Dagiti Nasayaat ken Dakes a Bunga
“Impakita kaniak ni Jehova, ket, adtoy! dua a kuribot a higos . . . No maipapan iti maysa a kuribot, nasayaat unay dagiti higos, kas kadagiti higos a nasapa a naluom; ket no maipapan iti sabali a kuribot, dakes unay dagiti higos, ket saan a mabalin a kanen ta dakesda unay.”—JEREMIAS 24:1, 2.
1. Kasano nga impakita ni Jehova ti asi iti ilina nga Israel, ngem kasanot’ panagtignayda?
TAWEN 617 K.K.P. idi. Sangapulo a tawen laengen sakbay nga iwayat ni Jehova ti pannusa a pakaikarian ti Jerusalem ken dagiti umilina. Tallopulo a tawenen a sipipinget a mangaskasaba ni Jeremias. Imutektekanyo ti napatak a panangiladawan ni Esdras iti kasasaad, kas masarakan idiay 2 Cronicas 36:15: “Intultuloy ni Jehova a Dios dagiti ammada ti nagbaon a maibusor kadakuada babaen kadagiti mensaherona, a maulit-ulit a nagbaon, gapu ta naasian iti ilina ken iti pagtaenganna.” Ket ania ti resulta amin daytoy a panagregget? Nakalkaldaang, ituloy a kunaen ni Esdras idiay 2 Cr 36 bersikulo 16: “Ngem rinabrabakda dagiti mensahero ti pudno a Dios ken inum-umsida dagiti saona ken inuy-uyawda dagiti mammadtona, agingga iti simged ti pungtot ni Jehova a maibusor iti ilina, agingga iti awanen ti pamuspusan.”
2, 3. Iladawanyo ti napatak a sirmata nga impakita ni Jehova ken Jeremias.
2 Kayat kadi a sawen daytoy a maikisap a naan-anay ti nasion ti Juda? Tapno maammuantayo ti sungbat, intay usigen ti nagpateg a sirmata a naited ken Jeremias ken nailanad iti Jer kapitulo 24 iti libro a naipanagan kenkuana. Iti daytoy a sirmata, nagusar ti Dios iti dua a kuribot a naglaon kadagiti higos a mangisimbolo kadagiti pasamak iti naitulag nga ilina. Nailadawan dagitoy babaen ti dua a nagduma a kita ti bunga, nasayaat ken dakes.
3 Iladawan ti Jeremias kapitulo 24, bersikulo 1 ken 2, ti nakita ti mammadto ti Dios: “Impakita kaniak ni Jehova, ket, adtoy! dua a kuribot a higos a naisaad iti sanguanan ti templo ni Jehova, kalpasan a ni Nabucodonosor nga ari ti Babilonia impanawna a nakayawan ni Jeconias nga anak a lalaki ni Joakim, ari ti Juda, ken dagiti prinsipe ti Juda ken dagiti nalaing nga agaramid ken dagiti mammanday ken dagiti manangbangon kadagiti sarikedked, manipud Jerusalem tapno ipanna ida idiay Babilonia. No maipapan iti maysa a kuribot, nasayaat unay dagiti higos, kas kadagiti higos a nasapa a naluom; ket no maipapan iti sabali a kuribot, dakes unay dagiti higos, ket saan a mabalin a kanen ta dakesda unay.”
Dagiti Mangiladawan a Nasayaat a Higos
4. Ania a makaliwliwa a mensahe ti impaay ti sirmata maipapan kadagiti higos kadagiti matalek nga Israelita?
4 Kalpasan ti panangsaludsodna ken Jeremias maipapan iti nakitana, intuloy a kinuna ni Jehova idiay Jer 24 bersikulo 5 agingga iti 7: “Kas kadagitoy nasayaat a higos, kasta ti panangibilangkonto kadagiti nakayawan iti Juda, dagidiay papanawekto ditoy a disso nga ipan iti daga dagiti Caldeo, iti nasayaat a pamay-an. Ket ikitakto ti matak kadakuada iti nasayaat a pamay-an, ket pagsubliekto ida iti daytoy a daga. Ket bangonekto ida, ket diakto rakraken; ken imulakto ida, ket diakto paruten. Ket ikkakto ida iti puso tapno maammuandak, a siak ni Jehova; ket isudanto ti agbalin nga ilik, ket siakto ti agbalin a Diosda, ta agsublidanto kaniak iti amin a pusoda.”
5, 6. (a) Kasano a ‘napapanaw [a naipan idiay Caldea dagiti dadduma nga Israelita] iti nasayaat a pamay-an’? (b) Kasano nga ‘inkita [ni Jehova] ti matana iti nasayaat a pamay-an’ kadagiti matalek nga Israelita a nakayawan?
5 Ngarud, iparipirip ti kinuna ni Jehova ditoy a dumtengto dagiti nasayaat a tiempo, a dinto maikisap a naan-anay ti nasion ti Juda. Ngem ania ti kaipapanan daytoy kuribot a naglaon kadagiti nasayaat a higos?
6 Taltallo pay laeng a bulan ken sangapulo nga aldaw a nagari ni Jeconias, wenno Joaquin, iti Juda sakbay a sibubulos nga insukona ti Jerusalem ken ni Ari Nabucodonosor. Kaduana a nakayawan da Daniel ken dagiti tallo a Hebreo a kakaduana a da Hananias, Misael, ken Asarias, kasta met ni Ezequiel. Saan ida a pinatay ti ari ti Babilonia, isu a maikuna a pinapanaw ni Jehova amin dagitoy a nakayawan nga impan iti daga dagiti Caldeo iti nasayaat a pamay-an. Nadlawyo kadi nga inkari met ni Jehova nga ‘ikitananto ti matana kadakuada iti nasayaat a pamay-an’? Kasano a natungpal daytoy? Idi 537 K.K.P., 80 a tawen kalpasanna, tinignay ni Jehova ni Ari Ciro a mangipaulog iti bilin a mangipalubos iti natda kadagiti kaputotanda nga agsubli iti daga ti Juda. Binangon manen dagitoy matalek a Judio ti siudad ti Jerusalem; nangipatakderda iti baro a templo a pagdaydayawan iti Diosda, ni Jehova; ken nagsublida kenkuana iti amin a pusoda. Isu nga iti imatang ni Jehova, nasayaat unay a higos a nasapa a naluom ti kayarigan dagitoy a nakayawan ken dagiti kaputotanda.
7. Kaano ken kasano nga inkita ni Jehova ti matana iti moderno a klase Jeremias “iti nasayaat a pamay-an”?
7 Mabalin a malagipyo pay nga iti napalabas nga artikulo maipapan iti naimpadtuan a sasao ni Jeremias, naammuantayo nga adda kaipapananda iti maika-20 a siglotayo. Kasta met ti Jer 24 kapitulo 24. Kadagiti nalidem a tawtawen ti Gubat Sangalubongan I, adu a dedikado nga adipen ni Jehova ti naipasidong iti impluensia ti Babilonia a Dakkel iti nadumaduma a pamay-an. Ngem ‘sikikita [ti nasiput a mata ni Jehova] kadakuada iti nasayaat a pamay-an.’ Gapuna, babaen ken Dakdakkel a Ciro, ni Kristo Jesus, winayawayaan ni Jehova ida iti pannakabalin ti Babilonia a Dakkel ket nagin-inut nga inyegna ida iti naespirituan a paraiso. Nagtignay dagitoy naespirituan nga Israelita ket nagsublida ken Jehova iti amin a pusoda. Ket idi 1931, naragsakanda a nangawat iti nagan a dagiti Saksi ni Jehova. Pudno unay, maikuna itan a nagbalinda a kas maysa a kuribot a naglaon kadagiti nasayaat unay a higos iti imatang ni Jehova.
8. Iti ania a pamay-an nga isaksaknap dagiti Saksi ni Jehova ti arig-higos kasam-itna a mensahe ti Pagarian?
8 Saan a naikapis dagiti Saksi ni Jehova iti panggep ti di kaikarian a kinamanangaasi ti Dios iti panangwayawayana kadakuada iti Babilonia a Dakkel. Saanda a binukbukodan ti arig-higos kasam-itna a mensahe ti naimbag a damag ti Pagarian, no di ket insaknapda dayta maitunos iti sasao ni Jesus idiay Mateo 24:14: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion.” Ket ti resultana? Nasurok nga 4,700,000 a kimmarnero a tattao a saan a naespirituan nga Israelita ti nakaruk-aten iti Babilonia a Dakkel!
Dagiti Mangiladawan a Dakes a Higos
9. Siasino ti intakderan dagiti dakes a higos iti sirmata ni Jeremias, ket ania ti naikeddeng a mapasamak kadakuada?
9 Ngem komusta met ngay daydiay kuribot a naglaon kadagiti dakes a higos iti sirmata ni Jeremias? Naiturong itan ti atension ni Jeremias iti sasao ni Jehova a masarakan idiay Jeremias kapitulo 24, bersikulo 8 agingga iti 10: “Kas kadagiti dakes a higos a saan a mabalin a kanen ta dakesda unay, pudno a kastoy ti kuna ni Jehova: ‘Kasta ti panangbaybay-akto ken Sedekias nga ari ti Juda ken dagiti prinsipena ken ti matda ti Jerusalem nga agbati ditoy a daga ken dagidiay nga agnaed iti daga nga Egipto—baybay-akto met ida a maipalladaw nga agallaalla iti nagtengngaan dagiti amin a pagarian ti lubong a maipaay iti pagdaksan, tapno agbalin a maysa nga umsi ken maysa a proverbio, maysa a pagrabakan ken maysa a lunod, kadagiti amin a disso a pangiwarawaraak kadakuada. Ket ibaonkonto a maibusor kadakuada ti kampilan, ti bisin ken ti angol, agingga iti maibusda iti daga nga intedko kadakuada ken kadagiti ammada.’”
10. Apay nga imbilang ni Jehova ni Sedekias a ‘dakes a higos’?
10 Ket pudno a nagbalin ni Sedekias a ‘dakes a higos’ iti imatang ni Jehova. Saan laeng nga immalsa a maibusor ken Ari Nabucodonosor babaen ti panangdadaelna iti sapata ti kinasungdo nga inaramidna iti dayta nga ari iti nagan ni Jehova no di pay ket linaksidna a naan-anay ti asi nga impakita ni Jehova kenkuana babaen ken Jeremias. Kinapudnona, pinaibaludna pay ketdi ni Jeremias! Di pakasdaawan a kastoy ti pananggupgop ni Esdras iti kababalin ti ari idiay 2 Cronicas 36:12: “Intultuloyna ti nagaramid iti dakes iti imatang ni Jehova a Diosna. Saan a nagpakumbaba.” Iti imatang ni Jehova, maysa a kuribot a naglaon kadagiti dakes, rinuker a higos ti kayarigan ni Sedekias ken dagidiay nabati idiay Jerusalem!
Dagiti Rinuker a Piguratibo a Higos iti Kaaldawantayo
11, 12. Siasino dagiti dakes a higos itatta, ket anianto ti mapasamak kadakuada?
11 Ita kitaenyo ti kasasaad ti lubong itatta. Iti panagkunayo, makasaraktay aya iti piguratibo a kuribot a naglaon kadagiti dakes a higos? Intay usigen dagiti bambanag babaen ti panangidilig ti kaaldawantayo iti kaaldawan ni Jeremias. Iti daytoy maika-20 a siglo, us-usaren ni Jehova ti klase Jeremias, dagiti napulotan a natda, a mamakdaar kadagiti nasion maipapan iti sumungsungad a pungtotna inton dakkel a rigat. Idagdagadagna kadagiti nasion nga ipaayda kenkuana ti dayag a pakaikarian ti naganna, a dayawenda iti espiritu ken kinapudno, ken bigbigenda ti agturturayen nga Anakna, ni Kristo Jesus, kas nainkalintegan nga Agturay iti daga. Kasano ti panagtignayda? Kas met laeng idi kaaldawan ni Jeremias. Saan nga agsardeng dagiti nasion nga agaramid iti dakes iti imatang ni Jehova.
12 Siasino dagiti mangisungsungsong iti daytoy nga ibubusor? Siasino dagiti mangrabrabak kadagiti kas ken Jeremias a mensahero ti Dios babaen ti panagduaduada iti autoridadda nga agserbi kas ministro ti Dios? Siasino dagiti manguy-uyaw iti Sao ti Dios? Siasino ita ti adda iti likudan ti dandani amin a pannakaidadanes dagiti Saksi ni Jehova? Nalawag ti sungbat a makita ti isuamin—isu ti Kakristianuan, nangruna dagiti klero! Ket kitaenyo laengen dagiti rinuker, dakes a bunga a patpatauden ti Kakristianuan a nasalaysay iti napalabas nga artikulo. Ay, wen, talaga nga adda simboliko a kuribot a naglaon kadagiti dakes a higos ditoy daga itatta. Kinapudnona, kinuna ni Jehova a saan a mabalin a “kanen [dagitoy] ta dakesda unay.” Agallangogan dagiti sao ni Jehova babaen ken Jeremias agingga iti kaaldawantayo: ‘Maibusdanto’! Saanen a maipamuspusan pay ti pungtot ni Jehova maibusor iti Kakristianuan.
Maysa a Ballaag Kadatayo
13. Iti lawag ti sasao ni Pablo a masarakan idiay 1 Corinto 10:11, kasanot’ rumbeng a panagawattayo iti sirmata maipapan iti dua a kuribot a higos?
13 Bayat nga us-usigentayo ti kaipapanan ti naipaltiing a pammakdaar a mensahe ni Jeremias, umaweng met kadagiti lapayagtayo ti sasao ni apostol Pablo idiay 1 Corinto 10:11: ‘Ita dagitoy a bambanag napagteng kadakuada kas pagulidanan, ket naisuratda a pammakdaar kadatayo a nadatngan dagiti panungpalan dagiti sistema ti bambanag.’ Ipappapusotay met laeng aya ti pakdaar nga impasimudaag kadatayo daytoy a sirmata maipapan iti dua a kuribot a higos? Ti salsalaysayentayo ket nagpateg a paset dagiti bambanag a napasamak iti Israel a pakaballaagantayo.
14. Kasano ti panangsubad ti Israel iti nadungngo a panangaywan ni Jehova?
14 Kamaudiananna, laglagipentayo ti sasao ni Jehova ken ni Ari David maipapan iti Israel, kas masarakan idiay 2 Samuel 7:10: “Itudingkonto ti maysa a lugar a maipaay iti ilik nga Israel ket imulakto ida.” Sidudungngo nga inaywanan ni Jehova ti ilina nga Israel, iti amin a pamay-an. Adu ti panggapuan dagiti Israelita a mangpataud koma kadagiti nasayaat a bunga iti biagda. Masapul laeng nga ipangagda ti nadiosan a pannursuro ni Jehova ken salimetmetanda dagiti bilinna. Ngem, manmano laeng kadakuada ti nangaramid iti kasta. Nagtangken ti ulo ken nayaw-awan ti kaaduan ket bin-ig a dakes, rinuker a bunga ti pinataudda.
15. Kasano ti panangsubad ti naespirituan nga Israel ita ken dagiti kimmarnero a kakaduada iti asi ni Jehova?
15 Bueno, komusta met ngay iti kaaldawantayo? Dakkel nga asi ti ipakpakita ni Jehova iti natda ti naespirituan nga Israel ken kadagiti kimmarnero a kakaduada. Kanayon a sikikita ti matana kadakuada sipud pay pannakaispalda iti naespirituan idi 1919. Kas impadtona babaen ken Isaias, inaldaw nga umaw-awatda iti nadibinuan a pannursuro manipud iti katan-okan a Mannursuro iti uniberso, ni Jehova a Dios. (Isaias 54:13) Daytoy nadibinuan a panangisuro, a maipatpatungpal babaen ti patpatgenna nga Anak, ni Jesu-Kristo, ket nangibunga iti naruay a talna kadakuada ken agtultuloy nga iturturongna ida iti nasingsinged a pannakirelasion ken Jehova. Anian a nagsayaat a naespirituan a kasasaad ti ipaay daytoy kadatayo amin a mangammo ken Jehova, agimdeng kenkuana, ken agtultuloy a mangpataud kadagiti nasayaat a bunga iti biagtayo—bungbunga a pakaidayawan ni Jehova! Kaipapanan dayta ti mismo a biagtayo!
16. Kasano a maiyaplikar ti tunggal maysa kadatayo ti sirmata maipapan iti dua a kuribot a higos?
16 Ngem agpapan pay amin a di kaikarian a kinamanangaasi ti Dios, adda latta dagidiay nasukir ken natangken ti panagpuspusona, kas ti napasamak iti adu iti kadaanan a Juda, ken mangpataud kadagiti dakes, rinuker a bunga iti biagda. Anian a nakalkaldaang daytoy! Sapay koma ta awan kadatayo ti mangiyaleng-aleng iti ballaag a silalawag a naiturong iti atensiontayo babaen kadagitoy dua a kuribot a naglaon kadagiti bunga ti higos—nasayaat ken dakes. Bayat nga umas-asideg ti maikari a pannusa ni Jehova a maibusor iti apostata a Kakristianuan, sapay koma ta ipapusotayo ti pammagbaga ni apostol Pablo: “Magnakayo a maikari ken Jehova maipaay iti panggep a panangay-ayo a naan-anay kenkuana bayat nga agtultuloykayo nga agbunga iti tunggal naimbag nga aramid.”—Colosas 1:10.
Panangrepaso iti “Dagiti Nasayaat ken Dakes a Bunga” ken parapo 1-4 ti “Ti Pannakisupiat ni Jehova Kadagiti Nasion”
◻ Ania ti itakderan ti kuribot a naglaon kadagiti nasayaat a higos?
◻ Kasano a bimmatad ti naglaon kadagiti dakes a higos?
◻ Ania a ballaag ti ipaay kadatayo ti mensahe ni Jeremias?
◻ Ania ti pateg ti tawen 607 K.K.P.? ken 1914 K.P.?
[Ladawan iti panid 15]
Kas kadagiti nasayaat a higos, nangpataud ti ili ti Dios kadagiti nasam-it a bunga ti Pagarian
[Ladawan iti panid 15]
Napaneknekan ti Kakristianuan kas maysa a kuribot a naglaon kadagiti dakes a higos