hedkuarter idiay Brooklyn, Nueva York, wenno iti kaasitgan a sanga nga opisina.
◻ SAGSAGUT: Mabalin nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, Inc., P.O. Box 2044, 1099 Manila, wenno iti lokal a sanga nga opisina ti Sosiedad. Mabalin met nga idonar dagiti alahas wenno dadduma pay a sanikua. Masapul a mapakuyogan dagitoy a kontribusion iti ababa a surat a mangibagbaga a dayta ket maysa a direkta a sagut.
◻ KONDISIONAL A DONASION NGA URNOS: Mabalin nga italek ti kuarta iti Watch Tower Society agingga iti ipapatay ti nangidonar, iti kondision a no rumsua ti personal a pakasapulan, maisubli dayta iti nangidonar.
◻ SEGURO: Mabalin a ti Watch Tower Society ti mapanaganan kas benepisario ti life insurance policy wenno ti retirement/pension plan. Rumbeng a mapakaammuan ti Sosiedad maipapan iti kasta nga urnos.
◻ DEPOSITO ITI BANKO: Mabalin nga italek wenno payable on death iti Watch Tower Society dagiti deposito iti banko, certificates of deposit, wenno individual retirement accounts, maitunos kadagiti alagaden ti lokal a banko. Rumbeng a mapakaammuan ti Sosiedad maipapan iti kasta nga urnos.
◻ STOCKS KEN BONDS: Mabalin nga idonar dagiti stocks ken bonds iti Watch Tower Society kas maysa a direkta a sagut wenno babaen ti maysa nga urnos a ti masapulan ket agtultuloy a maited iti nagidonar.
◻ REAL ESTATE: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba ti life estate iti nangidonar, a makapagtultuloy nga agnaed sadiay bayat a sibibiag. Masapul a makiuman ti maysa iti Sosiedad sakbay ti legal a panangiyallatiw kadagiti papeles ti aniaman a real estate iti Sosiedad.
◻ TESTAMENTO KEN TALEK: Mabalin nga ipatawid ti sanikua wenno kuarta iti Watch Tower Bible and Tract Society of the Philippines Inc. babaen ti legal a pannakapatalgedna a testamento, wenno ti Sosiedad ti mabalin a mapanaganan kas benepisario iti maysa a trust agreement. Mabalin nga adda bentahana iti buis no maysa a relihiuso nga organisasion ti benepisario ti talek. Rumbeng a mapatulodan ti Sosiedad iti kopia ti testamento wenno trust agreement.
Para iti kanayonan nga impormasion maipapan kadagita a banag, agsuratkayo iti Treasurer’s Office, Watch Tower Bible and Tract Society of the Philippines, Inc., P.O. Box 2044, 1099 Manila, wenno iti lokal a sanga nga opisina ti Sosiedad.
[Dagiti ladawan iti panid 31]
No kasano a maus-usar dagiti donasionyo:
1. Dagiti boluntario iti Bethel
2. Pangipatakder kadagiti sanga nga opisina
3. Pangsaranay kadagiti biktima ti didigra
4. Dagiti Kingdom Hall
5. Dagiti misionero